Latest News

Health Minister hovin Hripui dona a hmalak dan thlirhona neih a ni

Nimin khan Health Minister Dr. R. Lalthangliana hovin Mizoram-a COVID-19 Second Wave thawk mek chungchang thlirhona neih a ni.

SAD Conference Hall-a he thlirhona hunah hian Medical Operational Team (MOT) on COVID-19 in COVID-19 Second Wave thawh chhunga Aizawl khawpuia hripui kai tam zualna Veng 14 an zirchianna report tarlangin, heng Veng 14-ah hian Sample 15,837 lak a ni a, chung zingah chuan hri pui kai mi 2522 an awm a ni. An zirchianna ah hian Hmai tuamna (mask) fimkhur taka vuah leh hmang tha zingah hripui kai pakhatmah an awmlo tih an hmuchhuak a, SOP tha taka zawmna Veng-ah hri an inkaidarh nasa lova. Hri kai zawng zawng zinga 85% hi chhungkua, thian intlawh tawn, chhungkhat laina intlawhpawh leh thenawmte nena intlawhpawh nasa an ni. COVID-19 Second Wave chhunga Aizawl khawpui Area a hri kai tam zualna Veng te chu Chhinga Veng, Saron Veng, Electric Veng, Bethlehem Vengthlang, Bawngkawn, Ramthar, Bethlehem, Dawrpui, Chanmari leh Tuithiang an ni.

IDSP report atanga a lan danin April 1 atanga June 7 thleng khan hri kai 9520 hmuhchhuah a ni a, heng zinga mi 1325 (April-ah 692, May-ah 609 leh June-ah 24) chu Mizoram pawn atanga lo lut an ni a. Hri kai tawh kawmhnaih atanga hri kai mi 5376 (April-ah 573, May-ah 3768 leh June-ah 1035) niin, hri kaina chhui ngai hi mi 2819 (April-ah 390, May-ah 1891 leh June-ah 538) an ni a. Hri kai hmuhchhuah zinga 56% hi symptom nei niin, 44% in symptom an nei lo a ni.

He hunah hian Home Isolation, CCC leh CCCC-a inenkawlte tun aia awmze nei zawka vil (monitor) dan turte pawh sawiho niin, heng hmuna damlote leh Doctor te inbiakpawh zung zung theihna tur ruahman tum a ni a. Doctor thiam rual chi hrang hrang, pension tawhte thlengin hripui kai damlote enkawl dan tur rang taka ngaihtuah zung zung tur, Scientific Study Team din a nih thu tarlan ni bawkin, COVID-19 hri kai ZMC-a Ventilator nena enkawl, dinhmun ziaawm deuh hlek, Ventilator mamawh tawh lo mahse Oxygen nena vil uluk la ngai si te dahna tur MINECO-a MRB Office sak thar pawh a satu Contractor ten MRB hnena an hlan chhawn veleh luah theih a nih tur thu tarlan a ni bawk.

He thutkhawm ah hian State Level Administrator on COVID-19, Chief Secretary ni bawk, Lalnunmawia Chuaungo chuan kum 18 - 44 inkar ten vaccine an lak kim theih nan theihtawp chhuaha tan an lak thu sawiin, hei hi an ngaih pawimawh ber a nih thu a sawi bawk.

Comments

Chhiar Hlawhte