Posts

Showing posts from December, 2023

Latest News

Chapchar Kut hlut dan ngaihtuah a tul

Image
Mizo ten Kut chi thum kan neih zinga tun thleng kan la hmanlar ber Chapchar Kut chu kumdang ang bawkin kan lo hmang zo leh ta a, kumin hian Serchhip bikah chuan thil thar leh danglam lutuk awm lovin mipui ten an beisei thin ang ngeiin ‘Phullem chung ah’ Chapchar Kut hi kan hmang a, kan Mual in min dawl zoin kumdang-a harsatna kan tawh thin tam tak kan tawk lo thung niin a lang a, mipuite pawhin kan Phullem kan roh in kan dimdawi hle a, hetiang bawk hian sawrkar in mipuite tana hmasawnna hna a thawh te hi neitu rilru pu in enkawl ila, a tichhetu ni lo a a venghimtu kan nih zui zel hi a tul hle a ni.

Tualthattu damchhung tang tura hrem a ni

Image
Kumin May 16-a Chhiahtlang leh Bukpui inkara Lalsangzuala ruang chhar chungchang ah tualthattu a.puh Laldinthara chu damchhung Lung In tang tura hrem a ni .

Serchhip District-ah kum chhungin rannung seh leh Typhoid kai hmuhchhuah an tam hle

Image
Kumin January atanga November thla tawp thleng khan Serchhip District-ah rannung seh (Scrub Typhus) kai mi 1105 zet hmuh an ni a, hei bakah hian Typhoid kai mi 1170 hmuh ni bawkin kumin chhung hian Serchhip District-ah COVID-19 hri kai mi 15 hmuh an ni bawk.

Vietnam mi TNT-ah dah ta

Image
Kum 2020 kum-a East Lungdar VLTF ten an man Vietnam mi pakhat chu hun rei tak Ser-chhip District Jail-a enkawl a nih hnuah nimin khan Centre for Environment and Social Justice (CESJ) te chuan lachhuakin Thutak Nunpuitu Team (TNT) Camp, Zuangtui-ah dah a ni ang.

Hmeichhe Vote tla thatna MHIP te lawmman hlan an ni

Image
Mizoram Assembly Inthlanpui neih zawh taka Serchhip District chhunga Polling Station 88 zinga Hmeichhe Vote thlak thatna te MHIP Branch te hnenah nimin khan Serchhip District-a SVEEP Nodal Officer Lalnunmawii chuan lawmman a hlan.

Dan bawhchia mi 6 man

Image
Serchhip-a 'No Tolerance Drive/Checking' kalpui mekah nimin khan Serchhip Traffic Police te chuan Dan bawhchhia mi 6 man lehin heng mite pawisa chawi tlingkhawm chu Rs. 14,000/- a ni.

Buhfai-ah sawrkar in hma la

Supply Minister B. Lalchhanzova chuan Krismas leh kumthar vuakvet-ah mipui ten buhfai a harsatna an tawh loh nan sawrkar in theihtawp a chhuah tih nimin-a thuthar thehdarhtu thenkhat ten an kawmna ah a sawi a. Thla khata Mizoram in buhfai a mamawh zat chu Quintal nuai khat vel a nih thu leh Sawrkar laipuiin Subsidy a pek bakah Mizoram Sawrkar in thla tin buhfai leina atan cheng vbc. 7.11 vel a chawibelh thin thu a sawi bawk.

MLA in Press Club tlawh

Assembly Deputy Speaker leh Kolasib bialtu MLA Lalfamkima chuan nimin khan Kolasib Press Club tlawhin MJA Member te nen an inkawm a, mipui rorelna sawrkarah chanchinbu mite an pawimawhin, sawrkar tha dinna kawngah an thawhhlawk hle tih sawiin, MJA te chu ram leh hnam tan thahnem ngai taka thawk zel turin a chah a. Thu pawimawh hrang hrang an sawiho nghal bawk.

I&PR hotute Minister in kawm

Information & Public Relation Minister Dr. Vanlalthlana chuan nimin khan a Pisa-a I&PR Department hotute kawmin an hmalakna leh an hmachhawp te a sawipui a, I&PR Department chu sawrkar thuchhuah mipuite tana hriat tur tul te puangzartu leh zirtirna petu pawimawh tak a nih avangin thawktute chu inthlahdah lova ram leh mipui rawngbawl kawnga thahnemngai taka thawk turin a chah bawk. Hei bakah hian Mizo-ram dinhmun leh hmasawnnate State pawn lam mite tana entawntlak chindan tha leh mawite tarlan tam deuh deuh a pawimawh thu a sawi a. Ram leh mipui tana rawngbawl kawngah rinawm leh dik taka hmalak a nih theih nana theihtawp chhuaha hmalak ho zel a tul thu a sawi bawk.

AR hotu in CM a lawmpui

Chief Minister Lalduhoma chu nimin khan Brigadier Girish Upadhya, SM, VSM, DIG, 23 Sector Assam Rifle, Aizawl chuan a Pisa-ah hmuin lawmpuina a hlan a, Chief Minister chuan ruihhlo leh dan lova kuhva tawlh te dangchata titawp tur te, Zokhawsang-a Assam Rifles te an insawn pheina tur atana Mizoram sawrkarin tihtur a la neih ang angte ziaka a hnena thlen tur leh Zo-khawsang-a an ram paltlanga feh ngaiten an feh kawng ve tur an neih fel hma chu phal taka lo paltlangtir tur te in a chah a, Brig Girish Upadhya hian a theih anga a lo bawhzui nghal tur thu Chief Minister hi a hrilh a ni. Heng bakah hian Mizo thalai tam zawkte sipai-a an tan zel theihna tura thil pawimawhte an sawidun bawk.

Home Minister in Mizoram khawchhak lam District pathum tlawhin sawrkar hotute a kawm

Home Minister K. Sapdanga chuan nimin khan Saitual, Khawzawl leh Champhai District te tlawhin Mizoram khawchhak lam chu thil tha tam tak chhuahna a nih rualin, ruihhlo leh dan phalloh thil te luhna kawng lian ber a ni mek chu pawi a tih thu a sawi.

Serchhip-ah lirthei Dan zawm lo 43 man an ni tawh

Image
Kar kalta Nilani atanga Serchhip-a 'No Tolerance Drive/Checking' kalpui mekah Inrinni thleng khanDan bawhchhia mi 43 man an ni tawh.

Serchhip-ah Viksit Bharat Sankalp Yatra tan

Image
Serchhip District chhunga Viksit Bharat Sankalp Yatra neih tur atan Information, Education & Communication (IEC) Van chu Inrinni tlai khan Serchhip DC Office Tual atanga vailiam a ni.

