Tun dinhmun ah a hma aiin ZMC-ah COVID-19 damlo na zual enkawl ngai an tlem tawh

Mizoram-a COVID-19 hri kaite enkawl dan chungchang sawihona chu nimin khan Health Minister, Dr. R. Lalthangliana hovin SAD Conference Hall-ah neih a ni a, ZMC Doctor te chuan tun dinhmun ah a hma aiin damlo na zual enkawl ngai an tlem tawh tih an sawi.

He sawihona hunah hian Health Minister Dr. R. Lalthangliana chuan Mizoram-ah COVID-19 hri kai kan la pun belh zel rual hian kan ngaih pawimawh ber tur pakhat chu hri kaite nunna chhanhim a ni a, Doctor te leh Healthcare Frontline Workers ten theihtawp chhuaha tha leh zung tak meuh senga an thawh avangin Pathian in an thawhrimna mal a sawm a, State dangte nen khaikhin chuan kan dinhmun a la ziaawm hle a ni, a ti a. Nunna chhan tura an thawhnaah lawmawm a tih thu sawiin, tha thlah lova theihtawp chhuaha tang fan fan tura a chah bakah, Mizoram mipuiten an chungah rinna an nghat a ni tih a sawi bawk.

ZMC-a Doctor te chuan damlo an enkawl dan leh an buaipui dante sawiin, damlote an enkawlna kawnga damdawi an mamawh ang chi sawrkar-a an thlente rang taka ngaihtuah sak an nih avanga lawmthu sawiin, damdawi chan har leh man to tak takte sawrkarin a chah thlen sak chu an lawm takzet tih an sawi a. Tun dinhmunah a hma aiin damlo na zual enkawl ngai an tlem tawh tih tarlangin, damlote enkawlna tur bungrua leh hmanraw chi hrang hrangah thlaphanna tur a awm rih loh thu an sawi a, RT-PCR kit 7500 vel an la neih thu leh tunah hian an chah belh leh mek thu an tarlang a. ZMC-a COVID-19 hri kaite enkawlna tur Ward thar khum 30 awmna chu an hman tan tawh thu sawiin, tun dinhmunah khum 277 a awm mek thu an tarlang a, Ward dang pakhat, khum 30 awmna pawh kar hnih chhungin an peihfel leh hman an inrin thu an tarlang bawk.

COVID-19 hrin kaite zingah raipuar te an ngaihtuahawm bik tih he hunah hian tarlan a ni a, raipuarte chu Co-morbid anga ngaih an ni nghal a, an taksa in natna a do theihna (immune response) a chak loh bik avangin an na zual hma bik a, mi pangngai aia an thisen a khal/khang duh bik bawk avangin an fimkhur hle a ngai tih sawi a ni. Raipuarte tan COVID-19 vaccine lak thuai a that thu sawi a ni a, hemi chungchangah hian India rama damdawi lam mithiamte ngaihdan sawrkarin a lak tawh thu tarlan niin, Central sawrkar chuan reilote chhung lo ngaichanga formal communication lo nghak turin an rawn chah tih thu tarlan a ni bawk.

ZMC-ah COVID-19 hri kai raipuar mi 30 admit tawh an nih thu he hunah hian tarlan niin, an zinga 80% chu kum 20-34 in kar an ni a, a tam ber hi nau thla 8-9 inkar pai niin, an vai deuhthaw hian ICU ah dah nghal niin COVID-19 positive nau chunga thi mi 4 an awm tawh thu tarlan a ni a, ZMC a raipuar admit zinga 6.7% in nunna an chan a, COVID-19 hri kai dangte zinga 2.2% in nunna an chan a ni. Raipuar te himna ngaih pawimawh a nih vangin District Hospital zawng zawngah COVID-19 hri kai raipuarte nau neihna tur a bika siam Make-Shift Labour Loom siam tawh a ni a. Aizawl-ah raipuar COVID-19 hri kaite enkawlna tur bik ruahman mek a ni bawk.

Hei bakah hianCOVID-19 hri kaite leh hri kailo mipuite pawh taksa rim lutuk lova insawizawi emaw, chet kual emaw a pawi-mawh thu he hunah hian sawilan a ni a, Third Wave lo thleng tura sawi a nih avangin Mizoram State Health Care Scheme hnuaia inziaklutlo te tan inziahluh a pawimawha an hriat thu leh, hmun danga Health Insurance ti theite pawhin a Scheme a zira a theihna ang angah insurance policy ngaihven se a that thu tarlan a ni.

COVID-19 damdawi mumal tak a la awm loh avangin damdawi lei kawngah mipuite fimkhur se an duh thu pawh he hunah hian sawilan a ni bawk.