Latest News

Cricket Final khel dawn

Cricket Association of Serchhip District in an buatsaih, Serchhip District Cricket League vawi khatna chu Vawiin chhun dar 12:00 hian Final khelh a ni dawn ta a, Tuikhuah Veng CC leh AO3C ten Final hi an khel dawn a ni. He inkhel hi TV lamah en theih tura pekchhuah leh a ni dawn a ni. Vawiin a Final khelh hi Cricket Association of Mizoram hotute pawhin an rawn hmanpui dawn a ni.

Zodintluanga’n Lunglei Civil Hospital tana pek RT-PCR khawl bun thuai turin CM a ngen

Thorang bialtu MLA, Zodintluanga Ralte chuan Lunglei Civil Hospital tana RT-PCR khawl a pek chu hman theih tura bun (install) thuai tur Chief Minister Zoramthanga a ngen.

Kar kalta Inrinni-a Chief Minister hnenah lehkha a thawnah Zodintluanga Ralte chuan, sawrkarin Lunglei-a Expert Team a tirh te'n Civil Hospital Lunglei building awmsaa RT-PCR dahna tur Laboratory siam theih a nih thu sawrkar-a an thlen hnuah leh, Un-Official Level-ah Health Department lam ngaihdante zawtin damdawi In thuneitute hnenah RT-PCR hlanin anni pawhin lawm takin an lo dawnsak tih a sawi a. Rin leh beisei loh deuha thil a kal tak avangin chhim lam mipuite tana RT-PCR khawl hman tangkai tak tur chu 'politics' inbeihna hmanruaah a tang ta hlauh zawk chu hrehawm a tih thu a sawi a. Hripuiin min run lai hi chuan 'inbeih hun a ni love, hnam anga tanrual hun a ni' tih a nih laia hripui do-a theihtawp chhuak mek sawrkarna chelhtute pawhin hetianga inbeih hi an duh a rin loh thu a sawi.

Tunhnaia Civil Hospital Lunglei-a Covid-19 test-na hmanrua pakhat TrueNat Quattro dah belh tura sawrkarin ruahmanna a siam chu tha a tih thu a sawi a. TrueNat hi RT-PCR aiin a ‘test’ a muan zawk avangin chhim lamah hri vei hmuhchhuah thar an tam tak zel avangin TrueNat khawl ringawt hi chuan an mamawh a phuhruk zo dawn lo hle tih a sawi a, “Sample test tam leh result a chhuah ran hi hmanraw pawimawh ber pakhat anih avangin ‘sample test’ rang thei zawk leh a rintlak ‘Gold Standard’ an tih ngei RT-PCR khawl hi chhimlam mipuite tana hman theih tura bun (install) turin ka rawn ngen che a ni,” a ti.

Zodintluanga chuan Covid-19 hripui leng avangin Mizoram chhim lam mipuite an mangang a, sawrkar an au mek a, an theih ang tawkah an tlanchhe lo a ni tih lantir nan mi thahnemngaiten Lunglei-a RT-PCR bun a nih theihnan vehburte an khawn mek tih pawh sawiin, “Hei hian an manganzia leh Covid-19 hrik hmuchhuak rang thei khawl an mamawh zia a tilang chiang hlein ka hria,” a ti a. “Mipui mangang au aw hian ram hruaitu lu ber a auh ei ngei kei chuan ka ring tlat a, Zoram tana i thatlai hun zawng petu i ni a, he hun harsa ah pawh hian Mizoram chhim lam mipuite tana tha ber tur ruahmanna i siam ngei ka ring tlat a ni,” a ti bawk. 

Hei bakah hian “Hripui doa tanrual a hun lai taka RT-PCR khawl hmanga ‘politics’ a inbeihna hi a tawp theih nan te, ‘politics’ inbeihna a hmatheh (scapegoat) atana sawrkar hnathawkte hman an nih tawh loh nan te leh ‘political party’ te hi hripui do-in kan tangrual a ni tih mipuiin an lo hriat nante i thuneihna hmang turin thinlung takin ka ngen che a ni,” tiin Chief Minister hnenah lehkha a thawn-ah hian a tarlang a ni.

Comments

Chhiar Hlawhte