Posts

Showing posts from July, 2022

Serchhip-a Treasury in chawlhkar khat chhung sum pechhuak tawh lovin hlawh pek hun tur an la hre lo

Image
Serchhip-a District Treasury Office chuan chawlhkar khat chhung sum an pekchhuah tawh loh thu sawiin, sawrkar hnathawk te hlawh an pekchhuah theih hun tur an la hriat loh thu an sawi a, hotu sang atanga thuchhuah awm ang ang bawhzui nghal thei turin inring renga an awm thu an sawi.

Thenzawl-ah Kawlphetha Kutpui hman a ni

Image
Serchhip District chhunga ‘Ujjwal Bharat - Ujjwal Bhavishya Power@2047’ chungchang inhrilhhriatna neih mek chu nimin khan Thenzawl Bazar Veng-a Joint YMA Hall-ah neih chhunzawm leh a ni a, he hun hi District Bawrhsap Nazuk Kumar IAS chuan a hmanpui a ni.

Sports Complex-ah Football khel zel

Image
Serchhip Sports Complex-a Independence Day/Screening Football Tournament 2022 khelh chu tluang taka chhunzawm zel niin thla thar August 15 thleng khian khelh tur a ni ang.

EE kalchhuak tur an thlah

Image
PHE Serchhip WATSAN Division-a Sr. Executive Engineer Er. F. Lalsanglura chu Aizawl ah sawn a nih tak avangin MJA Serchhip District te chuan nimin khan thlahna hun an hmang.

World Hepatitis Day hmang

Image
Niminpiah July 28 kha ‘World Hepatitis Day’ niin he ni pual hian nimin khan Serchhip District Hospital OPD-ah hun hman a ni a, he hunah hian Health Department-a thawktute telin naupai inentir te Hepatitis B leh C an kai leh kai loh enfiah vekna tura hmalak dan tur hrang hrang te sawiho a ni.

Vawk thi awm belh lo

Nimin khan Serchhip District-a African Swine Fever (ASF) hri lenna khaw hrang hrang ah Vawk thi leh suat a awm belh lova, heti hian nimin thleng khan Serchhip District-a ASF vanga Vawk thi chu 222 niin Vawk 266 suat a ni tawh bawk a, khaw 8 te chu Vawk hri lenna hmun ah puan a ni tawh bawk a ni.

Mi In-a lut Police ten man

Tunkar Nilaini khan Serchhip Vengchung-a chenna In pakhat ah In neitu awmloh hlanin mi tu tih hriatloh chu lutin pawisafai Rs. 20,500/- a ru a, hemi chungchang hi Serchhip Police te hriattir an nih hnuah pawisa latu nia hriat hmeichhe pakhat, kum tling lo chu man a ni a, a hnen atang hian Rs. 18,540/- hmuhlet a ni. He Hmeichhia hian an chahbi dahna hriain In neitute awm loh lai hian a lut ru nia hriat a ni.

COVID-19 enkawllai 67 awm

Nimin tlai thleng khan Serchhip District-ah COVID-19 hri kai enkawllai mi 67 an la awm.

Pension rawih nawn duh lo

Tunhnaia Mizoram sawrkarin Cooperation Department-a Addl. Registrar Cooperative Societies pension tawh rawih nawn leh a tum chu Mizo Zirlai Pawl (MZP) chuan duh lovin Pension tawh rawih nawn tumna order hi cancel turin Mizoram sawrkar an ngen a, karleh Thawhtanni khian he Order hi hal an tum thu an sawi bawk.

ZR. Thiamsanga’n hmanpui

Catholic Relief Services (CRS) leh Zoram Entu Pawl (ZEP) te tangkawp buatsaih Cham-phai District chhunga hriselna kawnga thawktu hrang hrangte tana training chu Champhai Circuit House Conference Hall-ah nimin khan neih niin Health & Family Welfare Board Vice Chairman Dr. ZR. Thiamsanga MLA chuan khuallian leh Resource Person niin a telpui a, hriselna lam hawi inzirtirna tha tak CRS leh ZEP-in an buatsaih chu Champhai mai nilo Mizoram pum tana pawimawh tak a nih thu a sawi a ni.

ECI in ruahmanna thar puang

Election Commission of India chuan August 1, 2022 atang khian Special Summary Revision of Electoral Roll a tan dawn a. Hemi chungchang ah hian inkaihhuaina thar tichhuakin kum tling thar ten January ni 1 an nghah kher ngai tawh lovin kum khatah vawi li - 1st April, 1st July, 1st October leh 1st January-ah te Electoral Roll-a in thun theihna hun a ruahman tawh dawn a. Kum 17 tling thar te chuan Voter list-ah in thun turin a lo dil lawk theih tawh dawn a. August 1, 2022 atang hian Voter list-a inthun lut turin Form awlsam zawk a ruahman bawk a ni

PMAY (U) Sensitization nei

Urban Development & Poverty Alleviation Department chuan Pradhan Mantri Awas Yojana (Urban) - Housing For All Mission hnuaia Beneficiary Led Construction (BLC) Vertical a Aizawl 2nd Detailed Project Report (DPR) atanga In sak tanpuina dawng tur mi 1308 te tan nimin khan Aizawl khawpui chhung hmun thum-ah Sensitization Programme an buatsaih a, Aizawl 2nd DPR chhungah hian Beneficiary 4867 an awm a, Beneficiary 2698 te hi Sensitization Prog-ramme neihpui tawh niin midang pawh neih pui zel tura ruahman a ni. Sensitization Programme ah hian Mission kalphung, pawisa pekchhuah dan, In sak dan tur leh Insak thlalak dan te hrilh an ni a. Grant-In-Aid Letter, intiamkamna lehkha (Undertaking) pekchhuah an ni bawk.

H&TE Minister in building sak thar a hawng

Higher & Technical Education Minister Dr R. Lalthangliana chuan nimin khan Rashtriya Uchchatar Shiksha Abhiyan thawh hnihna (RUSA 2.0) hnuaia cheng nuai 160 senga sak Govt. J. Thankima College Central Campus, Bawngkawn-a Academic Building thar chu a hawng a, he building hi March ni 9, 2019 a sak tan niin March ni 16, 2021 khan sak zawh a ni, Mizoram Technocrats Company (P) Ltd ten he building an sa a, chhawng hnih niin Ground Floor-ah hian classroom 4 (zirlai 48 lenna classroom 2 leh zirlai 32 lenna classroom 2) awmin First Floor-ah hian Classroom 4 (zirlai 32 lenna) a awm bawk a ni.

