Latest News

Mamit DC in Saikhawthlir BOP a hmunah a tlawh

Mamit District Bawrhsap, Dr. Lalrozama IAS leh SP, Vineet Kumar IPS te chuan nimin khan Saikhawthlir khua-a Border Out-Post (BOP) an tlawh.

District Bawrhsap leh SP te hian Chuhvel leh Saikhawthlir ramchhunga John Halliday-a Thlam sak avanga buaina awm chung-changah boruak thalo veng tura duty-te an awm-hmunah tlawhin khawtlang hruaitute nen boruak tha a awm theihna tura hmalak dan tur an sawiho a. Saikhawthlir-ah hian tunhnaia Zemabawk atanga CRPF Platoon 1 sawnthlakte awmna tur hmunhmate enfel nghal niin Duty-a awm mek 3rd Battalion MAP/4th IR BOP pawh an tlawh nghal bawk a. Zemabawk atanga CRPF Platoon khat te hi a hmunah hian boruak thalo te veng tura dah an ni.

Mamit District Bawrhsap, Dr. Lalro-zama chuan tunhnaia John Halliday-a Thlam sak avanga buaina awm chungchangah Chuhvel leh Saikhawthlir khuate chu ram lehkha document an neihte vawng tha tura chahin, kan ramchhung ah thlamuang taka awm turin a chah a. Ram venhim hna chu sawrkar-in a ngaih pawimawh ber a nih avangin ramdang/hmundang atanga kan ram-chhunga buaina rawn siam an nih chuan a tul anga hmalak chu sawrkar-in a tum thu sawiin, chutihrual chuan sawrkar hmalakna ngaichang thiam turin a ngen bawk.

Mamit District Bawrhsap hian John Halliday-a Thlam sak chungchanga buaina awm thlithlai hian Chuhvel leh Saikhawthlir hi tum thum a lo tlawh tawh a, nimin-a helai hmun a tlawhna ah hian Kawrthah atangin SDO (C) leh SDPO bakah, Saikhawthlir VCP leh VC Member dangte'n an tawiawm a ni.

Comments

Chhiar Hlawhte