Lenkawl

Nimin khan Serchhip-ah Mizoram State AIDS Control Society (MSACS), District Hospital Blood Bank Serchhip leh Association for Voluntary Blood Donation (AVBD) Serchhip Branch te buatsaihin thisen pek pawimawh zia leh thisen pe tura midangte cho phur theih dan tur chungchang zirhona neih a ni.

Karleh Thawhlehni-a Assembly Inthlanpui neih tura Serchhip District-a Polling Party te tana training tum hnihna chu nimin khan neih tan niin inthlan ni-a Duty turte hian Postal Ballot hmangin Vote an thlak tan nghal bawk.

Zirtawpni leh Inrinni kalta, October 27 leh 28, 2023 chhung khan Society of Krishi Vigyan buatsaihin First National Seminar of Society of Krishi Vigyan chu biakhmuh theihna hmanga neih a ni. First National Seminar of Society of Krishi Vigyan-ah hian India ramchhunga Krishi Vigyan Kendra (KVK) leh Institution hrang hrang a\angin mi engemaw zat an tel a, a ni khatna chawhnu hun ah KVK Serchhip District-a Senior Scientist and Head, KVK Dr. T. Vanlalngurzauva chu Moderator niin ramchhung hmun hrang hrang atangin mi 14 ten thupui hrang hrang hmangin thu an sawi a. Heng atang hian KVK Serchhip District-a SMS (Animal Science) Dr. C. Lalremruata'n ‘Chilung technology, a sustainable approach for Mithun farming in Serchhip District, Mizoram’ tih thupui hmanga a sawi atangin lawmman pathumna dawngin Mizoram atangin Dr. Rohit Shukla, SMS(Horticulture), KVK Serchhip leh Vanlalmalsawmi Sailo, SMS (Soil Science), KVK Lawngtlai te pawhin presentation an pe a, Vanlalmalsawmi Sailo hian pahnihna din

Mizo National Youth Front (MNYF), Ser-chhip East Block huaihawtin nimin khan Serchhip Bazar leh a chhehvel a bawlhhlawh chharfaiin hnatlang neih a ni a, he hnatlang neih a nih hma hian Serchhip-a MNF Party Office, Mizo Hnam Run-ah Inkhawm tawi neih hmasak niin he hunah hian Serchhip Bial-a MNF Candidate J. Mal-sawmzuala Vanchhawng leh Serchhip East Block MNF President H. Lalthianghlima te chuan thu an sawi a ni. Serchhip East Block MNYF President Lalramthara chuan Politics chu ram tana thil tha ti chunga khelh theih a ni tih hriat nana hnatlang chu neih a nih thu a sawi a ni.

Mizoram Legislative Assembly Inthlanpui neih tur atana Serchhip District-a inbuatsaihna kal mekah nimin khan venhimna hna thawktu tur Central Armed Police Force (CAPF) Company hnih (2) te chuan Serchhip an rawn thleng leh a, heng mite hi New Serchhip-a Boxing Hall-ah an inkulh dawn a ni. Hemi hmalam hian Serchhip District a Duty tur hian CAPF (BSF) Company khat te chuan Serchhip rawn thleng tawhin hmun hrang hrangah an Duty mek a. Heng mite bakah hian Vote thlak ni-a Duty turin State Armed Police Force te an la rawn kal leh dawn bawk a. Nimin a rawn thleng thar te hi Nagaland atanga rawn kal te an ni.

MNF General Hqrs. a Adviser Prof. F. Lalnun-mawia chuan nimin khan Aizawl Press Club-ah thuthar thehdarhtute kawmin MLA Election Manifesto 2023 a MNF-in an tarlan pawimawh leh langsar tak chu Zoram thalaite eizawnna leh hna thawh bul tanpuina tur, ‘Youth Oriented SEDP’ a nih thu a sawi a. Hemi in a tum ber chu Zoram thalai eizawnna nghet nei lo te tana eizawnna kawng kawhhmuh leh chumi atana an bultanna tur sum ngaihtuah sak a nih thu a sawi bawk.

Association for Environmental Preservation (ASEP) chuan Thlasik-a lo haw khawm thin Sava te kan ramah an rawn haw khawm ve leh ta mek tih sawiin, Pem kual thin Sava thenkhat te pawhin an zinkawng zawhna ah hun engemaw chen chhung chamna atan Mizoram an hmang bawk thin niin an sawi a. Mikhual te chunga that chhuah thin Hnam kan nihna chu heng nungcha duhawm tak tak te lakah pawh lanchhuah tir turin Mizo mipuite an sawm bawk.

Excise & Narcotics Department chuan ruih-hlo chi hrang hrang an man cheng vbc. 12.98 hu chu nimin khan Bethani Multipurpose Farm, Phunchawng-ah an halral a, tun tum hi tum khata Heroin ah halral tam ber tum nia hriat a nih thu END Commissioner Ngurchungnunga Sailo chuan a sawi a, Heroin hi kgs. 41.188 halralin cheng vbc. 12.35 man nia chhut a ni. Heng bakah hian Ganja kgs. 56.79 (cheng nuai 2.27 hu), Methamphetamine kgs. 4.35 (cheng nuai 59.42 hu), Alprozolam grams 533.54 (Rs. 48,500hu), Tramadol grams 197.68 (Rs. 5,648 hu), Preganon grams 8.16 (Rs. 741.82 hu), Nitrazepam grams 9.42 (Rs. 88.75 hu) leh Codein based Cough Syrup kgs. 28.70 (Rs. 43,000) te niin Court in tihral a phalsak hnua halral a ni.

October 28 atanga November 5 chhung hian India rampumah ‘Vigilance Awareness Week, 2023’ hman leh mek a ni a, kumin Vigilance Week thupui tan hian'Hlemhletna hnawl la, ram tan thawk rawh' (Say no to corruption, commit to the Nation) tih chu hman a ni. Ramchhung hmundangte rualin nimin khan Mizoram-ah pawh 'Vigilance Week 2023' hawn nan Chief Secretary Dr. Renu Sharma kaihhruaina hnuaiah Mizoram Secretariat, MINECO-a sawrkar hnathawk, Officials and Staff zawng zawngten a huhovin 'Integrity Pledge' an chham rual a. Sawrkar Office tina Heads of Office-te pawhin an hnuaia thawk Officer leh Staff-te nen anmahni Office hmun theuhah 'Integrity Pledge' hi an chhamrual bawk a ni.

Chief Electoral Officer (CEO) Madhup Vyas IAS chuan General Election to Mizoram Legislative Assembly, 2023 atana SVEEP State Icon-te chu nimin khan a Pisa-ah a kawm.

