Lenkawl

MNF-a General Secretary Lalremruata Chhangte chuan Chief Minister Lalduhoma’n sawrkar Dan dinglai pawt fan chung leh kuthnathawktute Sawhthing man tam tak la batsak mek chunga Car man to a lei thar a sawifiah tir dan chu Zoram mipuite hmuhsitna leh zahlohna nasa tak a nih thu a sawi.

Health & Family Welfare Minister Lalrinpuii chuan ram leh khawtlang hmasawnna tura sawrkar hmalakna te chu intihluihna hmanga hlawhtling thei a nih loh thu a sawi.

Mizoram KVI Board Chairman C. Lalremliana chuan kum 2024-2025 Financial Year chhunga Mizoram KVI Board kaltlanga Prime Minister's Employment Generation Programe (PMEGP) Bank loan la te hmalakna chu a hmunah tlawhin a enfiah.

Mizoram Pradesh Congress Committee (MPCC) Treasurer Dr. Lalmalsawma Nghaka chuan Sairang-a Bamboo Technology Park chu hawn a nih hnuah kalpui chhunzawm loh a nih thu a sawi.

Mizoram chak lakluhna kawngpui ber a chhiat avangin Northeast Petroleum Mazdoor Union chuan naktuk, August 1, 2025 atangin Mizorama Oil phurhluh an chawlhsan rih dawn.

Japan International Cooperation Agency (JICA) sum hmanga ‘Mizoram State Super Specialty Cancer & Research Centre’ sak tur chungchang chu nimin khan Chief Minister Lalduhoma hovin CM Conference Hall-ah sawiho a ni.

Mizoram Contract Health Worker Association-te chu nimin khan Aizawl-a Chief Minister Bungalow kawt-ah lungawi lohna lantirin an pungkhawm a, sawrkar in Health Worker nghet mi 100 a lak turah NHM hnuaia Contract Health Worker mi 50 tal dahngheh an phut thu an sawi.

Mizo Hmeichhe Insuihkhawm Pawl (MHIP) General Headquarters chuan tun thla ni 27-a rawng taka a pasal thattu a puh Lalremruati chuan a phu tawk hremna hmu ngei se an duh tih an sawi.

Mizoram Hand Holding Scheme (Bana Kaih) peng pakhat Chief Minister’s Special Package hnuaia tanpuina semchhuak turin hmalak mek a ni.

Union Ministry of Education chuan National Education Policy NEP kum nga tlin pualin nimin khan 'Akhil Bharatiya Shiksha Samagam 2025' a huaihawt.

Thla thar August 7-9, 2025 chhung khian Aizawl Mualpui-a Rajiv Gandhi Stadium-ah Sipai lak runpui neih leh a ni dawn.

Nimin khan Govt. Kolasib College-ah University UG/PG exam a Kolasib MLA Constituency atanga Top 10-a tlingte chawimawina leh thilpek hlanna hun hman a ni a, he hun hi Bialtu MLA leh Assembly Deputy Speaker Lalfamkima chuan hmanpuiin a bial chhungah zirna ah hmasawnna leh result duhawm tak tak nei an awm chu lawmawm a tih thu sawiin, zirlai titha kalkawmte chu khawvel tukverh a dakchhuak tak tak turin kailawn pawimawh takah an ding chhuak tih hriaa an hma a kawng pawimawh tak la awm chu chu zawh a hlawhtlinna chang ngei tur chuan theihtawp a tan an lak a, tumruhna nen an beih a ngai tih hre reng turin a chah a ni.

Land Revenue & Settlement Department changtu Minister B. Lalchhanzova chuan nimin khan e-RAM portal kaltlanga Digitally-signed ROR (LSC) hlanna hun a hmanpui.

ZPM Party thupuangtu K. Laltluangkima chuan Sawhthing dah tawih nia sawi chu Sawhthing hralh tlak leh hralh tlak loh thliarna lama tha lo zual paih te niin a sawi.

Central YMA Executive Committee (CEC) thukhawmin tunhnaia State thenawm, Assam-a dan lova Bangladesh atanga awm an hnawhchhuahte chu Mizoram-a an lo luh loh nan sawrkar chu ruahmanna siam thuai a, ILP pekchhuah kawngah fimkhur lehzual turin an ngen.

