Latest News

Ramkang-ah thingtiak phun

Kumin Thal lai-a ramkang in a tihchhiat Ser-chhip Chanmari Veng-a Chan Kahna ram-ah nimin khan thingtiak phun beihpui thlak a ni.

Serchhip District thuneitu ten kumin-a ramkang avanga Serchhip District-a ramngaw chhia siamtha leh tura hmalakna tur an ruahman angin nimin khan Serchhip DC Office, Environment, Forest and Climate Change Department leh Serchhip Chan-mari VC te tangkawp chuan Serchhip Chanmari Veng-a Chand kahna tlang-ah thingphun beihpui an thlak a, helai ram hi Assam Rifles enkawl a nih avangin Chanmari VC te hian Assam Rifles ah thingtiak phun hi dilin EFCC Department in thingtiak 300 an pe a, Chanmari VC leh YMA ten thingtiak phun hian hnatlang neiin an Branch huamchhung atangin mi thahnem tak an thawk-chhuak a ni.

Nimin-a thingtiak phunna hmun hi nimin chawhnu lam khan District Bawrhsap, Kumar Abhishek, Addl. DC Lalmuansanga Ralte leh Thenzawl DFO, Margareth Lalramchhani te chuan tlawhin thingtiak an phun a. He hunah hian Bawrhsap chuan thingtiak phun takte chu uluk taka enkawl zui a pawimawh thu sawiin, an puitling vek theihna turin theihtawp chhuah turin a ngen a. Thenzawl DFO Margaret Lalram-chhani pawhin thingtiak phun te tha taka an dam khawchhuah theih nan kangmei laka an him that a pawimawh thu sawiin, kangmei chhuak tur uluk taka venghim zel turin Serchhip Chanmari VC bakah Branch YMA te chu a chah bawk a ni.

Chand kahna tlang-a thingtiak phun te hi Serchhip Chanmari VC te chuan a puitlin ngei theih nan kum 5 chhung an enkawl zui dawn a, sawrkar thuneitute chuan a theih angin kumtin thingtiak pawh phun belh zel tur a nih thu an sawi bawk.

Comments

Popular News (Last 30 Days)