Latest News

Mizoram-ah hri kai 300 chuang hmuh belh leh an ni

Niminpiah-a Mizoram-a Sample enfiah 4395 atangin COVID-19 hri kai mi 302 hmuh leh an ni a, Sample enfiah atanga za zela 6.87 te chuan hri kaiin Mizoram-a hri kai hmuhchhuah chu 16,437 an tling tawh a ni.

Niminpiah khan ZMC-a RT-PCR Laboratory-ah Sample 1261 zet enfiah leh niin heng atang hian hri kai 109 hmuhchhuah an ni a, an zinga 106 te hi Aizawl District-a sample lak niin a dang pathum te hi Lunglei District-a Sample lak a ni thung. Aizawl District-a hri kai hmuh te hi hri kai nen inkawmhnaihna neih avanga inkhunghrang lai an ni deuh vek a, hri kai awmpuitu leh mi pathum leh State pawn atanga hnathawk tura rawn lut mi 4 an awm bawk. Lunglei District-a hri kai hmuhchhuah te hi hri kai nen inkawmhnaihna neih avanga inkhunghrang lai an ni bawk.

Mizoram District hrang hranga TrueNat Laboratory-ah niminpiah khan Sample 185 enfiah niin heng atang hian hri kai mi 10 hmuhchhuah an ni bawk a, heng zinga 6 te hi Lunglei District ami niin hri kai tawh nen inkawmhnaihna nei an ni a, Mamit leh Hnahthial District-ah hri kai mi 2 ve ve hmuh niin State pawn atanga rawn lut, inkhunghrang lai an ni.

Rapid Antigen Test hmanga Sample enfiah 2949 atangin hri kai mi 183 hmuh an ni bawk a, an zinga 118 te hi Aizawl District-a hri kai hmuh niin Dinthar Veng-ah hri kai 15 hmuh an nih bakah Central Jail a tang mek zingah hri kai mi 14 hmuh leh an ni bawk. Lawngtlai District-ah hri kai mi 33 hmuh an ni a, Lunglei District-ah hri kai mi 14 hmuh niin Khawzawl District-ah hnathawk tura State pawn atanga lut hri kai 9, Kolasib District-ah hri kai 8 leh Mamit District-ah hri kai mi pakhat te hmuh an ni bawk.

Mizoram-a COVID-19 hri kai enkawl zingah nimin khan mi 138 te chu anmahni enkawlna hmun atanga chhuahtir an ni ve leh bawk a, heti hian nimin thleng khan Mizoram-a hri kai hmuhchhuah chu 16,437 niin heng zinga 12,858 te chu enkawl dam an ni tawh a, hei hi hri kai hmuh tawh atanga chhutin za zela 78.22 niin tunah hian hri kai enkawllai 3503 an la awm mek a ni.

Hri kai zingah mi 76 an boral tawh :

Mizoram-a COVID-19 hri kai zingah nimin thleng khan mi 76 zet an boral tawh. Mizoram-a COVID-19 hri kai zingah nimin khan mi pakhat boral lehin nimin zing dar 8:50 khan Ricky Zothanzama (40), Kawnpui chu ZMC-ah a boral ve leh a, June 2-a hri kai hmuhchhuah niin June 8 khan ZMC-ah dahluh a ni.

Heti hian nimin thleng khan Mizoram a hri kai hmuhchhuah zingah mi 76 boral tawhin an zinga a tam ber, mi 65 te chu Aizawl District-a hri kai hmuhchhuah an ni a, Kolasib District-a hri kai hmuhchhuah zingah mi 4 boral tawhin Serchhip District-ah 3, Mamit District-ah 2 leh Champhai leh Saitual District-ah mi pakhat ve ve an boral tawh bawk a ni.

Comments

Chhiar Hlawhte