Latest News

Indo-Myanmar ramri kai khaw hrang hranga inkhuahkhirhna leh a kaihhnawih sawiho a ni

Nimin khan Champhai District chhung Indo-Myanmar ramri kai khaw hrang hranga inkhuah-khirhna leh a kaihhnawih chungchang sawihona neih a ni.

He sawihona Champhai DC Conference Hall-a neih ah hian District Bawrhsap, Maria CT. Zuali chuan ramri depa awm leh hrileng laka fimkhur ngaih zualna Champhai District-ah hri leng pahnih, Covid-19 leh African Swine Fever ven hna lungrual taka kalpui a ni leh, tun thlenga hrileng darh huk thei reng khuahkhirh a ni chu lawmawm a tih thu a sawi a. Hun rei tak chhung COVID-19 hrileng do kawngah tha leh zung tam tak senral a ni a, hmabak chin hriat a nih loh avangin rilru nei deuha tanho thiam a ngai takzet a ni, tiin fimkhur taka tanho zel a ngaih thu a sawi bawk.

Champhai SP, Lalrinpuia Varte pawhin VLTF te chu sawrkarin dan ang thlapa a din leh kut ke ber an nih anga dan tlawhchhan chung zela hma la thin turin a chah a. Dan bawhchhia leh ruihhlo an man te chu dan hnuaia hrem an nih ngei theihna turin Incident Commander emaw, Police-te hnena hrilh vat thin tura chahin, State dangte neih ve loh leh entawn an nih angin VLTF zahawmna leh mawina hum zel kawngah theihtawp chhuah turin a chah bawk a ni.

He hunah hian ramri khar a nih mek lai leh, Free Movement Regime tihtawp lailawk a nih lai reng chunga dan kalha ramri kan-a mihring lutchhuak, bungrua leh ruihhlo lakluh tum an awm thin thu te tarlan niin, dan lova mihring lut chhuak, bungrua, ran leh ruihhlo tawlh thinte chu khauh takin thukhat vuaa theihtawp chhuaha do tlan zel nise tih a ni a. Thenawm ramah COVID-19 hri kai an pun zel avangin fimkhur chhunzawm zel nise, ramri dep maia awm Champhai District chu hri inkaidarh huk theihna hmuna awm a nih hre rengin dan lova ramri kan leh chetvelna awm thei te khauh taka do tlan zel nise, ramri kan-a chhungkaw intlawhpawh loh nise tih a ni a. Ruihhlo la leh tawlh thin dan lova ramri kan lui fote chu VLTF te'n thuneitute hnenah thlen se, a tul anga hmalak thin nise tih a ni bawk.

He hunah hian SDO (Sadar), Lalnunfela Chawngthu hnen atangin MCPC Act, 2020 chungchang inzirtirna ngaihthlak niin VLTF hrang hrang atanga rawtna lut te sawiho a ni bawk.

Comments

Chhiar Hlawhte