Candidate te senso enfiah dan tur zirhona neih a ni

Image
Mizoram Assembly Inthlanpui neih zawh taka Serchhip District-a Candidate hrang hrangte sum hman dan enfiahna hnuhnung ber nei turin inbuatsaihna kalpui mek a ni.

Serchhip District-a Polling Station thenkhat sawn tura ruahmanna siam a ni

Image
Serchhip District chhunga Polling Station thenkhat hmun chu sawn tura ruahman niin Electoral Roll-a Section theknhat pawh siamrem a ni bawk.

Sialsir in Award lawmna nei

Image
Serchhip District chhunga Sialsir khua chuan ‘3rd National Water Award 2020 (North East Zone)’ a lawmman pakhatna an lak chu tun thla ni 14 khan Sialsir Community Hall-ah an lawm a, he hun hi Er. H. Duhkima, Director Project Management Unit (PHED) chuan khuallian niin a hmanpui a ni. He hunah hian Er. PB Lalnunsanga, SDO PHED chuan Sialsir khaw hmalakna tarlangin Samuel Lallawmzuala, District Coordinator chuan Award dawng tura an hmalakna te a tarlang bawk a ni. National Water Award hian Momento, Certificate leh Rs. 2,00,000/- keng telin kum 2019 khan Leng khua in an dawng tawh bawk a ni.

KTP ten thisen an pe

Image
Inrinni khan Serchhip District Hospital Blood Bank-a dah turin Serchhip Pastor Bial KTP te chuan thisen Unit 21 an pe a, thisen petute hi mipa 14 leh hmeichhia 7 an ni. Tun tumah hian Serchhip Pastor Bial KTP atang hian Hmar Veng Branch KTP in thisen Unit 8 leh Bethel Branch KTP ten Unit 13 an pe a ni.

S&G in Grand Camp Fire nei

Image
Serchhip District Bharat Scouts & Guides buatsaih ‘Grand Camp Fire’ chu Ningani zan khan LM Comprehensive Middle School Serchhip Darnam Veng-ah neih niin District Bawrhsap leh an President David Lalthantluanga chuan khuallian niin a hmanpui a, Scouts leh Guides ten an thiamthil hrang hrang an entir a ni.

Larsap in thilpek a sem

Mizoram Larsap Dr Hari Babu Kambhampati chuan a Discretionary Fund atangin Mizoram District 11-a Orphanage leh Charity Home 45 te hnenah Krismas leh Kumthar lawmna atan Rs. 10,000/- theuh a hlan a. Serchhip-ah pawh Old Age Home, Zoar Urban Deprived Children Home, Unity Orphanage Home, Adult Rehabilitation Centre leh Shalom Special School te Rs. 10,000 theuh hlan an ni ang.

CM in Krismas thilpek hlan

Chief Minister Lalduhoma chuan Chief Minister Discretionary Grant, 2023-24 atangin Mizoram chhunga Hospitals, Orphanages, Rescue Centres leh Home hrang hrang 90 te hnenah Krismas thilpek Rs. 2,41,000/- a pe a. Aizawl District-a hmun 25, Lunglei District-ah 13, Siaha District-ah 7, Lawngtlai District-ah 6, Champhai District-ah 8, Mamit District-ah 6, Serchhip District-ah 8, Kolasib District-ah 9, Saitual District-ah 2, Hnahthial District-ah 3 leh Khawzawl District-a 3 te hnenah pek an ni a, District tina Deputy Commissioner te kaltlangin hlan tur a ni ang.

CM lawmpuina hlan

Mizoram University Vice Chancellor Prof. Dibakar Chandra Deka chuan Zirtawpni khan Chief Minister Lalduhoma chu a Pisa-ah hmuin lawmpuina a hlan bakah Mizoram University in hma a sawn zel theihna tur thil pawimawhte an sawi dun nghal a Hemi hnu hian Project Puspak (BRO)-a Chief Engineer SP. Kolipey pawhin Chief Minister hi lawmpuina hlanin Mizoram a Border Road Organisation in hna a thawh tlangpuite leh hmachhawp an neihte a hrilhfiah a. Chief Minister chuan an kawng siamah khawchhung kawngte ngaipawimawh thin turin a lo chah bawk a ni.

Taxation Minister in kawm

Taxation Department changtu Minister Dr. Vanlalthlana chuan Zirtawpni khan a Pisa-ah Taxation Department hotute kawmin an Department chu Mizoram sawrkar tana sum hailuttu lian ber Department anih thu sawiin, tuna Sawrkar-in sum harsatna a tawh mek pawh ti ziaawm thei turin tan an lak a ngai tih a sawi a. Chhiah chu mipuite pek khawm, sumdawngten sawrkara an chhun ve leh chhawn anihna miputen an hriat a, chu sum tlingkhawm bawk chu mipuite leh ram hmasawnna atana hman leh thin anih thu hi mipuiten hrethiam se a duh thu a sawi bawk. He huna tarlan a nih danin an Department hi Zone 15-ah then niin Aizawl-ah Zone 4 leh District tinah Zonal Office an awm a, kum kal mek 2023-24 chhung hian November thla thleng khan Chhiah cheng vbc. 734.60 a lakhawm tawh a ni.

RD Minister hovin thukhawm

Rural Development Department changtu Minister Prof. Lalnilawma hovin Zirtawpni khan Secretariat Conference Hall No. 2-ah RD Department hmalakna hrang hrang- MGNREGS (ni 100 inhlawhna), PMAY-G (Mirethei Insak tanpuina), PMKSY-WDC, BADP, SAGY, SAU leh SIRD&PR hnuaia hmalakna leh hmachhawpte thlirhona neih a ni a. He hunah hian RD Minister chuan Sawrkar tharah chuan Corruption free sawrkar siam an tum thu sawiin, chumi atan chuan Department Officials te thawhho puiah a sawm a. Kuthnathawktute leh thingtlang mi harsa te dawmkan leh chawikan chu Department thil tum ber anih thu te, theihtawpchhuaha hna kan thawh a, Budget te tha tak leh dik taka kan hman chuan change kan siam theih ngei a beisei thu a sawi bawk.

Sawhthing leh Hmarcha lei turin inremna ziak

Inrinni khan CM Conference Hall-ah Chief Minister Lalduhoma hmaah Staunch Enterprise, Tinsukia, Assam leh Zawlnghak Farmer Producer Company leh Sialkal Farmer Producer Company te chuan Sawhthing metric ton 500 leh hmarcha metric ton 100 leina tur inremna an ziak.

Kumin ah Grape Wine siamchhuak hnem tawh

Champhai Winery atangin kumin, 2023-ah Grape Wine (Champ Wine) Case 4,360 siamchhuah tawh a ni a, Winery-ah hian Wine-a la siam loh litre 2,50,000 a la awm mek bawk.

