Chhiah petu mipuite tan a tha nat thlak ta - Lalsawta

Congress Vice President Lalsawta chuan hri dona tura inrenchemna kawng sawrkarin hawi duh lova luhlul a chhuah tlat chu chhiah petu mipui tan a tha nat thlak ta hle tih a sawi.

Nimin-a thuchhuah a siamah Lalsawta hian, hripui lo lan tirh phat khan sawrkar laipui chuan Lok Sabha leh Rajya Sabha MP 700 chuang salary chu za a 30-in a tihtlem nghal thu leh, MP Fund pawh kum hnih chhung atan hman a phal lo nghal tih sawiin, ram ruhrel hmasawnna lam thawhna tur tam tak pawh he hripui do nana hmang nghal tura a tih laia, a lova awm theih, thla tina sum tam tak senna, SEDP hnuaia Board 14 te, MPSC awm reng laia Mizo thalai lehkhathiamte ti beidawng thei, Mizoram Subordinate Service Selection Board (MSSSB) te hi thiat a, thihna kotlanga mipui kan din tawh laia sum tam tak senna tur, Rawmi Mau supply leh PAHOSS-te pawh hi kaltlangpui lui lo turin a ngen a ni.

Lalsawta chuan, nikum June thla a MLA Zodintluanga Ralte-in a pek RT-PCR khawl hman theih lova vawiin thlenga a la awm chu pawi a tih thu sawiin, he khawl hi a rang thei ang bera sawrkar hian chhim lam mipui tana hman theih turin bun fel thuai turin phutin, tumah thlei hrang lo leh dim nei lo he hripui hi do turin party dangte pawh ring ngam a puitling taka do turin kan sawrkar a ngen a ni.