Posts

Showing posts from February, 2024

Latest News

Science & Mathematics Olympiad neih a ni

Image
Nimin khan Serchhip-ah Class VI atanga Class IX zirlai naupangte tan Science & Mathematics Olympiad neih a ni.

Serchhip Town in Khawpui Fai ber lawmman a lak lawmna Bawrhsap hovin neih a ni

Image
Kum 2023-a Mizoram Khawpui Fai inelna, Mizoram Cleanliness Competition 2023-a District Hqrs. zinga Fai ber lawmman Serchhip Town in a dawn lawmna chu nimin khan neih a ni a, he hun hi Serchhip District Bawrhsap David Lalthantluanga chuan hmanpuiin Town chhunga VC hrang hrangte hnenah lawmman a hlan bawk.

Jail-a tang mek te eizawnna neih dan tur zirtir an ni

Image
Serchhip District Jail-a tang mek te tana ‘Skill Development Training’ buatsaih chu nimin khan a hawnna hun hman a ni.

Pawl 12 zirlai ten HSSLC Exam an nei tan

Image
Mizoram Board of School Education (MBSE) buatsaihin kumin-a pawl 12 zirlaite tana Higher Secondary School Leaving Certificate (HSSLC) Exam chu nimin khan Mizoram hmun hrang hranga Exam Centre-ah te neih tan a ni a, Serchhip District-ah pawh HSSLC Exam Centre hi 9 awmin HSS 13-a zirlai ten Exam hi an bei a. Arts-ah zirlai 440, Science-ah zirlai 110, Commarce-ah zirlai 3 leh Vocational Education-ah zirlai 278 ten Exam hi an hmachhawn a ni.

SDC mi 2 in hna zawm thar

Image
 Mizoram Civil Service (MCS) Junior Grade atana lak thar te an awmna tur siamfal a nih hnuah Serchhip DC Office-a Sub-Deputy Commissioner (SDC) hna chelh tura ruat Dr. Marilyn Lalruatkimi leh Dr. C. Vanlalchhanhimi te chuan an hna an rawn zawm ta a, heti hian Serchhip DC Office-ah SDC mi pathum an awm ta a ni.

Hming pelut dang awm lo

March 15, 2024-a MNF General Hqrs. hruaitu thlanna neih turah nimin chawhnu dar 2:00 khan chuh tumte tana hming pekluh hun chu a tawp ta a, he inthlanna chuh tum hian Official Candidate tura chhawpchhuah te chauh hming pelut awmin heng te hi Vawiin hian enfiah a ni anga, chuhtu awm lova tling-a puan theih an ni ang.

ZPM Vice President-ah ruat

ZPM General Hqrs. hruaitu thlanna neih a nih hnuah President atana thlan thar Lalliansawta chuan Vice President atan VL. Zaithanzama (MLA) leh C. Lalnunnema te chu a ruat a, ZPM Inthlanpui-ah khan Vice President-ah W. Chhuanawma chu thlantlin niin heti hian ZPM-ah Vice President pathum an awm ta a ni.

Supplementary Demand pawm

Nimin-a Mizoram State Assembly Inkhawm ah sawrkar kum kal meka sum indaihlohna phuhrukna tura sum dil belhna, Supplementary Demand for Grants for the year 2023-2024 chu sawiho tura pharh a nih hnuah pawm a ni a, Chief Minister Lalduhoma chuan ‘The Mizoram Lokayukta (Amendment) Bill, 2024’ chu pharhin pawm a ni bawk. Nimin a Assembly thukhawm ah hian Agriculture Minister PC. Vanlalruata chuan zawhna chhangin kum 2024-2025 (Financial Year) chhungin kuthnathawktute tan sawrkarin ruahmanna chi hrang hrang a siam tih a sawi a. Sports Minister Lalnghinglova Hmar chuan, sawrkar hmasa a PMJVK hnuaia Sports Infrastructure lo din tawh, a ziak ang ngei a tha a ni em tih endik turin amah ngeiin hnathawh hrang hrangte tlawh a tum thu a sawi bawk a ni.

PRI – CBO Convergence zirho

Nimin khan Khawzawl-ah Panchayati Raj Institutions- Community Based Organisation (PRI-CBO) Convergence chungchang inhrilhhriatna neih niin District Bawrhsap K. Lalrohlua chuan a kaihruai a, PRI – CBO Convergence hian Village Council te leh Community Based Organi-sations (CBO) ten khawtlang hmasawnna leh thanna kawnga thawhhona tha an neih theih nana kaihhruai chu a tum ber a ni a. He Convergence hnuaiah hian CBO (Village Organisation, Self Help Group etc) ten Gram Panchayat Development Plan (GPDP) an buatsaih hnuaia Village Poverty Reduction Plan (VPRP) an siam chu ngaih pawimawh tur a ni bawk. Mizoram State Rural Livelihood Mission (MzSRLM) chuan National Research Organisation, Kumdumbashree te nen thawkhoin PRI-CBO Project hi Serchhip leh Mamit District-ah te a lo kalpui tawh a. Tunah hian RD Block 15 – Khawzawl, Serchhip, East Lungdar, Reiek, West Phaileng, Zawlnuam, Cham-phai, Khawbung, Hnahthial, Thingdawl, Bilkhaw-thlir, Tlangnuam, Thingsulthliah, Aibawk leh Kawrte-thawvengah te

Lawngtlai District-ah Malaria dinhmun thlirho a ni

Nimin khan Lawngtlai-ah District Task Force on Malaria Elimination leh District Level Task Force on Immunization thutkhawm neiin an District chhunga Malaria tih tlem dan turte sawiho a ni a. He huna tarlan a nih danin kum 2023 chhung khan Lawngtlai District-ah mi 47811 endik atangin Malaria vei mi 7915 hmuhchhuah an ni a, Malaria vanga nunna chan mi 6 awmin kumin chhung hian an District-a khaw 143-ah Thosi hlo kapin damdawi-a chiah sa Thosilen 1,05,537 sem tum a ni bawk.

RG Stadium-a Artificial Turf phah MSSC in hriatpui lo

Nikum-a Rajiv Gandhi Stadium, Mualpui-a Artificial Turf phah thara sum sen zat Mizoram State Sports Council in a hriatpui lo tih Sports Minister Lalnghinglova Hmar chuan Assembly House a hrilh.

Civil Hospital, Aizawl tihchangtlunna tur hawng

Health Minister Lalrinpuii chuan nimin khan Civil Hospital, Aizawl-ah Biometric Attendance, Medical Record Digitalization, CCTV, Hospital Pharmacy, Jan Aushadhi, Hospital Website, Online OPD Registration & UPI Payment, SMS Lab. Report, OPD Ticket Counter leh HIV Viral Load Machine te a tlangzarh.

District Council te chungchanga State sawrkar inrawlhna Assembly House-ah sawifiah a ni

District Council & Minority Affairs Minister C. Lalsawivunga’n Autonomous District Council (ADC) pathumte inrelbawlna chungchang ah Governor thupek ni lovin District Council & Minority Affairs Department a inrawlh hriat a ni lo tih a sawi.

Kawlphetha leina atan vbc. 33-37 vel hmang thin

P&E Minister F. Rodingliana chuan sawrkar in thla khat-ah kawlphetha leina atan cheng vbc. 33 atanga 37 vel a sen thin thu a sawi.