Lokayukta in eiruk thubuai chhui tur 53 dawng tawh

Kum 2019 March 11-a Mizoram Larsap in Chairman a lakluh hnua a taka hna thawk tan, Mizoram Lokayukta chuan Vawiin thlengin eiruk thubuai chhui tur 53 a dawng tawh a, kumin ah thubuai chhui tur paruk a dawng tawh.

Viksit Bharat Sankalp Yatra neih tur atan Governor in District-a hman tur IEC Van a vailiam

Prime Minister Narendra Modi chuan Inrinni khan Mizoram tiamin ramchhung State 5 tan ‘Viksit Bharat Sankalp Yatra’ a tlangzarh a, he hun hi Mizoram atang pawhin Governor hova lo zawm niin sawrkar laipui in hemi atana Information, Education & Communication (IEC) Van a rawn pek chu Governor hian a vailiam bawk.

SOC hruaitu thlanna nei

Image
Serchhip Officers’ Club (SOC) chuan nimin khan P&E Rest House, Serchhip Bukpui-ah Advance Krismas hmangin kum 2024 chhunga an pawl hruaitu tur thlanna an nei a. President-ah Er. R. Zirsangliana (Sr. EE, PWD); Vice President-ah John Zorammawia (Lecturer DIET Serchhip); General Secretary-ah Samuel Saithuamliana (Lecturer GHSS); Secretary i/c Games & Sports-ah C. Lalengzauva (AO P&E); Secretary i/c Information & P:ublicity-ah Lalnunmawii (DIPRO); Treasurer-ah Lucy Lalrinpuii (DFDO) leh Fin. Secretary-ah Lalsiampuii (DCPO) te thlan an ni.

East Lungdar tharchhuah Serthlum vailiam a ni

Image
Serchhip District chhung East Lungdar khuaa Serthlum chingtu intelkhawm Zotui Orange Producer Company Ltd. in Serthlum an tharchhuah te chu nimin atanga Aizawl-a ‘Orange Road Show’ a zawrhchhuah turin nimin zing khan Serchhip Addl. DC Lalnundika chuan Serchhip atangin a vailiam.

North Zone M/ Sports-ah LFCS te an Champion

Image
Tunkar Thawhtanni atanga neih Serchhip North Zone Middle School Sports chu nimin khan Serchhip P&E Veng-a Leisekawt Mual-ah zawhfel a ni ta a, Middle School 5 intihsiak zingah Little Flower Convent School chuan point 134 hmuin an Champion a, pahnihna Presbyterian English School chuan point 68 hmuin pathumna All Saints School chuan point 57 an hmu bawk. He Zonal Sports-ah hian Israel Lalchhuansanga (Govt. M/S New Serchhip) chu Best Boy niin PC. Lalchhanchhuahi (Little Flower Convent School) leh C. Lalruatfeli (Presbyterian English School) te chu Best Girl an ni bawk. Tarlan tawh angin Serchhip North Zone huamchhungah hian Middle School 6 awmin he Sports-ah hian zirna In panga ten infiamna chi hrang hrang hmangin intihsiakna an nei a ni.

DIET in Faina hnatlang nei

Image
Nimin khan DIET Serchhip Eco Club huaihawtin Faina hnatlangpui neih a ni a, he hunah hian Serchhip Sailiamkawn atanga Serchhip Mat Phai, Zawlpui thlengin kawngpui kam-a bawlhhlawh chharfai hna an thawk a ni. He hunah hian DIET Serchhip-a Training lai leh Lecturer te telin Faina kawnga hmalak zel a tul zia inzirtirna an nei nghal bawk a. Mat phai panna kawngah hian bawlh-hlawh bag 50 vel zet an chharkhawm tih sawiin, mipuite pawhin khawlai leh kawngpui dung vawnfai a pawimawh zia hriain a hmun lo a bawlh-hlawh paih mai mai lo turin an ngen bawk.

SEDP Board te thiah an ni

Mizoram sawrkar-a General Administration Department (GAD) chuan nimin khan Mizoram-a Socio-Economic Development Prog-ramme (SEDP) Board thiahna thupek a tichhuak. Sawrkar thuchhuah a tarlan a nih danin Mizoram sawrkar chuan February ni 7, 2019 leh March ni 9, 2020-a din SEDP Board chu December ni 5, 2023 atangin thiah a nih thu an tarlang a. SEDP Board hnuaia Co-Terminus Staff zawng zawngte chu December ni 5, 2023 atangin ban vek an ni tih thuchhuak hian a tarlang bawk a ni.

Chhawrtui kum 50-na lawm

Khawzawl District chhunga awm Chhawrtui khua chuan meimit lova khua an luah champha kum 50-na lawmna leh khaw chhuak hawrunpui chu tun thla ni 12 atang khan an hmang a, he hun hi nimin khan Khawzawl DC K. Lalrohlua chuan khuallian nia hmanpuin cheng nuai 10 senga sak Chhawrtui Village Council House chu a hawng nghal bawk. Kum 1903 khan Lalburhna chuan a tum khatna atan Chhawrtui hi kaiin kum 1968 khan rambuai avangin Khawhai-ah sawikhawm an ni a, kum 1973 khan an khaw hlui-ah let lehin an luah chhunzawm leh a ni.

Minister in thawktute kawm

Social Welfare, Tribal Affairs, Women & Child Development Department Minister Lalrinpuii chuan niminpiah khan Secretariat Conference Hall No-2 ah Department hotute a kawm a, he hunah hian Social Welfare, Tribal Affairs, Women & Child Development hnuaia Central Scheme hrang hrang awmte leh Mizorama kalpui tawh dante, Project kal lai leh hmachhawpte ngaihthlak niin Department hotute chuan chak zawka hmalak a nih theih nana bawhzui tul angte leh pawimawh ni a an hriatte Minister hi an hrilh bawk. He hunah hian Minister hian kalkhawmte fuihna thu sawiin, an hmalakna hrang hrangte sawiho a ni bawk.

Adviser to CM-ah mi 4 ruat

Mizoram sawrkar chuan Mizoram-a MLA thlan thar mi 4 te chu ‘Adviser to the Chief Minister’ atan a ruat thar a, heng mite hi Minister of State Rank pek niin hamthatna dang pek belh a awm dawn lo a. Hrangturzo Bial atanga thlan Lalmuanpuia Punte chu Adviser to Chief Minister (Political) atana ruat niin Aizawl West-I bialtu MLA TBC. Lalvenchhunga chu Adviser to Chief Minister (Finance) atan ruat a ni a, Champhai North Bialtu MLA H. Ginzalala chu Adviser to Chief Minister (Technical) atan ruat a nih bakah Lawngtlai East bialtu MLA Dr. Lorrain Lalpekliana Chinzah chu Adviser to Chief Minister (Health & Family Welfare & Agriculture) atan ruat a ni.