Aizawl District Court-a Special Judge (Prevention of Corruption Act) Dr. HTC. Lalrinchhana chuan kar kaltaa cheng vbc. 1.06 tihchingpen thubuaia thiamloh a chantir Law and Judicial Department-a LDC (Muster Roll) thin Lydia Lalhruaitluangi chu kum 4 chhung tang tur leh cheng vbc. 1 chawi turin a hrem a. Pawisa hi a pe lo a nih chuan kum 50 a tan belh ang.

Congress Party Chief Spokesperson Ronald Sapa Tlau chuan Mizoram inthlanpui lo awm tura Party hrang hrangin Chief Minister ni thei tura an chhawpchhuah zingah Lalsawta chu a tha ber niin a sawi.

Union Minister for Road Transport and Highways Nitin Gadkari chuan Mizoram District 9 chhun tur leh State thenawm leh ram thenawm pawh tur kawngpui sial hna chu cheng vbc. 20,000 sengin nakum atanga thawh tan a ni dawn tih sawiin, Ramchhung mitin hmasawnna thlen theitu chu BJP chauh a nih thu a sawi bawk.

Serchhip District chhunga kum upa leh rualbanlote tana Vote thlakna hun ruahman an Vote thlak thei mi 174 zingah mi 168 ten Vote an thlak.

Mizoram Assembly Inthlanpui neih tura Serchhip Bial-a BJP Candidate K. Vanlalruati chuan nakum a Parliament inthlanpui lo awm turah BJP kaihhruai NDA bawkin sawrkarna a siam leh dawn tih a chiang nia sawiin, chumi atan chuan Serchhip Bial malsawmna dawhthleng ni turin hmanrua atan a inpe tih a sawi.

Mizoram Mathematics Society leh Mizoram Science, Technology and Innovation Council (MISTIC) tangdun buatsaih State Level Mathematics Competition chu Inrinni khan Mizoram hmun hrang hrangah neih niin Serchhip-ah pawh Govt. HSS-ah he Exam hi neih a ni.

Mizoram-a kum upa zawkte tana Table Tennis inelna neih ah Serchhip atanga kal ten lawmman 5 an la. Mizoram Veteran Committee buatsaih Mizo-ram Masters Meet 2023 hi Inrinni khan MTTA Hall, Kawlthei Hun-ah khelh zawh a ni a, he inelna ah hian Tennis player kum 40 chunglam tel theih niin Category 8-an inelna neih a ni a. Serchhip atanga kal zingah T. Hrangsiama (Chanmari Veng) chu Mens +60 Singles-ah Champion in Mens +55 Singles-ah pathumna a ni a. VLC. Hrilmawia (New Serchhip) chu Mens +50 Singles-ah Champion in Mens +45 Singles-ah pathumna a ni bawk a. Womens Veteran Doubles-ah F. Edenthari leh Lalmuanawmi te tangdun chu pahnihna an ni bawk.

Thla thar Nov. 7-a Mizoram Legislative Assembly inthlanpui neih turah inthlan chungchanga zawh duh neite tan a thlawnin Ph. No. 1950-a call-in zawhna siam theih niin hei bakah hian Playstore atangin Voter Helpline app download theih siam ni bawkin, chungte hmang chuan Electoral Roll-a mahni hming a chuan leh chuan loh te, thil dik lo complain tur nei tan pawh a hman theih bawk. Pawisa hmanga vote hralhte, invauna leh inrikrapna te, Vote beisei vanga zu leh ruihtheih thil sem leh dik lo taka Vote hmuh tum hria te chuan cVIGIL mobile application hmangin thlalak leh video emaw voice record emaw a thehluh theih niin Candidate te chungchang hrechiang duh tak KYC-Know Your Candidate App leh Vohbikte tana siam SAKSHAM-ECI App a awm bawk a ni.

India leh Bangladesh inrina hrulah venhimna tihchak nan Khawthlangtuipui kan-a inkal-pawhna lei dawhkaina turin Forest Clearance buaipui mek a ni. Sawrkar laipuia Ministry of Home Affairs sum cheng vbc. 54 chuang senga Tlabung thlang Nunsury II khawdai-a inkalpawhna lei dawhkai tur hi ram chungchang buaina vangin hun rei tak chhung tihkhawtlai a ni tawh a, danin a phut anga State Institute of Rural Development lamin, he lei dawhkai turin a bulhnaia mipuite nunphung a nghawng dan tur Social Impact Assesment chu thehluh ni tawhin, Environment, Forests and Climate Change Department lamah kutthlak phalna (Forest clearance) buaipui leh mek a ni a. Hei hi tihfel a nih chuan thla khat chhunga hna hi tan hman beisei a ni bawk.

Inrinni zan khan Aizawl Tuikual South-ah Electric in mi pathum manin an zinga pakhat chu a boral. Thudawn danin Inrinni zan dar 11:30 vel khan Aizawl Tuikual South-ah Scooty pakhat chesualin an tlu a, he Scooty khalhtu leh a mi phurh te hi helai hmuna mimal electric pawhna hrui leh rangva lo insi chuan a man zui a. Helai hmuna midang leng haw tur FC. Vaveitlochai (33) chuan chhan tum mah se amah pawh hi electric hian a lo man ve leh zui nghal a. An thawm hi midang ten hriain chhan tum mah se electric a kal nasat avangin an chhan thei mai lo a, Power Department lamin Current an off hnuah chhan tum mah se FC. Vaveitlochai hi a boral hman a ni. Van-duaina thlenga boral FC. Vaveitlochai s/o FC. Tlakho, Chakhei, Tuipang ruang hi Postmortem a nih hnuah an khua ah a ruang hi lak tura tih a ni a, Inrinni zan vek khan Electric current kal dan dik lo hi Power Department a thawkte chuan enfelin an siamtha nghal a ni.

Mizo Zirlai Pawl (MZP) chuan Inrinni zing khan Aizawl khawpui chhunga hnamdang awm te enfiah hna thawkin ILP nei lo mi 78 leh kum tling lo hnathawk a chhawr mi engemaw zat an hmuchhuak a, dan zawmlo hmuhchhuah te hi thuneitute hnenah hlan nghal an ni. MZP chuan sawrkar leh thuneituten theihtawp chhuah a hma an lak mek laia tukkhat maiah ILP nei lo leh sumdawng tha-hnem tak man chhuah tur an awm chu pawi an tih thu an sawi a, an mi man te hi a tlangpuiin Permit nei lo leh an Permit dam hun chhung zo tawh te an nih thu an sawi a. Ram danpuiin a bik taka Mizote a humhalhna dan, Inner Line Permit chu a nihna ang taka hmang tur leh a pekchhuah kawngah pawh fimkhur leh zuala kalpui turin thuneitute a ngen nawn leh a. Mizoram chhunga Local Council leh Village Council hruaitute pawh hnamdang permit ILP pek chhuah chungchangah lehkha pawimawh nei mumal lo chu hriatpuina lehkha pechhuak tawh lo turin an ngen bawk.

