Lenkawl

Mizoram Board of School Education (MB-SE) buatsaih Mizo tawng-a ziak Pawl 11 Zirlaibu 4- Physics, Chemistry, Biology leh Mathematics te chu nimin khan School Education Minister Dr. Vanlalthlana'n Directorate of School Education Conference Hall, Aizawl-ah a tlangzarh a, National Education Policy (NEP) 2020 in tawng chi hniha zirna kalpui, a bik takin Mathematics leh Science subject-ah te a ngaihpawimawh em avangin MBSE chuan tawng chi hnih (Mizo leh English version) zirlaibu 'bilingual textbooks' siam turin kum 2022 atangin hma a la tan a. Academic Session 2023-2024 ah khan Mizoram pumah Science leh Mathematics bikah pawl 9 leh pawl 10-ah te bilingual version textbooks hman tan a ni a, MBSE hnuaia zirlaite chu India rama bilingual textbooks hmang hmasa ber an ni. Tunah hian pawl 12 Science leh Mathematics subject-te Mizo tawnga buatsaih turin buaipui mek a ni bawk. 

Lai Autonomous District Council (LADC) huamchhung Village Council (VC) 98-a Inthlanna chu tluang taka zawhfel niin ZPM chu party mal-a Seat leh VC la tam ber an ni.

Governor Dr. Hari Babu Kambhampati chuan nimin khan 2 Assam Rifles Complex, Zokhawsang-ah NIEDO Second Batch Coaching a hawng.

Aizawl District Court-a Special Judge (Prevention of Corruption Act) Dr. HTC. Lalrinchhana chuan State Bank of India (SBI), Mission Veng Branch-a Manager ni thin Lalkhomang Guite leh a thurualpui Sacred Heart Society neitu Gary T. Haokip te chu eiruk thubuaiah thiamloh a chantir a, karleh Thawhtanni-ah hremna puan a ni ang.

Chief Minister Lalduhoma chuan Remna Ni vawi 38-na puala MZP ten nimin-a hun an hman chu a hmanpui a, rambuai laia Hnam sipai nunna chan te kha ram tan an thi lem lem lo tih sawiin, “Mizoram an hmangaih avangin an Martar tak tak a, zah leh chawimawi an phu em em a ni,” a ti.

Finance Department changtu Chief Minister Lalduhoma hovin nimin khan Mizoram Institutional Finance & State Lottery kalpui mek dan leh tihhmasawn zel dan tur chu sawrkar mi pawimawh ten a Pisa-ah an sawiho.

MGNREGS hnuaia hmalakna thar ‘Project Rotling – Hmasawnna Rahbi Thar’ chu nimin khan Rural Development Minister Prof. Lalnilawma chuan tlangzarhin he Project vil zuina tur Portal leh MzSRLM hnuaia Self-Help Group te hlawhtlinna lehkhabu a tlangzarh nghal bawk.

Cooperative Society-a thawk thate hnena hlan thin ‘National Cooperative Development Corporation (NCDC) Regional Awards for Cooperative Excellence and Merit-2023’ chu nimin khan Cooperation Minister PC. Vanlalruata chuan Cooperative Society 3 te hnenah a hlan.

Mizoram State Project Monitoring Committee (MSPMC) chuan Lengpui Airport tihchangtlunna hnathawh hrang hrangte chu nimnpiah khan an enfiah.

Industrial Training Institute (ITI) Aizawl in kum 60 a tlinna, Diamond Jubilee lawmna chu nimin khan neih niin Labour Employment, Skill Development & Entrepreneurship Department Minister Lalnghinglova Hmar chuan khuallian niin a hmanpui.

School Education Minister Dr. Vanlalthlana chuan hmasawnna kalpui danah Science ngaihtuah a tul rualin Environment ngaihtuah tel a ngai tih a sawi.

Aizawl Municipal Corporation (AMC) Ward No. XIX By-Election neih a vote tlate chu nimin khan Aizawl DC Pisa-ah chhiar niin Zoram People’s Movement (ZPM) Candidate Dr. C. Malsawmtluangi chu thlantlin a ni.