ZPM Party chuan nimin khan Aizawl-a an Party Office-ah Chhung Inkhawm neiin he hunah hian ZPM General Hqrs. a Consultant Rev. Dr. K. Thanzauva chuan ZPM an sawrkar theihna chhan pawimawh tak pakhat chu ‘Çorruption kan ti ve dawn lo’ tih kha a ni tih a sawi a, “Kan MLA Candidate zawng zawngin Pathian hmaah an intiam a, Vawiin thleng hian an la fihlimin ka hria a, ka lawm takzet a ni. Kawng a chhia tih pawh kan hria, siam that a la ni zel dawn. Corruption erawh chu CBI, ACB, Lokayukta ten man lovin Court-ah te thiam-chang mah se an asset neih zat kan hria a, Mizoram mipui rilruah thiam an chang chuang lo. Tuna kan ram hruaitute hi term tawp thlengin lo rinawm zel ula; tichuan, kan thlang tling leh ang che u,” a ti bawk.

Mizoram chhunga District hrang hrang thuneituten State Emergency Operation Center (SEOC) an hriattir danin, kumin chhungin ruahsur nasa avanga Inchhia leh In chim 283 a awm a, In rauhsan 345-a awm tawh bawk.

Ramri buai chungchanga inremna siam tura Mizoram leh Assam Official-te inbiak lehna hun tur ruahman kawngah Assam Official-te thu ngaihchan mek a ni.

World Hepatitis Day pualin nimin khan Civil Hospital Aizawl-ah hun hman a ni.

Mizoram Youth Commission (MYC) Chairman Malsawmzuala Ralte chuan MYC kaltlanga British Army-a tang duh, Mizo tlangval 247 dilna thehlut atangin mi panga koh zingah mi pathumin British Army an zawm fel tawh thu a sawi.

Myanmar raltlante kutzia leh mit-naute lakkhawm hna chu harsatna dang a awm loh chuan tunkar chho hian Lunglei District-ah tan hman tum a ni.

NITI Aayog hnuaia Aspirational Block te hmasawnna tura inelna ‘Sampoornata Abhiyan’ a Ngopa Block atanga hnathawk thate lawmpuina hun ‘Sampoornata Abhiyan Samman Samaroh’ chu nimin khan Saitual Auditorium-ah neih a ni.

Rural Development & Administration Department changtu Minister Prof Lalnilawma chuan Mahatma Gandhi National Rural Employment Guarantee Scheme (MGNREGS) hnuaia inhlawhna chu a tak taka kalpui a, hna an thawk tak tak tihlan a tul thu sawiin, “Thahnem ngai taka dik tak leh fel fai taka ni 100 inhlawhna kan kalpui a ngai,” a ti.

Champhai Sub-Hqrs. YMA chuan an District huamchhunga Myanmar raltlan awmte chu chibil pawl din lo turin a hriattir.

Aspirational Block Programme leh Project BLOOM (Better Living through Outreach, Optimal Maternal & Child Health) hmalakna hnuaiah Lungsen Aspirational Block huamchhungah damdawi In-a nau nei nasa takin an pung a, a tumkhat nan kumin June atanga July thla chhungin zaa 70-a kai a ni.

Kolkata khawpuia Damdawi In pakhat, Peerless Hospital chuan Mizoram Universal Health Care Scheme (MUHCS) zawmin, Mizoram sawrkar an rinngam bakah Mizo mipuiten an hlawkpui ngei an beisei tih an sawi.

Kum 1999-a Kargil indonaa-a India sipai thite hriatrengna hun, Kargil Vijay Diwas chu Inrinni khan ramchhung hmun hrang hrangah urhsun taka hman a ni.

Mizoram-ah Vawk pul hri, African Swine Fever (ASF) chu a la leng zel a, kumin hian Mizoram chhimlam District pahnih, Siaha leh Lawngtlai District te chuan an tuar nasa hle a, ASF vanga Vawk thi leh suat tam tak awm tawhin, Vawk vulhtute leh sawrkar tan harsatna lian tak a thlen mek a ni.

Hnahlan leh Champhaia Winery-te chuan kuthnathawktute Grape tharchhuah an lei mek a, Winery pahnihte hian Grape hi kg-ah Rs. 60 zela leiin Hnahlan Winery hian a man an pek zel laiin Champhai lam erawh chuan an pe nghal lo thung.