ZPM Research Wing chuan, an party thil tumte chu zirbingna an neih hnua a tih theih ngei a ni tih an finfiah tawh a ni tih an sawi.

Mizoram Pradesh Congress Committee (MPCC) President Lalsawta chuan kumin MLA inthlan chu Thlarau Indona nia sawiin, “He inthlana kan innghahna chu Pathian a ni,” a ti.

Chakma Autonomous District Council (CADC) a rorellai MNF MDC Amit Bayan Chakma chuan BJP a zawm a, Mondirasora bial atanga MNF ticket-a thlantlin Amit Bayan Chakma hian BJP hruaitu Union Minister Kiran Rijiju awm laiin BJP hi a zawm niin BJP thupuangtu M. Kikon chuan a sawi. Kumina CADC inthlanah khan MDC Bial 20-ah MNF in Bial 10 lain BJP leh Congress in Bial 5 ve ve an la a, BJP leh Congress MDC ten MNF zawmin MNF sawrkar a ding a, tuna MDC chhuah avang hian CADC sawrkar a nghing pha lo nia thudawn a ni.

MNF party chuan Mizoram Assembly inthlan lo awm turah an Party chu BJP-in hnawk an ti hle niin an sawi.

Mizoram Legislative Assembly, 2023 Inthlanna atana inpuah-chahna kalzelah Zirtawpni khan Mizoram CEO Office-ah GE-MiZ '23 Social Media Influencers' Club (GESMIC) Meeting neih a ni.

Serchhip District chhung Assembly Bial hrang hranga Assembly Inthlanna neih tura inbuatsaihna kal zelah nimin khan EVM Commissioning neih a ni a, he hunah hian EVM-ah Candidate hrang hrangte hming thunlun niin Vote thlak chhin nghal a ni bawk.

Mizoram People Forum (MPF) Serchhip District chuan Mizoram Assembly Inthlanpui neih tura Serchhip Bial-a Candidate te tan nimin khan Serchhip Bazar Tual-ah Common Platform an buatsaih a, he hunah hian Serchhip Bial a Candidate paruk (6) te tel kim theiin an ngaih pawimawh leh hmalak an tumna te an sawilang hlawm a ni.

Serchhip District Tennis Association buatsaih ‘Serchhip Open’ Mizoram Tennis Ranking Tournament chu nimin khan khelh zawh a ni. Tun thla ni 24 atanga Leisekawt Tennis Court-a khelh he Tournament-ah hian category 9-ah inelna neih a ni a, heng zinga pathum chu Junior Level inelna a ni.

Assembly Inthlanpui neih tura Serchhip District-a General Observer V. Sampath IAS chuan nimin atang khan Hrangturzo Bial-a Polling Station thenkhat tlawhin an dinhmun te a enfiah a. Nimin khan Keitum Polling Station tlawhin Vawiin hian Lungkawl leh Chekawn-a Polling Station te a tlawh leh dawn bawk a ni.

College of Agriculture, Central Agricultural University, Imphal, Manipur-a Bachelor of Science (Agriculture) zirlaite chuan Oct. 16-27, 2023 chhung khan KVK, Kolasib-ah Rural Agricultural Work Experience (RAWE) Internship Prog-ramme an hmang a, nimin khan he Programme kharna leh Certificate hlanna hun hman a ni a, tun tumah hian CAU Imphal-a BSc (Agriculture) zirlai 7 te kawng hrang hrangah zirtirna pek an ni.

MPCC President Lalsawta chuan nimin a Congress Bhavan Golden Hall-a Friday Political Session-ah Congress Party an sawrkar anih chuan SSA zirtirtute harsatna an chinfel tur thu a sawi a. “A ngheta dah ngei kan tum ang. Vawi leh khatah an zavaia kan dah nghet thei lo anih pawhin a tahtawlin kan dah nghet ang tih ka tiam a ni,” tiin Congress Party chuan dawt an sawi ve ngai lo niin a sawi bawk.

Khawzawl DC Office-in ruahmanna siam bawhzuiin Geography Association of Mizoram (GAM) leh Govt. Champhai College, Geography Department te tangkawp chuan nimin khan Tropic of Cancer-in Khawzawl khawchhung a tan tlangna hmun an zawngchhuak a. Tropic of Cancer (23 1/2° N) in Khawzawl a tan tlangna hi hmun hnihah zawnchhuah (identify) niin heng hmun te hi Khawzawl Hermon Presbyterian Biak In thlang (Bung hnuai) leh Neihdawn kawng in National Highway 06 a pawhna hmar lam te an ni a. Heng hmun ah te hian chhinchhiahna mawi leh felfai tak siam tum a ni.

Mizo Zirlai Pawl (MZP) General Hqrs. chuan nimin khan Aizawl-a MZP Conference Hall-ah Zirlaite Ni leh MZP din champhaphak vawi 88-na lawmna leh zirlai hruaitu pass thar te lawm-puina hun a hmang a, MZP hi Oct. 27, 1935 khan ‘Lusai Student Association’ tia din niin kum 1947 khan ‘Mizo Zirlai Pawl’ tia thlak a ni a. Tunah hian MZP General Hqrs. hnuaiah Hqrs. 13, Sub-Hqrs. 49 leh Branch 100 chuang an awm a, Hnampual Zirlai Pawl 7 an inziaklut bawk a ni.

Mizoram Cooperative Apex Bank (MC-AB) Ltd. chuan Presbyterian English School te hman atana Computer Set leina tur Rs. 12,50,000 an hlan a, heng sum te hi Apex Bank Chairman Lalnunsanga chuan Synod Moderator Rev. Dr. C. Chawnghmingliana kutah a hlan a ni. Apex Bank Chairman chuan hun rei tak atang Apex Bank leh Mizoram Synod te an lo indawr tawh dan leh inzawmna tha neih zel an duh thu a sawi a. Synod Moderator pawhin Apex Bank leh Mizo-ram Synod inzawm dan leh an lo chhawr tangkai tawh dan te sawiin, thuk zawka inzawmna neih zel a beisei thu a sawi bawk. Mizoram Cooperative Apex Bank hi Mizo mipuite Bank a nih angin Bank Service bakah a hlawknate Mizo mipuite hmasawnna atana hman thin a ni.

