Latest News

CSR Fund atanga hri leng dona bungraw dawn Health Department hotute kutah hlan a ni

Serchhip District Bawrhsap, Kumar Abhishek-a hmalakna a Serchhip District in COVID-19 hri leng dona kawnga hmanrua leh bungrua Delhi-a inbun Company pathum te Corporate Social Responsibility (CSR) Fund atanga a dawn te chu nimin khan Serchhip District-a Health Department hotute kutah hlan a ni.


Heng bungrua inhlanna puala inkhawm tawi Serchhip DC Office Tual-a neih ah District Bawrhsap, Kumar Abhishek chuan COVID-19 hri a len tirh atanga Vawiin thlenga hri leng dona lama theihtawp chhuahtu zawng zawngte chungah lawmthu a sawi a. An inpekna zarah Serchhip District chu dinhmun tha takah a ding zel nia a hriat thu a sawi a. Hripui thawh hnihna a lo thlen chinah ram-in kan tuar nasa hle tih sawiin, a dona hmanrua mamawh pawh a pung zel a, chuvang chuan kan District in hmanrua a mamawhte dapchhuah ve theih beiseiin District-a Health Department hotuten kan mamawh an sawite behchhanin Delhi lama a hmelhriat Company te a biak kual thu a sawi a. Kan mamawhna te hriaiin heng te hi an rawn pek thu leh an chungah a lawm thu sawiin, tangkai taka kan hman ngei a beisei thu a sawi a. Tun tumah hian kan thil dawnte hi a la rawn thleng kim lo tih sawiin, tunah hian Medical lamin hman an mamawh tawh avangin a rawn thleng ang ang te inhlanna buatsaih a nih thu a sawi a. Tuna CSR min petute bakah hian Company dang pawh a biak thu leh anni hnen atang pawhin beisei tur a la awm thu sawiin, a tul anga la dap zel tur a nih thu a sawi a. Serchhip District mipuite chu COVID-19 vaccine lak hlau lo tur leh a rang lama lak dan ngaihtuah theuh zawk tura ngenin, Vaccine kan dawn ang angte a semchhuak chak ber nih tum turin mipuite leh thawktute a sawm a ni.

Heng bungrua inhlanna puala inkhawm neih hi Addl. DC, Lalmuansanga Ralte chuan kaihruaiin Corporate Social Responsibility (CSR) hi Company te pawhin hri leng dona kalpui mekah ramchhungah tangkai taka an hman thu sawiin, Serchhip DC pawhin hun engemaw chen atang khan a lo dap tawh thu leh hmu mai tura inngaih a nih hnuah kan Bawrhsap chhungte, Delhi lama awm mek chu hri in a tihbuai ve tak thu leh a pa phei chu ICU-ah te hial dah ngaia a awm tak avangin harsatna a thlen tak thu a sawi a. Amaherawh chu a hna a rawn zawm leh veleh hma la nghalin tunah chuan bungrua thahnem tak a rawn thlen tak thu a sawi a ni.

Serchhip District Bawrhsap hmalakna hnuaiah hian Serchhip District hian Alumni of Institute for Providing Care and Relief (AIR) Foundation, Chhatarpur, New Delhi atangin Surgical Masks 2000, Surgical Gloves 2000, Sanitizers (litre khat bur zel) 500, Pulse Oximeter 100, Oxygen Concentrator 15, Oxygen Cylinder 30, Flow Meter and Regulator 30, Nebulizer 20, N95 Masks 1000 leh Digital thermometer 100 a dawng a. Hei bakah hian JAI Foundation atangin PPE kit Set 500 leh ACT Grants and Swasth Alliance, New Delhi atangin Oxygen Concentrator 20 te hmuh a ni a. Heng zinga Oxygen Concentrator 35 leh PPE Kit 500 te hian Serchhip an rawn thleng tawhin nimin khan Health Department kutah hian hlan a ni a, a dang te pawh hi kawnglak ah a rawn kal mek a ni.

Heng Company pathum atanga Serchhip District in bungrua a dawn te hi Rs. 40,86,388/- hu vel niin Health Department aiawha dawngtu Serchhip CMO, Dr. Laldawngliana Sailo chuan Bawrhsap hmalakna chu lawmawm a tih thu leh tangkai taka hman a nih tur thu a sawi bawk.

Comments

Chhiar Hlawhte