Chanchin thar thenkhat :

Memorandum thehlut

RT-PCR Lab. for Chhimbial chuan a rang thei ang bera RT-PCR Laboratory puitling din thuai turin nimin khan Medical Superintendent, Civil Hospital, Lunglei hnenah Memorandum an thehlut a. He hunah hian an thilphut pathum tar-langin, RT-PCR Laboratory a rang thei ang bera din puitlin a nih theih nan hma la tura an beisei thu te, kum khat dawn liamta June 15, 2020-a Lunglei tlawhtu mithiam rual (Expert Team) te nena Civil Hospital Lunglei-a RT-PCR Laboratory siam theih dan sawrkara an thehluh tawh chu a rang thei ang bera chak taka hma laa bawhzui tura an beisei thu leh, nikum-a Health Minister Dr. R. Lalthangliana'n National Health Mission sum hmanga RT-PCR khawl lei Lunglei-a dah tum a nih thu a lo sawi tawh chungchangah hma la zui tura an beisei thute an tarlang a. An beiseina te hi a rang lama tihhlawhtlin theih a nih loh chuan a tul dan ang anga hma an lak tur thu an hriattir nghal bawk.

CS in Meeting neihpui

Chief Secretary Lalnunmawia Chuaungo chuan COVID-19 hripui darh zel tur venna atana Sawrkarin inkharkhipna thupek a chhuah chungchangah nimin khan Mizoram Kohhran Hruaitute Committee (MKHC), Joint NGO Coordination Committee leh Mizoram Business Coordination Committee (MBCo-C) hruaitute leh SEC Member te Meeting a neihpui a. He hunah hian Chief Secretary chuan mipuite hripui lakah an him tlan theih nan inkharkhipna hi pawhsei ala ngai rih tih sawiin, hei hi sawrkarin ama duhthu a ti a nih lo thu leh kiltin atanga an thlir hnuah loh theihlohna avanga tih a nih thu a sawi.

Special Package siam phut

Mizoram-a sumdawng pawl intelkhawm, Mizoram Business Corporation Committee (MBCo-C) chuan nimin khan ramchhunga inkharkhip a nih avanga harsatna an tawh chungchang sawihona an nei a, inkharkhip kalpui zel a nih dawn chuan Special Economic Pakage siam turin sawrkar an ngen nghal bawk.

Sawrkar chungah lawm

Mizo Students' Union (MSU) General Hqrs. chuan COVID-19 hri leng kara zirlaite zirna chhun-zawm zel dan tur a ngaihtuahna kawnga School Education Department Minister, Lalchhandama Ralte hnena School Admission Fees tihniam tura ngenna an thlen hnuah Sawrkar enkawl Government, Defit leh Grant-in-Aid School zawng zawng te Class XI Admission lak thar atana Fees 30%-a a tihniam chu lawmawm an tih thu sawiin, Sawkar thuneitute hnenah zirlaite leh nu leh pate aiawhin lawmthu a sawi tih an sawi a. Private leh Kohhran enkawl School te pawh a remchan dan anga Admission lak thar turah fees tihniam ve turin a ngen bawk.

Central YMA in lawmthu sawi

Central YMA chuan nimin khan thu-chhuah siamin COVID-19 hripui leng avanga zirna In kalpui hleih theihloh a ni laia Zirlaite harsatna hriatpuia Mizoram sawrkar in School Education Department hnuaia Class-XI zirlaite tan Admission Fee an hmanlai mek atanga zaa 30% a tihhniam a nih tur thu a puang chu lawmawm an tih thu an tarlang a, ‘Zirna Uar’ Kumpuan an neih laia sawrkar hmalakna lawmawm an tih thu an tarlang a ni. Hei bakah hian Higher & Technical Education Department hnuaia College leh zirna In te pawh zirlaite harsatna hriaa Admission Fee tihniam ve turin thuneitute an ngen bawk.

A thlawnin vaccine pe dawn; buhfai sem zel dawn

Prime Minister Narendra Modi chuan ramchhung State zawng zawngah COVID-19 vaccine a thlawna pek chhuah a ni ang tih nimin tlai a mipuite hnena thuchah a sawi ah a tarlang a, “Vaccine hi sawrkarin a leikhawm ang a, chu chu State-te hnenah a thlawnin sem chhuah a ni ang,” a ti. Prime Minister chuan Hripui leng chu khua leh tui, tumahin an tawrh sawrkarin a phallo tih sawiin, June 21 atang chuan sawrkar laipui tumin kum 18 chung lamte chu hri danna pek kim vek an ni ang, a ti a. Pradhan Mantri-Garib Kalyan Anna Yojana (PM-GKAY) chu Diwali thlenga pawtseiin, November thla thleng hian mi vbc. 80 chuang hnenah thla tin a thlawnin buhfai pek an ni ang, a ti bawk.