Chanchin thar thenkhat :

Total Lockdown pawtsei

COVID-19 hripui lengin ziaawm lam a pan theihloh avang leh kai thar an pun zel avangin Mizoram Sawrkar chuan tukin dar 4:00 thlenga Total Lockdown a kalpui chu June  21, 2021 zing dar 4:00 thlenga hman chhunzawm turin a pawtsei a. Chawlhkar khat chhung inkharkhip bur chhunzawmna turah hian inkaihhruaina tih danglam hranpa a awm lova, a ngai hman chhun-zawm tur a ni tlangpui bawk. AMC Area huam-chin pawn lamah chuan Deputy Commissioner/ DDMA ten an District dinhmun te uluk taka zir chiangin an District chhungah inkhuahkirhna siamin an kalpui anga. DC te hian anmahni District chhung leh area/khua te dinhmun uluk taka thlithlaiin, COVID-19 venna atana tul apiangah ruahmanna siamin inkhuahkhirhna an kalpui ang.

ALA mi nia hriat te man

Lawngtlai Police te leh 3rd Assam Rifles te chuan Zirtawpni zan khan Lawngtlai District, Myanmar ramri dep-a awm Kakichhuah-ah Arakan Liberation Army nia rin mi 5 leh an ralthuam te an man. Lawngtlai Addl. SP C. Lalruatkima chuan heng an mi man te hi Kaiwar-Maih (33), Kai-Epai (19), Kai-Zojeritapai (23), Kai-Neu-Meu-Melang-Sue (17) leh Kai-Chawntun (31) te niin Pauto State, Arakan, Myanmar mi vek an nih thu leh an hnen atang hian ralthuam, 9mm Pistol pakhat, .38 Revolver pakhat, Silaimu 55 leh Hand Grenade 4 an man tel thu a sawi bawk. Heng an mi man te hi Inrinni zing khan Lawngtlai Police Station thlenpui an ni a, Arms Act leh Foreigner Act hmanga thubuai siamsak niin Court-a hruai an nih hnuah Lawngtlai District Jail-ah dahluh an ni.

Vaccine pe vek dawn

Mizoram Sawrkar chuan Mizoram a cheng, India khua leh tui nghet zawng zawng, hri danna lak remti chu a thlawnin COVID-19 hri danna pek an nih tur thu thuchhuah siamin a tarlang a. Hri danna pek chungchang hi Sawrkar Laipuiin hemi chungchanga kaihhruaina a siam te leh a chhuah ang zela kalpui tur a ni dawn a ni.

Ngopa PHC tan Motor hlan

Lengteng bialtu MLA, L. Thangmawia chuan Driver-ten him taka Covid veite an phurh theihna tur motor, 'Emergency Health Services' chu Inrinni khan Ngopa CHC tan a hlan. Motor hlanna puala inkhawm tawi a chenna, Aizawl Mission Veng-thlang-a neih ah Bialtu MLA chuan COVID-19 hri leng mekin a bialchhung a luh tawh thu sawiin, a chhe ber dawnin khawdang ah hri kai te awm se Medical Team in an mamawh hmasak ber te zing ami chu motor a nih thu a sawi a. Lengteng bial-a an CHC neihchhun Ngopa CHC chuan Covid 2nd Wave mai bakah 3rd Wave lo thleng thut thei atana inbuatsaih lawk nan motor fit tak pakhat tal a kawl a ngai tih a sawi bawk.

Lawmman dawn hman dan tur ruahman

Kumin chhunga Serchhip District-a khaw hrang hrangte zinga ram kang venna hna thawk tha lawmman pakhatna dawngtu Vanchengte khua chuan an lawmman dawn Rs. 50,000/- atangin COVID-19 avanga mitin in harsatna an tawh avang leh kangmei venna kawnga tha tam tak thawhtu an nih theuh avangin an khua a chhungkaw tin, chhungkaw 26 te chu Rs. 1000/- theuhin an sem a, hei bakah hian Vanchengte Branch YMA hnenah Rs. 8000/- hlanin an khaw Village Council ten khawtlang hmasawnna hnathawh nan leh ramngaw venhim hna thawhna atan Rs. 16,000/- an hmang dawn bawk a ni.