Myanmar ramri hung tumna leh FMR tihtawp duhlohna Official Resolution House-ah pawm a ni

 Nimin-a Mizoram Legislative Assembly thutkhawm ah Home Minister K. Sapdanga Official Resolution putluh, Myanmar ramri hung tumna leh Free Movement Regime (FMR) tihtawp duhlohna te chu lungrual taka pass a ni.

Mental Health Camp buatsaih

Image
Nimin khan Serchhip District Jail-ah Mental Health Camp neiin a thlawna inentirna buatsaih a ni.

Consumer Awareness nei

Image
Administrative Institute (ATI) leh Mizoram Consumer's Union tangkawp buatsaihin nimin khan Serchhip DC Conference Hall-ah Consumer Awareness Programme neih a ni a, he hunah hian MCU General Secretary Hmangaihzuala chu Resource Person atan hman niin Consumer Protection Act 2019 chhunga Consumer te dikna leh chanvo bakah Consumer ten harsatna hrang hrang an tawha thuneitute hnena an thlen dan tur te a zirtir a, kalkhawm te atanga zawhna awm te chhan nghal a ni bawk.

District Wildlife Crime Control Sub-Unit thukhawm

Image
Serchhip District Wildlife Crime Control Sub-Unit chu nimin khan an Chairman leh Serchhip SP MS. Dawngkima hovin a Pisa-ah an thukhawm.

Lirthei tlan hun bithliah

Image
Serchhip Sailiamkawn leh Serchhip District Park, Dawngzawl inkar-a lirthei tlan theih hun tur leh tlan theih loh hun tur ruahman thar a ni.

Pandal hlanna Inkhawm nei

Mizoram-a Kohhran Thalai intawhkhawmna lian ber, KTP General Conference vawi 60-na chu naktuk zan aang khian Ngopa Public Playground-ah neih tan a ni dawn a, he khawmpui neihna tur atana Pandal sak chu nizan khan a hlanna Inkhawm neih a ni. Presbyterian Kohhran-a thalai pawl, Kristian Thalai Pawl (KTP) General Conference hi Pathianni lo awm tur thleng khian neih tur a ni a, Thu leh hla hmanga inpawlhonate, Jubilee Concert te a awm dawn a. Khawmpui hmanna tur pandal hi a dung ft. 280 leh a vang ft. 180 a zau a ni a, mi 10,000 chuang leng tura ruahman niin hriat theih chinah Inkhawmpuia kal tur mikhual in report hi 20,967 an tling tawh a ni.

Police in mipuite thu rawn

Mizoram Police chuan tunhnaiah Delhi leh a chhehvelah hna leh sum kaihhnawiha inbumna a hluar hle tih sawiin, Delhi Mizo Zirlai Pawl pawhin January ni 30, 2024 khan mipuite hnenah thurawn an lo pe tawh tih an sawi a. Hetiang inbumnaah hian Mizo thalaite an inhnamhnawih tih hriat a nih thue leh hna tak tak hmuh hmain hna diltute'n cheng nuai 1 atanga nuai 2 inkar an pek lawk a ngai thin a, an thawhna tura an sawi chu Company pangngai tak ang thei turin ruahmanna pawh siam thin tih sawiin, Mizo thalai lehkha thiam hna zawng mekte an bitum nia hriat a nih thu an sawi a. Hetiang kawngah hian mipuite fimkhur turin thu an rawn bawk.

Supplementary Demands pharh

Nimin-a Mizoram Legislative Assembly Budget Session-ah Finance changtu Chief Minister Lalduhoma’n sawrkar kumthar atana Mizoram sawrkar budget a pharh rualin Financial Year kal laia sum indaihlohna avanga ruahman belhna, Supplementary Demands for Grants 2023-2024 cheng vbc. 3,287.93 chu a pharh nghal a, hei hi Vawiin hian sawiho a pawm turm a ni ang.

Inthlanpui atan training nei

Lok Sabha Inthlanpui neih tura inbuatsaihna kal zelah nimin khan Saitual District chhunga Sector Officer/Magistrate leh Sector Police Officer te tan Saitual DC Conference Hall-ah an hnathawh dan tur zirhona neih a ni a. ECI in kaih-hruaina a siam angin Saitual District-a Assembly Segment (Constituency) pathum chu Sector 15-ah then niin Sector khat hi Sector Officer/Magistrate pakhat-in a vil anga, Magisterial Power pek an la ni bawk ang.

Governor in hun hmanpui

Ephatha Society of Mizoram for the Deaf and Hard of Hearing leh Ali Yavar Jung National Institute of Speech & Hearing Disabilities (Divyangjan) te tangkawp buatsaih, Diagnostic & Fitment Camp for Hearing Impaired chu nimin khan Ephatha Special School, Kulikawn West-ah neiin Governor Dr. Hari Babu Kambhampati chuan khuallian niin a hmanpui a. Mimal thahnem ngai leh pawl thenkhat, mi harsa zawkte dikna leh chanvo humhalhna tura thawktute chungah lawmthu sawiin, Ephatha Society chu Beng hriatna lama harsatna nei te tanpuina kawngah rawng-bawlna zahawm tak tak an thawh avangin fakawm a tih thu a sawi bawk. Governor chuan pian-phunga mi dangte phak lo te pawhin zahawm tak leh mawihnai taka khawsak an phu vek tih sawiin, “Kan chhehvela kan hmelhriatte zingah pianphunga harsatna tawk an awm chuan tanpui kan inhuam tlang tur a ni,” a ti bawk. He hunah hian Governor hian beneficiary-te leh zirlaite hnenah Hearing Aids a sem a ni.

Champhai-a Experiential Learning Centre (ELC) din tur chungchang sawihona nei

Sawrkar Laipui-a Ministry of Information & Broadcasting sum cheng nuai 100 senga Champhai-a ‘Experiential Learning Centre’ (ELC) din tur chungchang chu nimin khan nimin khan District Bawrhsap James Lalrinchhana hovin sawiho a ni.

Sawrkar inrelbawlna ah hman tur zaa 82.97 tling

Kum 2024-2205 Mizoram sawrkar Budget pharh takah Budget pumpui atangin hmasawnna hna thar thawhna tur, Capital Expenditure chu zaa 17.03 a ni a, sawrkar inrelbawlna senso Revenue Expenditure chu zaa 82.97 ni tura chhut a ni.

Ban-a kaih Policy chungchang CM in sawifiah

Chief Minister Lalduhoma chuan Ban-a Kaih Policy chu thalai ten sem ni lovin Thawhrimna chu hlawhtlinna a ni tih an hriat theih nan hman tum a nih thu a sawi.

Budget-ah hmasawnna hna thawhna tur a pung

Chief Minister Lalduhoma chuan kum 2024-2025 chu sum renchem, sum dinhmun insawh nghehna kum a ni tih sawiin, chuti chung chuan hmasawnna hnathawh tur erawh a pun tho thu a sawi.

Langtlang leh rintlak taka sum leh pai enkawl ngaih pawimawh hmasak a ni dawn - Chief Minister

Chief Minister Lalduhoma chuan langtlang leh rintlak taka sum leh pai enkawl an ngaih pawimawh hmasak dawn thu a sawi.