MNF Party chuan kawngpui siamna tur pawisa awm reng chunga kawng siam that a ni lo chu pawi an tih thu sawiin, Mizoram sawrkar in mipui te a zah lo nia an ngaih thu an sawi.

Kum 2019-a din eiruk thubuai chhuitu tur, Mizoram Lokayukta chuan kumin thlengin thubuai chhuitu tur, ‘Investigation Wing’ a la nei lo a, hetihlai hian thubuai chhui tur 78 a dawng tawh.

Kawnpui leh Sairang inkar kawngpui chhia leh chumi nghawnga lirthei leh Driver tangkhangte harsatna sutkian dan tur ngaihtuahin Inrinni zan khan ZPM Legislature Party chu an thukhawm a, sawrkar sum awm ang angin harsatna awm mek chinfel dan tur ngaihtuah chhunzawm zel tum a ni.

Mizoram Sawrkar flagship scheme Bana Kaih (Handholding) hnuaiah Loan la tur mi 646 leh CM Special Package dawng tur mi 2257 thlanchhuah an ni tawh a, CM Special Package dawng tura thlan te hnenah hian July 2025 thla chhung hian tanpuina semchhuah vek hman tum a ni.

Excise & Narcotics Department leh Assam Rifles tangkawpin tunhnai khan Methamphetamine thahnem tak an man.

Mizoram Education Reforms Committee chuan nimin khan Hindi zir chungchanga inrawnkhawmna an buatsaih a, he hunah hian Hindi zirna lama thawktute leh mithiamten Hindi zirna tihhmasawnna tur kawng hrang hrang an sawiho a ni.

Agriculture and Farmers' Welfare Minister PC. Vanlalruata chuan kan thlai tharchhuah sawng-bawl a, hlawk zawka hralh a nih theih dan tur ngaihtuah reng thu a sawi.

Mizoram chak lakna kawngpui chhia avanga Mizoram-a tuialhthei phur luttu Mizoram Oil Tanker Driver Association (MOTDA) ten an lirthei an tlan duh loh chu nimin tlai khan titawpin Mizoram-a tuialhthei harsatna thleng mek pawh ziaawm chho tura beisei a ni.

Home Minister K. Sapdanga hovin nimin khan Directorate of Forensic Science Laboratory (FSL) dinhmun thlirhona, ‘One Day Review Meeting of Forensic Science Laboratory’ neih a ni.

Aizawl khawpui-a Assam Rifle chhuahsan ram te hman zui dan tur ngaihtuahtu Advisory Committee te chu nimin khan an Chairman leh Chief Minister Lalduhoma hovin an thukhawm.

The Mizoram Bana Kaih (Handholding) Scheme hnuaia CM Special Package atanga thawhpui tur (progress partner) te tan tunlai hian District hrang hrangah Orientation Training kalpui mek a ni.

Chief Minister Lalduhoma chuan nimin khan Civil Hospital Aizawl-ah Trauma Care Facility thar a hawng.

Health Minister Lalrinpuii’n natna tam tak a thlawna test theihna Sub-Centre leh PHC te tun aia hmang tangkai turin mipuite a sawm.

Mizoram Larsap, General (Dr) Vijay Kumar Singh chuan Mizoram chu India rama khawtlang inlungrual leh inpumkhat tia hriat hlawh a nih thu sawiin, thalaite chu Mizoram mai bakah India ram hmalam hun atana beiseina meichher kengtu an nih thu a sawi.

Mizoram Pradesh Congress Committee (MPCC) chuan Mizoram sawrkarin Sawhthing leisa a buaipui zui dan an enfiah thu sawiin, Sawhthing lei khawlsa hi a tawih nasa tawh hle niin an sawi.

Higher & Technical Education hmalakna hrang hrang thlirin nimin khan Chief Minister Lalduhoma hovin sawrkar mi pawimawhte an thukhawm a, he hunah hian zirna In sang te dinhmun hrang hrang ngaihtuah a nih bakah Scholarship chungchang te pawh sawiho a ni bawk.