Mizoram Cooperative Apex Bank (MCAB) Ltd. hotute chuan Apex Bank chu Mizo mipuite ta, a hlawkna pawh Mizo mipuite tel a nih thu sawiin, an Bank kaltlanga sum chevel reng reng Mizoram pawnah chhuak lovin State chhungah vek a virkual avangin an hlutna chu mipuiten hre thar zel se an duh thu an sawi.

Nimin khan Serchhip District-ah African Swine Fever (ASF) vanga Vawk thi 6 awm lehin Vawk 43 lai suat belh leh a ni a, Serchhip District-ah hian ASF hri leng hian zual lam ala pan zel niin a lang.

Mizoram Police te chuan nimin-a International Day against Drug Abuse & Illicit Trafficking pualin nimin khan ruihhlo an man sa thahnem tak an halral.

Lai Autonomous District Council (LADC) hnuaia Village Council Inthlanpui chu Vawiin hian neih a ni dawn a, nimin khan Inthlan buaipuitu turte pawhin an Duty-na tur hmun an pan fel tawh a ni.

Social Welfare Minister Lalrinpuii’n mumal taka ruihhlo do anih theih nan Mizoram Drug Policy siam mek a nih thu a sawi a, Jail tang te zinga ruihhlo ngai te enkawlna tur bakah naupang ruihhlo ngai enkawlna turah hmalak mek a nih thu a sawi bawk.

Mizoram State Agriculture and Allied Marketing Board-a Chairman leh Agriculture Minister PC. Vanlalruata chuan thlai thar lei leh hralh chungchanga an hmalak tawh chin leh hmalak an tum dan te nimin khan a puang.

Mizoram-ah damchhunga Jail tang tur (lifer) mi 56 an awm mek a, June 20, 2024 thleng khan Mizoram-a Jail hrang hrang 10-ah mi tang (prisoner) 1,889 an awm a, awm thei zat (jail capacity) aia mi tang tamna 503 a tling.

Lunglei Municipal Council Area huam chhungah Traffic Management mumal zawk a awm theih nan nimin khan LMC leh Local Council Chairman 23 ten Memorandum of Understanding (MoU) an ziak.

Mizoram Apex Handloom & Handicraft Cooperative Society Ltd. (MAHCO) Annual General Assembly vawi 45-na chu nimin khan neih niin Cooperation Department changtu Miniter PC. Vanlalruata chuan khuallian niin a hmanpui.

Home Minister leh UD&PA Department changtu Minister K. Sapdanga chuan nimin khan Aizawl-a Old Secretariat Building-a Integrated Command & Control Centre (ICCC) tlawhin an hnathawh dan te a enpui.

Mizoram sawrkar-a Minister Dr. Vanlalthlana chu sawrkar laipui-a mi pawimawh te dawrin New Delhi-ah a cham mek a, Vawiin hian Mizoram-ah a rawn haw ang.

Mizoram-a Village Council (VC) kalphung siamthatna tura rawtna, ‘The Mizoram (Village Councils) Bill 2024’ chungchangah inrawnkhawmna leh sawihona chu nimin khan neih a ni a. Village Council pakhat-a VC Member tam zawng chu mipui cheng zat a zira bithliah tura rawt a ni.

Thla nga kalta, January atanga May 2024 chhung khan Aizawl khawpuiah lirthei chetsualna avangin mi 13 an thi a, lirthei chetsualna thlen chhan ber hi a khalhtu fimkhur loh vang a ni.

Lok Sabha 18-na thutkhawm hmasa ber chu nimin khan neih tan niin Member thar te lakluhna hun hman a ni a, Protem Speaker atan Bhartruhari Mahtab chu nimin vek khan lakluh a ni bawk.