Mizoram-ah COVID-19 enkawllai an la pung zel

Niminpiah khan Mizoram-ah COVID-19 hri kai mi 159 hmuh leh niin nimin khan hri kai mi 127 te enkawl dam an ni thung.

ZPM in CSS sum pek ngun taka enzui an tum

ZPM Leader Lalduhoma chuan CSS sum Department-a pek chungchang chu ngun takin an enzui dawn tih a sawi.

Thla 3/4 ei chu stock sa kan nei - Supply Minister

Supply Minister K. Lalrinliana chuan intodelh rih lo mah ila ration-ah harsatna a awm lo tih sawiin, “Engemaw thut lo thleng mahse, thla 3/4 ei chu stock sa kan nei,” a ti.

Khawvel hriata Mizo tawng pholan theih nan hma la

Khawvel hriata Mizo tawng pholan a nih theih nan sawrkarin hma a la zel tih School Education Minister Lalchhandama Ralte chuan a sawi.

Mizo sipaite India ram tana an hnathawh leh inpekna ziahna lehkhabu tlangzarh

Mizo sipaite India Independence hma leh hnua ram tana an hnathawh leh inpekna chungchang, Thlalak leh thuziah telna lehkhabu Coffee Table Book 'Lest We Forget' tih chu nimin khan Home Minister Lalchamliana chuan Assembly Annexe-ah a tlangzarh.

Ujjwal Bharat - Ujjwal Bhavishya Power @2047 pualin Serchhip-ah ‘Kawlphetha Kut’ hman a ni

Image
India ramin zalenna a hmuh champha kum za na, kum 2047-ah India ramin Power intodelh (independent) neih hman tuma hmalakna ‘Ujjwal Bharat - Ujjwal Bhavishya Power@2047’ chungchang inhrilhhriatna hun ‘Kawlphetha Kutpui’ chu nimin khan Serchhip P&E Veng YMA Hall-ah District Bawrhsap Nazuk Kumar IAS hovin hman a ni.

Football Tournament khelh mek a ni

Image
Serchhip District Football Association (SDFA) buatsaih Independence Day/Screening Football Tournament 2022 chu khelh mek zel a ni.

Govt. Serchhip College-ah zirlai thar lawmna neih a ni

Image
Govt. Serchhip College chuan kumin a an College-a zirlai lut thar te lawmna hun nimin khan hmangin he hun hi Bawrhsap Nazuk Kumar IAS chuan a hmanpui a ni.

Mualcheng-ah Vawk 4 thi leh

Nimin khan Serchhip District chhunga North Mualcheng khua ah ASF vangin Vawk thi 4 a awm belh leh a, heng te nen hian North Mual-cheng-ah hian ASF vangin Vawk 52 zet a thi tawh a ni. ASF hri lenna a puan tawh Khawlailung khua ah nimin khan Vawk 2 suat niin an khua ah hian Vawk 62 suat a ni tawh bawk a, Lung-chhuan khua ah nimin khan Vawk pakhat suat leh ni bawkin an khua ah hian Vawk 4 suat a ni ve ta bawk a ni.

Serchhip District-ah COVID-19 hri kai pung leh mek

Nimin khan Serchhip District-ah COVID-19 hri kai mi 13 hmuhchhuah leh niin hri kai te zingah mi 8 te chu anmahni enkawlna hmun atanga chhuahtir an ni thung.

Tuichang bial fang mek

Tuichang bial tlawha zin mek ZPM Leader Lalduhoma chuan nimin khan Tualte leh Hmuncheng-a Vantlang Inkhawm ah thu a sawi a, tunlai kan ram dinhmun thlirin kan ramin bung thar kan kai dawn niin an hriat thu sawiin, kan ram a rorel tawh party pahnih te kan thlirin mipui hian kalphung thar kan mamawh tawh a ni tih chu mipui ngaihdan leh thlir dan niin a sawi a. “Mi taima leh remhria te kum 5 chhunga chawikan hi kan party thil tum pawimawh tak a ni,” tiin Party sawrkar ni lo, mipui sawrkar an din dawn thu leh taima leh tharchhuak hnem apiangin budget an sawk hnem dawn niin a sawi.

Awmze nei lo ah ah ngai

PC Party Senior Vice President Vanlalruata chuan nimin khan Aizawl-a an party Office-ah Fostering Climate Resillent Upland Farming System (FOCUS) hmangin tunhnaiah khawchhak tlangdung ah mi engemaw zat Grape chingtute tanpuina pek an nih thu leh mi dang pawh pek leh tum mek a ni tih sawiin, “Dan hmanga Wine siam leh zawrh khap a nih lai leh a zuartute pawh man an nih laia Wine siamna tur Grape an chin thar tir leh lawi si hian sawrkar awmze nei lo a nihzia a tarlang a ni,” tiin Grape leh Wine chungchanga sawrkar chet dan hrang hrangin sawrkar awmze neih lohzia a pholang niin a sawi.

Bank te hmalak dan thlirho

Nimin khan Lawngtlai-ah District Consultative Committee, District Level Review Committee leh District Level Security Committee chu an Chairman leh Lawngtlai Bawrhsap Amol Srivastava hova thukhawmin an District-a Bank hrang hrangte hmalak dan an thlirho.

Nu leh naupang thihna thlirlet

Nimin khan Kolasib-ah District Level Maternal & Child Health Review Meeting neih a ni a, he huna tarlan a nih danin kum 2020-21 khan an District-ah naupang kum 5 hnuailam thi 27 leh kum 2021-22 ah 31 an awm a. Kum 2021-22 chhunga naupang thi zing a 10 chu kar khat tling lo niin thla 1 leh kum 1 inkar thi 12 an awm a. District Hospital-a thi hi 19 awmin In lam a thi pakhat a awm bawk a ni. Naupang thihchhan tarlan zing a tam ber chu Pneumonia leh Birth Asphyxia/Respiratory Failure vang a ni a, hun kaihruaitu District Bawrhsap John LT. Sanga chuan heng te hi zirchiana a tul anga hma la thuai turin Member-te a chah a ni.

Bill la pechhuak thei lo

Mizoram-a Treasury lian pahnih, Aizawl South leh Aizawl North Treasury te chuan bill dawng reng mah se, eng Bill mah an pechhuak lo chhunzawm zel a, sum harsatna thleng mek hian sawrkar hnathawk hlawh a nghawng dawn leh dawn loh a la hriat loh. Thudawn danin, Aizawl North leh Aizawl South Treasury atangin eng bill mah nimin khan pekchhuah a la awm lo a, Pay Bill pass leh pass loh chungchang pawh Treasury thawktute chuan engmah hriat an la nei lo. Pass theih a nih ve leh a pass tur erawhin an inbuatsaih nia thudawn a ni. Treasury atanga bill pekchhuah a awm loh avangin nimin lamah Treasury Office ten dawrtu an nei tlem hle a ni. Mizoram sawrkar in sum harsatna a tawh chhan hi sawrkar laipui thupek anga CSS sum pekchhuah vang a ni ber a, tun dinhmun ah Treasury ten bill dawng reng mah se, sum pekchhuah lam chi reng reng erawh ti thei loin an awm mek a ni.

