Electric leh Tui bill awl tur rih turin CM ngen

Hachhek bialtu MLA, Lalrindika Ralte chuan Total Lockdown avanga mipui tawrhna chhawk zangkhai nan Electric Bill leh Tui bill awltir rih tura ngenna nimin khan Chief Minister hnenah a thlen.

Nimin-a Chief Minister hnena lehkha a thehluh ah hian Hachhek bialtu MLA, Lalrindika Ralte chuan Mizoram-a COVID-19 thawh hnihna a hluar zel avangin Mizoram sawrkar chuan April 20, 2021 atangin Lockdown a kalpui chho tan tih tarlangin, Total Lockdown thla hnih chuang kalpui a nih hnuah pawh hri kai zat a tlakhniam theih si loh avangin Lockdown puan chhunzawm a la nih thu leh mipui nawlpui dinhmun a harsa ta hle tih a tarlang a. Sumdawng tam takin sumdawnna an kalpui theih loh avangin an hnuaia hnathawkte thlengin an tuar nasa a, lirthei khalh a eizawng te, loneitute, nitin chawhmeh zuar te, nitin inhlawh chawpa khawsa te pawhin an tuar nasa hle tih tarlangin, “Sawrkar hnathawkte thlengin Mizoram mipui hian Total Lockdown hun rei tak puan a ni hi kan tuar a ni,” a ti.

Chhungkaw tin sum lakluh nasa taka a tlahniam laiin thla tina sawrkar-a sum chhunluh tur Chhiah leh Bill chi hrang hrangte, Inluah man leh dawr luah man, thla tina pek tur erawh a ngai reng tih pawh a lehkha ah hian tarlangin, “Hetiang a nih avang hian sawrkar hi a mipuite tan inhawng lehzual se ka duh a. Total Lockdown avanga dinhmun harsa taka awm mek Mizoram mipuite hi Tui Bill leh Electric Bill, Mizoram sawrkara kan chhunluh thin hi harsatna kan tawh zual chhung chu min awl tir (free) rih turin ka rawn ngen che a ni,” a ti bawk.