Tlawmngai pawl, Political Party leh Kohhran ten hri leng mek dona chungchang an sawiho

Mizoram-a tlawngai pawl hrang hrang, Political Party hrang hrang leh Kohhran hruaitute chu nimin khan thukhawmin hripui leng mek doletna kawnga hmalakho dan tur chungchang an sawiho a. BPL leh AAY chhungkua te Sawrkar Bill hrang hrangte Sawrkar-in ngaihnathiam an duh thu an sawi bawk.

He sawihona Central YMA Committee Room-a neih hi Central YMA President, Vanlalruata chuan kaihruaiin issue pawimawh a awmin inhmuhkhawmna hun an buatsaih thin thu a sawi a, “Sawrkar kan ni lova, tlawmngai pawl, mi zawng zawng lenna kan ni. Kal dan turah rawtna hranpa kan nei chuang lo,” a ti a. Central YMA General Secretary, Prof. Lalnuntluanga chuan thawhhona tha leh awmze nei zawk neih a nih zel theihna atan inrawnkhawmna hi buatsaih a nih thu sawiin, “Nasa taka hmalakna in COVID-19 do kawngah awmzia a nei chho a, thawhnihnaah erawh State dang an tlakhniam laiin kan tlahniam hlei thei lo,” tiin theihtawp chhuaha hripui do kawngah thawhho zel a pawimawh thu a sawi bawk.

He hunah hian hri leng doletna chungchanga hmalakna hrang hrangte an sawiho hnuah Hripui dona kawngah pheikhai rual zawka tan lak a nih theih nan Sawrkar-in All Party Meeting ko se an ti a, COVID-19 hri kai te rang taka hriatchhuah zung zung a nih theih nan chak zawka Test kalpui pawh an rel bawk. Hei bakah hian Kuthnathawktu ten an thlai tharte awmze neia an tihral theih dan tur Sawrkar-in ruahmanna siam se tiin COVID-19 hrileng mek do nan hriselna kawnga kan mamawhte tha leh changtlung zawk kan neih theih nan Sawrkar-in hma la rawh se an ti a. Hrileng vanga kan harsatna tawh mekte inchhawk zangkhai a nih theih nan, In/dawr luah man in ngaihnathiam nise, BPL leh AAY chhungkua te Sawrkar Bill hrang hrangte Sawrkar-in ngaih-hnathiam rawh se, an ti bawk.

He Joint Meeting hian MKHC, BJP, INC, MNF, ZPM, PC, ZNP leh NGO hrang hrang aiawhte telin COVID-19 hrileng do hnathawktu te inpekna leh Aizawl khawpui pawn atanga an thlai thar tam tak an rawn pe thin chu lawmawm an tih thu pawh an sawi a, COVID-19 hripui laka kan him tlan theih nan, Vaccine a chak thei anga pek zui zel nise an tih bakah mipuite pawhin kan him tlan theih nan COVID-19 inkaihhruaina dan SoP leh CAB (Covid Appropriate Beha-viour) te zawm that nise an ti bawk.