COVID-19 hri kai thar la tlahniam thei tak tak lo

Mizoram-ah ni khat-a COVID-19 hri kai hmuhchhuah zat an la tlahniam thei meuh lova, niminpiah khan hri kai mi 145 hmuh belh leh an ni.

MP (LS) in BRO hotu a hmu

Mizoram Lok Sabha MP C. Lalrosanga chu nimin khan New Delhi-a Border Roads Orga-nisation (BRO) hmunpuiah lengin BRO Director General, Lt. General Rajeev Choudhary chu Mizoram a ramri hnaih kawng sial leh siam that hna chungchang a sawipui.

Chhiatna thleng thei lakah fimkhur a tul thu sawi

Disaster Management & Rehabilitiation Department changtu Minister Lalchamliana chuan khuarel chhiatrupna hrang hrang leh mihring thlen chawp harsatna te chu engtik lai pawha thleng thei a nih avangin kan fimkhur a tul thu a sawi.

Ni 2 chhunga kawng chhia siamthat hna thawh phut

Khawthlangtuipui Group YMA thukhawm chuan Lunglei leh Tlabung inkar kawngpui, NH. 302 siamtha turin ni hnih (2) chhung hun an bituk a, kawng  chhiat vanga nunna chan mi 2 te pawh zangnadawmna pe ngei turin an phut.

Kan sum harsat chhan - a hnar atangin kan hmu tha lo - Taxation Minister

Taxation Department changtu Minister Lalchamliana chuan kan sum harsat chhan chu a hnar atanga kan hmuh that loh vang niin a sawi.

MBSE Online Portal thar Minister in a hawng

Mizoram Board of School Education (MBSE) Online Portal chu nimin khan School Education Minister Lalchhandama Ralte chuan Aizawl-a MBSE Conference Hall-ah a hawng.

Bawrhsap hovin National Viral Hepatitis Control Programme leh BMWM Committee thutkhawm neih a ni

Image
Nimin khan Serchhip District Bawrhsap Nazuk Kumar IAS hovin ‘National Viral Hepatitis Control Programme’ chungchangah District Level Meeting neih niin ‘District Level Bio-Medical Waste Management Committee’ thutkhawm neih a ni bawk a, Serchhip Sailiamkawn-a Incinerator bun tawh chu hman a nih theih nana hmalak tum a ni.

Volleyball inelna ah Khawbel Branch te an tla ve leh ta

Inter-Branch YMA Volleyball Tournament khelh mekah Serchhip Sub-Hqrs. YMA atanga tel te chu an tla kim ta.

Hri kai mi 8 hmuh belh leh

Nimin khan Serchhip District-ah COVID-19 hri kai mi 8 hmuhchhuah niin mi 6 enkawl dam an ni thung.

Independence Day Football khel zel

Image
SDFA hnuaia 1st Division te chuan nimin khan Independence Day Football Tournament khel tanin naktuk-ah an match hnihna an khel leh bawk ang.

Independence Day hman dan tur ruahman a ni

Image
Thla thar August 15-a India Independence Day lo thleng tur chu Serchhip-ah ropui taka lawm tum niin kumin hian Serchhip Sports Complex-ah Independence Day hi hman tura ruahman a ni.

Japanese Encephalitis natna inhrilhhriatna neih a ni

Image
Tunhnaiah Japanese Encephalitis (JE) vei nia rinhlelh Thenzawl mi hmuhchhuah a nih avangin he natna chungchang inhrilhhriatna chu nizan hmasa khan Thenzawl Joint VC bultumin Thenzawl-a Vantawng Group YMA Run-ah neih a ni.

Power-a harsatna enfiah

Tawngtai Bethel Camping Centre, Sakawr-tuichhun-in electric a harsatna an tawh mek chungchangah Central YMA te ngenna angin Thawhlehni khan Power & Electricity Minister R.Lalzirliana chuan helai hmun hi a tlawh a, Electric bill pek theih loh a awm tawh lohna turin connection leh load hrang hrang awmdan P&E Department-a thawktu ten enchiang tura ruahman a ni tih sawiin, Electri Bill ba rulhna turin Minister Dr. Beichhua nena an thawh Rs. 5,00,000/- chu a hlan nghal bawk.

F&ES ten thisen Unit 30 pe

Fire & Emergency Services te chuan an Department din champha kum 50-na pualin nimin khan Aizawl Civil Hospital Blood Bank-ah thisen Unit 30 an pe a, heng zinga 29 hi mipa niin hmeichhia pakhat a tel bawk a ni. Fire & Emergency Services ah hian tun dinhmunah thawktu (operational & Office staff) hi mi 183 an awm mek a, state pumah Fire Station 14 an nei mek a ni. Fire & Emergency Services hi kum 1972 a din niin kumin hi an kum 50-na a ni a, September 1, 2022 hian a lawmna programme nei turin an inbuatsaih mek a ni.

MADC thutkhawm chhunzawm

Mara Autonomous District Council (MADC) Fur thutkhawm ni hnihna chu nimin khan Chairman N. Viakhu kaihhruaiin chhunzawm a ni a, chawhma lamah zawhna leh chhanna hun hmangin zawhna 7 chhan a ni a, chawhnu lamah CAG Report sawihona hun hman a ni bawk.

Sports Minister in hmanpui

Govt. J. Thankima College in an zirlai thar te lawmna leh Music Video tlangzarhna hun nimin a Aizawl Vanapa Hall-a an buatsaih chu Sports Minister Robert Romawia Royte chuan a hmanpui a, zirna (Education) hi retheite tana dinchhuahna kawng, tuma dan theih loh a ni tih sawiin, Mizo zinga mi hlawhtling te hi harsatna paltlangtute an nih thu leh retheihna in a hneh loh an nih thu a sawi bawk. Kum 1992 a din Govt J. Thankima College hian NAAC assessment tum thumna nei turin an inbuatsaih mek a, kuminah hian zirlai 1,050 an awm a, Principal leh zirtirtu 40 leh thawktu dang 12 an awm mek a ni. Nimin a he hun hmanna ah hian an zirlai University Examination-a tithate chawimawina hlan an ni bawk.