Tang tlanchhuak man

Central Jail-a tang, damlohna avanga Green-wood Hospital-a enkawl a nihna hmun atanga kumin April 26-a tlanchhuak Vanlalvena, Aizawl Bawngkawn chu nimin khan Zokhawthar-ah man a ni a, thudawn danin Vanlalvena hi ruihhlo avanga man niin a thubuai ah hian thiamloh chantir a ni a, a damlohna avanga Damdawi In-a enkawl a nih lai hian a tlanchhuak a ni.

Damdawi In ah X-Ray khawl pe

Tuichang bialtu MLA hlui leh Deputy Chief Minister hlui Tawnluia chuan nimin khan a bial hlui Khawzawl District Hospital-ah Portable X-Ray khawl a hlan a, CMO Dr. Albert Lalhminghlua chuan a dawng a ni. He khawl hi Formosa Foundation atanga CSR Fund  atanga hmuh niin cheng nuai 12 man a ni a, nimin-a khawl hlanna hunah hian Tawnluia chuan Khawzawl Damdawi In tih hmasawnna atana theihtawp a chhuah thin thu sawiin, nimin-a hlan tak X-Ray khawl hi Health Department in phalna a pek, Dan ang thlapa lei a nih thu a sawi a. AERP Permission pawh tihfel a nih tawh thu leh Company mithiam ten installation an tih dawn thu a sawi bawk.

Hman khat daih Sarang hmang lo turin ngen

Mizoram Pollution Control Board chuan Krismas leh kumthar lawmna ah hman khat daih sarang leh a kaihhnawih te hmang lo turin mipuite an ngen.

MSME Cell atan hma la mek

Commerce and Industries Minister F. Ro-dingliana chuan MSME Cell ni 100 chhunga neih a nih theih nan hmalak mek a ni, a ti.

Ruang phurh sawrkar in mawh ah a la dawn

Health Minister Lalrinpuii chuan Social Security-a an policy atangin Mitthi ruang phurh sawrkarin a mawh-ah a la dawn tih a sawi.

Sawrkar in Faculty Grading System thar hman tum

Higher & Technical Education Minister Dr. Vanlalthlana chuan College Zirtirtute tehfung thar, Faculty Grading System chu Sawrkar thar in kalpui a tum thu a sawi.

Deputy Speaker atan Lalfamkima thlan a ni

Mizoram Legislative Assembly thutkhawm nimin-a neih ah Deputy Speaker atan Kolasib bialtu MLA Lalfamkima chu chuhtu awm lova thlantlin a ni.

Kum 15 hnuah Mizoram in Leader of Opposition a nei leh ta

Mizoram Legislative Assembly-a Leader of Opposition, Lalchhandama Ralte MLA chuan nimin khan Assembly Secretariat Annexe Building-a a Office  thar tur a luahlut a, Lalchhandama Ralte chuan Leader of Opposition dinhmun luah thei khawpa thlawptu MLA a nei tling chu lawmawm a tih thu sawiin, he dinhmun hi a awmna tura Pathian in a ruat a nih ngei a beisei thu leh ram leh mipui tan sawrkar khalh ngil tura theihtawp chhuah a tum thu a sawi bawk.

Ministry thar-a Council of Ministers thutkhawm hmasa ber Chief Minister hova neih a ni

Mizoram State Legislative Assembly 9-na a Council of Ministers thutkhawm hmasa ber chu niminpiah khan Assembly Recess Room-ah Chief Minister Lalduhoma kaihhruaiin neih a ni.

MSSSB in hna a lak mek zawh hunah thiah tur niin a tul anga MPSC thuam chak chhoh zel a ni dawn

Chief Minister Lalduhoma'n Mizoram Subordinate Services Selection Board (MSSSB) chu tun-a Exam an Conduct mek an zawh hunah thiah a ni dawn tih sawiin, Zohnahthlak raltlante chhawmdawl kawngah an phak ang tawkin hma an la zel dawn tih a sawi bawk. 

Adviser to the Chief Minister atan mi 4 ruat

Image
Mizoram sawrkar chuan Mizoram-a MLA thlan thar mi 4 te chu ‘Adviser to the Chief Minister’ atan a ruat.

Serchhip Photographers' Association kum 10-na lawm

Image
Serchhip Photographers' Association (SPA) chuan nimin khan an kum 10 tlin lawmna neiin kum 2024 chhunga hruaitu tur thlanna an nei.

No Tolerance Drive nei tan

Image
Serchhip Traffic Police te chuan nimin atang khan Serchhip khawpui chhungah ngaihhnathiamna tel lova Traffic Dan bawhchhiate enfiah runpui, 'No Tolerance Drive/Checking' an nei tan.

Serchhip-ah Heroin man

Image
Serchhip-a Excise & Narcotics Department te chuan nimin chhun dar 1:00 vel khan Serchhip Bazar Veng-ah Heroin Hawng hnih, gram 11.66 a rit an man a, a neitu nia hriat Zairimawii (33) d/o Thlakama (L) Tuikhuangtum, Thantlang District Myanmar mi nia insawi pawh man nghal niin thubuai siam sak nghal a ni.

MCS Officer te sawn

Serchhip DCOffice-a Election Officer (EO) Lalrinsanga Hnamte chu Aizawl lama awm tura sawn niin Home Minister Private Secretary in a awm dawn a, tunkar tawp khian Serchhip a chhuahsan ang. East Lungdar-a BDO Albert Vanlalruata pawh I&PR Minister Private Secretary hna thawk tura sawn a ni bawk a, an aiawh tur dah erawh an la awm rih lo thung.

Central YMA in mipuite hnenah ngenna an siam

Central YMA chuan Krismas leh kumthar lo thleng tur hlim leh lawm taka kan hman theih nan mipuite leh YMA Branch tin te chu theihtawpa tan la tlang turin an ngen.

Session zawhfel a ni dawn

Mizoram Legislative Assembly 9-na thut-khawm hmasa ber ni thum chhung awh chu Vawiin hian chhunzawma zawhfel a ni dawn a, Vawiin a thutkhawm ah hian tunhnaia boral Minister hlui Lalbiakzuala sunna hun hman a ni ang a, hemi hnu hian Deputy Speaker tur thlanna neih tur niin nimin tlai dar 3:30 thleng khan rorellai pawl, ZPM atangin Kolasib bialtu MLA Lalfamkima chauhin hming a pekluh avangin a ni hi chuhtu awm lova tlinga puan a nih rin a ni. Deputy Speaker thlanna neih zawh hian nimin-a Mizoram Governor in House chhunga thu a sawi chungchanga lawmthu sawina Motion putluh chu sawiho a ni anga, hemi hnu hian thutkhawm hi zawhfel a ni ang.

