July thla-ah hri kai hmuhchhuah tlakhniam beisei

Mizoram chhunga COVID-19 hri kai hmuhchhuah zatin tam lam a pan mek laiin, July thla vel atang chuan tlakhniam lam a pan tawh beisei a ni tih IMA hruaitute chuan an sawi.

Indian Medical Association (IMA), Mizoram State Branch President Dr. Rosangluaia chuan Hripui leng hrim hrim hi chu zual lai a awm thu leh, engemaw tiin a zual hnuah a rawn tlahniam leh thin tih sawiin, “Chutiang deuh hlek chuan COVID-19 hripui leng pawh hi a ni tho,” a ti a. Hri leng thawh khatnaah khan India ram khawpui zawk Delhi-ah te chuan nikum August/September velah tlahniam tanin, chumi atanga thla hnihna vela Mizoram-ah pawh a tlahniam veleh a. Chutiang bawkin tun tumah pawh hian Delhi leh Mumbai lamah tlakhniam lam a pan mek dan chhutin, Mizoram-ah thlaleh July velah chuan hri lengin tlakhniam lam a pan ve mai chu an rin dan a nih thu a sawi bawk.

‘Hri inkhaidiat dan chhu chat tura inkharkhip bak sawrkar in a thiamlo’ tih te leh ‘Sawrkar hi a hlawhchham ber mai’ tih mi tam tak ngaihdan chu a dikna chin a awm ve tih a sawi a. Dr Rosangluaia chuan, “Keini lam ngaihtuah ve danah chuan hripui a len a, mipui zingah, vantlang ah a darh tawh a nih chuan inkharkhip hian engtizawng mahin a hripui tireh vek tur chuan thil theih tawh loh tluk ang a ni,” tiin, inkharkhip in a tum ber chu case tam lutuk tur tihhniamna a nih thu a sawi a. Hri kai an tam lutuk chuan damdawi In hrang hranga ICU te leh hri kai te enkawlna hmun hrang hrang te a khah lutuk chuan inthunun pawh a har an rin thu sawiin, “Phai ram ang pui puia hri kai khum changlo kan la tam lo a, hei hi inkharkhip vangah te pawh kan ngai a, inkharkhip hi a tangkai lutuk,” a ti.

Mizoram-a Delta variant hmuh thu puan tak chungchang ah Dr. Rosangluaia chuan, “Nikum Covid leh tun Covid thawh dan kalphung hrim hrim thlir hian variant thar a awm tih chu kan rin sa a ni a. Tuna case tam ber hi inkaichhawn awl leh na thut thut kan neihte hi hemi variant thar vek turah kan ngai a, chutianga thil thar eng emaw symptom kan hriat ang ni lo rawn lang thar turah kan ngai lo,” a ti bawk.