Latest News

Hri kai mi 62 hmuh belh leh

Nimin khan Serchhip District-ah COVID-19 hri kai mi 62 zet hmuhchhuah belh leh an ni a, hri kai hmuhchhuah thar zinga a tam zawk te hi Serchhip khawpui chhung ami te niin Khaw-bel-ah mi 13 hmuh belh an ni a, Thenzawl-ah pawh hri kai pakhat hmuh a ni bawk.

ZPM in mipui Sawrkar a hlawhchham tih an puang

ZPM Party chuan Mizoram sawrkar chu hripui laka mipuite chhan hna thawh kawngah a hlawhchham tih an sawi.

Nimin a thuchhuah an siamah ZPM Party chuan hrileng tihbaiawm takin hei leh chen min chenchilh hnuah mithiamte thurawn anga hrikai enfiah leh hrileng vanga damlo te enkawlna buatsaih kawngah hma kan sawn thei lo nia sawiin, “Theih tawp chhuahin beiseina sang tak nen ‘Tanrual Hun’ a ni tiin ZPM Party chuan sawisel mai lovin rem leh remlo thlu lovin thurawn hrang hrangte a pe a, sawrkar hi thawhpui tumin vawi tam tak ngenna te a chhuah tawh a ni,” an ti a. “Ei leh bar pawh ngaihtuah thei lova, thi leh dam kara hei chen mipui kan tawm hnuah hrileng a kiam thei lo hi ZPM Party chuan Pu Zoramthanga kaihhruai sawrkar hi hripui do kawngah a hlawmchham kan ti,” an ti.

ZPM Party chuan Mizoram-a hri leng thawhhnihna lo thlen hma, January leh March thla laihawl inkarah kan ram a hrileng hre chiang tura Swab Sample 112 zet thawn zinga 10 te chu tuna khawvelin a hlauh ber chi, Delta Variant an tih mai, inkaidarh awlsam ber leh hlauhawm ber chi kha kan lo kawl daih tawh nia sawiin, chutiang natna hlauhawm chi chu a lo lut tawh tih Sawrkar in Official Report a dawn daih tawh a rinawm laiin Vawiin thleng hian thupin a zep char char niin an sawi a. Thudik pawh min hrilh ngam lo sawrkarah rinna nghah ngam a harsa tih sawiin, “Hetiang hre reng chung si hian Mizoram pawn atanga lo hawte chu, darkar 96 chhunga Negative Certificate an neih chuan chhuah zalen an ni zel mai te kha a mak kan ti hle a ni,” an ti.

Thawktu lak belh aiin volunteer kutah kan innghat zel nia sawiin, Hri len hmaa Nurse post ruak hnawhkhahna tura post 50 hawn pawh Vawiin thlengin lak an la ni lo niin ZPM chuan an sawi a. May thla chhunga hrikai hmuhchhuah 6268 zingah khan natna langchhuak (symptomatic) an tam zawk nia sawi bawkin, “Natna a lanchhuah hnuah chuan tihdam a lo har tawh a, ICU-a lut kan tam phah a, nunna chan pawh kan tam phah ta niin a lang,” an ti a. Medical Operation Team Chairman thusawi atanga a lan dan phei chuan sawrkar in test tam a, hrikai hmuhchhuah chak kha a hlau hle nia a lan thu an sawi bawk.

ZPM chuan vawi tam tak ngenna siama, sum chungchangah pawh a awm ang angte hrileng dona kawnga ngai pawimawh tur leh, a tul a nih chuan Special Assembly Session hial pawh ko mai tura an ngenna te a remchan loh thu chhanna pawh awm lovin, sawrkar chu a ngawi ringawt zel tih an sawi a. “Sawrkar ber kan auh ei zawh tak si lohah chuan, hrehawm ti tak chungin keini ZPM Party chuan kan sawrkar hi hripui laka mipuite chhan hna thawh kawngah hian a hlawhchhamah kan puang a ni,” an ti.

Comments

Chhiar Hlawhte