Latest News

RT-PCR dahna a awm niin sawi

Mizoram Pradesh Congress Committee (MP-CC) chuan Lunglei Civil Hospital-in RT-PCR dahna tur Laboratory a nei sa reng niin an sawi.

Nimin a thuchhuah an siamah MPCC Media Department chuan Lunglei Civil Hospital hotuten an mamawh zia an sawi avangin June 26, 2020 khan Zodintluanga Ralte, MLA chuan Lunglei Civil Hospital-a hman turin RT-PCR khawl, MLA Fund atanga lei chu a pe tih tarlangin, Health Minister, MNF Party leh Mizoram sawrkar chuan chhuanlam chi hrang hrang siamin, he RT-PCR hman loh dan ringawt hi an ngaihtuah thung niin an tarlang.

MPCC chuan RT-PCR khawl hi BSL-3 Laboratory chinah dah thin a ni tih sawiin, amah-erawh chu COVID-19 hripuiin min nuai tak avang leh mamawhna a san tak em avangin June 2, 2020 atang khan ICMR pawhin BSL-3 kher phut lovin, BSL-2 Laboratory-a RT-PCR hman hi a lo remti daih tawh niin an tarlang a. Lunglei Civil Hospital hian BSL-2 Laboratory a neih sa hrim hrim avangin an Microbiologist ngei pawhin RT-PCR khawl dah chu thil harsa a nih loh tur thu Lunglei Thalai Pawlte hnenah a lo sawi tawh thu leh RT-PCR khawl Lunglei Civil Hospital-a dah tur hian ICMR-ah harsatna engmah a awm lo tihna a nih thu an tarlang.

Hei bakah hian MPCC chuan Lunglei a RT-PCR khawl hmang turin building thar sak phawt a tul thu sawi a awm thu tarlangin, hei hi thu diklo hmanga mipui hruai sual tumna a ni tih an tarlang a. “Falkawn-a COVID-19 Testing Laboratory awmna hi building thar ni lovin, District TB Centre awmsa, TB Laboratory, OPD leh TB veite enkawlna Ward awmna building a ni. Falkawn-ah pawh building awmsa a Laboratory din theih a nih laia Lunglei a nih tak avanga building thar sak kher ngai an ti hi thu belhchian dawl lo, mipui hruai sual tumna dik tak a ni,” an ti bawk.

Comments

Chhiar Hlawhte