Mizoram Legislative Assembly Inthlanpui neih turah Polling Station venhim uluk zual ngai bik 30 a awm.

BJP National President Jagat Prakash Nadda chuan Mizoram-ah BJP telna sawrkar a piang a nih chuan MNF sawrkarin SEDP a kalpui dan chhui chiang turin Special Investigation Team din a ni ang, a ti.

Aizawl District Court-a Special Judge (Prevention of Corruption Act) Dr. HTC. Lalrin-chhana chuan cheng vbc 1.06 tihchingpen thubuai ah Law and Judicial Department-a LDC (Muster Roll) thin Lydia Lalhruaitliangi chu thiamloh a chantir a, a hremna tur hi karleh Thawhtanni, Oct. ni 30-ah puan a ni ang.

Mizoram Legislative Assembly Inthlanpui lo awm tur atan Serchhip District chhung Assembly Constituency pathum-a kum 80 chunglam te leh rualbanlote chu nimin Oct. 26, 2023 atang khan an chenna In-ah Inthlan buaipuitu ten kalchilhin Vote thlak tir an ni ta.

Mizoram Legislative Assembly Inthlanpui neih tura Serchhip Bial-a Independent Candidate Ramhlun-Edena chu nimin tlai khan a Election Agent Lalremmawia nen CEO Office-ah Media Cell-ah koh niin tunhnaia Election kaihhnawiha Social Media leh Chanchinbu kaltlanga thu thehdarh chungchang bakah Dan leh hrai chung-chang te sawipui a ni a. He hunah hian CEO Office-a Media Cell Member te chuan Vote thlak chungchanga Media kaltlanga Ramhlun-Edena thu sawi in mipui ah nghawng tha lo a neih theih dan te tarlangin, ngenna an siam nghal bawk a. He an ngenna ang hian Vote thlak chungchang ah thuchhuah leh thusawi tawh loh an remti niin Addl. Chief Electoral Officer H. Lianzela chuan a sawi a ni.

Mizoram People Forum (MPF) Serchhip District chuan Assembly Inthlanpui neih tura Ser-chhip Bial-a Candidate hrang hrangte tan Vawiin chawhnu dar 1:30 hian Serchhip Bazar Tual-ah Common Platform an buatsaih dawn a, he hunah hian Serchhip Bial chhunga Candidate mi 6 te chu thusawina hun pek an ni dawn a. Hetiang bawk hian khaw hrang hrangah pawh MPF te hian Common Platform buatsaih tur hian ruahmanna an siam mek bawk a ni.

Mizoram Assembly Inthlanpui neih tura BJP tana Campaign tura rawn zin mek Union Minister Rajiv Shankar chuan nimin khan Siaha-ah Street Campaign a nei a, Kan hmaa thil pawimawh lo thleng tur a awm avangin Siaha leh Palak Bial-ah BJP Candidate an tlin a ngai tih sawiin, an party candidate pahnih an thlantlin chuan ama chanpual atangin Siaha District thalaite tan hna thawh tur leh hmasawnna nasa tak pek a tiam bakah IT lamah hmasawnna turin chak zawkin hma an lak tur thu a sawi a, Siaha District tih hmasawnna hna thawh nan Special Package vbc. 35-50 pek an nih tur thu a sawi tel bawk.

North East Congress Co-ordination Committee Convener Pradyut Bordoloi chuan nimin khan Aizawl Press Club-ah Thuthar lakhawm-tute kawmin, BJP in Hmarchhak mipuite bumna policy a kalpui mek niin a sawi a. ECCC Convener chuan mipuite min thendarha, kan chunga rorel tumin kawngkhar hnung lamah rukru angin rawn luh an tum mek nia sawiin, chumi tur chuan Regional Party te an hmang mek niin a sawi bawk. Prime Minister Narendra Modi-a’n Manipur buaina a ngaihthah luih chungchangah ni 177 lai a liam hnuah pawh Manipur la tlawh lo ah Prime Minister chu a puh bawk.

Mizoram Assembly Inthlanpui neih tura Lawngtlai District chhung Polling Station hrang hranga Duty tur Polling Officials te tan nimin atang khan Postal Ballot hmanga Vote thlakna hun chu Facilitation Centre, Govt. Regional Higher Secondary School, New Vengpui-ah hawn tan a ni a, tun thla ni 28 thlengin Polling Official te tan hian Vote thlak theih tura ruahman niin Oct. 31 atanga Nov. 6 thlengin Polling Station-a duty tur ni lo, Election Official dangte tan Facilitation Centre, Deputy Commissioner’s Office-ah Postal Ballot hmang a vote thlakna hun hi hawn leh a ni bawk ang.

Nature Learning Centre (NLC) Mizoram leh Association for Environmental Preservation (ASEP) tangkawp buatsaih Environmental Photo Exhibition chu nimin khan Millenium Centre Atrium-ah-ah neih tan niin ASEP President K. Lalmuansanga chuan a hawng a. He Exhibition hi ramngaw leh nungcha humhalh inzirtirna tura buatsaih niin Mizoram chhunga khuarel, nungcha chi hrang hrangte thlalak, Mizo fate kutchhuak ngei phochhuah a ni a. Ni thum chhung neih tur niin tunkar Inrinni thlengin a duh apiang tan tlawh theih a nih bakah thlalak phochhuah te hi lei theih a ni bawk.

YMA Inkhawmpui Lian Biate-a neih chu nizan khan a tiak ta a, nimin khan Khawmpui Palai ten kum 2023-2025 chhunga Central YMA hruaitu tur thlangin Vice President nilai Lalhmachhuana (Chaltlang Lily Veng) chu President thar atan thlan a ni a. Vice President atan Prof. Lalnuntluanga (New Capital Complex); General Secretary atan Prof. Malsawmliana (Vaivakawn); Assistant Secretary atan (Fabian Lalfakawma) Chawlh-hmun Veng); Treasurer atan Roneihthanga (Nursery Veng) leh Finance Secretary atan MS. Ralte (Upper Republic veng) te chu thlantlin an ni bawk.

Maharashtra Public Service Commission Chairman leh Member bakah an thawhpuite chuan Mizoram rawn tlawh mekin nimin khan Mizoram Public Service Commission Office tlawhin Joint Meeting an nei.

Mizoram Assembly Inthlan puan atanga zawhfel ni thlengin Internet leh Social Media kaltlanga thu thehdarhtuin Model Code of Conduct (MCC) a bawhchhia em tih chu Media Certification and Monitoring Committee (MCMC) leh Social Media Team ten uluk takin an vil.

