Latest News

Tokyo Olympic Games-a India aiawha Hockey-a tel tur Lalremsiami pualin hun hman a ni

Thla leh-a Summer Olympics Games neih tura India Hockey Squad-a tel tura thlan Lalremsiami lawmpuina leh chawimawina hun chu nimin khan Chief Minister, Zoramthanga hovin CM Conference Hall-ah neih a ni.

Nimin-a he hun hmanna ah hian Chief Minister chuan inelna level sang tak paltlangtu Lalremsiami chu Mizo nula zinga chhuanawm berte zing ami a ni tih a sawi a, a thawhrimna leh inpekna te chu a entawntlak thu leh chawimawi a phu thu sawiin, Olympic Games atan duhsakna a hlan bawk. Chief Minister chuan Hockey chu Mizo ten infiamna khawvelah 'advantage' kan neihna a ni tih pawh sawiin, tunhma atang tawhin Mizoram chuan Hockey player tha tak tak neiin, tunah hian he infiamna hi chawisang zel turin sawrkar pawhin hma a lak thu a sawi. Hockey India nena inrawnna angin Hockey thanlenna tur atan Special Committee siam a nih tur thu a sawi a. Hockey bakah Sports discipline hrang hrang hmanga eizawnna tha tak tak nei Mizote zingah an awm belh chho zel chu lawmawm a tih thu leh Sports Industry changtlung tak siam tura ruahmanna siam a nih zel thu a sawi bawk.

Nimin-a he hun hmanna ah hian Kolasib bialtu MLA, K. Lalrinliana pawh telin, Mizoram leh a bik takin Kolasib District tan Lalremsiami chu a chhuanawm thu a sawi a. Sports Minister Robert Romawia Royte pawhin India State tam takin an mi leh sa Olympics a tel thei an neihloh laia Mizoram in Lalremsiami kan nei chu lawmawm a tih thu sawiin, State sawrkar in Olympics a tel thei infiammi kan neih theih nan theihtawp a lo chhuah tawh thin thu te pawh a sawi bawk.

2020 Summer Olympics hi Tokyo-ah July 23 atanga August ni 8 chhung khian neih tura ruahman niin Lalremsiami hi Mizoram atanga Olympic Games a tel thei hmeichhe awmchhun a ni dawn a. Mizoram sawrkar chuan cheng nuai 25 a pek tur thu puang tawhin nimin-a hun hmanna ah hian a coach hlui, Lalrampari hnenah Cheng nuai 10 hlan a ni a. Olympics zawhah a bak zawng hi amah, Lalremsiami kuta hlan leh tura ruahman a ni.

Comments

Popular News (Last 30 Days)