ASHA lawmman pechhuak

National Health Mission (NHM) Mizoram hnuaia Accredited Social Health Activist (ASHA) te lawmman hun engemaw chen atanga pekchhuah tawh loh chu nimin atang khan pekchhuah tan a ni tih kan thudawnna chuan a tarlang a. ASHA te hlawh pekchhuah rual hian National Health Mission (NHM) pawisa cheng vbc. 24.47 pawh nimin vek khan Treasury atanga pekchhuah a ni bawk nia thudawn a ni.

Planning Board Vice Chairman-ah Dr. Kenneth-a

Mizoram sawrkar chuan Mizoram State Planing Board Vice Chairman atan Dr. Kenneth Chawngliana chu a ruat thar a, Cabinet Minister Rank pek niin Cabiner Minister te hlawh leh hamthatna ang te a dawng thei ang. Dr. Kenneth Chawngliana hi Mizoram Legislative Assembly-a Speaker hlui niin ZPM Party Vice President nilai a ni.

Dy. Chief Whip ruat thar

Chief Minister Lalduhoma chuan Tuichang bial atanga MLA-a thlantlin W. Chhuanawma chu Deputy Government Chief Whip atan a ruat thar.

Health Minister in sawm

Health & Family Welfare Department changtu Minister Lalrinpuii chuan niminpiah khan Health & Family Welfare Department hnuaia Directorate hrang hranga hotute a Office Chamber-ah thutkhawm neihpuiin Health & Family Welfare Department hnuaia hmalakna leh hmachhawp hrang hrangte powerpoint presentation kaltlanga ngaihthlak a ni a. He hunah hian Health Minister chuan hriselna kawngah Mizoram in hma a sawn theih nan theihtawp chhuah a tum thu sawiin, hmachhawpte tihlawhtling turin Department hnuaia thawkte thahnemngai taka thawhpuiah a sawm a. Health & Family Welfare Department hnuaia thawktu zawng zawngte chu inthlahdah lo tur leh taima taka thawk tura chahin, theihtawp chhuaha thawk chhunzawm zel tura a ngen bakah kum nga chhung ngeia Mizoram Health Care System tidanglam dawrh thei tura thawhpuiah Health Department Official-te a sawm nghal bawk.

CM lawmpuina an hlan

Mizo Zirlai Pawl (MZP) General Hqrs. hruaitute chuan nimin khan Chief Minister thar Lalduhoma chu a Pisa-ah hmuin lawmpuina an hlan a, MZP hruaitute chuan hun reilote chhungin kalphung thar kan hmu nghal nia sawiin, “Zirlaite kan lawm em em a, mipuite pawhin an lawmin kan hria a ni,” an ti a, sawrkar thar hmalaknaah te lawmthu an hrilh bawk. Chief Minister pawhin MZP te chu an kal zelna turah duhsakna hlanin, ram hmasawnna hnathawh kawngah a tul ang zela sawrkar lo puibawm zel turin a sawm a ni.

Swadesh Darshan 2.0 Scheme-a hmalakna tur sawiho

Sawrkar Laipui Ministry of Tourism hnuaia Swadesh Darshan 2.0 Scheme kaltlanga Champhai District-a Tourism kawnga hmalak dan tur chu nimin khan Champhai-ah District Bawrhsap hova sawiho a ni.

Raltlan tana theihtawp chhuah chhunzawm turin ngen

MNF Party chuan Sawrkar hmasa in theih-tawp alo chhuahpui tawh angin kan unau raltlante tan theihtawp chhuah chhunzawm turin ZPM Sawrkar chu an ngenin an chah bawk.

MZP in MSSSB thiah ngawt an duh loh thu an sawi

Mizo Zirlai Pawl (MZP) chuan Mizoram-a sawrkar hnathawk tur latu pakhat, Mizoram Subordinate Service Selection Board (MSSSB) pawng thiah ngawt an duh loh thu an sawi.

MZP in NIT Mizoram-ah thil fello ram tak inphum ru a awm nia an hriat thu an sawi

Mizo Zirlai Pawl (MZP) chuan National Institute of Technology Mizoram (NIT Mizoram) in awp danah te, sum leh pai hman danah te leh thawktu lak danah te thil fello tam tak inphum ru a awm nia an hriat thu an sawi.

Sum inrenchemna kalpui tur Chief Minister Office atanga a hniam ber thlengin kalpui a ni ang - Governor

Mizoram Legislative Assembly 9-na thutkhawm neih mekah nimin khan Mizoram Larsap Dr. Hari Babu Kambampati chuan House-ah thu sawiin, sum inrenchemna kalpui tur chu Chief Minister Office atanga a hniam ber thlengin kalpui a ni ang tih a sawi.

Kumin ah Zu leh Heroin man tam tawh

Image
Serchhip-a Excise & Narcotics Department chuan kumin chhungin Rakzu litre 1500 chuang man tawhin Heroin pawh kg. hnih dawn an man tawh bawk.

Serchhip District-a Viksit Bharat Sankalp Yatra kalpui dan tur Bawrhsap hovin ngaihtuah a ni

Image
Nimin khan Serchhip-ah District Bawrhsap David Lalthantluanga hovin Serchhip District a Viksit Bharat Sankalp Yatra kalpui dan tur ngaihtuah a ni a, he hunah hian Serchhip District-a Sawrkar Laipui scheme kalpuitu Department te an tel a ni.

Damdawi In-ah thutthleng pe

Image
KVK Serchhip District Staff Welfare chuan niminpiah khan Khawlailung leh East Lungdar PHC-a hman turin Thutthleng sei (Bench) pali (4) ve ve an hlan a, hemi hmalam hian North Vanlaiphai CHC-ah thutthleng pali an lo pe tawh bawk a ni.

No Tolerance Drive/Checking

Krismas leh kum thar hunpui lo theng tur mi tinin dam leh hlim tlang taka kan hman theihna turin Vawiin atang hian Serchhip Traffic Police chuan Serchhip khawpui chhung hmun hrang hrangah Traffic dan bawhchhiate check/enfiah runpui 'No Tolerance Drive/Checking' an nei dawn a. Lirthei khalhtu zawng zawngte chu dan zawm a, fimkhur taka lirthei khalh theuh turin Serchhip Addl. SP chuan mipuite a hriattir a, dan bawhchhia te chu ngaihhnathiamna awm lo a hrem an ni ang.

