Inthlanna a Duty hri kai boral ralna hlan a ni

Bihar inthlan-a Mizoram atanga IR Police duty zinga tel leh nikum Nov. 23-a COVID-19 vanga boral R. Hrangthanga, Thenzawl chu Bihar Election Department chuan zangnadawmna cheng nuai 30 a pe.

Bihar Joint Chief Electoral Officer (Joint CEO) chuan tunhnai khan Mizoram Joint CEO hnenah lehkha thawnin, R. Hrangthanga nupui hnenah zangnadawmna cheng nuai 30 pek a nih thu hi a rawn hriattir a. Election Commission of India chuan inthlana duty avanga COVID-19 vei, thih phah chhungte chu cheng nuai 30 zel zangnadawmna pek tur tiin thutlukna a lo siam tawh a ni.

Bihar inthlanna a kal heng IR Police te hian nikum November 12, 2020 khan Mizoram rawn thlengin an Swab Sample endik nghal a ni a, R. Hrangthanga leh a kalpui thenkhat te chuan COVID-19 hri an kai tih hmuhchhuah niin Serchhip Nursing School CCC-ah dah nghal an ni a, November 22-a Rapid Antigen Test hmanga a sample endikah a negative avangin chhuahtir nghal a ni a; CCC atanga a chhuah tûk, November 23 chawhma dar 11:05-ah PTS, Thenzawl-a a inkhunghranna ah a boral zui ta a ni.

R. Hrangthanga hi Nursing School CCC atanga chhuahtir a nih hma hian hri a kai tawhlo niin lang mah se a thih hnua a sample enfiah leh ah TrueNat-PCR hmangin hri a kai tih hmuh leh a ni a, a thih atanga ni 30-na, December 23, 2020-ah COVID-19 vanga thi a nih thu Mizo-ram sawrkarin a puang chauh thung a ni.