Aizawl khawpui chawmna atana Tui lakna khawl chhia chui siam that a la nih loh avangin nidang-a Tui pump thin zahve vel chauh tunlai hian pump chhuah theih ala ni a, he harsatna hi sutkian hun tur hriat a la ni lo.

Mizoram University (MZU) hnuaia Under-Graduate (UG) Exam Result chu nimin khan tihchhuah niin zirlai Exam zingah za zela 66.14 in an pass a, kum hmasa a pass za zela 76.86 aiin pass percentage a chhe zawk a ni.

Cyclone Remal avanga Mizoram-a chhiatna thleng enfiah tura rawn kal Ministry of Road Transport & Highways-a RO Adelbert Susng leh Team te chuan nimin khan Saitual District tlawhin Saitual District chhunga khaw pathum inkalpawhna, Tawizo - Maite Road, Dilkhan - Lungpher - Buhban Road leh Khanpui - Tualbung Road chhia te a hmunah an enfiah.

Nizan hmasa khan Lawngtlai Vengpui-a kangmei chhuakah In pakhat kangin mi pahnih in nunna an chan.

Indian Metereological Department (IMD) Aizawl Center chuan kumin hian Mizoram in ruahtui a dawng tam dawn nia hriat a nih thu an sawi.

Sawrkar Laipui-a sawrkar thar lakluh a nih hnuah 18th Lok Sabha thutkhawm hmasa ber chu Vawiin, June 24, 2024 hian neih a ni dawn a, July 3, 2024 thleng a awh ang.

Mizoram-a MLA-te’n an bial chhunga hmasawnna hna an thawhna tur MLA Local Area Development Fund chu kumin atang hian MLA pakhat zelin cheng nuai 200 an hmang thei tawh dawn.

Cyclone Remal avanga Mizoram-a chhiatna thleng enfiah tura rawn kal Inter-Ministerial Team te chuan hmun hrang hrang tlawh mekin he thlipui tleh in a tihchhiat thawmthat nan hian a tlem berah cheng vbc. 237.6 vel ngai tua chhut a ni.

Union Health Minister JP. Nadda chuan Zoram Medical College (ZMC) tana Special Package dilna thehluh tawh atanga 1st Installment cheng vbc. 170 chu pekchhuah thuai a nih tur thu Chief Minister Lalduhoma a hrilh.

Mizoram-ah ruihhlo hmansual avanga nunna chan mi 1852 an awm tawh.

Chief Minister Lalduhoma chuan State dangte dinhmuna ding ve phak turin sum leh pai mamawhna a sang nia sawiin, ‘Peace Dividend- siamsak kan mamawh tih a sawi a. A kaihhruai sawrkar chu Mizoram-a ‘Change’ thlentir tum tlat an nih thu a sawi bawk.

PWD Minister Vanlalhlana chuan nimin khan Mizoram Co-operative Apex Bank Ltd. (MCAB) Durtlang Branch a hawng.

Thla thar July 1, 2024 atang khian misual leh dan bawhchhiate hremna dan thar (Major Criminal Law) thar chu hman a ni dawn.

Horticulture Minister Prof. Lalnilawma chuan hmasawnna reng reng ‘Sustainable Development’ anga kalpui a nih loh chuan awmzia a nei thui thei lo tih a sawi.

Governor Dr. Hari Babu Kambhampati chuan Yoga hmanga taksa insawizawi chu hriselna a nih bakah ram leh khawtlang hrisel zawk siam kan tumna kawngah te pawh hmalakna pawimawh a nih thu te a sawi.

Cyclone Remal avanga Mizoram hmun hrang hranga chhiatna thleng rawn endiktu tur, Inter-Ministerial Central Team te chuan nimin khan Mizoram rawn thlengin hmun hrang hrang an tlawh bakah sawrkar mi pawimawh te an kawm nghal.

Zoram Medical College (ZMC)-ah Mizoram-a la zai ngai loh Thin (Liver) Cancer Zaipui hlawhtling taka tih a ni.

