Chanchin thar thenkhat :

Cheng nuai 4 theuh hlan

Tun thla ni 11 zan-a Aizawl Thuampui Veng a Lalbiakzuala In luahlai a chim avanga nunna chan ta- Lalthlamuani (16), Laltanpuii (16), Joseph Lalrinhlua (5) leh Daniel Lalngaihsaka (3) chhungte hnenah nimin khan State Disaster Response Fund (SDRF) hnuaia zangnadawmna (Ex-Gratia) Rs. 4,00,000 /- (Nuai li) theuh hlan a ni a, zangnadawmna hi Lalthlamuani leh Lal-tanpuii te hmingin an pa, Lalbiakzuala hnenah leh Joseph Lalrinhlua leh Daniel Lalngaihsaka te hmingin an nu Zairimawii te hnenah Mizoram Sawrkar aiawhin Aizawl District Bawrhsap Dr. Lalhriatzuali Ralte chuan a pisa-ah a hlan a, he hun hi sawrkar in SOP a siam zawm chungin hman a ni.

PHC tan Ambulance hlan

Lengteng bialtu MLA, L. Thangmawia chuan a bial chhung NE Khawdungsei PHC-a hman tur, COVID-19 hri kaite phurhna tura a bik taka duan ambulance thar chu nimin khan Mission Vengthlang-a a chenna In atangin a vailiam a, he Ambulance thar hi Maruti company siam Eeco Van niin, COVID-19 hri kai te him taka Driver ten an phurh theihnan indaidanna tha taka siam a ni a, a hmingah ‘Emergency Health Services’ tia vuahin COVID-19 dona atana MLA Fund atanga a leisak a ni.

Zirlai tithate chawimawi

Lunglei District Bawrhsap, Kulothungan A chuan tunhnaia MBSE in HSLC leh HSSLC Exam result a tihchhuah taka Lunglei District atanga Top 10-a lang zirlaite chu nimin khan a Pisa-ah kawmin chawimawina thuziak leh lawm-puina pawisafai a hlan a. Tun tuma HSLC leh HSSLC Exam result chhuakah khan Lunglei District atang hian Top 10-a lang mi 4 awmin Zirlai titha te chu a lawmpui takzet thu sawiin, an kal zelna turah duhsakna a hlan a. Chhungkua, khawtlang leh ram tana chhawrtlak nih tum tur leh an zirlai pui te tana entawn tlak leh kawng kawh-hmuhtu nih tum zel turin a chah bawk.

Kawng siam mek enfiah

Supply Minister leh Kolasib bialtu MLA, K. Lalrinliana chuan nimin khan a bial chhunga Chemlui, Zukmawi WRC Area-a kawng siam mek chu a hmun ah a enfiah. He kawng hi PMGSY Scheme hnuaia loneitute leh Sangha Dil hmanga eizawngte’n hlawk zawk leh chak zawka an huan thlai tharte an seng a, a tihralna hmun tur an thlenpui zung zung theih nana ruahman a ni a. Rengtekawn atanga Builum thleng Cement Flooring tur niin tun dinhmunah kawng siam zawh tawh hi KM 3.840 a ni a, PCC chhun niin, tui hawk luan kawr a tel a ni. Bialtu MLA hian MLA Fund atangin Lei dawhna tur cheng nuai khat chu a hlan nghal bawk. Rengtekawn to Builum PMGSY Road hi KM 13.52 niin estimate chu cheng nuai 2059.06 a ni a, kumin September thla ah zo tura beisei a ni.

HPC in Kel vulh ah hma la

Lunglei High Power Committee leh AH & Vety Department tangkawp hmalakna tur, ‘Goat Farming Pilot Project’ chu nimin khan HPC Vice Chairman, Lawmawma Tochhawng chuan Lunglei-a HPC Office-ah a tlangzarh a. He Pilot Project bultanna atan hian beneficiary pathum thlan niin nimin khan Kel panga (5) theuh an dawng a. Hei bakah hian a In sakna leh enkawlna senso atana Rs. 40,000/- theuh an lo dawng tawh bawk a ni. ‘Goat Farming Pilot Project’ hi Lunglei District chhungah zau zawka la kalpui zel tum a ni a, HPC Lunglei hmalakna-a intihsiakna ‘Leitlangpui Rahbi 2019’ a lawmman dawngtu pakhat, Sangkhuma Khiangte, Upper Lungrang S chuan Kel vulh hi hlawhtling takin a kalpui mek bawk a ni.

Admission Fee-ah MLA Fund

Aizawl North-II bialtu MLA, Dr. Vanlal-thlana chuan a bial chhunga College awm, Govt. Zirtiri Residential Science College leh Govt. Aizawl North College te nimin khan tlawhin a bial chhunga zirlai naupang, College kal zawm duh si, Admission tihna tur neilo 39 te Admission Fee tur chu MLA Fund atangin a tum sak a, heng te hi Govt. Zirtiri Residential Science College-ah zirlai 18 leh Govt. Aizawl North College-ah zirlai 21 an ni. Hei bakah hian nimin vek khan Ramhlun South Branch YMA, Kumpuan Committee hmalaknaa an veng chhunga zirlai harsa, sawrkar sikula lut naupang 10 tan tanpuina a hlan nghal bawk.