Thu diklo a nih thu sawi

MNF Party chuan ZPM Legislature Party ten COVID-19 dona kawnga hmanraw pawimawh Thermal Camera leh Ambulance lei chungchang a thuchhuah an siam chu thu diklo niin an sawi.

Nimin a thuchhuah an siamah MNF Party chuan Thermal Camera pali (4) lei ni anga sawi chu panga (5) zawk a ni tih sawiin, Company Rate pangngai ah chuan Rs. 900,000/- lai ni mahse, a aia man tlawmin Thermal Camera pakhat man atan hian Rs.820,050/- sen a ni tih an sawi a. COVID-19 thawhkhatnain Mizoram a lo thlen hma atangin Mizoram sawrkar chuan theih ang angin remruatna a lo kalpui tawh tih sawiin, Thermal & Optical Bi-Spectrum ngat phei chu India ramah Delhi, Bangalore leh Thiruvananthapuram Airport-te dawtah a nei thei Airport palina kan nih bakah India hmarchhak State zinga nei hmasa ber kan ni hial tih an sawi bawk.

Ambulance lei chungchang pawh sawiin MNF thuchhuah chuan NEC atangin Tata Winger Ambulance pathum lei a nih thu leh pakhat man chu Rs.15,52,500/- niin, a pathum-a lei nan hian Rs. 46,57,500/- sen a ni tih an sawi a. Rampum a BS4 tihtawp a nih lai, BS6 hman tan tirh te laia lei a nih thu leh heng Motor hi an lian thain Covid patient dinhmun tha vaklo thlenga phur thei tur, thuam phuisui theih tur leh Basic Life Support/Advanced Life Support dah a ngaih pawha leng thei tura ngaih an ni tih an sawi.

Heng ruahmanna te hi State Level Task Force kaltlanga Proper Procedure felfai tak nena lei vek a nih thu leh Ambulance lei chungchang hi Vehicle Purchase Board, Mizoram a State Health Society, H&FW-in May 12, 2020 Meeting-a a pawmpui niin Thermal Camera hi Task Group on Medicine and Medical Equipment Meeting, Health Secretary Chairman-na hnuaia May 13, 2020-a neihin a pawmpui a ni tih an sawi bawk.