School Games neih tan a ni

Mizoram Secondary School Games vawi 40-na chu nimin khan Aizawl khawpui chhunga Infiamna hmun hrang hrangah neih tan a ni a, tun tum Secondary School Games-ah hian Sports Discipline hrang hrang 6- Athletics, Badminton, Basketball, Football, Table Tennis leh Volleyball-ah te High School zirlaite an inel dawn a, Discipline hrang hrang hi hmun hrang hrangah nghah niin District hrang hrang 11 atangin zirlai leh zirtirtu 1000 vel an tel dawn a, Serchhip District atang pawhin zirlaite telin tunkar Zirtawpni ah zofel tura ruahman a ni.

ZLP hruaitu thlanna nei

ZPM Legislature Party Member te chu nimin khan Assembly ZPM MLA Recess Room-ah thukhawmin ZPM Legislature party hruaitu an la thlan fel loh te an thlang leh a, rawtna awm angin ZPM Legislature Party Secretary atan TBC. Lalvenchhunga (Aizawl West-I) leh Treasurer atan Lalchhuanthanga (Aizawl South-II) te thlan an ni. Tarlan tawh angin tun thla ni 5-a ZPM Legislature Party thukhawm chuan an Leader atan Serchhip Bialtu MLA Lalduhoma leh Deputy Leader atan K. Sapdanga te an lo thlang tawh bawk a ni.

Larsap in thu sawi dawn

Mizoram Legislative Assembly Session chu Vawiin hian chhunzawm leh a ni dawn a, Vawiin a thutkhawm ah hian Governor Dr. Hari Babu Khambampati chuan member te hmaah thu a sawi dawn a ni.

Assembly thutkhawm nei

Mizoram Legislative Assembly 9-na thut-khawm hmasa ber chu nimin khan neih tan a ni a, Vawiin leh naktuk-ah te chhunzawm a ni ang. Nimin-a Mizoram Assembly 9-na thutkhawm neih tan a nih hma chawhma dar 10:00 khan Assembly Conference Hall-ah MLA tharte pual inhlanna hun hman a ni a, he hun hi Parliamentary Affairs changtu Minister Vanlalhlana, Aizawl North-I Bialtu MLA ni bawk chuan kaihruaiin Synod Moderator Rev. R.Vanlalnghaka'n hunserh hmangin MLA tharte hlanna a nei a. Hemi hnu hian 9th Legislative Assembly thutkhawm hmasa ber chu Protem Speaker Lalfamkima kaihhruaina in neih chhunzawm a ni a. Member thar te lakluhna neih a nih hnuah Speaker thlanna neih zui a ni a. Legislature party hrang hrang aiawh ten thu an sawi bawk a ni.

CM in CM hlui nupui a tlawh

Mizoram Chief Minister Lalduhoma leh a nupui Liansailovi te chuan nimin khan Mizoram Chief Minister hmasa ber Ch. Chhunga (L) nupui Rothangi chu a chenna In, Aizawl Saron Veng ah a tlawh a, duhsakna chibai bukin pangpar an hlan a, Rothangi pawhin sawrkar tluang taka a kaihhruai theih nan duhsakna hlanin a lawmpui thu a lo hrilh a, Bungalow-a an luh hunah la tlawh ve ngei a tum thu a sawi a ni. Mizoram in UT a hmuh kum 1972-a UT Sawrkar a din khan Chief Minister hmasa ber chu Ch. Chhunga a ni a, he sawrkar a din lai hian tuna Chief Minister Lal-duhoma hi Chief Minister chuan Private Secretary ni tura ruatin he hna hi hun engemaw chen a thawk a ni. Mizoram Chief Minister hmasa ber Ch. Chhunga nupui Rothangi hi tunah hian kum 99 mi niinTu 41 leh tuchhuan 58 a nei mek a ni.

Minister hovin Horticulture Department hotute an thukhawm

Horticulture Department changtu Minister Prof. Lalniliana hovin nimin khan Horticulture Commissioner & Secretary Garima Gupta leh Horticulture Directorate-a thawk Officer te chu an thukhawm.

Kum 5 chhungin Electric Bill tihsan a ni dawn lo tih P&E Minister in a sawi

Power & Electricity (P&E) changtu Minister F. Rodingliana chuan kum 5 chhungin Electric Bill tihsan a nih dawn loh thu a sawi.

SCERT buatsaihin Poetry Festival hman a ni

SCERT-in kum 2011 atanga kum tina an hman thin ‘Poetry Festival’ chu kumin ah pawh hman leh niin nimin khan lawmman semna neih a ni.

Assembly Speaker atan Lalbiakzama thlan a ni

Mizoram Legislative Assembly 9-na thutkhawm hmasa ber nimin-a neih ah Speaker atan Chalfilh bialtu MLA Lalbiakzama chu chuhtu awm lova thlantlin a ni.

Mizoram Assembly 9-na thutkhawm hmasa ber neiin MLA hlawh tihpun a ni dawn lo tih CM in a sawi

Mizoram Chief Minister Lalduhoma’n sawrkar sum dinhmun a chhiat avangin inren taka kal a ngai dawn tih sawiin, hlawh tihpun a ni dawnlo tih a sawi a. Bial chhunga Department hmalakna tunhmaa MLA ten an hmuh ngai loh chu sawrkar tharah chuan MLA te hnen a thleng vek dawn tih a sawi bawk.

Serchhip Police in hmeichhia te humhimna dan an zir

Image
Social Welfare Department hnuaia Serchhip a One Stop Centre chuan nimin khan Serchhip a Police te tan hmeichhiate humhimna leh dikna chanvo inhrilhhriatna hun an buatsaih.

Boxing Hall tan thutthleng pe

Image
Serchhip Boxing Hall-a hman turin Serchhip District Police te chuan nimin khan Thutthleng sei (Bench) 15 an hlan.

Serchhip North Zone M/S Sports neih tan a ni

Image
Serchhip North Zone Middle Sports 2023 chu nimin khan Serchhip P&E Veng-a Leisekawt Mual-ah neih tan niin tunkar Ningani thleng neih tura ruahman a ni.

Assembly Session nei dawn

Mizoram Legislative Assembly 9-na sawrkar thar a din hnua Assembly thutkhawm hmasa ber chu Vawiin chawhma dar 10:30 hian neih tan a ni dawn a, ni thum chhung thutkhawm hi neih a ni ang. Vawiin-a Assembly Session neih tur hi Speaker atana ruat lailawk, Protem Speaker Lalfamkima chuan kaihruaiin Mizoram Legislative Assembly pakuana-a member thar te a lalut dawn a, hemi hnu hian Speaker thlanna neih a ni ang. Thudawn danin Vawiin-a Speaker thlanna neih turah hian chuh tura hming pelut pakhat awmin rorellai ZPM atangin Lalbiakzama chuan a hming a pelut a, hei vang hian chuhtu awm lova tling-ah puan a nih beisei a ni.