Mizoram Chief Electoral Officer (CEO) Madhup Vyas chuan Inthlanpui neih turah inthlan buaipuitute ke-a an kal ngaihna Polling Station 22 chu inthlan buaipuitute an intirhchhuah hma ngeia lirthei kaltlang theiha siam a nih a beisei thu a sawi.

Mizoram-a Political Party pathum te telna, Mizoram Secular Alliance hruaitute chuan nimin khan Serchhip Press Club-ah thuthar thehdarhtute kawmin, India rama Sakhaw zalenna duhtu Congress Party Candidate te Vote turin mipuite chu an sawm.

Mizoram Assembly Inthlanpui lo awm tura 26-Serchhip (ST) AC-a Independent Candidate Lalawmpuia Renthlei chuan nimin khan Serchhip-ah thuthar thehdarhtute kawmin Nomination a File chhan leh a ngaih pawimawh te a hrilhfiah.

Serchhip District chhunga Assembly Constituency pathum (3)-ah hmeichhia ten vote thlak pawi-mawh zia an hriat a, hmeichhe vote thlak percentage a san theihna turin District Election Office leh MHIP Sub-Hqrs. Serchhip te chuan thawhhona thuthlung an ziak.

Serchhip District chhung Assembly Bial hrang hranga Candidate te sum hman dan enfiahna hmasa ber chu nimin khan neih a ni a, he hun hi Serchhip District tana Expenditure Observer Umesh Chandrakant Phade IRS hova neih a ni.

Mizoram DGP Anil Shukla IPS chuan nimin khan Serchhip rawn tlawhin SP leh a thawhpui ten an lo dawngsawng a, inthlanpui neih tura Serchhip District-a Police te inbuatsaihna hrang hrang a enpui bakah hmundang atanga Police rawn kal te awmna hmun tura ruahman te a tlawh bawk a ni. Mizoram DGP chuan Police te chu Inthlanpui neih chhunga an tih tur leh tih loh tur te hre chiang tura chahin, harsatna an neih hrang hrangte pawh a ngaihthlak sak nghal bawk a ni.

Assembly Inthlanpui neih tura Serchhip District chhunga Flying Squad, Video Surveillance Team (VST) leh Static Surveillance Team (SST) tana Training chu nimin khan Serchhip DC Meeting Hall-ah neih a ni a, he hun hi Serchhip District-a Expenditure Observer Umesh Chandrakant Phade IRS chuan a telpui a, heng Team hrang hrang hi Assembly Bial tina pahnih theuh awmsa bakah pakhat theuh siam belh niin nimin-a Training-ah hian an tel nghal a ni.

Mizoram Assembly Inthlanpui-a Candidate ten an affidavit an thehluh PTI-in a zirchianna ah Mizoram-a Candidate zinga zaa 64.4, candidate 174 zinga 112 te thil neih hlut zawng chu cheng vbc. 1 chunglam a ni.

Ram in zalenna a neih hriatrengna, Azadi Ka Amrit Mahotsav hnuaia Meri Maati Mera Desh hnu kharna, Mitti Kalash Yatra programme chu nimin khan Mizoram bikah Sports and Youth Affairs Directorate Auditorium-ah hman a ni a. He hun hi Sports and Youth Services Department Secretary Dr. Lalrozama, State Nodal Officer chuan hmanpuiin Meri Maati Mera Desh chu ram pum huapa thil pawimawh tak, zalenna hmuh pawimawh zia leh a sual chhuaktute ngaih pawimawh an nih zia hriatrengna atana huaihawt a nih thu a sawi bawk.

Mizoram Assembly inthlanpui neih tur atana inbuatsaihna kal zelah nimin khan Aizawl-a ICT Conference Hall-ah thuthar lakhawmtute pualin ni khat awh inthlan chungchang chanchinthar thehdarh dan inzirtirna buatsaih a ni a. He hun hi Addl. CEO H. Lianzela chuan hmanpuiin, inthlan lo awm turah vote a tam thei ang ber a tlak theih nan Media kaltlanga inzirtirna uar a tul thu a sawi a. Mipui Rorelna Democracy-ah chuan Media te hi ram innghahna lungphum palina an nih thu sawiin, ram hmalam hun atan an dinhmun a pawimawh hle, a ti a. Inthlanna felfai, thianghlim leh langtlang a awm theih nan Media kaltlangin hmalak a tul thu sawiin, Chanchinthar thehdarh kawngah pawh tan bik nei lo a lai taka thu thehdarh thin turin thuthar lakhawmtute hi a chah a ni. He Workshop-ah hian inthlan kaihhnawih hrang hranga Media-te mawhphurhnate, dan leh hrai chi hrang hrangte inzirtir a ni.

Kum 2023 MLA inthlanpui awm tura ZPM Candidate te rinawmna thutiam hun chu nizan hmasa khan Val Upa Council te ruahmanna in Aizawl a Dawrpui Multipurpose Centre-ah neih a ni.

MNF Media & Publicity hruaitute chuan ZPM Chief Ministerial Candidate leh Serchhip bial MLA ni mek Lalduhoma'n MLA Fund atanga damlo kanna atan sum a chheprel ngei nia an hriat thu an sawi.

YMA Inkhawmpui Lian vawi 74-na chu Biate-ah neih mek niin Vawiin hian Central YMA hruaitu tur thlanna neih a ni anga, zanin hian Inkhawmpui hi a tiak dawn a ni.

Chief Electoral Officer (CEO), Mizoram Madhup Vyas IAS chuan nimin khan Aizawl-a ICT Conference Hall-ah thuthar thehdarhtute kawmin Assembly Inthlanpui neih tur atana an inbuatsaihna hrang hrang a tarlang.

Election Commission of India in Mizoram Assembly Inthlanpui neih tura Serchhip District-a General Observer tura a ruat V. Sampath IAS chuan inthlanna fel fai, thianghlim leh huapzo a awm theih nan thawhhopui ah he Inthlanna a Candidate leh an aiawhte chu a sawm.

Mizoram Assembly Inthlanpui neih tura Serchhip District tana Expenditure Observer Umesh Phade IRS chuan nimin zing khan Serchhip District MPF hruaitute kawmin inthlanna felfai leh thianghlim neih theihna tura MPF hmalakna hrang hrang a sawipui.

