College Admission Fee ngaihtuah mek a ni

Higher & Technical Education (H&TE) Minister Dr. R. Lalthangliana chuan College Admission Fee chungchang ah ngaihtuahna sen mek a ni tih sawiin, Department dangte nen inrawn zau a ngaih vangin thutlukna siam a la nih loh thu a sawi bawk.

Thudawn danin HSSLC, pawl 12 Exam result a chhuah hnuah tunlai hian Mizoram-a College hrang hrang ten Online in Admission an ti mek a, hemi chungchanga zawhna chhangin H&TE Minister, Dr. R. Lalthangliana chuan Admission Fee-ah ngaihtuahna an sen mek thu leh thutlukna erawh siam fel a la nih loh thu a sawi a ni.

Mizoram Board of School Education (MBSE) chuan June ni 18, 2021 khan HSSLC Examination 2021 result a tichhuak a, hetah hian zirlai pass thar mi 10,089 an awm a, chung zing a zirlai tam ber te chu Mizoram chhung College hrang hranga zirna chhunzawm tur an ni. Tunah hian zirlai pawl leh mi tlawmngai thenkhat te chuan Admission Fee-a harsatna nei zirlaite tan hma an la chho mek bawk a ni.

Hemi hmalam hian Hripui leng mek leh inkharkhip avanga mipui harsatna chhawk zangkhai nan sawrkar School bakah, sawrkarin zirtirtu hlawh leh tanpuina a pek Higher Secondary School-ah te pawl 11 Admission Fee chu 30% a tihhniam a nih thu School Education Minister, Lalchhandama Ralte chuan a lo puang tawh a ni.