Mizoram-ah Hri kai thar 226 hmuhchhuah leh an ni

Mizoram-ah COVID-19 hri kai hmuhchhuah thar an la awm belh zel a, niminpiah khan Mizoram-ah Sample 3136 enfiah niin hri kai 226 hmuh an ni a, Sample enfiah atanga za zela 7.20 te chuan hri an kai a ni.

Niminpiah khan ZMC Laboratory-ah Sample 722 enfiah niin hri kai mi 41 hmuh an ni a, heng hri kai hmuhchhuah te hi Aizawl District a Sample lak vek niin Saron Veng-ah hri kai mi 26 zet hmuhchhuah belh an la ni a, midang te hi hri kai tawh nen inkawmhnaihna nei deuh vek niin State pawn atanga rawn lut pakhat leh State pawn-a zin tum Sample enfiah atanga hri kai tih hriat mi pakhat an awm bawk.

Mizoram District hrang hranga TrueNat Laboratory-ah Sample 319 enfiah ni bawkin heng atang hian hri kai mi 12 hmuh an ni bawk a, an zinga mi 9 te chu Lunglei District ami niin an zinga 7 te chu Lunglei khawpui chhung ami an ni. Siaha District-ah hri kai mi 2 leh Kolasib District-ah hri kai mi pakhat hmuh an ni bawk.

Niminpiah khan Rapid Antigen Test hmangin Mizoram-ah Sample 2095 enfiah niin hri kai mi 173 hmuh an ni bawk a, an zinga 99 te chu Aizawl District-a hri kai hmuhchhuah niin Central Jail-a tang te atangin hri kai 19 hmuh belh leh an ni a, Phunchawng-ah hri kai mi 14 hmuh niin Dinthar Veng-ah hri kai mi 10 hmuh an ni bawk. Heng bakah hian Kolasib District-ah hri kai mi 37 hmuh niin Lunglei District-ah hri kai mi 22 zet hmuh an ni bawk a, an zinga 21 chu Lunglei khawpui chhung ami an ni. Siaha District-ah hri kai mi 6 hmuh niin Hnahthial District-ah mi 5, Lawngtlai District-ah mi 3 leh Serchhip District-ah hri kai mi pakhat hmuh an awm bawk a ni.

Heti hian nimin thleng khan Mizoram-a COVID-19 hri kai hmuhchhuah chu mi 18,635 an tling ta a, nimin khan hri kai mi 220 te chu enkawl dam leh niin nimin thlenga hri kai enkawl dam chu 14,316 an ni tawh a, hei hi hri kai hmuhchhuah atamnga chhutin za zela 76.82 a ni a, tunah hian hri kai enkawllai 4232an la awm mek a ni.

Hri kai zingah nunna chan mi pahnih awm leh :

Nimin khan Mizoram-a COVID-19 hri kai zingah mi pakhat boral lehin Mizoram-ah hri kai zingah mi 88 an boral ta a ni. Nimin zing dar 8:00 khan R. Vanlalzuali (41), Edenthar Veng Aizawl chu ZMC-ah a boral ve leh a, ani hi June 17-a hri kai hmuhchhuah niin ZMC-ah enkawl nghal a ni a, nimin zing khan a boral zui ta a ni. Nimin chhun dar 12:00 khan Lalbiakthangi (61), Mission Vengthlang; Vairengte-a zin chu boral in Vairengte CHC-a Sample enfiah a nih hnuah COVID-19 hri a kai tih hmuhchhuah leh a ni bawk a. Heti hian Mizoram-a hri kai zingah mi 88 an boral ta a ni.