I-Day hmanpuitu tur ruat

Mizoram sawrkar chuan kumin-a India Independence Day lawmna District khawpui hrang hranga neih tur hmanpuitu tur a ruat a, Aizawl-ah Chief Minister Zoramthanga; Khaw-zawl-ah Deputy Chief Minister Tawnluia; Lunglei-ah Speaker Lalrinliana Sailo; Hnahthial ah Health Minister Dr. R. Lalthangliana; Sai-tual-ah Home Minister Lalchamliana; Kolasib ah P&E Minister R. Lalzirliana; Lawngtlai-ah Agriculture Minister C. Lalrinsanga; Champhai ah Education Minister Lalchhandama Ralte; Serchhip-ah RD Minister Lalruatkima; Siaha-ah Vety Minister Dr. K. Beichhua leh Mamit-ah Law & Judicial Minister TJ. Lalnuntluanga ten an hmanpui dawn a. Silchar-ah Supply Minister K. Lalrinliana chuan a hmanpui dawn bakah SDO (Civil) te chuan an Sub-Division Hqrs. ah theuh Hnam Puanzar an pawtparh bawk ang.

Mizoram-ah COVID-19 kai an la pun belh zel

Niminpiah khan Mizoram-ah COVID-19 hri kai mi 169 hmuh belh leh an ni a, Mizoram-ah COVID-19 hri kai hmuhchhuah an la pung zel.

Vaimim thar tihralna tur chungchang sawiho

Agriculture Minister C. Lalrinsanga leh District hrang hranga District Agriculture Officer (DAO) leh Block Agricultural Officer-te chuan nimin khan Video Conferencing hmanga inkawmna an nei.

Pala Dil leh a chhehvel Ramsar Site-ah puang

Siaha District chunga Pala Dil leh a chhehvel (Pala Wetland) chu Ramsar Site-ah puan a ni tih Mizoram sawrkar-a Environment, Forests & Climate Change Department chuan thuchhuah siamin a tarlang.

MLA atanga bang turin ka inpeih reng - BD. Chakma

Tuichawng bialtu MLA, Dr. BD. Chakma chuan kum 2013-14 chhoa CADC CEM a nih laia CADC Sawrkar sum hmang dik lo a puh an nihnaa Court-in thiamloh a chantir chungchangah a tul a nih chuan MLA atanga ban a inpeih reng tih a sawi.

Cheng nuai 400 chuang sengin Mizoram tan Mobile Veterinary Unit (MVU) 26 lei fel a ni tawh

Mizoram sawrkar-a Animal Husbandry and Veterinary (AH&Vety) Department chuan cheng nuai 400 chuang sengin Mobile Veterinary Unit 26 a lei fel tawh a, senso zawng zawng sawrkar laipui tum vek niin, a enkawl hna thawktu turte pawh lakfel thuai tum a ni.

Serchhip District Sports Committee hnuaia Association ten DSC ruangam thar tur an duh lo

Image
Serchhip District Sports Committee (SDSC) hnuaia Sports Association hrang hrangte chuan Mizoram sawrkar in District Sports Committee ruangam a siam thar chu an duh lo tih sawiin, hemi chungchanga DC lamin thutkhawm an koh pawhin tel rihloh nise an ti.

Thenzawl chawmna atana Vanva lui tui lakna enchhinna hlawhtling taka neih a ni

Image
Thenzawl khaw chawmna tura Vanva lui tui pump-na tur enchhinna, Official Commission-na hun chu nimin khan PHE Department-a Engineer-in-Chief C. Lalremsiama hovin neih a ni a, Thenzawl khuaa Private Water Connection pekchhuah theih tawh rih loh pawh pekchhuah leh theih a nih tak thu he hunah hian puan a ni.

YMA Volleyball-ah Q/F lut ta

D3 Amrit Cement 22nd Inter-Branch YMA Volleyball Tournament khelh mekah nimin khan Serchhip Sub-Hqrs. YMA atanga tel Khawbel Branch chuan Thenzawl Vengthlang Branch chu 3-1 (25-16, 16-25, 28-26, 25-17) a hnehin Quarter Final an lut a, Vawiin hian Quarter Final-ah Chhinga Veng Branch an hmachhawn leh nghal dawn a ni. Nimin a inkhel dangah Thenzawl Bazar chu Zawlnuam Venngpui Branch lakah 3-0 a tlawmin an tla a, Bungtlang Chhim Veng Branch pawh Maubawk lakah 3-0 a tlawmin an tla ve bawk. Hmeichhe lamah Thenzawl Field  Veng Branch in Chanmari West chu 3-0 (25-13,25-16, 25-16) a hnehin Quarter Final an lut bawk.

I-Day Football khelh chhunzawm a ni

Image
Independence Day Football Tournament, Division Screening ni bawk chu nimin khan khelh chhunzawm niin Vawiin hian 1st Division ten an match hmasa ber an khel ang.

Vaccine dose 3-na lak theih

Ramchhung hmun dang rualin Mizoram-ah ram zalenna kum 75-na lawmna denchhenin COVID-19 vaccine a thlawna pek kalpui mek a ni a, Vawiin hian Serchhip Main Centre, CMO Office hnuaiah Vaccine Dose 3-na la duhte tan a thlawna lak theih a ni ang.

ASF vangin Vawk 2 thi leh

Nimin khan Serchhip District-ah ASF vanga Vawk thi pahnih awmin Vawk 13 suat leh a ni bawk. Nimin a Serchhip District chhunga African Swine Fever (ASF) avanga Vawk thi te hi East Lungdar khuaa mi te ve ve an ni a, East Lungdar-ah bawk hian nimin khan Vawk pakhat chu suat leh a nih bakah Khawlailung-ah Vawk 12 suat a ni bawk. Heti hian nimin thleng khan Serchhip District-a ASF vanga Vawk thi chu 215 a tling ta a, ASF hri lenna hmuna Vawk suat pawh 235 a tling  tawh bawk a ni.

Baktawng VC by-election atan Draft Roll tarchhuak

Image
Baktawng Village Council-a Reserved Seat a ruah avanga bye-election neih tur inbuatsaihna atan nimin khan he inthlanna a hman tur Draft Electoral Roll chu tarchhuah a ni.

COVID-19 kai 8 hmuh belh

Nimin khan Serchhip District-ah COVID-19 hri kai mi 8 hmuhchhuah niin hri kai enkawl dam mi 6 an awm thung.

