Latest News

High Court-ah PIL thehlut

RT-PCR for Chhimbial chuan Lunglei Civil Hospital-a RT-PCR khawl bun thuai a nih theihna tura inrawlh tura ngenna, Public Interest Litigation (PIL) chu Gauhati High Court Aizawl Bench-ah an thehlut a, Court hian karleh Thawhtanni khian a ngaihtuah nghal ang.

Thudawn danin he PIL hi RT-PCR for Chhimbial hian an Secretary, LH. Lalzarzoliana hmingin an thehlut a, an aiawh hian an Legal Adviser, JC. Lalnunsanga chu Delhi atangin Video kaltlangin Court-ah hian a ding dawn nia thudawn a ni bawk. Kumin chhunga PIL lut hmasa ber he PIL hi Gauhati High Court Judge, Justice Nelson Sailo chuan a ngaihtuah nghal dawn nia thudawn a ni.

He PIL hmang hian Mizoram sawrkar a mi pawimawh pali (4) te chu khin an ni a, Respondent No. 1 chu Mizoram sawrkar aiawhtu Chief Secretary niin Respondent No. 2 chu Health Secretary a ni a, Respondent No. 3 chu Hospital & Medical Education Director niin Lunglei Civil Hospital Medical Superintendent chu Respondent No. 4 a ni.

Thudawn danin PIL-ah hian Lunglei-a RT-PCR bun theih dan tur enfiah tura Mizoram sawrkar in a tirh, Expert Team in khawl bun theih dan tur rawtna sawrkar-a an thehluh thu te, ICMR in BSL-2 chin Laboratory-ah dah a rem tih tawh thu te, an hmalakna leh sawrkar hmalakna te an tarlang a. Hri leng mekah Sample test-na indaih-loh vanga Test result tih khawtlai a tam avangin mipuiin harsatna an tawh thu te leh khua leh tui te hriselna leh nunna chu ram Danpui hnuaia venhimna pek a nih thu te tarlan a ni a. Mipuite hriselna leh nunna chhanhim tura sawrkar in a mawhphurhna a hlen theihna turin RT-PCR khawl chu Lunglei Civil Hospital-a bun tir tur leh kumin May 7-a HME Director in khawl bun tura thupek a lo siam tawh chu a taka tih puitlin a nih theihna tura thu pe turin PIL thehluttu hian Court chu a ngen a ni.

Comments

Chhiar Hlawhte