TNT Camp-ah COVID-19 hri kai 528 zet hmuh an ni

Nimin khan Thutak Nunpuitu Team (TNT) Camp, Muanna Veng Aizawl-a awm te Sample enfiah sak niin hri kai 528 zet hmuhchhuah an ni a, nimin kha Mizoram-a ni khat-a hri kai hmuhchhuah tam ber ni a ni.

Thudawn danin June thla tir lam khan TNT Center-I a damlo pakhat chu Center-I hruaitu pakhatin Bike-a phurin damdawi In-ah a kalpui a. Hetah hian Rapid Antigen Test (RAgT) hmanga Sample an lo endik ah damlo zawk hi a negative laiin a hruaitu chu a positive thung a. Damlo hruaitu hi Aizawl Kanan Veng mi a nih angin, Kanan Veng 4C-ah dahluh nghal a ni.

Hetianga hri kai hmuhchhuah a nih avang hian amah hnaih thei awma ngaih te sample endik sak vek an ni a, hri kai hmuhchhuah erawh an awm belh lo thung a. Ngaihtha a an awm tawh hnu-ah he Camp-a awm hun hmang zo tawh, an chhungten an lakchhuah chu fimkhur thil-ah In an thlen hmain an Sample enfiah hmasa tura tih an ni a. Hetianga Sample an enfiah te hian hri an kai tak deuh zel avangin nimin zing khan TNT lama hotute chuan Health Minister, Dr. R. Lal-thangliana chu Phone hmangin an dinhmun hi an hrilh a. Minister hian hma lo la nghalin Medical Operational Team (MOT) Chairman Dr. ZR. Thiamsanga leh Dr. Pachuau Lalmalsawma te'n Trinity, Ebenezer leh Aizawl Hospital doctor leh nurse te nen TNT hi nimin chhun khan luhchilhin Sample enfiah hna hi thawh a ni ta a ni.

TNT Camp-ah hian nizan thleng khan Sample 989 enfiah niin hri kai mi 528 zet hmuh an ni a, hri kai te hi kum 2 leh kum 80 inkar te niin hri kai zingah hian taksa-a hri kai lanchhuahna nei an awmlo nia thudawn a ni a. Sawrkar chuan he Camp viltu tur hi COVID-19 Medical Operational Team kaihhruaina hnuaiah a ruat nghal bawk a ni.