MADC thutkhawm nei tan

Mara Autonomous District Council (MA-DC)-a sawrkar thar a din hnua thutkhawm hmasa ber ni 3 awh tur chu nimin khan Siaha-a MADC Session Hall-ah neih tan a ni a, chawhma lamah zawhna leh chhanna hun hman niin chawhnu lamah Bill pakhat chu House-ah pharh a nih bakah CAG Report pawh pharh a ni bawk.

PC in sawrkar an ngen

PC Party Sr. Vice President Vanlalruata chuan Mizoram in sum harsatna kan tawh mèk siamthat bultan nan tangkaina nei miah lo, sawrkar Department-te pawhina an nin em em SEDP Board zawng zawng thiat vek turin a ngen tih nimin khan Aizawl-a an Party Office-ah a sawi a, Minister, MLA leh Officer lian hovin sawrkar sum a awmpui an làk pawh titawp turin sawrkar a ngen bawk.

PUC in NAAC A+ Grade hmu

India rama zirna In te endiktu, National Assessment and Accreditation Council (NAAC) in Pachhunga University College chu Accreditation A+ Grade an pe a, Cumulative Grade Point Average (CGPA)-ah 3.37 hmuin India hmarchhak-a College zingah NAAC grading a Score sang ber a ni.

Sports Minister in hmanpui

Aizawl-a Govt. T. Romana College chuan nimin khan Aizawl Vanapa Hall-ah zirlai lut thar te lawmna leh zirlai pass chhuak te lawmpuina hun an hmang a, he hun hi Sports Minister Robert Romawia Royte chuan hmanpuiin he College a lut thar, pawl 12 pass thar te chuan College rapin bul an tan thar tih sawiin, bultanna tha in a tawp tha a hril theih thin avangin an zirna kawngah te, thian inkawmna kawngah te leh ngaihtuahna in siamna kawngah te a bul tan uluk turin a chah a. Degree nei thar zirlai passed chhuak te chu a lawmpui thu a sawi bawk. Govt. T. Romana College hi kum 1992-a din niin zirlai naupang 1500 bawr an nei mek a ni.

I&PR Minister in hmanpui

Helen Lowry College Aizawl in a vawi khatna atana ‘Graduation Day Cum Freshers' Social’ an hman chu nimin khan I&PR Minister Lalruat-kima chuan khuallian niin a hmanpui a, he huna zirlai hlawhtling an chawimawi te chu mi tangkai, khawtlang leh ram tana ban rinawm ni turin ram in a beisei thu leh mi hnawksak emaw, ram leh hnam timualpho turin he hunaah hian chawimawi an ni lo tih a sawi a. Mi tumruh leh taima tan hlawh-tlinna a in hawng zel tih a sawi bawk. Helen Lowry College hi kum 2017 khan din a ni a, tun tuma Graduate mi 56 te hi kum 2021 leh 2022-a Mizoram University hnuaia exam paltlang te an ni. Helen Lowry College-ah hian Education, Political Science, Economics, English, Sociology leh Commerce zirna a awm a, tunah hian thawktu mi 20 awmin, zirlai mi 120 vel an awm mek a ni.

Mizoram-ah COVID-19 kai enkawllai an la pung zel

Mizoram-ah COVID-19 hri kai enkawllai an la pung zel a, nimin tlai thleng khan hri kai enkawllai mi 762 an la awm a ni.

Treasury khar ngai ang em em chuan la awm lo

Aizawl South Treasury Officer chuan tun dinhmunah sum harsatna tawk mek mah se Treasury khar ngai ang em em chuan an la awm rih lo tih a sawi.

DM&R Minister in vanduaina thlenna hmun a tlawh

Aizawl Republic Venghlun, Lungli Road-a lei tawlhna hmun chu nimin tlai khan DM&R changtu Home Minister Lalchamliana chuan a hmunah tlawhin a enfiah a, vanduaina tawk te thinlung taka a tawrhpui thu sawiin, chhiatrupna a lo thlen thulha DM&R atanga tanpuina awm thei te pawh ngaihven nghal a nih thu leh tanpuina pek tur zat hi Central sawrkarin inkaihruaina a siam ang a nih thu a sawi bawk. Home Minister hian Local Level Disaster Management Committee, Republic Veng hnenah tanpuina Rs 50,000/- leh Relief Camp a awm te tana ni 3 chhung atan Relief Rs. 17,760/- a hlan a. YMA hnenah thingpui lumna turin Rs. 10,000/- a pe bawk.

NHIDCL leivung paihna chungchang thlirho

National Highways and Infrastructure Development Corporation Limited (NHIDCL)-in Mizoram-a kawngpui an sialna leivung an paih in Environment a tihchhiat chungchang enpui tura ruat, State Level Committee chu niminpiah khan an Chairman leh Adviser to Chief Minister (Technical) K. Lalsawmvela hovin Chief Minister Conference Hall-ah khan an thukhawm.

Nikum-a ASF vanga Vawk suat chhungkaw 2488 te hnenah zangnadawmna pek an ni

Nikum 2021 chhunga Mizoram-a Vawk pul hri African Swine Fever (ASF) leng darh zel tur venna tura AH&Vety Department-in Vawk an suat sakte tana zangnadawmna chu nimin khan semchhuah niin mi 2488 hnenah Rs 10,48,42,200/- chu an Bank Account kaltlaanga sem a ni.

Inbiakna chhunzawm thuai beisei a ni - HM

Nimin July 26, 2022 kha hi ramri bula inkahna thlen champha kum khatna a ni a, Home Minister Lalchamliana'n ramri chingfel tura inbiakna chhunzawm thuai beisei a ni, a ti.

Inter-Branch YMA Volleyball khelh mek zel a ni

Nimin khan ‘D3 Amrit Cement 22nd Inter Branch YMA Volleyball Tournament 2022’ chu khelh chhunzawm leh a ni.

Bukpui ram-ah District Hospital sak tum niin Serchhip Venglai-a PWD Quarters sawnchhuah a ni dawn

Image
Chief Minister Zoramthanga chuan nimin khan Serchhip rawn tlawhin Serchhip District Hospital luah mek leh Hospital building thar sakna tura rawt te chu tlawhin, Serchhip District Hospital building thar chu Bukpui-ah sak a nih dawn thu leh Staff Quarters leh thildang sak bultanna atan cheng vbc. 13 pek a nih tur thu a sawi.

Nakum-a MLA inthlanpui ah ZPM Under 10-ah; Congress Artelukawn thei an ni - MNF President

Image
MNF President Zoramthanga chuan nakum-a Mizoram MLA inthlanpui neih turah ZPM chuan Seat 10 an lak phak a rin loh thu leh Congress chu an tihsual chuan Artelukawn thei an nih thu a sawi.