Kum 2024-2025 atana Mizoram Budget ruahman cheng vbc. 14,412.12 chu House-ah pharh a ni

Assembly Budget Session neih mekah nimin khan Finance changtu Chief Minister Lalduhoma chuan kum 2024-2025 chhunga Mizoram sawrkar budget cheng vbc. 14,412.12 chu a pharh a, kum kal mek 2023-2024 a Mizoram Budget aiin cheng vbc. 202.17 (1.42%) in a tam zawk a. Revenue surplus cheng vbc. 564.95 awm tura beisei a ni.

ILP-ah thuchhuah siam thar

Image
Serchhip Police te chuan Serchhip District chhungah Inner Line pass (BERF Act, 1973) tha taka kenkawh a nih theihna turin mipuite hnenah thuchhuah an siam.

HSLC Exam neih tan a ni

Image
Kumin-a pawl 10 zirlaite tana High School Leaving Certificate (HSLC) Exam chu nimin khan neih tan a ni. Kumin a HSLC Exam hi Serchhip District chhungah chuan Exam Centre 11-ah neih niin Exam tura inziaklut zirlai 948 an awm a, heng zirlaite hian kar hmasa Nilaini khan Science Subject-ah Practical Exam nei tawhin nimin khan Theory Exam neih tan a ni a. Nimin khan Mizo Subject Exam in tun thla ni 29-ah English, March 4-ah Science, March 8-ah Social Science leh March 13-ah Mathematics te an Exam dawn a ni.

Rabung kawng sawiho a ni

Nimin khan Khawzawl-ah District Bawrhsap K. Lalrohlua hovin KM 33-a thui Khawzawl leh Rabung inkar kawngpui siamthat dan tur sawiho a ni. Rabung kawng hi kum 1987 vel a laih niin 1994 velah blacktop a ni a, hemi hnu hian mumal taka siam that a ni zui ta lo a ni. Rabung VC te chuan kawng hi tum hnih khat kawng chhe zual lai (pot holes etc) han hnawh zeuh zeuh a awm tih loh chu kum 30 vel zet enkawl mumal loh niin an sawi a. PWD lam chuan a theihna ang ang ah a siamna tur sum an zawn thu an tarlang a, NABARD-ah te pawh project siam a an thehluh thu leh a tlang loh thu an sawi thung a ni. He hunah hian Khawzawl DC chuan NABARD lam hotute a lo sawipui tur thu leh PWD chu Project lo siamtha tura in ruahman turin a chah a, he kawng siam thatna tur hian a theihna apianga hmalak a tum thu a sawi a ni.

GST Dan siamthatna tur Bill Assembly in pass

Mizoram-a Goods and Services Tax (GST) Dan hman mek siamthatna tur Bill chu nimin khan Assembly House-ah pawm a ni.

Inthlan atan hming pelut

Thla thar March 15-a MNF Genral Hqrs. hruaitu thlanna neih tura party Official Candidate te chuan nimin khan he inthlanna neih tura Returning Officer hnenah Nomination an File a, tun thla ni 28 tlai dar 5:00 thlengin he inthlan chuh tumte tan hian Nomination hi File theih a ni ang. He inthlanna chuh tura Nomination File te hi President-ah Zoramthanga; Sr. Vice President-ah Dr. R. Lalthangliana; Vice President-ah Lalchhandama Ralte leh Vanlalzawma bakah Treasurer-ah Lalruatkima te an ni. He inthlanna chuh tura hming pelut te tan hian Feb. 29 thlengin inhnuhdawhna hun hawn a ni a, chuhtu dang an awm dawn em tih erawh hriat a ni lo thung.

CM in Charkos hotute kawm

Chief Minister Lalduhoma chuan nimin tlai khan a Pisa-ah Mizo Nurse te UK leh Germany-a thawk tura training pe-a thawn thin Charkos hotute kawmin an hnathawh dan te a sawipui a. Chief Minister chuan Mizo Nurse, OET Eexam tuma beitu, sum lama harsatna neite chu Mizoram Youth Commission kaltlanga Hand Holding Policy hmanga sawrkarin a tanpui theih a rin thu a lo hrilh a. Hemi thila zirlaite harsatna hi ziaka a hnena thehlut turin a lo chah a ni. Charkos te hi Mizoram OET Coaching Hub (MOCH) ten an thawkho mek a, Charkos Co-founder Dr. Seema Baliyan chuan an hna-thawh dan hrang hrang CM hi a hrilhfiah a ni.

Ruang zawn tihtawp rel

Mamit District Disaster Management Authority nimin-a thukhawm chuan nikum kumtawp lama West Phulpui bul quarry chima tun thlenga ruang pakhat la hmuh zawhloh chu Official-a zawnna chu tihtawp nise an ti a, SLT Company lam chuan an remchan dan ang angin ruang hi la zawn chhunzawm zel se an ti. Hei bakah hian kumin Fur lo thleng tur atana inruahman lawkna'n District chhung mamawhna ang anga hman theih turin silpaulin lei ni se an ti bawk.

Skill Development for Prisoner

Siaha District Jail-a tang ten kutthemthiam thil an zirna tur, ‘Skill Development for Prisoner’ chu nimin khan District Legal Services Authority bultumin Siaha District-a Additional District and Sessions Judge leh Fast Track Court-a Judge Lalngaihmawia Zote chuan a hawng a, he Skill Development programme hi Siaha District Jail a an neih vawi khatna tur niin he programme atan hian Trade 4- Arts, Handicraft, Barber leh Electric Wiring-te thlan a ni a. Zirtirtu tur atan Jail Staff, Tang Convict tawh leh pawnlam mi te thlan an ni a. Jail tang te an chhuah hnua mahni ke-a an din theihna tura thiamna pek chu he hmalakna in a tum ber a ni.

Assam Rifles sawn thu ah MHA thu ngaichang mek

Home Minister K. Sapdanga chuan ZPM Member VL. Zaithanzawma zawhna chhangin Assam Rifles-te Zokhawsang-a an insawnchhuah chungchangah Ministry of Home Affairs (MHA) chhanna nghah mek a nih thu nimin-a Assembly Inkhawm ah a sawi a, Home Minister chuan, “Assam Rifle-te Zokhawsang-a an insawn-chhuahna tur atana tihtur zawng zawng hi Mizo-ram Sawrkar chuan a ti zo vek tawh a, Assam Rifles lam hian insawnna atan MoU sign nise an ti. Draft MoU an siam hi MHA-ah an thehlut a, chu pawh chu Mizoram Sawrkar chuan Comment hi ni 8.9.2023 khan a thawn thla tawh. MHA lam chhanna hi nghak mek a ni,” a ti.

Pu Zoramthanga uapna kan la mamawh - Tawnluia

MNF Sr. Vice President Tawnluia chuan, “Tun dinhmunah chuan Pu Zoramthanga uapna kan la mamawh,” a ti.

ZIDCO in Hand Holding hman tangkai an tum

ZIDCO Chairman JK. Dawngzuala chuan ZPM Policy, Hand Holding chu ZIDCO chuan tangkai taka kalpui an tum thu a sawi.

Tun sawrkar-ah Kuhva tawlhruk bag 2868 man tawh

Tun sawrkar kal mekah dan lova kuhva tawlh ruk bag 2868 man a ni tawh.