Mizoram Lok Sabha MP Richard Vanlalhma-ngaiha chuan niminpiah tlai khan National Highways and Infrastructure Development Corporation Limited (NHIDCL) Managing Director Dr. Krishan Kumar chu New Delhi-a a Office-ah kawmin Mizoram-a NHIDCL kawng siam chung-changa harsatna hrang hrang an tawh dan te a sawipui a. Lok Sabha MP chuan NHIDCL enkawl kawng NH-306 Vairengte -Sairang inkar kawng a chiat avanga Mizoram in harsatna an tawh nasat zia te, a bikin Sairang leh Kawnpui inkar a chhiat nasat zual avanga Commercial vehicles pawh an tlan ngam tawh lo thu te chipchiar takin Dr. Krishan Kumar hi a hrilh a. NHIDCL Managing Director hi an hnathawhna a hmun ngeia en tura Mizoram-a lo kal turin a sawm bawk a ni.

Nimin July 23, 2025 kha ‘National Broadcasting Day’ a ni a, Akashvani Director General, Dr. Pragyapgaur chuan he ni pual hian Akashvani ngaithlatu zawng zawngte chibai bukin Akashvani in a tum ber - mipuite hrilhhriat, zirtir leh rimawi hmanga awmtlei kawngah hmalak chhunzawm zel a nih tur thu a sawi.

Mission for Integrated Development of Horticulture (MIDH) Special Intervention hnuaia Champhai District-a Sapthei chin tur khuhhawnna chu nimin khan Horticulture Minister C. Lalsawivunga hovin neih a ni.

Kawnpui leh Sairang inkar kawng chhia avanga an lirthei din tir mek Mizoram Oil Tanker Driver’s Association (MOTDA) te chuan an lirthei an la din tir chhunzawm zel.

Dampa Bialtu MLA Lalrintluanga Sailo chu nimin khan Aizawl Luangmual-a an Chenna In-ah vuiliam a ni a, sawrkar hruaitute leh Political Party hrang hrang aiawh ten an ui thu a vuina hunah hian an sawi a ni.

India Meteorological Department (IMD) hnuaia Meteorological Centre Aizawl-a Director & Head Sudheer Kumar Dwivedi chuan nimin khan Larsap hmuin an hmalakna leh hmachhawp hrang hrangte a sawipui.

Mizoram-a Eklavya Model Residential School (EMRS)-a thuneitu. Mizoram EMRS Governing Council chu nimin khan Chief Minister leh an Chairman Lalduhoma hovin CM Office Conference Hall-ah an thukhawm a. Tun tum hi Planning Department hnuaia Tribal Affairs dah a nih hnua Governing Council thutkhawm hmasa ber a ni.

Nizan hmasa-a New Delhi-a boral Mizoram Legislative Assembly-a Member nilai leh MNF Legislature Party Leader Lalrintluanga Sailo ruang chu nimin khan Aizawl rawn thlenpui a ni a, Vawiin-ah vuiliam a ni ang.

Larsap General Vijay Kumar Singh chuan niminpiah khan Border Roads Organisation (BRO)-a Project Pushpak Chief Engineer GP. Singh chu Raj Bahvan-ah kawmin Mizoram-a Project Pushpak hmalakna hrang hrang a sawipui.

Ministry of DoNER hnuaia Nagaland Chief Minister Neiphiu Rio kaihhruaina hnuaia din High Level Task Force on Handloom & Handicraft chu nimin khan thukhawmin Chief Minister Lalduhoma pawhin a Pisa atangin Online hmangin a lo zawm a ni.

Mizo Zirlai Pawl (MZP) chuan NHIDCL-in an enkawl kawngpui chhe zual lai chu tun thla, July 2025 chhung ngeia Motor kal theih tura thuamthat an phut thu sawiin, Mizoram ei leh bar lakluhna kawng kal hleihtheih loh khawpa a chhiat laia chawlh la NHIDCL Executive Director chu Mizorama let leh tawh lo tura an hriattir thu a sawi bawk.

Mizoram-ah Covid hri kai enkawllai an awm tawh rih lo a, kumin chhungin Covid hri kai mi 12 hmuhchhuah ni tawhin an vai hian enkawl dam vek an ni tawh a ni.

Kawnpui leh Sairang inkar kawngchhe zualpui hnawh nan sawrkarin cheng nuai 100 a ruahman a, nizan khan hna thawh tan nghal tura ruahman a ni.