I-Day Football khelh tan a ni ta

Image
Nimin atang khan Serchhip Sports Complex-ah Independence Day Football, Division Screening Tournament ni nghal bawk chu khelh tan niin thla thar August 15 thleng khian khelh a ni ang.

CM in Thenzawl PTS a tlawh

Image
Serchhip bial tlawha zin Chief Minister Zoramthanga chuan nimin chawhnu khan Thenzawl Police Training School (PTS) chu a tlawh a, PTS hotute chuan lo dawngsawngin, an hmunhma tihchangtlun ngai te an thlen a. An hmun chhunga inkalpawhna kawng thenkhat siamthat ngai te Chief Minister hian enpuiin, hmasawnna ruhrel din an beisei thenkhat te an sawiho bawk. Chief Minister hian Thenzawl-ah hian MNF party in Vantlang Inkhawm an buatsaih aah thu a sawi bawk a ni.

DSC sawihona nei dawn

Tunhnaia Mizoram sawrkar in District Sports Committee ruangam a tih danglam chungchang ah Serchhip District Sports Committee chuan Vawiin tlai hian Special General Body Meeting koin Sports Association hrang hrang aiawh ten hemi chungchang hi an sawiho dawn.

COVID-19 kai thar 11 la awm

Nimin khan Serchhip District-ah COVID-19 hri kai mi 11 hmuh belh niin mi 24 te enkawl dam an ni thung.

Sipai lak runpui nei leh dawn

Kumin October ni 4-9, 2022 chhung hian Rajiv Gandhi Stadium, Mualpui, Aizawl-ah Sipai (Agniveer) lak runpui neih a ni dawn a, Army Rally hriattirna hi August thla ah tihchhuah a ni anga, Online in emaw, Form hmangin dilna te hi thehluh theih a ni ang. Form hi District Sainik Office, Assam Rifles Office leh Common Service Centre (CSC)-ah te lak leh in register theih a ni anga, Form leh in register na man hi a thlawn tur a ni.

Draft Roll tarchhuak dawn

Mizoram State Election Commission thupek leh The Mizoram (Election to Village Councils) Rules, 2014 in a sawi angin Baktawng Village Council-a Reserved Seat atana bye-election neih tur atana Electoral Roll siam hna chu January ni 1, 2022 tehfunga hmangin neih a ni dawn a, Vawiin July ni 25, 2022 hian Draft Roll tarchhuah a ni ang. Draft Roll hi Electoral Reistration Officer (ERO) 27- Tuikum (ST) AC leh Assistant Electoral Registration Officer (AERO), 27- Tuikum (ST) AC leh Village Level Officer (VLO) leh DC Office-ah te en theih a ni ang. Draft Roll atanga inpaih, inthunthar leh siam that tur neite chuan July ni 31, 2022 ral hmain Village Level Officer ah diln thehluh theih a ni ang.

ASF vangin Vawk 7 thi leh

Nimin khan Serchhip District-ah African Swine Fever (ASF) vanga Vawk thi 7 awm belh lehin Serchhip District-ah ASF vangin Vawk thi 212 a awm tawh a ni. Nimin a Serchhip District-a ASF vanga Vawk thi te hi khaw pahnih a mi te niin Lungchhuan-ah Vawk thi 7 a awm a, heng zinga 3 hi Vawk puitling an ni tawh nghe nghe a, Lungchhuan ah hian ASF vangin Vawk 10 a thi tawh a, North Vanlaiphai-ah vawk 4 thi leh bawkin an zinga pahnih te hi a puitling a ni bawk a, North Vanlaiphai-ah hian Vawk 31 a thi tawh bawk a ni. Nimin vek khan Lungchhuan khua ah hian Vawk pahnih chu hri leng avangin suat leh a ni bawk.

Harsatna chinfel dan tur hria

PC Party Sr. Vice President Vanlalruata chuan nimin-a an Party OB Meeting neih ah tuna Mizoram sum harsatna hi mahni  neih theih leh thawhchhuah theih ngaihtuah miah lova nuamchen zawng leh duhsak zawngte châwichhuah tuma sawrkara thuneitu mi tlemtein hma an làk vang nia sawiin, he harsatna chinfel dan tur hi an Party chuan an hriat thu a sawi bawk.

RD Minister in hmanpui

Nimin khan Kolasib-a Diakkawn Hall-ah Kolasib Block MNF buatsaihin Leadership cum Political Training neih a ni a, he hun hi MNF Adviser leh RD Minister ni bawk Lalruatkima chuan hmanpuiin, “MNF sawrkar chuan inthlan dawna kan inzawrhna Election Manifesto kan tihlawhtling deuh vek tawh,” a ti a, MNF chu Pathian in rintlak-a a ngaih leh Pathian hriak thih niin a sawi bawk.

Raltlan chungchang sawiho

Nimin khan Siaha-ah District Level Committee on Myanmar Refugees chu an Chairman leh Siaha DC Lalsangliana hovin an thukhawm a, tun thla ni 25 thleng khan an District-ah Myanmar atanga raltlan 7971 an awm mek thu leh an vai hian ID siam sak vek an nih tawh thu tarlan a ni. He hunah hian Myanmar Rufugee te chhiarpui neih chhunzawm chhungchang te, Refugee Camp thawmthat dan tur chungchang leh Refugee te leh dan lova thil tawlhruk inkungkaih thei chungchang te huamzau taka sawiho a ni.

Chhungkaw 36 chhuak tawh

Azawl Republic Venghlun, Lungli Road-a lei tawlh avangin nimin tlai thleng khan chhungkaw 36-a mi 146 te chu hmun him lamah thiarchhuah an ni tawh a, chhungkaw 17 te chu an bungrua nen thiarchhuah niin chhungkaw 19 dang te chu bungrua tel lovin thiarchhuah an ni thung. He lei tawlh a dinhmun hlauhawm bera ding Lalnunmawia Hnamte In chu a banpui phet tawhin Step vel pawh a min tawh a, tlawhpawh theihloh tura hung niin Quick Response Team ten helai hmun hi an vil reng bawk a, chenna In thiat turin chet ngam erawh a ni rih lo a, sawrkar atangin tanpuina awm thei te dil mek a ni bawk.

Sports Minister in hmanpui

Govt. Zirtiri Residential College chuan nimin khan Aizawl-a Vanapa Hall-ah Freshers’ Social neiin he hun hi Sports Minister Robert Romawia Royte chuan a hmanpui a, he huna kalkhawm zirlaite chu Mizoram leh India ram tana rohlu tak ni tura tan la turin a chah a, Infiamna lamah Mizo thalai India ram pum huapa lar leh India ram aiawha fehchhuak an awm teuh tawh tih sawiin, infiamna mai bakah thiamna kawng ah te leh thildang chi hrang hrangah ram leh hnam rohlu ni turin theihna an neih thu a sawi bawk. Govt. Zirtiri Residential College hi Mizorama Science College hmasa ber niin June, 2000 khan din a ni a. Science, Home Science leh Computer Science zir theih niin kumin hian zirlai lut thar 334 an awm a ni.