Mizoram-ah Police hna ruak 4268 a awm mek

Home Minister K. Sapdanga chuan tun dinhmunah Mizoram-ah Police hna ruak hnawhkhah loh 4,268 a awm tih a sawi.

PM-in Railways project Sairang-ah lo hmanpui a ni

India ramchhung hmun hrang hranga Rrailways Project hrang hrang 2,054 hna bultanna tur lungphum phumna leh hna thawh zawh tawh hawnna chu nimin khan Prime Minister Narendra Modi chuan neiin he hun hi Sairang Station-ah pawh lo zawm a ni.

India Vice President in Mizoram University Convocation vawi 18-na a hmanpui

Mizoram University Convocation vawi 18-na chu nimin khan neih a ni a, he hun hi India Vice President Jagdeep Dhankar chuan khuallian nia hmanpuiin MZU-a Chief Rector leh Governor Dr. Hari Babu Kambhampati bakah Chief Minister Lalduhoma leh Babasahep Bhimrao Ambedkar University-a Chancellor ni thin Prof. Prakash Bartunia te chu khualzahawm an ni.

Mizoram-a rawn zin India Vice President in Mizoram Assembly Member te hmaah thu a sawi

Mizoram tlawha rawn zin Vice President Jagdeep Dhankhar chuan nimin khan Mizoram Legislative Assembly Member te hmaah thu sawiin, Mizoram-a Assembly Session lo kalpui tawh dan te a lo en thu leh felfai leh zahawm taka an thu rel dan chu lawmawm a tih thu a sawi.

North Vanlaiphai tana tui lak hna thawh mek enfiah

Image
North Vanlaiphai khaw mipui tana tui thiang-hlim in tur lakna tura hnathawh kal lai mek, North Vanlaiphai Water Supply Scheme, Rawleihlawn Pumping chu tunhnai khan North Vanlaiphai Village Council leh North Vanlaiphai Joint YMA hruaitu ten a hmunah kala enfiahin, hna thawh tawh te tha an tih thu an sawi a, hna chak leh tha zawka thawk zel turin an ngen.

UPC Biak In sak thar hawng

Image
United Pentecostal Church (UPC) NEI Serchhip Electric Veng Kohhran Biak In sak thar chu Inrinni khan Aizawl East District-a Superintendent Rev. KVL. Hmangaihkima chuan Ribbon chep chatin a hawng a, hemi hnu hian Biak In thar lawmna Inkhawm chu bialtu Pastor Rev. C. Lalchhuanga kaihhruaiin neih zui nghal a ni. UPC Electric Veng Biak In thar hi cheng nuai 70 chuang senga sak niin kum 2012 atang khan sak tan a lo ni tawh a, a dung ft. 60 leh a vang ft. 48-a zau niin an Kohhran ah hian Member 250 chuang an awm mek a ni.

IKK Thalai Rorel inkhawm nei

Image
Isua Krista Kohhran (IKK) Thalai Pawl Mizoram pum huap Rorel Inkhawmpui vawi 6-na chu nimin Pathianni hmang khan IKK Pathian Biak In, Serchhip Chanmari Veng-ah neih a ni a, thupui atan ‘Inralrinna thu puang rawh u’ tih chu hman a ni. IKK Thalai Pawl Rorel Inkhawmpui hi Zirtawpni zan atang khan neiin Palai lawmna leh Report ngaihthlak a ni a, Inrinni khan nileng in rorel a ni a, Inrinni zan atang khan Rorel Inkhawmpui thupui hmang hian mi hrang hrangte hnen atangin thuchah ngaihthlak thin a ni. Tun tuma IKK Thalai Pawl Rorel Inkhawmpui-ah hian Mizoram hmun hrang hrang atangin Palai 250 vel an tel a ni.

PYD (Mz) Inkhawmpui nei

Image
Mizoram UPC-a thalai pawl, Pentecostal Youth Department (PYD) Serchhip Bial Inkhawmpui vawi 29-na chu Zirtawpni zan atanga nimin Pathianni hmang khan Zoar Biak In, New Serchhip ah neih a ni a, he Inkhawmpui-ah hian Speaker atan Pastor Lalhmunsiama (Ruantlang) chu hman a ni a, Inrinni khan Rorel Inkhawm neiin Inrinni zan atanga nizan thleng khan Speaker hnen atang hian Pathian thuchah ngaihthlak thin a ni.

Pavalai Pawl intawhkhawm nei

Image
Mizoram Presbyterian Kohhran hnuaia Kohhran Pavalai Pawl (KPP) Intawhkhawm chu nimin Pathianni hmang khan Pastor Bial hrang hrang ah neih a ni a, KPP Intawhkhawm hi Zirtawpni zan atang khan neiin Inrinni khan intihhlimna te neiin hun hman a ni. Serchhip-ah Pastor Bial hrang hrangah pawh KPP Intawhkhawm hi neih niin Serchhip Pastor Bial in Serchhip Bethel Kohhran-ah Intawhkhawm hi an nei a, New Serchhip Pastor Bial in Peniel Kohhran Biak In-ah Intawhkhawm hi an nei bawk a. Serchhip Vengchung Pastor Bial ten thla thar-ah an nei dawn thung nia thudawn a ni.

Health Care Bill ba la awm cheng vbc. 45.59; tun sawrkar kum-ah rulh vek tum a ni

Mizoram sawrkar-a Health Minister Lalrinpuii'n Health Care Bill ba cheng vbc 45.59 chuang rulh nana SEDP sum cheng vbc 40 ruahman sa hmangin Bill ba te tun sawrkar kum chhunga pekchhuah tum a nih thu a sawi.

MNF Official Candidate siam

MNF Party chuan thla thar March 15-a an Pary General Hqrs. hruaitu thlanna neih tur atan inbuatsaihna an kalpui zel a, he inthlanna neih tur atana din Nomination Committee chu Inrinni khan thukhawmin Official Candidate tur an siam a, hemi ang hian an President nilai Zoramthanga chu a Post ngai-ah awm lehin Sr. Vice President-ah Dr. R. Lalthangliana; Vice President-ah Lalchhan-dama Ralte leh Vanlalzawma bakah Treasurer-ah Lalruatkima te dah an ni. He inthlanna neih tur atan hian Vawiin atangin hming pekluh theih a ni dawn a, tunkar Nilaini thlengin hming pekluh hun hawn a ni ang.

Session chhunzawm dawn

Mizoram Legislative Assembly Budget Session neih mek chu Vawiin hian chhunzawm a ni leh dawn a, Vawiin hian chawhma dar 10:30 ah thutkhawm tanin hun hmasa darkar khat chu zawhna leh chhanna hun atan hman leh a ni anga, Committee lehkha pawimawhte House dawhkana dah a nih hnuah Assembly Financial Committee te inthlanna tur chungchang Motion chu Parliamentary Affairs Minister Vanlalhlana'n a pulut anga, Taxation Minister Dr. Vanlalthlana'n ‘The Mizoram Goods and Services Tax (Amendment) Bill, 2024’ chu House pawmpui turin a pulut bawk ang.

