MLA in lirthei a pek Registration tihfel a ni ta

Lawngtlai West bialtu MLA C. Ngunlianchunga'n Mizoram State Cancer Institute (MSCI), Zemabawk in a tul apianga hman tura lirthei (Van motor) a pek chu thla riat dawn hman loha a awm hnuah nimin khan registration tihfel a ni.

MSCI Director, Dr. Zoramthanga chuan lirthei an dawn hnu lawkah an buaipui nghal thu sawiin, “Mahse, Covid-19 hri len lai te a ni si a, tum loh angin thil a awm ta nuaih a, a fuh lo tluan chhuak vel vek a. A bilhah a tho lo laklawh a ni e,” a ti.

Private lirthei te anga registration tih nghal theih ngawt a nih loh dan nimin-a amah kawmtu thuthar thehdarhtute hnenah sawiin, “Engemaw lehkha tihfel tur neuh neuh nen, sawrkarin hetiang thil pek an rawn pek hi phalna lak phawt a ngai tih order a awm a. Entirnan : motor 10 min rawn pe ta se, Driver 10, Petrol leh a enkawlna tur zawng zawng kha kan zo dawn em tihte thlengin GAD leh Finance paltlanga phalna neih a ngai a. Lockdown te a lo ni bawk nen file hi rin aiin a kal muang bawk nen,” tiin Transport Office-a kala registration tih nghal tawp theih a nih loh thu a sawi.

Nikum-a lirthei hlan an nih khan bawhzui nghalin buaipui ngai te tihfel a nih hnuah lirthei lam tura an kalin Ambulance tur emaw an ti leh thin tih pawh a sawi a, “Phalna a rawn chhuah khan, Ambulance tur emaw an ti a, vawi hnih lai file a kal sual a. A vawi thumnaah ‘Ambulance a ni lo e tiin Transport Office-ah tifel rawh u’ an ti a. Mahse, lockdown in a rawn nang leh ta si a. Registration kan ti leh ta lo reng a,” tiin, a petuin a pekna angah chuan damlo te an phurh a, Zemabawk-a kal thei taw lo damlo chau tawh takte an In-a pan chilhna atan te a pek a nih avangin a tir atangin thil a kal fuh lo laklawh niin a sawi a. Nimin khan Transport department-ah an ngenna angin a bik takin registration hi tihfel sak an ni ta a ni.

October 15, 2020 khan Lunglei West bialtu MLA C. Ngunlian-chunga hian Zemabawk Cancer Hospital pantu damlo thenkhat khawsak harsa tak tak Civil Hospital, Aizawl-ah CT Scan leh MRI tih ngai te tan veivahna lamah harsatna an tawh nasat thin avangin chung damlo te tana hman tur atan chuan an veivahna tur lirthei pahnih a pe a. Kum 2017 khan C. Ngunlianchunga hi Cancer natna in a tlakbuak a, hun eng emawchen a inenkawl hnuah damna a chang tawh nghe nghe a ni.