Remna Ni Pual - Pu Laldenga i fak ang u...

Remna Ni Pual - Pu Laldenga i fak ang u...

- K.Remruatfela

Remna leh muanna champha phâk vawi 35-na kan lo thleng leh ta reng mai a. Ram buai hrehawmzia leh runthlâk zia hre pha tute phei chuan kumkhua in a hlutzia an sawi bang tawh lo ang! Remna leh muanna a lo awm theihna tur hian kan mi hmasa ho te khan tha leh zung tam tak an sêng a, he ni lawmawm tak a lo thlen theihna tura beitute rilru-ah an châm reng a, keipawhin zahna chibai ka rawn buk thar leh a ni.

Remna leh muanna hi a hlut tehlul nen mi tam tak chuan a hlutzia hi kan chhùtfiah thiam tâwk lo deuh em aw ka ti thin a. Patling lungfing tawh zâwk, Mizo Union party hruaite thuchah an dawngsawng thiam ve ta maw tih tâk aruanga MNF tlâwm ni anga deuhsawhna rawngkâia thu kan chhak chhuak leh zeuh thin phei hi chu a tha lo ka ti thin hle! India Sawrkar nen inrema kan awm theih nana Pu Laldenga hnathawh hi a ropui takzet a. Kan Zoram nuam tak thin kha, tah leh thisen luanna hmun, rambuaia min hruailûttu a nih ang bawka remna leh muanna hmuna min hruai lêt lehtu a ni leh thei te hi a lawmawm zual hle a ni. Famkimlohna khawvela la chêng kan nih miau hrih avangin mihringte hi famkim rêng kan awm lova. Rambuaia min hruai lûttu Pu Laldenga ngei pawh hi famkimlo mihring a nih angin a hun kal tawhah tihsual tam tak chu a nei ang. Eiruk thubuai kaihhnawiha a hna atanga suspend tu, Mizo Union District Council Sawrkar laka inhrikthlâk nân leh Pu Ch.Saprawnga aia dinhmun sâng leh tha zâwka awm duh vanga zalenna kâwra hmangin beisei tak tak chuang si lovin independent policy a lo changchâwi pawh a ni thei a, nimahsela hriat zui sak reng hi thil tha ber chu a ni hran chuang hauh lo! A enga pawh chu lo ni ta tehreng se, inchhira, a do te hmaa huaisen taka a inlamlêt leh ngamna hi a fakawm em emna zâwk chu a ni.

Pu Laldenga pawlte kha Vawiin thleng hian Silai tung lovin ramhnuaiah la awm reng chu ni ta sela, kan retheih dan tur leh kan hrehawm turzia hi sawi ngam pawh a ni lo hial ang! Tin, amah ni lo, a hnuaia a sipaite duhthusam leh beisei angin Independent country lo ni ta tak tak phei ila chuan kan hnam a boral loh vek pawhin tute maw hnuaiah hrehawm taka kan kun tho tho a rinawm a. Heng thil lo la awm thei zawng zawng hmu tlang veka, kumkhuaa a sipaiten an kah hneh loh tur laka inphahhnuai vatna châng a hria te hi a ropui takzet a, India Union chhunga kan awm hi kan himna ber tur a ni tih hre theia finna thûk tak a nei lehzelte hi van lawmawm lehzual tehlul em! Heng a thil tih avang hian Pu Laldenga hi i fak mawlh mawlh ang u.

Kan hriat theuh angin “Buaina chhûm hi kiangin a mawi rih lo, tapa tlaini len a awl mang e” ti-a kum 20 leh thla 3 chhung lai tah leh hathialna hmuna kan awm hnuin, Mizoram chu India ram State 23-na ni turin India Constitution Art. 371G-ah ziahluh fel thlap a lo ni ta a. Chumi a inremna thuthlung, Memmorandum of Settlement an tih Point 13 lai nei chu MNF leh India sawrkar aiawh te chuan Dt. 30.06.1986 zân dar 9:00 khân an ziak fel ta a. India sawrkar aiawhin R.D.Pradhan, Home Secretary of India; MNF Party aiawhin Laldenga, President MNF leh Mizoram sawrkar aiawhin Pu Lalkhama, Chief Secretary, Government of Mizoram chuan hming an sign hnan ta a. India danpui pawh a vawi 53-na atan siamthat niin ‘The Mizoram State Act, 1986’ (Act no 34 of 1986) tih chu a lo piang ta a. Chumi châng 4-na ang chuan Mizoram dinhmun thar pawh India Danpui Art. 371G-ah dahluh a lo ni ta a ni. Tin, The North Eastern Areas (Re-Organisation) Act 1971, chang 6-na angin U.T. kan nih laia ramri chu State ramri atana rin nghal a ni ta bawk a. India Danpui First Schedule - 11, entry 8-na awm thin Mizoram pawh khimi Schedule tho 1-na, entry 23-naah dah a lo ni ta bawk a. Tichuan, kahtih laia India Prime Minister, Rajiv Gandhi chuan ni 20 February, 1987 khan India rama State puitling 23-na ni turin a rawn puang ta a nih kha!

He inremna a awm theihna tur hian Pu Laldenga mai bakah Congress Party hruaitute pawhin nasa takin an bei a. Hetihlaia Mizoram Chief Minister Pu Lal Thanhawla chuan inremna atan a CM seat chu Pu Laldenga hnenah a hlan a, hemi rual hian Cabinet Minister Pu Liansuama, Pu Rokamlova leh Deputy Minister Pu Hiphei pawhin an dinhmun an kian bawk a, an fakawm hle a ni. He CM seat in kenna hi inremna kipui ber a ni kan ti thei ang. Tin, Remna Ni a lo thlen apianga a hming kan lam hmaih ngaih hauh loh tur chu Pu Lalduhoma, Serchhip Bialtu MLA hi a ni. Remna leh muanna a awm theih nâna Police Officer dinhmun awhawm tak kalsana India Sawrkar leh Pu Laldenga pawlte laka palai hna thawh a thlang zâwkte kha a van ropui tehlul em! A thawhrimna vang liau liaua remna leh muanna nei thei kan ni pawh ti ila kan sawi sual lutuk lovang.

Memmorandum of Settlement signed a nih khan rorel lai Congress Sawrkar leh MNF Sawrkar chuan Sawrkar intawm ‘Coalition Government’ an siam a. Amaherawhchu, thla 6 chauh an thawk ho hman tihin ni 16 February, 1987 khan Mizoram State Election hmasa ber neih a ni a. MNF chuan hneh taka Sawrkarna changin Pu Laldenga chu Mizoram Chief Minister hmasa ber a ni ta a. Harsatna ruam tam tak paltlanga, hetia a tum ram leh a duhthusâm a hlenchhuak thei ta mai te hi a ropui em em a. Chuvangin, Pu Laldenga hi chawimawi tlâk mi tum ruh, mahni nih tum hlenchhuahna tura risk sâng tak pawh la ngama bei hram hram thin mi a ni ka ti lo thei lo!