Tui bill tihsan tumna awm lo

PHE Minister Prof. Lalnilawma chuan Siaha bialtu MLA Dr. K. Beichhua zawhna chhangin tun dinhmun ah Tui Bill tihsan tumna a awm loh thu a sawi a. Greater Aizawl Water Supply Scheme Phase-III chu Tui pump nana Power Supply mamawh tun thla chhunga hmuh hman a nih chuan March, 2024 chhungin Electric khawl hmangin tui pump theih beisei a nih thu leh sawrkar hmasa a lo hawn tawh chu a enchhinna ang chauh a nih thu a sawi leh Diesel hmanga pump a nih thu a sawi bawk.

Solar Park 4 din tum mek

Mizoram sawrkar chuan Nizung chakna (Solar Power) hmanga khawlphetha Megawatt 45 pechhuak thei tur Solar Plant/Solar Park 4 din belh turin hma a la mek. Power Department hotute sawi danin Pamtul ram, North Vanlaiphai-ah Kawlphetha Megawatt 20 pechhuak thei tur Solar Plant din tura ruahman a ni a, Vantawng khaw-hmun ram, Thenzawl leh Keifang, Saitual ramah MW 10 ve ve pechhuak thei tur leh Sumsuih-a Dilkawn ramah Kawlphetha MW 5 pechhuak thei tur ruahmanna kalpui mek a ni bawk.

‘Mission UPSC’ tiin thlak

Mizoram Youth Commission (MYC) Chairman Malsawmzuala Ralte chuan Zirtawpni tlai khan Delhi-a Mizoram House-ah MYC in a enkawl UPSC Exam tura Delhi-a inbuatsaiha awm mek, Mizo thalai 10-te chu kawmin zanriah a buatsaih sak a, he hunah hian MYC Chairman chuan ‘Super IAS’ tih thin chu ‘Mission UPSC’ ti a thlak a nih thu sawiin, UPSC exam tura inbuatsaih mek te chu ‘ka thei a ni’ tih rilru pu a, an tih ve tur lam inbuatsaihnaah theihtawp chhuah turin a fuih bawk. UPSC exam tura inbuatsaih mekte pawhin MYC Chairman hnenah hian an harsatna tawh te lo hrilhin, MYC Chairman chuan a theih anga sutkian an tum tur thu a sawi bawk. He hunah hian Vision IAS Coaching Centre a zirtirtu Satender chuan Prelims Exam tura inbuatsaih dan leh hmachhawn dan tur kawng kawhhmuhin thu a sawi bawk a ni.

PM hun hman rualin Sairang-ah hun hmang dawn

Ramchhunga Rel chawlhhmun thar leh thuam thar 554 leh Rel kawng chunga kawngchhawng siam leh a hnuai lama siam 1,500 zet chu Vawiin hian Prime Minister Narendra Modi chuan hawngin lungphum a phum dawn a, Sairang Rel chawlhhmun-ah pawh hemi rual hian hmun hman ve a ni ang.

Mizoram-ah India Vice President rawn zin dawn

India Vice President Jagdeep Dhankar chuan Vawiin hian Mizoram a rawn tlawh dawn a, Vawiin vek chawhnu lamah Mizoram a chhuahsan leh nghal ang. Ruahman lawk dan chuan Vice President hian Mizoram University Convocation tum 18-na a hmanpui anga, hemi hnu hian Mizoram Legislative Assembly 9-na thutkhawm neih mek chhimin thu a sawi dawn a ni. Vice President hi Assembly Speaker Lalbiakzama'n lawmna thu sawiin House Leader Lalduhoma'n thu a sawi hnuah Vice President hian thu a sawi chhunzawm dawn a ni. Jagdeep Dhankhar hian Mizoram Assembly-ah thu a sawi a nih chuan India Vice President zinga Mizoram Assembly House-ah thu sawi pahnihna a ni dawn a. March ni 10, 2022 khan khatihlai a Vice President M. Venkaiah Naidu chuan thu a lo sawi tawh a ni.

Khamrang leh Buichali inkar kawng siam dan tur en

PWD Minister Vanlalhlana leh Assembly Deputy Speaker Lalfamkima te chuan Inrinni zing khan Khamrang leh Buichali inkar kawng dinhmun enfiahin kawng chhe lai siamthat dan tur te an ruahman.

Jail-ah surprise checking nei turin thupek chhuah

Mizoram-a Jail hrang hrang 10-a Jail tang awm thei zat tura bituk chu mi 1,386 an nih laiin February 22, 2024 thleng khan tang 2,030 an awm a. Hetihlai hian Jail chhungah thil duhawm lo (Attemp to suicide etc.) a thlen thin avangin Surprise Checking nei turin thupek chhuah a ni.

Mizoram Excise & Narcotics Manual angin transfer leh posting kalpui a ni dawn - END Minister

Excise & Narcotics Department (END) Minister Lalnghinglova Hmar chuan Mizoram Excise & Narcotics Manual angin transfer leh posting kalpui a ni dawn tih a sawi.

Ruihhlo hmansual vangin mi 10 thi leh tawh

Mizoram-ah kumin chhungin ruihhlo vanga thi mi 10 an awm tawh a, kum 1984 atanga kumin thlengin ruihhlo vanga thi mi 1,820 an awm tawh a. Mizoram Police-te chuan nikum chhung khan ruihhlo chi hrang hrang cheng vbc. 49 chuang hu man an nei.

Damdawi hmanga chiah sa Thosilen Mizoram hmun hrang hrangah sem leh a ni dawn

Mizoram hmun hrang hranga semchhuah tur damdawi hmanga chiah sa Thosilen chu Inrinni khan Aizawl atangin vailiam a ni a, kumin March-April inkar hian Mizorama District 9-ah te mipui hman theih tura sem zawh hman tura hmalak mek a ni.

MNF inthlan turah Official Candidate tur ruahman

Image
Thla thar March 15-a MNF General Hqrs. hruaitu thlanna neih turah MNF Nomination Committee chuan Official Candidate tur an ruahman ta.

District Sports Committee thutkhawm neih a ni

Image
Serchhip District Sports Committee (SDSC) chu nimin khan an Chairman, Serchhip District Bawrhsap David Lalthantluanga hovin Serchhip DC Meeting Hall-ah an thukhawm.

MJA te rawn kir leh ta

Image
Zan khat riaka Kolasib Disrtict-a zin MJA Serchhip District Member te chuan nizan khan Serchhip an rawn thleng leh ta a. Serchhip District-a MJA member mi 8 te hian niminpiah zing khan Serchhip chhuahsanin Thingdawl khuaa Horticulture Centre of Excellent chu an tlawh a, helai hmuna hnathawktu ten an hnathawh dan hrang hrangte chipchiar taka lo hrilhin, helai hmuna thlai chi hrang hrang chin tur enchhin hna an kalpui dan bakah thlai tiak leh helai hmun atanga an thlai tharchhuah an tihral dan te an lo hrilh a. Rel kawng siam mek erawh khua in a zir tak loh avangin an tlawh thei ta lo thung a ni.

CM hnena thlen bawhzui nghal

Image
ZPM Serchhip Block hruaitute chuan tunhnai khan Bialtu MLA leh Chief Minister Lalduhoma chu a Pisa-ah hmuin tun maia Serchhip khawtlang mamawh nghal nia an hriat - Electric current chung-changte, Police indaihlohna te leh School building sak that ngai chungchang te an thlen thu an sawi a. Chief Minister hian a tul anga hma lak sak nghalin Serchhip Police indaihlohna phuhrukna turin mi 15 chu rawn dah nghal an ni tih an sawi a. School thenkhat sak that ngai leh Electric current siamthat ngai te pawh Department hotute leh Minister te be nghalin hma lak thuai a nih tur thu a sawi tih sawiin, sawrkar chungah an lawm thu an sawi bawk.