BJP in ZPM an lawmpui

BJP Mizoram Pradesh-a State Spokesperson K. Laldinthara chuan nimin khan Aizawl Press Club-ah thuthar thehdarhtute kawmin ZPM kaihhruai sawrkar thar kan neih ah Chief Minister Lalduhoma, Minister leh MLA te an lawmpuiin an lakah beiseina sang tak an neih thu a sawi a. “Zoram mipuite beisei ang ngeia hmasawnna kawnga min kaihhruai kan beisei a, chutianga hmalakna awmah chuan Mizoram Pradesh BJP chuan theihtawp chhuahpui kan inhuam reng bawk a ni,” an ti a. Central Scheme leh Programme chi hrang hrangte a nihna tur ang taka mipuiten kan chhawr theih tura hmala turin an beisei thu a sawi bawk.

CM leh CS te an inkawm

Mizoram Chief Minister thar Lalduhoma chu nimin khan Chief Secretary Dr. Renu Sharma IAS chuan a Pisa-ah hmuin an inkawm a, he hunah hian sawrkar thil pawimawh hrang hrang leh sawrkar tharin hma a lak dan ruahmanna te an sawi dun tih sawrkar thuchhuah chuan a tarlang.

MHIP in duhsakna an hlan

Mizo Hmeichhe Insuihkhawm Pawl (MHIP) General Hqrs. chuan kum 2023 Mizoram Legislative Assembly Inthlanpui neih zawh takah an hmeichhiatpui pathum- Lalrinpuii (ZPM, Lunglei East), Baryl Vannneihsangi (ZPM, Aizawl South-III) leh Prova Chakma (MNF, West Tuipui) thlantlin an ni chu an chhuang takzet tih thuchhuah siamin an tarlang a, “Ram rorelna khawl a hmeichhia te tana mellung pawimawh tak min siam saktu te hi an kal leh zelna turah leh ram rawng an bawlna turah duhsakna sang ber MHIP Gen. Hqrs chuan kan hlan a ni,” an ti bawk.

Hlawh pechhuak turin ti

Chief Minister thar Lalduhoma chuan nimin khan a Department enkawl Finance Department leh Planning & Programme Implementation Department hotute chu a pisa-ah meeting a neihpui a. Chief Minister duh danin sawrkar hnathawk ten November thla hlawh nimin thlenga an la lak loh chu pekchhuah nghal tura ruahman a ni a, Healthcare bill tang pek tur cheng vbc. 40 leh Thlai thar leina, sawrkar policy in a huam thlai palite leina tur cheng vbc. 110 an ruahman nghal bawk. Kum tina Zirlai naupang Scholarship pekchhuah hun tlai thin pawh kum thar atang chuan a hun taka pekchhuah theih dan dap turin a hrilh a. Budget thar ruahman tan a hun tawh avangin Budget an buatsaihnaah sawrkar sum dinhmun dik tak, a nihna ang taka dah chhuak turin a chah bawk.

Saitual-ah Bank te hmalak dan thlirlet a ni

Nimin khan Saitual-ah District Cconsultative Committee leh District Level Review Committee thukhawmin an District chhunga Bank hrang hrangte hmalak dan an thlirlet a. He hunah hian an District-a Bank te Security Guard duty indaihlohna a awm chungchangah Meeting Chairman leh Saitual District Bawrhsap chuan RO lamah ngenna siam se a ti a,CD Ration chu Bank thenkhat a that rualin Bank thenkhat ah a hniam thu leh tanlak dan turte sawiho a ni bawk a. Mutual Fund leh Insurance ah te tan lak a tul thu te, Kishan Credit Card(KCC) chungchangah Line Department te nasa lehzuala tan la thar leh hram turin an chah bawk.

Prime Minister in Viksit Bharat@2047: Voice of Youth a tlangzarhna Governor in a lo chhim

Prime Minister Narendra Modi chuan nimin khan Video Conferencing kaltlangin ‘Viksit Bharat @2047: Voice of Youth’ a tlangzarh a, he hun hi Mizoram Governor Dr. Hari Babu Kambhampati chuan Raj Bhavan atangin a lo chhim a. Hemi hnu hian MZU, ICFAI leh NIT-a Vice Chancellor leh Registrar te chu hmalak dan tur a sawipui chhunzawm nghal a ni.

Sawrkar thar-a Minister ten Pisa an luahlut tan

Mzoram sawrkar-a Minister hrang hrangte lakluh an nih hnuah Minister thar te hian nimin khan an Pisa an luahlut a, Pathian hnena inhlanna hun an hmang a ni.

MNF insiamtha vek dawn

MNF President Zoramthanga chuan kumthar ah an insiamtha vek dawn tih sawiin, “Tun inthlan result hi kan thatna tur zawka Pathian remruat a ni tih kan pawm a ni,” a ti.

Party atangin MDC 6 te bang

Chakma Autonomous District Council (CA-DC)-a MDC 6 te chuan an Party atanga banna an thehlut a, ZPM sawrkar din an tum nia thudawn a ni.

Ni 6 chhung awh tur Winter Festival 2023 cum Mega Exhibition hawnna Aizawl-ah neih a ni

Mizoram Tourism buatsaih ‘Winter Festival 2023 Cum Mega Exhibition’ chu nimin khan Aizawl-a Lammual-ah neih tan a ni a, Tourism Minister Lalrinpuii chuan hawngin he Festival hi ni ruk (6) chhung hman tur a ni ang.

Home Minister in Police hmunpui a tlawh

Mizoram sawrkar-a Home Minister K. Sapdanga chuan nimin khan Aizawl Khatla-a Police Headquarters (PHQ) tlawhin Police hotute a kawm a. Mipui in an beisei angte tihhlawhtlin an tum dawn thu a sawi bawk.

Sawrkar leh tlaka min ngaih theih nan tlak huamin hna kan thawk dawn - Lalduhoma

ZPM Leader leh Chief Minister Lalduhoma chuan ni 100 chhunga an tihtur an puan te khawng takin an kalpui dawn tih sawiin, “Ram mipuiin min enchhin a, min enchhin zel turin kan duh. Kan hnathawh atangin mipuiin min endik se, sawrkar leh tlaka min ngaih theih nan tlak huamin hna kan thawk dawn,” a ti.

Leimin in hnathawktu chhilh

Image
Inrinni tlai khan Serchhip Leisang Veng-a In sak lai-a lei tawlh thutin hnathawktu mi pahnih a chhilh a, vanneihthlak takin nunna chan lovin chhanchhuah an ni.

