Latest News

Sawrkar in ration buhfai sem chungchang sawifiah

Mizoram sawrkar chuan thuchhuah siamin mipuite hnena Ration buhfai sem chungchang chu a sawifiah.

Sawrkar thuchhuah chuan National Food Security Act, 2013 hnuaia Section 3(1) a inziak angin Priority Household Ration Card (PHH/Card hring) neite chanvo chu member pakhat tan thla khatah buhfai kg. 5 a nih thu leh, AAY Ration Card (Card eng) neite chanvo chu Card pakhat tan thla khatah buhfai kg. 35 a ni tih an tarlang a. Buhfai khulna man hi Rs. 3 per kilogram (kg 1 zelah Rs. 3) a subsidise niin Central Sawrkar pawhin hetiang hisap hian NFSA buhfai tur pawh a rawn pe thin tih an sawi. National Food Security Act, 2013 in a huam ve chiah loh, State Sawrkarin tunhma atanga Ration Card a lo pek chhuah chhungkaw tam tak awmin heng te hi Card var pek an ni a, an quota hi thla khatah mi pakhat tan kg. 8 niin State Sawrkarin an buhfai ei ve tur chu Open Market atanga leiin, an buhfai khulna man pawh hi State Sawrkarin Rs. 15 per kg (Kg. 1 Rs. 15) in a subsidise ve thung tih an sawi.

Dan hnuaia PHH te chanvo hi APL (Card var) te quota ai pawha a tlem avang leh APL (card var) te lak zat tal an lak ve theihna’n State Sawrkar chuan Open Market-a buhfai a lei atang hian thla khatah mi pakhat tan Kg. 3 chantirin hei hi kg. ah Rs. 15 hisap-a khul tir an nih thu pawh an tarlang a. Tunah hian PMGKAY-III hnuaiah Sawrkar Laipui in NFSA beneficiary - AAY leh PHH-te tana thla khata mi pakhat tan a thlawna buhfai kg 5 zel a rawn phal tak avangin thla khatah PHH Card Holder chhungkua-a mi pakhatin kg. 10 a dawng thei ta a, chuvang chuan APL Card Holder te aia la tlem zawk an nih tak lohah chuan Mizoram Sawrkarin Additional kg 3 @ Rs.15/- per kg a belh thin chu tihtawp rih a ni a. PMGKAY-III hnuaia buhfai a thlawna sem a tawp hunah kg 3 belha sem thin hi chhunzawm leh a nih tur thu an tarlang a. Hei hi nikum a PMGKAY-II hnuaia April-November, 2020 chhunga a thlawna buhfai kan dawn pawha an lo kalpui dan a nih thu an tarlang a ni.

Tunhnaia Social Media-a Mizoram Sawrkarin mipuite ration buhfai chanvo a tih tlem sak anga thu thehdarh chu thu diklo a ni tih pawh Supply Department chuan sawiin, mipuite buhfai chanvo chhuh sakna emaw, cut sakna a awm lo tih an sawi bawk.

Comments

Chhiar Hlawhte