Pathianni-ah hri kai 113 hmuhchhuah belh an ni

Pathianni khan Mizoram-ah Sample 746 enfiah niin heng atang hian COVID-19 hri kai 113 hmuhchhuah an ni a, Sample enfiah atanga za zela 15.14 te chuan hri an kai a ni.

Pathianni khan ZMC-a RT-PCR Laboratory-ah Sample enfiah awm lovin District hrang hranga TrueNat Laboratory-ah Sample 213 enfiah niin hri kai mi 19 hmuhchhuah an ni a, hri kai tawh nen inkawmhnaihna neih avanga inkhunghrang lai vek an ni. Heng hri kai hmuhchhuah zinga 9 te chu Lunglei District ami te niin Kolasib District-ah hri kai mi 6 leh Saitual District-ah hri kai mi 4 hmuh an ni.

Mizoram hmun hrang hrangah Pathianni khan Rapid Antigen Test hmangin Sample 533 enfiah ni bawkin hri kai mi 94 hmuhchhuah an ni bawk a, an zinga mi 75 te chu Aizawl District ami te an ni a, hri kaina hriatloh leh chhui ngai 42 awmin midang 33 te chu hri kai tawh te nen inkawmhnaihna nei an ni thung. Lawngtlai District-ah hri kai mi 17 hmuh niin Mamit leh Khawzawl District-ah hri kai pakhat ve ve hmuh a ni bawk.

Heti hian nimin tlai thleng khan Mizoram-a COVID-19 hri kai hmuh tawh chu 13,679 an tling tawh a, nimin khan Mizoram hmun hrang hrangah hri kai 208 te chu enkawl dam niin anmahni enkawlna hmun atanga chhuahtir an ni a, heti hian Mizoram-a hri kai zingah 10,623 te chu enkawl dam ni tawhin hri kai hmuhchhuah atanga za zela 77.65 te chu enkawl dam an ni tawh a, tunah hian hri kai enkawllai 3001 an la awm mek a ni.

Hri kai zingah nunna chan awm belh leh :

Mizoram-a COVID-19 hri kai hmuhchhuah zingah nunna chan awm belh zelin hri kai zingah nunna chan mi 55 an awm ta. Mizoram-a COVID-19 hri kai hmuhchhuah zing ami PC. Malsawmkima (42), Sairang Dinthar chu nimin zing dar 4:45 khan ZMC-ah a boral a, May 25-a hri kai hmuh niin hemi ni hian ZMC-ah dahluh nghal niin nimin zing khan a boral zui ta a ni. Heti hian Mizoram-a COVID-19 hri kai hmuhchhuah zingah nunna chan mi 55 lai an awm ta a, tun thla chhungin mi 15 lai an boral tawh a ni.