Latest News

Inkharkhipna kalpui mek chungchang sawihona nei

Mizoram-a COVID-19 hri leng avanga inkhuahkhirhna kalpui mek chu nimin khan Health Minister hovin thlirho a ni a, Lockdown la kalpui mek chu a tawp hunah inthlahdul nghal tha an tihloh thu sawiin, kalphung tur erawh chu State Disaster Management Authority (SDMA) hnuaia State Executive Committee kutah dah a ni.

SAD Conference Hall-a he thlirhona hunah hian Medical Operational Team, Joint NGO Coordination Committee leh Mizoram Kohhran Hruaitute Committee (MKHC), Local Task Force aiawhte an tel a, Lockdown kalpui lai mek sawiho a nih bakah karleh lama kan awm dan tur atana tha nia hriat te sawiho a ni a, zau taka ngaihdan an sawiho hnuah, a tul angin State Executive Committee on State Disaster Management Authority in rua-hmanna an siam leh dawn a ni.

Nimin-a sawihona hunah hian June 10, 2021 thleng khan COVID-19 vaccine dose 3,34,790 pek chhuah a nih tawh thu leh heng zinga mi 52,840 hian Full dose an lak tawh thu tarlan a ni a. Kum 18 - 44 inkar vaccine pek kalpui mek chu ngawrh lehzuala kalpui chhunzawm tha tih niin, a tam thei ang berin vaccine an lak thuai thuai a tul avangin Central sawrkarin vaccine 2nd dose la turte tana dahthat (reserve) tur a rawn tih pawh chu kum 18 - 44 inkarte tan pek chhuah mai nise tih niin, 2nd dose tur chu a lak hun taka an lak theih nan a tul anga na taka Central sawrkar nawr chhunzawm tha tih a ni. Nu naupai mekte tan vaccine lak a him tawh thu Central lam hotuten an sawi chu a tul anga kalpui tha tih a nih bakah, a dawng turte chu counselling uluk taka tih pui hnuah an duhthlanna anga kalpui tur a ni ang.

Hripui kai zinga a na zualte an pun chak em avangin inenkawlna hmun tur pawh ruahman belh mek a nih thu he hunah hian sawi a ni a, a hmunhma neih belh pawh nise a thawktu tur, Healthcare Frontline Workers an indaihloh avanga harsatna awm thei sutkian nan volunteers mamawh belhna a nasat thu leh, hmalak dan tur atana tha te sawiho a ni bawk.

IDSP hotute hnen atangin Mizorama COVID-19 dinhmun ngaihthlak niin kumin April thlaa hri kai hmuhchhuah mi 1655 zinga 58% chu tualchhunga inkaichhawng an nih laiin, May leh June 10 thlenga hri kai hmuhchhuah zinga 98 % hi tualchhunga inkaichhawng an ni thung.

He huna tarlan a nih danin tun dinhmunah Mizoram pumah CCC 49 awmin mi 2479 dah theihna a ni a, Aizawl bikah CCC 15 awmin mi 1158 dah theih a ni a. CCCC hi Mizoram pumah 168 awmin mi 3519 dah theihna a ni bawk a, Aizawl-ah 109 awmin mi 2243 dah theih a nih thu leh Paid CCC chu Aizawl-ah 2 awmin mi 41 dah theih a nih thu he hunah hian tarlan a ni bawk.

Comments

Chhiar Hlawhte