Latest News

Pathianni-ah hri kai 131 hmuhchhuah belh an ni

Pathianni khan Mizoram-ah Sample 608 enfiah niin COVID-19 hri kai 131 hmuh an ni a, hri kai hmuhchhuah hi tlem deuh mah se Sample enfiah zawng zawng atanga zaa 21.54 te chuan hri an kai a ni.

Pathianni khan ZMC Laboratory-ah Sample enfiah awm lovin District hrang hrang TrueNAT Laboratory-ah sample 9 enfiah a ni a, heng atang hian hri kai pakhat hmuchhuah niin Aizawl District ami niin hri kai tawh nen inkawm-hnaihna nei a ni.

Pathianni khan Mizoram-ah Rapid Antigen Test hmangin Sample 599 enfiah a ni bawk a, heng atang hian COVID-19 hri kai mi 130 hmuhchhuah an ni a, an zinga mi 123 te chu Aizawl District ami an ni. Aizawl District-a hri kai hmuhchhuah zingah hian Bethlehem Vengthlang leh Dawrpui atangin hri kai mi 16 ve ve hmuh an ni a, Ramthar Veng leh Sairang Dinthar Containment Zone-ah hri kai mi 10 ve ve hmuh an ni bawk a, a bak hi Veng hrang hrang ami te niin Central Jail-ah nausen kum khat mi hri kai hmuhchhuah a ni bawk. Heng bakah hian Lunglei District-ah hri kai mi 3 hmuh niin Kolasib District-ah hri kai mi 3 bawk hmuh an ni a, Mamit District-ah hri kai pakhat hmuh a ni bawk.

Nimin thlenga Mizoram-a COVID-19 hri kai hmuh tawh chu 19,455 an ni ta a, nimin khan Mizoram-a hri kai 255 te chu enkawl dam ni lehin mi 15,295 enkawl dam an ni ta a, hri kai hmuhchhuah atanga za zela 78.61 niin hri kai enkawllai 4068 an la awm mek a ni. Nizan dar 9:10 khan Lalthangmawii (41), Electric Veng Aizawl chu ZMC-ah a boral leh thung a, heti hian hri kai zingah nunna chan mi 92 an awm tawh bawk a ni.

Comments

Chhiar Hlawhte