Mizoram Assembly Inthlanpui neih turah Election Commision of India thuchhuak angin Vote thlak tur Electoral Roll-a chuang te chuan Electoral Photo Identity Card (EPIC) ken tur a ni a. EPIC ken tur nei lo te tan an nihna tilang chiang thei tur (Identification) atan Aadhaar Card; MNREGA Job Card; Thlalak chuanna Passbook Bank, emaw Post Office emaw atanga pek chhuah; Health Insurance Smart Card, Labour Ministry pek chhuah; Driving Licence; PAN Card; NPR Smart Card, RGI pekchhuah; Indian Passport; Thlalak chuanna Pension document; Central/State Govt./PSUs/Public Limited Companies pekchhuah thlalak chuang Service Identity Card; MPs/MLAs/MLCs te Oficial Identity Card te leh Ministry of Social Justice & Empowerment, Government of India in Unique Disability ID (UDID)Card a pekchhuah te chu hman theih a ni dawn bawk a ni.

Doordarshan Aizawl-a Joint Director leh News Head Nampibou Marinmai chuan nimin khan Kolasib District tlawhin District Bawrhsap John LT. Sanga a kawm a, Assembly Inthlanpui neih tura inbuatsaihna hrang hrangte a sawipui a ni. He Inkawmna ah hian Nampibou Marinmai chuan Kolasib District chu Assam nen ramri intawm an nihna laiah District pawimawh tak a nih avangin Inthlan lo awm turah pawh District dang zawng aia pawimawh a nih thu a sawi a, District Election Officer John LT. Sanga chuan tun dinhmunah Assam nen ramri chungchangah harsatna an neih loh thu sawiin, thla hmasa mai khan Assam lam nen Border Meeting pawh an neih thu leh Election a tana harsatna thleng theiah Assam Sawrkar thuneitute nen thawhho nise an tih thu a sawi a ni.

Nimin Oct. 24 kha ‘World Polio Day’ a ni a, he ni hi Zeng hri venna lak a pawimawh zia inzirtirna ni atana hman thin niin India a Zeng hri vei hnuhnungber chu January ni 13, 2011 khan chhinchhiah a ni a. World Health Organi-sation (WHO) chuan India chu kum 2014 khan Zeng hri awm tawh lohna ramah a puang tawh a. He hri laka ram mipuite an him nan hian hri danna la tura inhrilhhriatna kawngah India chuan nasa takin hma lain ramchhunga Zeng hri a luh leh tawh loh nan hri hluarna ram thenawm, Afghanistan leh Pakistan lakah India chu a la fimkhur chhun-zawm zel a ni.

Serchhip DAO Office atanga thu kan dawn danin PM-KISAN buaipuitute an zin avangin tunkar Ningani (Oct. 26, 2023) hian PM-KISAN buaipui turin Serchhip-ah Agriculture Department chu dawr theih a ni dawn lo a. PM-KISAN buaipui duh Farmers te hriatthiamna ngenin Form erawh lakchhuah reng theih a ni dawn thung a ni.

Santosh Trophy khelh mekah Mizoram chuan nimin khan hnehna chang lehin Final Round luh beiseina an nei sang zel.

MNF Party chuan Mizoram-a Assembly Bial tinah MNF sawwrkar leh duhsaktu leh rinna nghattu an pung zel tih nimin khan thuchhuah siama tarlangin, “Hun hmasa lama MNF rawn zawmtu te chhiar tello pawhin tun October thla chhunga MNF a lo lut ringawt pawh hi mi sing chuang fe an ni tawh a ni,” an ti a. “ZPM, Congress, BJP kalsan a, MNF huangchhunga ram rawngbawl hna thawk zel tur hian hmun ruak ala awm zel a, neutral atanga tha thawh duha rawn penlut duh tan pawh MNF chu zau takin a inhawng reng a ni,” tiin “Pathian leh mipuite duhsakna changin kan sawrkar leh ngei beiseina sang tak kan nei a ni,” an ti bawk.

MPCC President Lalsawta chuan nimin khan Lungdai Bazar-a Vantlang Inkhawm neih ah kan ram siam tura an rinchhan chu Pathian a nih thu sawiin, “Kan lama tang Pathian kan nei. Dik tak leh huai taka rorel turin min duh, a duh dana kan tih hian min tanpui ang tih pawh kan ring a, kan zam lo,” a ti a. Ram rorelna tha nei turin a reltu mi 40 an that a ngai tih pawh sawiin, “Mipui tha viau mah ila a reltu MLA an that loh a, a lu ber hming a hliau miau chuan rorelna tha kan nei ngai lovang,” tiin Sum-a lei theih sal neih hunlai a liam tawh thu leh sum-a lei theih kan nih loh thu a sawi bawk a ni.

State Meterological Centre Aizawl tarlan danin Bay of Bengal tuipui atanga Cyclone inmung mek chuan India hmarchhak lam thleng tawhin naktuk thleng hian Mizoram-ah ruah pawh sur thei tura ngaih a ni bawk.

MLA Inthlanpui lo awm turah Voter a tam thei ang berin Vote an thlak theih nana hmalakna SVEEP Cycle Rally chu nimin zing khan Aizawl Vanapa Hall kawt-ah neih a ni.

Mizoram Legislative Assembly inthlanpui neih tur chu fel fai, muanawm leh thianghlim taka neih a nih theih nan leh Mizoram mipui, vote nei te’n zalen tak leh him taka vote an thlak theih nan Mizoram Police chu kumin June thla atang khan a bik takin an lo inbuatsaih tawh.

ZPM Party chuan Mizoram-ah Sports-in nasa takin hma a sawn thu sawiin, Sports Person te chuan ngaihsak erawh an hlawh tawk lo niin an sawi.

Union Minister Kiren Rijiju-a’n Mizoram tana kawl a ên theihna tur chu BJP a nih thu a sawi.

YMA Inkhawmlian vawi 74-na chu nizan atang khan Biate-a Zialung Run-ah neih tan a ni a, Vawiin-ah Rorel Inkhawm neiin naktuk-ah hruaitu thlanna neih a ni ang.

Serchhip Bial-a MNF Party Candidate J. Malsawmzuala Vanchhawng chuan inthlanpui an hmachhawn tura hun tlem an la neih ah tha thlah lova theihtawp an chhuah chuan hlawhtlinna an chan ngei a beisei thu a sawi.

Serchhip District chhunga Assembly Bial pathum chuh tura hming pelut zingah inhnukdawk awm lovin Candidate mi 15 an awm dawn ta a. Nimin khan Polling party Second Randomization neih a nih bakah EVM hman turte tifelin Randomization neih nghal a ni bawk.

Serchhip Sub-Hqrs. YMA hruaitute chuan Serchhip leh Keitum inkar NH. 54 siamthat hna thawh mek chu Inrinni khan a hmunah enin kawng chhe zual siamtha tura hnathawktute an ngenna bawhzui a nih dan te an thlir bawk.

