Latest News

Chanchin thar thenkhat :

Laboratory Block siam tum

Mizoram sawrkar Health Department-a Hospital & Medical Education-a Director, T. Lalhmangaihi chuan nimin khan Lunglei Civil Hospital-a Trauma Centre sak mek, RT-PCR Laboratory buatsaihna hmun tur, H&FW Department quarters sak mekte a tlawh a. Hemi hnua Sub-Hqrs. YMA Conference Hall-a inkawmna neih ah RT-PCR khawl dahna tur hmun him, tangkai taka hman theihna tur 'Laboratory Block' siam tumin hmalak mek a nih thu leh hei hi Civil Hospital, Lunglei Compound chhungah dah turin ruahmanna siam a ni tih a sawi a. Tunah hian cheng vbc. 7.8 man hu Detailed Project Report (DPR) pawh siamin NEC-ah a thehlut tawh a ni tih a sawi a. He 'Laboratory Block' hi peih fel anih hunah Zodintluanga, MLA-in RT-PCR khawl a pek chu dahluha hman tum a ni tih a sawi a. Heng zawng zawng hi a puitlin hma chuan TrueNat Quattro khawl dang (a tul chuan pakhat aia tam) sawrkarin lei belh turin hma a lak thu a sawi bawk.


Siaha Dist. ah buh thar pung

Siaha District COVID-19 Food Security Consultative Committee (SDCFSCC) chu nimin khan an Chairman Dr. K. Beichhua Minister hovin an thukhawm a. COVID-19 hrileng avangin ei leh bara harsatna lo thleng thei laka lo inruahman nan hmanhmawh takin SDCFSC Committee hi nikum April thla khan din niin he hunah hian an hmalakna avangin nikum-ah kumdang zawng aia an District in buh an thar tam thu tarlan a ni. Tunah hian SDCFSCC hmalakna in chhungkaw 396 te tan Wet-Rice Cultivation (WRC) leilet hectare 517.6 chu JCB 14 hmangin leh zawh sak tawh a nih thu tarlan niin nikum atangin cheng nuai 111.98 hman a nih tawh thu tarlan a ni bawk.


Vawiin ah HSLC result

Mizoram Board of School Education (MB-SE) chuan kumin a pawl 10, HSLC Exam result chu Vawiin chhun dar 12:00 hian a tarchhuak dawn ta a, result hi www.mbse.edu.in-ah en theih tura tarchhuah a ni dawn a ni.


Hri leng vangin hnuchham 3

Mizoram-ah Covid-19 vanga nunna chan mi 44 zingah nu emaw, pa emaw in fate an kalsan tak hnuchham naupang 3 an awm tawh. Women & Child Development (ICDS) Deputy Director, Zoramthangi Chhangte sawi danin Mizoram chhunga nu leh pa in Covid-19 avanga an thihsan tak naupang 3 te hi Aizawl District, Serchhip District leh Champhai District-ah ami te niin anmahni puih nan hian PM Cares Fund for Children hnuaia Prime Minister in Scheme thar a hawn ah hamthatna an dawng thei dawn a ni.


CM in PM hnenah thlen

Chief Minister Zoramthanga chuan nimin-piah khan Prime Minister, Narendra Modi-a hnenah COVID-19 hri leng avangin State harsa zawkte chuan kawng hrang hrangah harsatna a tawh thu ziakin a thlen a. Kum 18-44 inkar vaccine lak tur chu anmahni sum a lei tura tih an ni leh zel chuan harsatna nasa tak a siam sak avangin, vaccine mamawh zawng zawng chu Mizoram leh Special Category State dangte tan chuan a thlawn a pek a nih theih nan hma lak sak turin a ngen bawk.

Comments

Chhiar Hlawhte