Lengpui-a NIT Campus din tura harsatna sawilang

Higher & Technical Education Minister Dr. Vanlalthlana'n Lengpui-a National Institute of Technology (NIT) Mizoram, Campus sak chung-changah Environment, Forest & Climate Change Department-ah cheng vbc. 22 chuang sum pek a ngaih avangin harsatna lian tak an tawk mek tih House a hrilh.

Nitin tui ML 28.77 pump thin

PHE Minister Prof. Lalnilawma chuan Aizawl khawpui chawm nan nitin tui million litre 28.77 pump thin a nih thu Assembly House a hrilh. Nimin-a Assembly Session-ah Aizawl West-III bialtu MLA VL. Zaithanzama zawhna leh zawh belhna dang a chhanna ah , PHE Minister chuan, tun dinhmunah Aizawl khawpuiah hian mihring 3,78,500 vel awm anga ngaih a nih thu a sawi a, tui thianghlim hnianghnar taka dawng turin Central Public Health & Environment Engineering Organisation Guidelines angin nitin Aizawl khawpui in tui thianghlim million litre 66.42 a mamawh ang a nih thu a sawi a, hetihlai hian nitin tui million liter 28.77 pump thin a nih thu a sawi a ni.

Saphu kawr-a sumdawng hrem

Aizawl District Judicial Magistrate chuan Saphu kâwrhmanga dan loa sumdawnna-a in-hnamhnawih mi pahnih David Lalthutiama (56), Ainawn Veng, Aizawl leh Lalvarsanga (33), Sakawrdai-te chu Rs. 10,000 chawi turin a hrem. Saphu kâwr hmanga dan bawhchhetute hi Sept. 15, 2023 khan Forest Department leh Wildlife Crime Control Bureau (WCCB) tang-kawp chuan manin, Wildlife (Protection) Act, 1972 hnuaiah thubuai an siam sak a, man an nih lai hian saphu kâwr kgs. 24.5 an lo kawl a ni. Forest Department Mizoram rohlu, kan ram-ngaw leh nungchate nasa lehzuala humhalh kawngah leh dan bawhchhetute zawnchhuah kawngah mipuite thawhpuina an ngen bawk.

Hlukhla Kut hmang

Laifate Kut ngaihhlut ber Hlukhla Kut chu nimin khan Lawngtlai-ah hman a ni a, he hun hi LADC-a CEM V. Zirsanga chuan hmanpuiin Hlukhla Kut-ah hian Hnam ziarang pholang thei zai leh lam te entir a ni a,  Lawngtlai District a hnam tenau dang te pawhin an hnam zai leh lam te an entir a, tualchhung zaithiam leh rampum huapa zaithiam langsar ten kalkhawmte an awi reng bawk.

Skill Training sawipui

Mizoram Youth Commission (MYC) Chairman Malsawmzuala Ralte leh Jonathan Lalremruata, OSD to CM te chu nimin khan National Skill Development Corporation Office-ah lengin Ved Mani Tiwari, CEO leh Mayank Bhatnagar, National Head State Engagement te nen an inkawm a, Mizo thalaite tana Skill Development Training buatsaih dan tur sawihoin, hmalak ho nise an ti a. Okhla Industrial Estate-a Mizo thalai Skill Training tura thawn theih dan turte pawh ruahmanna siam nise an ti bawk.

MP in Larsap-ah thlen

Mizoram Rajya Sabha MP K. Vanlalvena chuan nimin khan Governor Dr. Hari Babu Kam-bhampati chu Raj Bhavan-ah kawmin Kaladan Multi-Modal Transit Transport Project (KMMTTP) kawng sial mek chungchanga harsatna awmte sutkianpui turin a ngen a. Rajya Sabha MP hian KMMTTP kawng sial mek chungchanga harsatna hrang hrang Contractor chungchang te, Security leh Lei (bridge) chungchangte sawipuiin, an harsatna tawh te chu Governor a nihna angin External Ministry, Home Ministry leh Ministry of Road Transport and Highways (MoRTH) Government of India a thlen turin a ngen a ni. Governor hian a harsatna thlente tha taka lo dawng-sawngin Delhi a zin leh hmasak berah theihtawpa hmalak a tum thu a sawi a ni. He hunah hian KMMTTP chu Act East Policy hnuaia insum-dawnna kalkawng pawimawh tak a nih thu sawiin, hmanlai insumdawnna kalkawng (Silk Road) tharthawh leh theih an beisei thu tarlan a ni bawk.

Doctor hnaruak post 101 leh Nurse hna ruak 143 a awm

Health Minister Lalrinpuii'n Doctor hna ruak hnawh khah ngai post 101 leh Nurse hna ruak 143 bakah thawktu dang lak belh ngai tam tak a awm thu House a hrilh.

Sangha tharchhuah tlem chhan House-ah sawilang

Mizoram-a Sangha chi supply kawngah duhsak bik an awm thin avang leh Sangha note tam tawk loh avangin Sangha tharchhuah a tlem phah tih Fisheries Minister Lalthansanga chuan a sawi.

Assembly House-ah ‘The Mizoram Water Resources (Management and Regulation) Bill’ pass a ni

Mizoram Legislative Assembly Session neih mekah ‘The Mizoram Water Resources (Management and Regulation) Bill, 2024’ chu sawiho a nih hnuah pass a ni.

Hna zawng mek te rin ngam tur MPSC chhawpchhuah duh vangin MSSSB thiah a ni - Chief Minister

Chief Minister Lalduhoma chuan Mizo thalai hna zawng mek ten an rin ngam tur Mizoram Public Service Commission (MPSC) chhawpchhuah an duh avangin Mizoram Sub-Ordinate Service Selection Board (MSSSB) chu thiah a ni tih sawiin, MPSC thuamchak tum a ni tih a sawi bawk.

KEIMAHNI

MJA Serchhip District Member ten Vawiin leh naktuk ah Thingdawl-a Horticulture Department hmalakna leh Rel kawng siam mek te an tlawh dawn avangin naktuk leh naktip-ah te LENKAWL a rawn chhuak thei dawn lo a, mipuite hriatthiamna kan ngen e.

Mizo Infiamna hmanga YMA te inelna zawhfel a ni

Image
Serchhip Sub-Hqrs. YMA huamchhunga YMA Branch hrang hrangte Mizo Infiamna chi hrang hrang hmanga an inelna Serchhip-a neih chu nimin khan zawhfel a ni ta.

Truck 5 atangin Kuhva rah man

Image
Nizan hmasa khan East Lungdar Police Beat Post-a Duty te chuan Truck panga (5) atangin dan lova Kuhva rah hring phurh an man a, Custom Department kutah hlan an ni.

