SEDP sum-a Rawmi tiak lei a hunlo ah ngai

ZPM Thalaite chuan Hripui laka invenna vaccine la lo tam tak an awm lai leh, vaccine duh khawp kan neih theihloh laia, Rawmi tiak 15,000 lai leina atana SEDP sum hman a ni tur hi a hun lo hle-a an hriat thu an sawi.

Nimin a thuchhuah an siamah ZPM Thalaite chuan May 7, 2021-ah Horticulture Department-in 'Rawmi' (Dendrocalamus sikkimensis) tiak (seedlings) 40,000 supply-na tur tender a tichhuak tih sawiin, he Tender chhuah hi bawhzuiin Tender chhangtute atanga firm 3 thlante zinga pakhat, Mizoram Bamboo Producer, Lengte chu an tlawh tih an sawi a. Mizoram Bamboo Producer hi Tender hmasaa D. Brandisii Supply-tu, Growmore Biotech Ltd.-in Secondary Hardening Centre atana a hman tho kha niin, he nursery-ah hian  D. Brandisii chi 80,000 vel leh Rawmi tiak 1,00,000 vel a awm tih an sawi a ni. ZPM Thalai chuan Rawmi tiak supply tura thlan te'n rate inang (Rs. 85/-) thlapa an chhâng thei chu thil mak tak nia an hriat thu pawh sawiin, Rawmi tiak man hi a sâng uchuak hle-a an hriat thu leh, Mau/Rua chin leh supply chungchangah hian thil fello, sum insiam tawnna thil a awm ngeia an rin thu an sawi bawk.