COVID-19 kai enkawllai mi 717 la awm mek

Nimin tlai thleng khan Mizoram-ah COVID-19 hri kai enkawllai mi 717 an la awm.

President thar atan Draupadi Murmu lakluh a ni

Draupadi Murmu chu India President 15-na atan nimin khan Parliament Central Hall-ah rinawmna thu tiam tira lakluh a ni.

Larsap in IIT Tirupati leh NIT Mizoram Director te kawm

Governor Hari Babu Kambhampati chuan nimin khan Director of IIT Tirupati leh Director of NIT Mizoram te kawmin leimin vanga harsatna thleng thin pumpelh chungchang te, Science thiamna hmanga Mizoram a kuthnathawktute hmalakna tanpuina chungchang te leh NIT Mizoram sak hna thawh dan tur chungchangte an sawiho.

MLA, CADC-a CEM leh midang tang turin hrem an ni

Cheng nuai 137 tihchingpen thubuaiah Special Court (PC Act) Judge Vanlalenmawia chuan nimin khan Mizoram MLA nilai Dr. BD. Chakma leh Chakma Autonomous District Council (CADC)-a CEM ni lai Buddha Lila Chakma bakah CADC-a MDC ni mek pali leh MDC hlui pasarih te chu kum khat tang tur leh Rs 10,000 theuh chawi turin a hrem a, heng mii 13-te hi nimin vêk khan Special Court chuan bail-in a chhuah.

Thenzawl dai-ah Rakzu man

Thenzawl Joint YMA Ruihhlo Do Squad te chuan Zirtawpni zan khan Thenzawl dai-ah Rakzu litre 450 zet manin Excise & Narcotics Department kutah hlan nghal an ni. Thudawn danin heng rakzu te hi Phunchawng atanga rawn phurh niin Thenzawl-a hralh tur a ni a, Polythene lian 45-ah litre 10 zela dahin heng te hi Satha Ip-ah dah leh a ni a, Thenzawl Joint YMA Ruihhlo Do Squad te hian Thenzawl dai-ah lo manin Serchhip a Excise & Narcotics Department kutah Zu leh  phurhna Motor (Santro Car) bakah a khalhtu mi pakhat chu an hlan nghal a ni.

Chief Minister rawn kal dawn

Mizoram Chief Minister leh MNF President ni bawk Zoramthanga chuan Vawiin hian Serchhip a rawn tlawh dawn a, chawhma dar 10:00 leh 11:00 inkarah hmasawnna hnathawh thenkhat te tlawhin hemi hnu hian Serchhip Auditorium-a Vantlang Inkhawm ah thu a sawi ang. He hunah hian tunhnaia MNF Party-a lawmluh leh Serchhip bialtu viltu tur nia sawi J. Malsawmzuala Vanchhang pawh rawn tel tura beisei a ni.

Volleyball khel chhunzawm zel

D3 Amrit Cement 22nd Inter Branch YMA Volleyball Tournament 2022 chu tluang taka khelh mek zel a ni.

Hri kai enkawllai 59 la awm

Nimin tlai thleng khan Serchhip District-ah COVID-19 hri kai enkawllai mi 59 an awm.

Khaw pahnih-a Vawk thi ASF vang tih finfiah leh

Khawlailung leh Lungchhuan khua a Vawk thi te Sample chu enfiah a nih hnuah African Swine Fever (ASF) hri an kai tih hmuhchhuah a nih leh tak avangin Serchhip District chhunga khaw 8-ah ASF hri hi hmuhchhuah a ni tawh.

Keitum leh Khawlailung inkara Tuichang Lei dawh PWD leh YMA hruaitu ten a hmunah an tlawh

Image
Keitum leh Khawlailung inkara Tuichang Lei dawh hna kum 2019 vel atanga tan tawh chu tunkar chho hian Lei chhuat RCC hmanga chhun tumin ruahmanna siam mek a ni a, Lei chhut hi chhun mai tura ruahman ni mah se mipuite hman theih tura peih theih hun tur erawh hriat theih ala ni lo.

I-Day Football khelh tan a ni dawn

Serchhip District Football Association (SDFA) buatsaih Independence Day Football Tournament leh Division Screening Tournament chu Vawiin hian khelh tan a ni dawn ta.

Court in thutlukna puang dawn

Vawiin chawhma dar 11:00 hian Special Court (Prevention of Corruption Act) Judge chuan eiruk thubuai a thiam loh a chantir mi 13-te hremna tur a puang dawn.

President thar lalut dawn

India President 15-na atana thlantlin thar Draupadi Murmu-i chu Vawiin chawhma dar 10:15 hian Parliament Central Hall-ah President atan lakluh a ni dawn a, he hunah hian President kal chhuak tur Ram Nath Kovind-a pawh a tel dawn a ni. President atana thlan thar Draupadi Murmu hian Chief Justice of India NV. Ramana hmaah rinawmna thu a tiam anga, Laipui lawn zui a ni anga, thu a sawi zui nghal bawk ang. Hemi hnu hian Rashtrapati Bhavan a pan anga, chawimawina famkim nen lo dawnsawn a ni dawn a ni.

MZU Southern Campus din thuai a nih theih dan tur chungchangah sawrkar laipui-a Minister te dawr

Mizoram Youth Commission (MYC) Chairman leh Higher and Technical Education Board Vice Chairman Dr. Vanlaltanpuia MLA chuan Union Minister of Education Darmendra Pradhan chu Zirtawpni khan a Pisa-ah hmuin MZU Southern Campus chungchang a sawipui.

Hlawhchhamna ah ngai

ZPM Thalaite chuan March 31, 2022 hma lama CSS sum pek tawhte a dawngtu tur Department account-a thun vek tura Central-in State sawrkârte a hriattir hnuah CSS sum pekchhuah a nih dawn avânga sum lama harsatna tawk tur langsâr State kan ni bîk tur chu MNF sawrkâr hlawhchhamna ah an ngai tih thuchhuah siamin an tarlang a, inthlan hmaa MNF hruaitu te'n ‘khurpui khawh lut zur zur, liam zur zur, phai thei lo’ an sawi-te chu sawrkârna an chan hnuah chuan mumang mai a ni tih a chiang hle nia tarlangin, MNF sawrkâr chu laklawh thilah pawh Revenue Expenditure atân CSS sum hmang pûk tawh lo turin an ngen tih an sawi bawk.