MPCC hruaitu thlanna nei

Mizoram Pradesh Congress Committee (MPCC) chuan niminpiah khan Aizawl Congress Bhavan Golden Hall leh Lal Thanhawla Auditorium-ah hruaitu thlanna neiin President atan Sr. Vice President nilai Lal Thanzara chu thlantlin a ni a, Vice President atan Lalnunmawia Chuaungo leh Treasurer atan Dr. Lalmalsawma Nghaka chu thlantlin an ni bawk. Heng bakah hian Executive Member-ah Hmeichhia 10 leh Mipa 50 thlan an ni bawk a, Office Bearer thlannaah hian Vote 1878 tlain Executive Member-ah Vote 859 a tla a, vote thi 15 a awm bawk a ni.

Resolution putluh tum

Chief Minister Lalduhoma’n Myanmar ramri hung leh zalen taka inkalpawhna tihtawp dodalna Official Resolution chu Assembly House-ah putluh tum a nih thu nimin khan House-ah a sawi a, ramri hung leh FMR tihtawp chu a duhlo takzet tih a sawi a ni. Hei bakah hian Chief Minister chuan ZPM Sawrkara Rs. 1/- hlawh-a mi an rawih te chu sawrkar hmasa Rs. 1/- hlawh aiin Mizoram tan a tangkai zawk dawn ni a sawiin, sawrkar hmasaa sum senralna tullo thenkhat te siamthat mek zel a ni, a ti a, a heklo thei ang berin kal an tum thu a sawi bawk.

Tar Pension tihpun tum a ni

SWD Minister Lalrinpuii chuan Tar pension tia hriat, Old Age Pension Scheme-a sum dawn thin tihsan tumna a awm thu Assembly House chu hrilhin, mi pakhat tan thla khatah Rs. 1000/- ni tura tihpun tum a ni tih a sawi a. Budget-ah mi 25,213 tan Rs. 30,25,56,000/- dah turin proposal thehluh a ni tih sawiin, Tar pension hi State sawrkar share chu September, 2023 thleng leh Central sawrkar share chu June, 2023 thleng sem chhuah tawh a nih thu a sawi bawk.

MP Inthlan thlirlawkna nei

Nimin khan Lawngtlai-ah District Election Officer Cheemala Siva Gopal Reddy IAS hovin District chhunga Sawrkar Pisa hrang hrang hotute thukhawmin Member of Parliament (MP) inthlanna neih tur chungchanga inbuatsaihna kalpui dan tur sawiho a ni a. DEO chuan Lawngtlai District-a MP Election felfai leh tluang taka kalpui a nih theih nan sawrkar Department hrang hranga thawktute nen thawhhona tha neih a pawimawh thu sawiin, chanvo rualkhai taka sem zai a nih theih nan thawktu hming la thehlut lo Department-te chu rang tak a bawhzui turin a chah a. Election chhunga mawhphurna pekte chuan chhuanlam siam a awl bik tum lo turin a chah bawk.

Vice President rawn zin tum

India Vice President Jagdeep Dhankar chuan tun thla ni 26 khian Mizoram rawn tlawh a tum a, nimin khan Chief Secretary Dr. Renu Sharma hovin Chief Secretary Conference Hall-ah Vice President lo dawnsawn dan tur hi sawiho a ni a, he hunah hian Vice President lo zin tur chung-changa mawhphurhna nei Department hotulu te an tel a ni. Vice President hi Mizoram University Convocation vawi 18-na MZU Multipurpose Hall a neih tur hmanpui tura rawn kal tur a ni a, Vice President lo zin tur kaihhnawiha Department hrang hrang mawhphurhna neite leh an tih tur chin bituk leh ruahmante chu thlirho a ni a, heng te hi tha tak leh felfai taka hlenchhuak turin Chief Secretary chuan Department hotulute a chah a ni.

Siaha-ah SSCMC/DISH thutkhawm neih a ni

Nimin khan Siaha-ah DDCMC/DISHA thutkhawm chu an Chairman leh Lok Sabha MP C. Lalrosanga hovin neih a ni.

Malaria tlemna zingah Kolasib District a tel

Kum kalta 2023 chhung khan Kolasib District-ah Malaria vei mi 29 hmuhchhuah niin Dengue vei mi 17 hmuhchhuah an ni bawk.

MYC Chairman leh OSD to CM in Minister an kawm

Mizoram Youth Commission (MYC) Chairman Malsawmzuala Ralte leh OSD to CM Jonathan Lalremruata te chuan nimin khan Union Minister of State for Skill Development, Rajeev Chandrasekhar chu Delhi-a a chenna In-ah hmuin MYC in Mizo thalaite tana Skill Development training a buatsaih theihna tura hmalak pui turin an ngen a. Rajeev Chandrasekhar chuan thalai a tam thei ang ber Skill Training pek a duh tih a sawi bakah, MYC atangin lehkha siam a, a hnena thehlut turin a ti a, lehkha a hmuh atanga darkar 48 chhungin a Team ten Aizawl an thlen nghal tur thu sawiin, anni nena sawiho hnuah Final mai tur a nih thu a sawi bawk.

Bungrua leh hmunhma hman tangkai loh sawiho

Adviser to Chief Minister (Implementation of Hand-Holding Policy) KC. Lalmalsawmzauva chuan nimin khan Khawzawl tlawhin sawrkar Department hotute nen District chhunga sawrkar bungrua/hmunhma hman tangkai loha awm mek (Non-Functioning Assets) chungchang an sawiho.

Ruang phurh dan turah inkaihhruaina duan mek a ni

Social Welfare Minister Lalrinpuii'n ruang phurh inkaihhruaina dan duan mek a nih thu sawiin, kum 2024-2025 Budget Estimate ah cheng vbc. 5 dah a nih thu House a hrilh.

Bill lak tawh, hna la thawh loh 30 vel a awm

Mizoram-ah Contract hna kallai Bill lak tawh, a taka hna la thawh si loh 30 vel a awm.

Sawhthing leina atan Budget-ah sum dah tum a ni

Tun dinhmunah sawrkar ruahman angin Sawhthing lei la ni lovin, sawrkar Minimum Fixed Rate-a lei turin Budget-ah dah tum a ni.

Free Movement Regime (FMR) thiah leh India leh Myanmar ramri hung tum duhlohna punkhawm nei

Mizoram-a tlawmngai pawl hrang hrang telna, NGO Coordination Committee Mizoram buatsaihin nimin khan Aizawl-a Vanapa Hall kawt-ah Central Sawrkar in Myanmar leh India ram mite Passport leh Visa tellova an inkalpawh theihna Dan, ‘Free Movement Regime’ a thiah tak leh India leh Myanmar ramri hung a tumna duhlohna punkhawm neih a ni.

Thlai thar pali lei tura intiam zingah Hmunphiah hring a tello tih CM in a sawi

Chief Minister Lalduhoma'n thlai thar pali lei tura mipui-a an intiam zingah Hmunphiah hring a tel lo tih Assembly House hrilhin, Land Resources, Soil & Water Conservation Minister Lalthansanga'n Hmunphiah chingtuten a hralhna kawngah harsatna an tawk tih sawrkarin a hria tih House a hrilh bawk.

Serchhip-ah Mizo infiamna hmanga inelna neih tan a ni

Image
Serchhip Sub-Hqrs. YMA huamchhunga YMA Branch hrang hrangte Mizo Infiamna chi hrang hrang hmanga an inelna tur, ‘Aizawl DD Mizoram Indigenous Games 2024 (Inter-Branch YMA Competition, Serchhip District)’ chu nimin khan Serchhip P&E Veng-a Leisekawt Mual-ah neih tan niin Vawiin hian zawhfel a ni ang.