Serchhip-ah Lok Adalat in thubuai 16 an chingfel

Image
Inrinni khan ramchhung hmun hrang hrangah Lok Adalat thutkhawm neih leh niin Serchhip-ah pawh Lok Adalat thutkhawm hi neih a ni.

Boxing-ah Rahsi Veng Branch YMA an Champion

Image
Serchhip Boxing Hall-a khelh ‘Inter-Branch YMA Boxing Championship 2023’ chu Zirtawpni zan khan khelh zawh niin North Vanlaiphai Rahsi Veng Branch YMA te chu an Champion.

High School Quiz zofel

Mizo Zirlai Pawl (MZP) General Hqrs. buatsaih Aizawl Smart City Ltd. MZP Inter High School Quiz 2023 chu Zirtawpni zan khan zawhfel a ni a, a pumpui-ah St. Paul's Higher Secondary School chu pakhatna niin Rs. 30,000/- bakah thuziak leh trophy an dawng a, St. Joseph Higher Secondary School chu pahnihna leh CLS Academy chu pathumna an ni. MZP Inter High School Quiz hi kum 2010 atanga neih niin kumin hian School 13 an tel a, Zirtawpni zan-a hun hman hi MLA Lalmuanpuia Punte chuan a hmanpui a ni.

Raj Bhavan tlawh theih dawn

Mizoram Governor Dr. Hari Babu Kambhampati chuan kumin 2023 Krismas leh Kumthar 2024 pualin Governor chenna, Raj Bhavan chu mipuite tlawh theih turin hawn a ni leh dawn tih a puang a. Hemi ang hian kumin-ah December 24, 25 leh 26 bakah kumthar January ni 1, 2 leh 3-ah te hawn leh a ni dawn bawk a, heng ni tarlan ah te hian zing dar 10:00 atanga tlai dar 4:00 thlengin tlawh theih a ni dawn a. Main Gate i.e., Gate No. 1 (Northern Gate) atanga luh leh chhuah tur a ni ang.

YMA in hmalak bul an tan

Mizoram sawrkar in Central YMA a ngen angin Krismas leh Kumthar vuakvetah ruihhlo a zalen loh nan leh dan loa hnamdang sumdawngte dapchhuaka halpuah leh halmawite zawrh leh hman a nih loh nana hmalak tanna hun chu Inrinni zing khan Central YMA Zawlbuk, Tuikhuahtlang-ah neih a ni a. He hunah hian Central YMA Vice President leh Kumpuan Committee Chairman Prof. Lalnuntluanga chuan thu sawiin, Krismas leh Kumthar vuakvetah mipuite him leh thla-muang taka kan awm theih nan nasa zawka ruihhlo doa halpuah leh halmawi chhiatna thlen theite hman a nih loh nana hma la theuh turin Sub-Hqrs. YMA te leh Branch YMA zawng zawngte chu mahni huamchhung theuha hma la tura sawmin a ngen bawk a ni.

Naktuk-ah Session nei dawn

Mizoram Legislative Assembly 9-na thut-khawm hmasa ber chu naktuk, December 12, 2023 chawhma dar 10:30 hian Aizawl-a Assembly House-ah neih tan a ni dawn a, tun tuma thutkhawm hian ni thum chhung a awh ang.

Synod Inkhawmpui-ah Inkhawm tihtlem tlang lo

Presbyterian Kohhran rorelna sang ber Synod Inkhawmpui-ah Kohhran Inkhawm tihtlem rawtna lut chu a tlang ta lo.

YMA in tanpuina nuai 236 chuang dawng tawh

Central YMA chuan Myanmar, Manipur leh Bangladesh tualchhung buaina avanga Zohnahthlak te tanpuina atan cheng nuai 236 chuang dawng tawhin heng atang hian cheng nuai 167 chuang pekchhuah a ni tawh.

Lui-a bawlhhlawh lut thianfai turin Contractor hriattir

Mizoram Pollution Control Board (MPCB) chuan Tuirini lui nasa taka an tih bawlhhlawh avangin NHIDCL hnuaia Contractor pakhat chu an tih bawlhhlawh te thianfai turin an hriattir.

Mizoram-ah Viksit Bharat Sankalp Yatra lo zawm

Prime Minister Narendra Modi chuan Inrinni khan ramchhunga Viksit Bharat Sankalp Yatra te biakhmuhtheihna hmangin hun a hmanpui a, he hun hi Mizoram atang pawhin lo zawm ve a ni.

Mizoram Chief Minister thar Lalduhoma’n Chief Minister Pisa a luahlut tan ta

Image
Kum 1987-a Mizoram in State a hmuh hnua Chief Minister 9-na ni tura lakluh tak Lalduhoma chuan Aizawl Zarkawt Mc Donald Hill-a a Pisa thar chu Inrinni khan a luahlut a, Mizoram Kohhran Hruaitu Committee (MKHC) leh Mizoram People's Forum (MPF) OB te bakah Cabinet Minister leh Minister of State te leh a fanau ten an telpui a ni.

Kumin January - November thla chhungin Mizoram-ah Heroin kg. 142 chuang man a ni

Kumin-a thla 11 chhung, January leh November thla inkar chhung khan Mizoram Excise and Narcotics Department leh Police te chuan Heroin kg. 142 leh gram 496 manin Methamphetamine kg. 247 leh gram 54 an man bawk.

Thla 10 chhungin lirthei chesual-a thi 77 awm

Kumin January thla atanga October thla tawp thleng khan Mizoram-ah lirthei chetsualna ‘um 86 thlengin mi 77 in nunna an chan.

An intiam angin thlai thar chi 4 an lei dawn tih Chief Minister Lalduhoma’n a puang

Image
Mizoram Chief Minister thar Lalduhoma chuan nimin-a a kaihhruai sawrkar thar lakluh a nih hnuah thuthar thehdarhtute kawmin Mizoram Sawrkar sum dinhmun a that loh avangin Sawrkar kum thar lo thleng tur chu insawhngheh kumah an hmang dawn tih sawiin, an intiam angin thlai thar chi 4 an lei nghal dawn tih a sawi.

NSS ten thisen Unit 26 pe

Image
Nimin khan Brilliant Higher Secondary  School Serchhip-a NSS Unit te chuan damlo a mamawh apiangte hman atan Serchhip Blood Bank-ah thisen Unit 26 an pe a, thisen petute hi mipa 16 leh hmeichhia 10 an ni.

Thenzawl-ah Apex Bank Branch thar hawn a ni

Image
Nimin khan Serchhip District-a Thenzawl khua ah Mizoram Cooperative Apex Bank (MCAB) Branch thar leh ATM te chu mipuite hman theih tura hawn a ni.