Tut-Marpara kawng siam tum

BJP Mizoram Pradesh President Vanlal-hmuaka chuan Inrinni khan Dampa Bial chhunga West Phaileng tlawhin Vantlang Inkhawm ah thu a sawi a, Dampa bial khaw tam tak kawng chu kal hleihtheih loh khawpin a chhia nia sawiin, hemi chungchang hi Ministry of Road Transport & Highways changtu Minister Nitin Gadkari hnenah a thlen tawh thu leh Map atangin kawngchhe lai chu an en nghala, ruahmanna an siam nghal thu a sawi a. Minister hi a sawm anga Mizoram-ah rawn zin a tum thu leh chutah chuan Tut atanga West Phai-leng leh West Phaileng atanga Marpara thleng kawngchhia chu siam thuai anih tur thu amah ngei in a rawn puan dawn thu a sawi bawk.

Minister pahnih ten tlawh

Sports Minister Robert Romawia Royte leh I&PR Minister Lalruatkima te chuan Inrinni zing khan Tuikual Indoor Stadium tlawhin cheithat dan tur an en a, Tuikual Indoor Stadium hi kum 1992 a sak niin, Tuikual North Local Council huam-chhungah a awm a. Chhawng 6 a sang niin Mizoram State Sports Council kutah a awm mek a ni. Indoor Stadium huam chhungah hian Basketball Court, Volleyball Court, Judo khelhna, Mizoram Volleyball Association (MVA) Office awmin Minister pahnih leh khawtlang hruaitute hian hmalak zui dan turan sawiho nghal bawk a ni.

F&ES ten hnatlang an nei

Mizoram-a Fire & Emergency Services Department te chuan an din champha kum 50-na pualin Inrinni khan hnatlang runpui an nei a, he hunah hian Mizoram pui a Fire Station 14 te chuan Fire Tender nen thawkchhuak in vantlang hmun zunin, luikawr te, bazar leh vantlang kawng te tifaiin hnatlang runpui an nei a ni. Fire & Emergency Services, Mizoram hi kum 1972 a ding tan a ni a, kumin 2022 hi an kum 50-na a nih angin a lawmna peng khat atan hetiang hun hi hmangin District lamah chuan a hma pawhin hun an lo hmang tawh bawk a. Tunkar Nilaini khian an kum 50 tlin lawmna pualin thisen pek runpui an nei leh anga, an department kum 50-na pual hian Souvenir Magazine tihchhuah leh lawmna hun hi September 1, 2022 hian neih tum a ni.

COVID-19 hri kai enkawllai mi 708 la awm mek

Nimin tlai thleng khan Mizoram-ah COVID-19 hri kai enkawllai mi 708 la awmin District tinah hri kai enkawllai hi an la awm vek a ni.

Aizawl-ah Joint Ex-Servicemen Rally neih a ni

Assam Rifles chuan COVID-19 hripui a len hnua a vawikhatna atan Inrinni khan Aizawl Lammual-ah Assam Rifles leh Indian Army sipai bang tawh te tan Joint Ex-Servicemen Rally an buatsaih.

Lawngtlai DC in NH. 54 siam mek a hmunah a tlawh

Lawngtlai District Bawrhsap Amol Srivastava chuan Lawngtlai leh Kawlchaw 'W' inkar National Highway kawngpui laih zau hna thawh mek chu Inrinni khan tlawhin hnathawktute nen hmalak zui zel dan tur an sawiho nghal bawk.

July 2022 atanga Aizawl khawpui chhunga Gas Home Delivery kalpui tumna a hlawhtling rih lo

Mizoram sawrkarin July, 2022 atanga Aizawl khawpui Veng engemaw zat-a Gas Home Delivery kalpui tan a tum chu harsatna neuh neuh avangin tihhlawhtlin theih a la ni lo a, FCS&CA Department chuan Home Delivery hi a rang thei ang bera kalpui turin hma an la chhunzawm zel.

Kumin ah Cyber Crime thubuai 72 awm tawh

Kumin chhungin Cyber Crime Police Station (CCPS)-ah thubuai 72 ziahluh ni tawhin, Internet kaltlanga sum-a inbumna thubuai a tam hle a. CID (Crime) hotute chuan khawpui chauh ni lo, thingtlangah pawh Cyber Crime thubuai a tam tih an sawi.

P&E Minister in Kau-Tlabung Hydel Project tihchangtlun theih dan tur a hmunah a enfiah

Image
Kau-Tlabung Mini Hydel Project chu nimin khan  P&E Minister R. Lalzirliana chuan tlawhin he Project tih changtlun a nih theih dan tur hrang hrang thawktute a sawipui a. Tun dinhmunah helai hmun atang hian Kawlphetha siamchhuah tam theih ber laiin 2.4MW vel an siamchhuah theih thu thawktute chuan an sawi a ni.

PWD leh YMA Sub-Hqrs. hruaitu ten PMGSY sum hmanga Sialhau kawng siam mek an enfiah

Image
PWD Serchhip Division-a hotute leh Serchhip Sub-Hqrs. YMA hruaitute chuan nimin khan PMGSY sum hmanga Tuikum lui atanga Sialhau kawng laih leh siam mek chu a hmunah tlawhin hnathawh an enfiah a, kawng chhuat siamthat ngai te chu Fur ruahtui tlak zawh veleh siamthat nise an ti.

YMA Volleyball khelh leh a ni

Central YMA leh Mizoram Volleyball Association (MVA) te buatsaih ‘D3 Amrit Cement 22nd Inter Branch YMA Volleyball Tournament 2022’ chu nimin khan khelh chhunzawm leh a ni.

ASF vangin nimin-ah Vawk thi awm belh lo

Nimin khan Serchhip District chhunga ASF hri lenna khaw hrang hrangah Vawk thi chhin-chhiah belh awm lovin hri leng avanga Vawk suat a awm belh lo bawk a, hri kai nia rinhlelh Vawk thi chhinchhiah belh a awm lo bawk a ni. Heti hian nimin tlai thlenga Serchhip District-a ASF vanga Vawk thi tawh zat chu 191 niin hri lenna khua ah hian Vawk 199 suat a ni tawh bawk a, ASF hri lenna hmun puan loh khaw 9 ah Vawk thi 19 awm tawh bawkin khaw 4-ah Vawk suat a ni tawh bawk a, heng Vawk suat te zinga 33 te hi Khawlailung khuaa mi te niin an Sample te hi enfiah turin thawn mek a ni.