Mizoram State Day vawi 37-na Serchhip-ah Bawrhsap hova hman a ni

Image
Mizoram State Day vawi 37-na chu nimin khan Mizoram hmundangte rualin Serchhip-ah pawh hman a ni a, he ni pual hian Serchhip DC Conference Hall-a hun hman a nih hnuah Serchhip Auditorium-ah ram tana tawngtai rualna hun, ‘State Day of Prayer” chu State Day of Prayer Committee buatsaihin hman chhunzawm a ni bawk.

END ten damdawi man leh

Image
Serchhip-a Excise & Narcotics Department chuan nimin khan Serchhip Dinthar Veng-ah Heroin nia hriat Hawng khat, gram 12.56-a rit an man leh a, a neitu nia hriat Vanlalfaka (21), Serchhip Dinthar Veng nia insawi pawh man nghal niin thubuai siam sak a ni.

Zirtirtu lak chungchanga a khaw mi leh Block chhung mite duhsak hi

Zirtirtu lak chungchanga a khaw mi leh Block chhung mite duhsak hi - Thlirvela

State 2 dincham lawmna nei

Mizoram Governor Dr. Hari Babu Kambham-pati chuan nimin tlai khan Raj Bhavan Durbar Hall-ah Mizoram leh Arunachal Pradesh State-te pualin Foundation Day lawmna hun a buatsaih.

Tuitla mi 2 ruang hmu ta

Niminpiah chawhnu dar 1:00 vela Bairabi Tlawnglui, Licheng kai-a chesual-a tui-a tla mi pahnih te chu nimin khan an ruang hmuh a ni a. Vanduaina tawk H Vanlalchhanchhuaha ruang hi zing dar 10:30 velah hmuh niin VL. Chhan-chhuaha ruang pawh chawhma dar 10:55 vel khan an chetsualna bul mai-ah hian hmuh a ni.

Chawlh theih thu thlen

Thla thar March 15-a MNF General Hqrs. hruaitu thlanna neih turah MNF Sr. Vice President Tawnluia chuan hruaitu nihna atanga a chawlh theih thu an President hnenah a thlen a. MNF President Zoramthanga chuan Sr. Vice President nen hian an chawlh theih thu an Party hruaitute hnenah a thlen ve leh bawk.

Session chhunzawm dawn

Mizoram Legislative Assembly Budget Session neih mek chu nimin-a chawlh a nih hnuah Vawiin hian chhunzawm a ni leh dawn a, Vawiin hian hun hmasa lamah Member hlui boralta te sunna hun hman a ni anga, hemi hnu hian zawhna leh chhanna hun hmangin Session tan ni-a Governor thusawi chungchanga lawmthu sawina Motion chu sawiho a pass tum a ni ang.

Rampawn-ah State Day lawm

Nimin khan khan Kolkata Raj Bhavan-ah West Bengal Governor Dr. C.V. Ananda Bose huaihawtin Mizoram State Day leh Arunachal Pradesh State Day lawmna hun hman a ni a, he hunah hian Kolkata-a Mizo sawrkar hnathawk awm te leh Mizo Welfare leh zirlai hruaitu engemaw zat an tel a. Mizoram aiawhin Joint Resident Commissioner Jacob Lalawmpuia leh David Z. Chongthu IRS ten thu an sawi a ni. Nimin vek khan Mizoram leh Arunachal Pradesh State Formation Day lawmna chu Telangana Governor Tamilisai Soundararajan-i chuan Hyderabad-a Raj Bhavan-ah a buatsaih bawk a. Hyderabad Mizo mi 60 bakah Dr Christina Z Chawngthu, IAS leh Dr Franklin Laltinkhuma, IAS Delhi te pawhin an telpui a ni.

War Memorial-ah pangpar dah

Mizoram State Day lawmna chikhat atan nimin khan 2nd Assam Rifles bul tumin Aizawl a Assam Rilfes War Memorial-ah Chief Minister Lalduhoma bakah Chief Secretary Dr. Renu Sharma, Director General of Police Anil Shukla, Col. Mukesh Sauhta, Commandant, 2nd AR leh Assam Rifles Officer dangte, Hav. Lalbiak-thanga, Padma Shri, World War Veteran leh Surg Lt. Cdr. Lalnuntluanga, Director, Sainik Welfare & Resettlement te chuan pangpar an dah a, Assam Rifles hotute chuan Assam Rifles chu Mizoram State peng pakhat an ni tih sawiin, State Day hi urhsun taka lawmin, ram tana nunna lo hlan tawhtute hriatrengna atan he hun hi buatsaih an nih thu an sawi a ni.

IGNOU Convocation vawi 37-na hman a ni

Indira Gandhi National Open University (IGNOU) Convocation Vawi 37-na chu nimin khan IGNOU Regional Centre, Selesih, Aizawl-ah neiin PWD Minister Vanlalhlana chuan a hmanpui a, thawhrimna leh taimakna rahchhuah Degree, Diploma leh Certificate zirlaite'n an dawng tur chu a lawmpui thu sawiin, damchhunga inzir reng tur kan nih avangin zirna chu duhtawksan mai lova inzir reng turin a chah a, an thiamna chu khawtlang tana a tha zawnga danglamna thlentu nise a duh thu a sawi bawk. Minister hian zirlai hlawhtlinna chang Master Degree 580, Bachelor Degree 561, PG Diploma 46, PG Certificate 5, Diploma 4 leh Certificate zirlai 47, an vaiin mi 1243 te hnenah Degree, Diploma leh Certificate a hlan a ni.

Mamit-a JNV Campus sak thar PM in a hawng

Mamit Luangpawl-a Jawahar Navodaya Vidyalaya, School Campus chu nimin khan India Prime Minister, Nadrendra Modi chuan biakhmuhtheihna hmangin a hawng a, hemi pual-a JNV School Campus-a hun hman chu bialtu MLA Er. H. Lalzirliana chuan a hmanpui bawk a ni.

Prime Minister in Mizoram mipuite chibai a buk

Mizoram State Day pualin Prime Minister Narendra Modia chuan Mizoram mipuite chibai a buk a, Mizote hnam ziarang danglam tak te, mipuite thinlung hlim leh mawi tak chu India mipuiten an chhuang tih sawiin, “Mizo mipuite hnam nunphung chu midangte ti phurtu, remna leh muanna kengtu a ni,” a ti bawk. President Droupadi Murmu, Union Home Minister Amit Shah leh Vice President Jagdeep Dhankar pawhin Mizoram State Day pualin Mizo mipuite chu chibai bukin, Mizoram mawizia leh hnam ziarang hausa tak nei a nih thu te an sawi bawk a ni.

Mizoram State Day vawi 37-na lawmna Governor leh Chief Minister hovin neih a ni

Mizoram State Day vawi 37-na chu nimin khan Aizawl-a Vanapa Hall-ah neih a ni a, he hun hi Governor Dr. Hari Babu Kambhampati chuan khuallian nia hmanpuiin Chief Minister Lalduhoma chu Khualzahawm a ni.

Supplementary Nutrition Programme kalpui mek