Chief Minister Lalduhoma leh Union Home Minister Amit Shah te chu niminpiah tlai khan New Delhi-ah an inkawm a, Union Home Minister chuan Cyclone Remal avanga chhawmdawlna ngaihtuah a nih tur thu hrilhin, Assam Rifles te chu an insawn ngei dawn tih a lo hrilh bawk a ni.

Mizoram State Cooperative Union (MSCU) Annual General Assembly vawi 35-na chu nimin khan Dawrpui Multipurpose Centre-ah neiin Cooperation Department changtu Minister PC. Vanlalruata chuan a hmanpui a ni.

Lai Autonomous District Council (LADC)-a MDC pakua-te chu nimin khan ZPM party-ah lawmluh an ni.

Sawrkar hnathawk aikal late chu ni 30 ralhmain an hna thawk chhunzawm tura hriattir niin, hna chhunzawm lo te chu dan loa chawl (unauthorised absence)-ah ngaih an ni ang.

Mizoram khaw pathum-a Kuhva chingtute chuan niminpiah khan Home Minister K. Sapdanga hmuin tunhnaia Joint Meeting an neiha an thurel te an thlen.

Sawrkar kum liamta 2023-24 chhung khan Aizawl-a Mizoram State Library tlawhtu 6110 awmin chung zinga 3048 chu zirlai an ni.

Aizawl Municipal Corporation (AMC) Mayor Lalrinenga Sailo chuan ZPM leh Congress Corporator-ten thil hrechiang tawk lovin an bei nia sawiin, Board of Councillors (BOC) zahawmna tihbawrhbanna ah an ngaih thu a sawi.

Governor Dr. Hari Babu Kambhampati chuan Mizo lehkhathiam hnam ten hriselna a pawimawh zia an hre chho zel tih sawiin, “Taksa leh rilru leh ngaihtuahna hrisel turin inzirtir uar nise,” a ti.

Mizoram State AIDS Control Society (MSACS) chhinchhiah danin October 1990 atanga March 2024 thleng khan Mizoram-ah AIDS vanga thi mi 5,021 an awm tawh.

Supply Minister B. Lalchhanzova chuan nimin khan Mamit-a District Civil Supplies Officer (DCSO) Office tlawhin Mamit District chhunga Centre hrang hranga thawktute nen an inkawm a, an hmalakna hrang hrangte zawtin, thawhhona tha tak nena hna thawk turin a chah bawk a ni. Mamit District chhungah hian Supply Centre 13 awmin DCSO Office-ah hian thawktu 18 an awm mek a, Mamit District Godown-ah hian thla 6 chhung daih Monsoon Stock a awm thu he hunah hian tarlan a ni bawk.

Mizoram sawrkar chuan Biometric Enrollment hmanga Myanmar raltlan te chhinchhiahna tur chungchangah Sawrkar laipui thuchhuak a nghah mek.

Legal Metrology Department in Champhai kaltlanga dan lova ramdang atanga Sikret lakluh nikum chhunga an man cheng nuai 20 hu zet chu nimin khan tihchhiat a ni.

Horticulture Fair, 2024 chu nimin khan Aijal Club Park-ah neih tan a ni a, he hunah hian District hrang hranga ‘Best Horticulture Farmer’ atana thlan mi 11 te hnenah chawimawina hlan nghal an ni.

Hri leng avanga harsatna tawk Industry ten chak zawka hma an sawn theihna tura sawrkar laipui duan, Raising and Accelerating MSME Performance (RAMP) leh Facilitation Cell hawnna chu nimin khan Chief Minister Lalduhoma hovin Aizawl Vanapa Hall-ah neih a ni.

School Education Minister Dr. Vanlalthlana chuan MNF Sawrkar laia Council of Minister-in ni 27.9.2023 a School 340 te dinhmun sang zawka a hlankai chu ni 18.6.2024-a Council of Minister thukhawm chuan en that leh an rel tih sawiin, dinhmun sanga dah phu tak takte chu dinhmun sanga dah turin an kalpui chhunzawm zel dawn tih a sawi bawk.