Serchhip District chhung Hualtu khuaa Sang-zika In chu nimin khan bungrua engmah chuh hman lohin a kangral. Sangzika te hi nupa rek-a awm niin nimin chawhma dar 10:30 vel khan an In, Assam Type hi a kang a, kangmei chhuah lai hian In neitupa hi hnathawka a chhuah avang leh a nupui hi Chhing-chhip-ah a kal avangin kangmei chhuah chhan hi chiang taka hriat a ni lo a, mei an chhem ngai loh avang leh eirawngbawlna Gas pawh an Off avangin electric kalsual avanga kangmei hi chhuak nia rin a ni. Kangmei a chhuak tih hriat a nih hian a lo nasat tawh avangin thelh mai theih a ni lo a, chawhnu lamah In kang bang senghawi hna hi thawh a ni.

State Meterological Centre Aizawl chuan Bay of Bengal Tuipui atanga thlipui (Cyclone) in mung mek chuan Mizoram-ah pawh ruahtui a thlen dawn tih thuchhuah siamin an tarlang a, Bay of Bengal Tuipui atanga cyclone insiam tantir hian zawi zawiin India Hmarchhak lam a pan mek tih sawiin, he Cyclone insiam hian Mizoram-ah chuan thli na tham a thlen lo tura ngaih a ni a, chutih rualin Vawiin leh naktuk-ah hian Mizoram hmun tinah ruah sur tura ngaih a ni tih an tarlang bawk. Serchhip-ah chuan nimin zing lam khan ruah tam vak lo surin mipui tana harsatna lian siam khawp chuan ruahtui hi a tla lo thung a ni.

Lunglei District chhunga Tlabung leh khaw dang inkara tlan thin Maxi Cab 30 bawr vel te chu nimin atang khan dan pangngaiin an tlan leh tan ta a, tarlan tawh angin Tlabung atanga Lunglei leh Aizawl bakah Chawngte leh khaw danga tlan thin Maxi Cab 30 bawr vel te chu kumin July 24 atang khan NH. 302 zawh ngam loh avangin an ding tan a, ruahtui a hul tan leh tak avangin nimin atang khan dan pangngaiin an tlan leh tan a, hetianga Maxi Cab te an tlan mumal loh chhung hian mipui ten harsatna an tawk nasa in ei leh bar lakluhna kawngah pawh harsatna an tawk a ni.

Govt.Saiha College-a Zirtirtu pakhat sawn a nih avanga lungawilohna lantirin nimin khan Siaha-ah zirlai ten kawng an zawh. Thudawn danin Govt. Saiha College Students Union te chuan an Zirtirtu regular a thawk an neih chhun English Teacher chu J. Thankima College, Aizawl-a Attach-a dah a ni a, Students Union-te chuan English Department-a Regular Teacher an neih chhun chu sawn lo tura sawrkar an lo ngen tawh thu leh a hmain zirtirtu pahnih pawh sawn an lo nih tawh thu an sawi a, zirlaite'n harsatna nasa tak an tawh phah nia sawiin, lungawilohna hi an lantir a ni. Hetihlai hian nimin khan Govt. Siaha College-a English Department-a Assitant Professor Lalrinpuii Rokhum chu a Post ngai ah hian dahletna Order tihchhuah a ni.

Lawngtlai East Bial-a ZPM Candidate tura hming pelut Dr. Lorrain Lalpekliana Chinzah Nomination File na a thil fel lo awm mah se, Returning Officer (RO) thutlukna kaltlangpui a ni dawn a, Dr. Lorrain-a Nomination Paper-ah amah proposed tu mi 10 zinga pakhatin hming a sign loh avangin nomination endik ni October 21, 2023 khan thutlukna siam theih a ni lo a. A tuk Oct. 22-ah Dr. Lorrain-a nomination paper hi endik leh niin RO chuana pawm sak a. Hethlai hian Lawng-tlai East Bial-a BJP Candidate NC. Muankima, INC Candidate H. Zothangliana leh MNF Candidate H. Biakzauva chuan niminpiah khan thuchhuah siamin, Returning Officer Abraham Berazi Khithie thil tih dana an lawm loh thu leh thuneitu sang zawka kal an tum thu an tarlang ve bawk a ni.

Mizoram Assembly Inthlanpui neih turah National leh State Recognised Party-ten Sawrkar Media, Doordarshan (DDK) leh Akashvani (AIR) kaltlanga hun an hman dan tur chungchangah ruahmanna siam a ni.

Assembly bial 40 awmna Mizoram inthlanpui neih tur chuh tura hming pelutte inhnuhdawh theih chu nimin tlai dar 3:00 khan a tawp ta a, inthlan chuh tum-a hming pelut zingah inhnukdawk an awm loh avangin November ni 7-a Mizorama Assembly inthlanpui neih turah Candidate 174 an awm dawn ta a ni.

MZP Hqrs. Lunglei chuan nimin khan Office Bearer thutkhawm neiin MZP-in Party tinte MLA Election lo awm turah hnamdang pasal neite Candidate a dah lo tura a ngenna Congress Party-in zah loa, hnamdang pasal nei Candidate-a dah luih a ni chu pawi an ti takzet tih an sawi a. Tun hnuah hetiang hi thleng nawn tawh lo se an duh thu sawiin, “Hnamdang pasal nei Ccandidate-a dah luih a nih chungchangah MZP General Headquarters hmalakna kan thlawp tlat a, an hmalak leh zelna turah theihtawp kan chhuahpui zel dawn a ni,” an ti a. Lunglei South Constituency-a MZP Sub-Headquarters leh Branch-te chu MZP hmalakna lo tawiawm a, hnamdang pasal nei kan ram rorelna chelhtu an nih loh nan theihtawpa hma lo la turin an ngen a, MZP hmalakna tawiawm tur leh thlawp turin Mizo mipuite an ngen tih an sawi bawk.

Lunglei District-a Special Judge (POCSO Act) chuan mahni fanu pathumte pawngsual thintu Lawngtlai District chhung khaw pakhat-a mipa kum 46 mi chu thiamloh chantirin kum 21 tang turin a hrem.

ZPM Consultant F. Rodingliana chuan Electric Bill mipui-ah a to telh telh zawk chu mipuite hrilhfiah an phut thu a sawi.

Mizoram Pradesh Congress Committee (MPCC) Chief Spokesperson Ronald Sapa Tlau chuan Mizoram inthlanpui lo awm tur atana Congress party in an Manisfesto-a tihtur an ziahchhuah chu an tih ngei ngei tur an tiam a nih thu a sawi.

