Inkharkhipna kalpui leh chhunga Serchhip-a Dawr inhawn theih dan tur ruahman a ni

COVID-19 hri leng avanga Total Lockdown kalpui mek chu tun thla ni 21 zing dar 4:00 thleng kalpui zui tura tih a nih hnuah Serchhip khawpui chhunga inkaihhruaina tur chu nimin khan District Bawrhsap hovin sawiho a ni a, Dawr thenkhat chu hun tam zawk inhawng thei turin ruahmanna siam a ni.

Serchhip District Disaster Management Committee leh Serchhip khawpui chhunga COVID-19 Lockdown kenkawh kawnga hnathawktu pawimawh thenkhat te chu nimin khan Serchhip DC Meeting Hall-ah thukhawmin inkaihhruaina hman tur chungchang hi an sawiho a. Bawrhsap, Kumar Abhishek chuan Serchhip khawpui ah hun engemaw chen hri kai hmuh a ni tawh lo chu VLTF leh dan kengkawhtu hrang hrangte, mipuite thuawih tlatna vangte a ni tih sawiin, lawmthu a sawi a. Mitin te chu tuna dan dinglaite tha taka zawma, COVID-19 laka himna dan (Appropriate behavior) te tha taka zawm chhunzawm zel turin a ngen a, tuna sawrkar inkaihhruaina dan siam sa te chu tha taka kan zawm chuan a him tawk a ni, a ti a. Chutianga kan kal chunga hri kai tharte kan lo la awm zel a nih chuan a umzui dan tur pawh sawrkarin ruahmanna fel tak a nei sa a, sawrkar ruahmanna hi i ring tawk ang u, a ti bawk.

He Meeting hian Serchhip chu tun thlenga boruak tha tak neia a kal theih zel rih avangin dawr nei-a eizawngtu, hun rei tak inhawng tawhlo te tana an dawr hawn hun tam deuh zawk ruahman sak tha an ti a. Sawrkar in thuchhuah a siam angin eichawp dawr te chu nitin zing dar 5:00 atanga zing dar 10:00 thleng hawn theih a ni anga, Bungraw hlanthlak (unload) pawh tlai dar 5:30 atanga zing dar 4:00 thleng tih theih a ni ang.

Zirlaibu zawrhna dawr te chu Thawh-lehni, Ningani leh Inrinni-ah hawn theih a ni anga, hmasawnna hnathawhna atana bungraw mamawh Rod, Cement leh a dangte zawrhna chu Thawhtanni, Nilaini leh Zirtawpni-ah hawn theih a ni anga, lirthei parts zawrhna te chu Thawhtanni, Nilaini leh Zirtawpni ah hawn theih a ni ang. Computer leh Mobile Phone zawrhna te chu Thawhlehni, Ningani leh Inrinni-ah hawn a ni ang. Heng bak dawr dang, Thingpui dawr telin hawn ngai a awm chuan VLTF ten kar khat-a vawi hnih hawn theihin ruahmanna siamin thingpui dawr te hi a dawrtu te a kal erawh a remlo thung a ni.