Latest News

COVID-19 hri kai 233 hmuh belh leh an ni

Niminpiah-a Mizoram-a Sample enfiah 3413 atangin COVID-19 hri kai 233 hmuh leh an ni a, Sample enfiah atanga za zela 6.56 te chuan hri an kai a ni.

Niminpiah khan ZMC Laboratory-ah Sample 893 enfiah leh niin heng atang hian COVID-19 hri kai 34 hmuh leh an ni a, an zinga 32 te hi Aizawl District-a Sample lak niin midang pahnih te hi Serchhip District-a Sample lak an ni thung a. Aizawl District ami te hi hri kai nen inkawmhnaihna neih avanga inkhunghrang lai niin Serchhip District-a hri pahnih te hi BSF Sipai te an ni thung.

Mizoram District hrang hranga TrueNat Laboratory 10-ah pawh niminpiah khan Sample 240 enfiah niin COVID-19 hri kai mi 15 hmuh an ni bawk a, Hnahthial District-ah hri kai mi 4 hmuh niin Lunglei leh Mamit District-ah pathum ve ve hmuh an ni a, Champhai District-ah hri kai mi 2 hmuh niin Aizawl, Siaha leh Khawzawl District-ah hri kai mi pakhat theuh hmuh a ni bawk.

Rapid Antigen Test hmangin niminpiah khan Mizoram-ah Sample 2280 enfiah niin hri kai mi 175 hmuh an ni a, an zinga mi 98 te chu Aizawl District-a hri kai hmuhchhuah niin Dinthar Veng Containment Zone-ah hri kai mi 17 hmuh an ni a, Ramhlun North leh Venghlui-ah 11 ve ve hmuh an ni bawk. Kolasib District-ah hri kai mi 25 lai hmuh belh an awm leh bawk a, Lawngtlai District-ah mi 23 hmuhchhuah thar awmin Lunglei District-ah 14, Siaha District leh Serchhip District-ah 7 ve ve leh Mamit District-ah hri kai pakhat hmuh a ni bawk.

Heti hian nimin thleng khan Mizoram-ah COVID-19 hri kai mi 18,859 hmuhchhuah an ni tawh a, nimin khan hri kai mi 238 te chu enkawl dam ni lehin heti hian nimin thleng khan Mizoram-a hri kai zingah mi 14,554 te chu enkawl dam an ni tawh a, hei hi hri kai hmuhchhuah te atanga chhutin za zela 77.17 a ni a, hri kai enkawllai mi 4216 an la awm mek bawk a ni. Tun dinhmun ah Aizawl District chu hri kai enkawllai tamna ber la niin mi 3355 enkawl mek an la ni a, Lawngtlai District-ah 288 leh Kolasib District-ah 228 enkawl mek an la ni bawk.

Hri kai zingah mi 89 an boral tawh :

Mizoram-a COVID-19 hri kai zingah nimin khan mi pakhat boral lehin Mizoram-a hri kai zingah mi 89 an boral tawh. Nimin chawhma dar 11:45 khan Zoliana (54), Dawrpui Aizawl chu ZMC-ah a boral a, Junr 6-a hri kai hmuhchhuah kha niin June 8-ah ZMC-ah dahluh a ni a, nimin khan a boral zui ta a ni.

Heti hian nimin thleng khan mizoram-a COVID-19 hri kai zingah mi 89 an boral tawh a, tun thla chhungin mi 49 an boral tawh a ni. Hetihlai hian COVID-19 hri leng avang hian Mizoram mi leh sa, Mizoram pawn lama boral pawh mi 27 lai an awm tawh bawk nia chhinchhiah a ni.

Comments

Chhiar Hlawhte