Latest News

World Blood Donor Day-ah Assam Rifles leh TKP ten Serchhip Blood Bank-ah thisen an pe

Nimin June 14, 2021 khan khawvel pumah thisen petute ni, World Blood Donor Day hman a ni a, he ni pual hian Serchhip-a awm 8th Assam Rifles te chuan Serchhip Blood Bank-ah thisen an pe. Kumin-a World Blood Donor Day-ah hian thupui atan 'Give blood and keep the world beating' (Thisen pe la, khawvel chelh ding rawh) tih hman niin he ni denchhen hian 23 Sector hnuaia Serchhip-a awm 8th Assam Rifles Battalion te chuan Serchhip Blood Bank-a dah turin thisen Unit 6 an pe a, thisen petute hi mipa vek niin Assam Rifles-a RMO, Capt. Venkateshwararao Bhukya chuan a ho a ni.

Nimin vek khan BCM Serchhip Pastor Bial hnuaia Thalai Kristian Pawl (TKP) Serchhip Unit te chuan AVBD Serchhip Branch in ruahmanna an siam angin Serchhip Blood Bank-ah a mamawh apiangte hman turin thisen an pe bawk a, thisen petute hi mipa 20 leh hmeichhia 12, an vaiin mi 32 an ni a, heng mi tlawmngai te hi Serchhip Blood Bank-ah kalin thawktu ten thisen hi an lo lak sak a ni.

AVBD chuan, sawrkar kum liamta, April 2020 - March 2021 chhungin Mizoram-ah thisen Unit 26,658 pek a ni tih sawiin, “Heng zinga Unit 23,911 (89.66%) hi a thlâwna pek (voluntary donation) a ni. Blood Donation camp vawi 530 neih a ni a, chu'ng ah chuan thisen Unit 15,277 pek a ni. Thisen petu mimal leh pawl tinte chungah lawmthu kan sawi a, kan chhuang tak zet a che u,” an ti a. Hripui lêng avangin inkhârkhip lai ni mah se, thisen pek theih reng tho a ni tih sawiin AVBD chuan, “Páwl hming-a Donation Camp tih theih reng a nih bakah, Mimal in Blood Bank-ah pek theih reng a ni,” an ti bawk.

World Health Organisation (WHO) chuan Blood Group hmuchhuaktu, Dr. Karl Landsteiner pian champha, June 14 hi World Blood Donor Day-ah a puang a, kum 2005-ah hman tan a ni.

Comments

Chhiar Hlawhte