MNF dinchampha vawi 62-na lawmna chu nimin (Oct. 23, 2023) khan Aizawl a Mizo Hnam Run-ah neih a ni a, he hunah hian MNF President Zoramthanga chuan thu a sawi a ni.

ZPM Leader leh Serchhip Bial-a ZPM Candidate Lalduhoma chuan MLA Term kal mekah Opposition a nih avangin a Bial mipui ten a chhe zawngin a zar an zo nia sawiin, a hausakna pung chak lutuk nia sawi chu a Inhmun a hralh then vang a nih thu a sawi bawk.

India rama Police an Duty laia hmelma te kut tuara boral te hriatrengna leh zahna hlanna ni, 'Police Commemoration Day' chu Inrinni (Oct. 21, 2023) khan rampum ah urhsun taka hman a ni a, Serchhip-ah pawh Superintendent of Police (SP) MS. Dawngkima hovin he ni hi hman a ni.

Mizoram Assembly Inthlanpui neih tura Postal Ballot hmanga Vote thlak turte tan naktuk, Oct. 24, 2023 thlengin dilna thehluh theih a ni.

Serchhip Vengchung Pastor Bial KTP chuan Inrinni khan Inrinni khan Serchhip Blood Bank-a dah turin thisen Unit 32 an pe a, thisen petute hi mipa 21 leh hmeichhia 11 niin tun tumah hian Serchhip Vengchung Bial KTP aiawhin Serchhip Vengchung Branch KTP ten thisen hi an pe a, thla thar ah Branch dangin an pe ve leh dawn a ni.

Inrinni khan Serchhip DIET buatsaihin DIET Multipurpose Hall-ah On the Spot Painting Competition neih a ni a, he intihsiakna hi zirlai naupang kum 14 hnuailam tana buatsaih niin an kum zat a zirin Category pathum (3)- kum 7 hnuailam, kum 8-10 leh kum 11 - 14 te tan intihsiakna hi neih a ni a, Category tinah hian lawmman pakhatna atanga pathumna siam theuh niin Serchhip khaw-pui chhunga zirna In hrang hrang atangin zirlai mi 308 an tel a, hun remchang hmasa ah lawm-man semna hi neih leh tur a ni ang.

Mizoram Legislative Assembly Inthlanpui neih tur chuh tuma Serchhip District chhung Assembly Bial pathum-a Nomination paper thehluh te chu pawm vek niin Vawiin tlai dar 3:00 thleng hian inhnuhdawh theihna hun hawn a ni ang.

Serchhip Vengchung Branch YMA ten an huamchhunga chhungkaw pakhat chenna In tur sak hnatlang kar kalta Thawhtanni atanga an neih chu Inrinni thleng khan chhunzawmin In sak hna hi zawhfel a nih thu an sawi a. Vawiin lam hian inthiarna te siam sak lehin tunkar Nilaini velah In neitu ten an luahluh theih beisei a ni. Tarlan tawh angin In an sak sak te damlohna avanga pa ber hna thawk thei lo leh In nei lo an ni.

Thenzawl Lothazawl Khelmual-a Seventh Day Adventist thalai Inkhawmpui lian, Adventist Youth Convention vawi 3-na neih chu nizan khan a tiak ta a, Mizoram hmun hrang hrang atangin Palai thahnem tak an kal a ni. Nimin Pathianni chawhma inkhawmah Pastor PL. Biakchhawna hnen atangin Pathian thuchah ngaihthlak a ni a, Neih inang inkawp chungchang Adventist te thlir dan tih thupui zirhona neih a ni bawk.

Ningani kalta khan Mizoram-ah COVID-19 hri kai mi pakhat hmuh leh a ni a, kumin Sept. 12 hnu lama Mizoram-a COVID-19 hri kai hmuh leh hmasak ber niin Mizoram-ah COVID-19 hri kai enkawllai mi pakhat a awm leh mek a ni.

Mizoram-a District Jail thenkhata tang thei zat aia tam awmte chu Jail thawlna deuh dangah semrual dan ngaihtuah mek a ni tih Inspector General of Prisons R. Lalremsanga chuan Zirtawpni kaltaa Champhai District Jail a tlawhna ah a sawi a, Mizoram-a District Jail tang dinhmun a inang lo hle tih sawiin, Jail thenkhatah tang tur aia tam an tan laiin, thenkhatah an thawl em avangin tang tamna hmun ami, mi tang tlemna awmna hmunah sawnkual tura hma lak mek a ni tih a sawi a ni. Champhai District Jail hi mi 150 tan theihna tura duan a nih laiin, tunah mi 204 an tang mek a, hei vang hian tang ei leh in a hautak hle tih Jail hotute chuan an lo sawi a ni.

Mizoram-a Political party 8 leh pawl hrang hrangte’n a huho leh a hranga Mizoram Legislative Assembly inthlana vote tlate chhiar ni tura ruat sawn tura an ngenna chu Election Commission chuan tun thlengin a la chhang lo nia thudawn a ni a. Mizoram Assembly Inthlanna a vote tlate chhiarna hun atan hian ECI chuan December ni 3, 2023 a ruat a. He ni hi Pathianni a nih avangin Political party bakah Central YMA, MHIP, MUP, MZP leh MSU President theuh hming ziah hnanin vote thlak ni sawn tur hian an ngen a. Vote chhiar ni tura ruat December ni 3 chu Pathianni, Kris-tian-te inkhawma Pathian an biak ni a nih avangin sawn turin Election Commission hi an ngen a. Hei bakah hian Mizoram-a Political Party lian te chuan Pathianni-a Vote chhiar an duh loh thu an sawi a, MPF leh MKHC te chuan a hranpa in Chief Election Commission hnenah hian ngenna an thlen bawk a ni.

Santosh Trophy khelh mekah nimin khan Mizoram chuan Uttarakkand hnehin Final Round luh beisein an la nei zel.

MNF Adviser leh Minister Lalruatkima chuan, “Kan manifesto hi 80% vel hi chu kan tihlawhtlingin kan hria a, kan tihlawhtlin rih lohte pawh nasa taka hma kan lak meknate a ni hlawm,” a ti.

ZPM Party chuan rorellai MNF Party chu Socio Economic Development Programme (SEDP) hmanga mipui bumah an puh.

Reiek Tourist Resort-a ni 2 awh Anthurium Festival 2023 chu Inrinni khan zawhfel niin Chief Secretary Dr. Renu Sharma-i’n chuan he hun hi a hmanpui a ni.