Lenkawl

Inrinni thleng khan Serchhip District-ah COVID-19 hri kai mi 11,664 hmuhchhuah an ni tawh .

Serchhip Darnam Tlang-a ‘MYC Youth Centre’ sak mekah hnathawktute chuan hna thawh tur atanga zaa 90 vel an thawh zawh tawh thu sawiin, May thla tir lamah chuan zawhfel hman tura an inbeisei thu an sawi.

Sinlung Hills Council (SHC)-a sawrkar dinglai paihthlak tuma hmalakna awm duhloh lantirna atan Hmar Peoples Convention (HPC) Party chuan naktuk March ni 1, 2022 atangin Sakawrdai-ah tiamchin awm lovin Total Bandh neih an tum.

Mizoram Board of School Education (MBSE) chuan Vawiin atang hian Mizoram hmun hrang hranga Exam Centre an ruahman ah kumin atana pawl 10, High School Leaving Certificate (HSLC) Exam an buatsaih dawn.

Speaker in case file tum lo

Mizoram-ah COVID-19 hri kai hmuhchhuah la pung zelin mah se ni hnih chhung chu ni khat-a hri kai hmuhchhuah mi sang khat aiin an tlem ta.

National Health Mission-Mizoram hnuaia thawktu te hlawh chu tunkar chhung hian dan thar angin Treasury-ah thehluh a, bill a luh veleh release turin NHM leh Finance Department hotute ten ruahmanna an siam.

Union Minister of State for Health & Family Welfare Dr. Bharati Pravin Pawar-i chuan Mizoram rawn tlawh mekin Vawiin hian New Delhi a pan ang.

Mizoram Pradesh Congress Committee (MPCC) chuan kumin-a Mizoram budget pharh tak chu mipui pual budget ni lovin Finance Minister Zoramthanga pual budget a ni, an ti.

Health Minister Dr. R. Lalthangliana chuan Mizoram chu India ram State te zingah Covid test ti tha leh ti tam ber te zinga mi kan nih thu sawiin, Mizoram-a hri kai hmuhchhuah atanga nunna chan tam lam chu 0.31% a nih thu leh India ram-a hniam berte zinga mi a nih thu a sawi.

Serchhip District-ah nimin khan COVID-19 hri kai mi 175 zet hmuhchhuah belh leh an ni.

Mimal lirthei khalhtute leh enkawltute tana hamthatna tur Private Member's Bill 'Mizoram Private Transport Workers (Welfare) Bill, 2022' tih nimin-a Mizoram Budget Session neiha Aizawl North-II bialtu MLA Dr. Vanlalthlana'n a putluh chu sawihona neih a nih hnuah hnawl a ni.

Kumin a High School Leaving Certificate (HSLC) leh Higher Secondary School Leaving Certificate (HSSLC) Exam neih tur chu hri leng laka himna ngai pawimawh chungin Serchhip a Exam Centre hrang hrangah nei tura inbuat-saih mek a ni.

Agricultural Technology Management Agency (ATMA) Serchhip District hnuaia East Lungdar RD Block buatsaihin nimin khan Sialsir khua ah Vawk enkawl dan Inzirtirna neih a ni a, he hunah hian Moses Zonunsiama, Assistant Technology Manager, ATMA in ATMA kal-phung leh training an neih chhante sawiin, he hunah hian Resource Person atan KC. Kawlhnuna, Junior Vety Extension Officer, Khawlailung hman a ni a, Vawk enkawl dan leh Damdawi chi hrang hrang hman dan leh pek dan turte zirtirin, Vawk damdawi sem nghal a ni bawk. Nimin-a Training neih zawh hnu hian Resource Person leh a Team te bakah MzSRLM Team te tangkawp chuan Sialsir khua a Vawk In zawng zawng fangchhuakin Vawk pul hri, Swine Fever Vaccine pek hna an kalpui leh nghal bawk a ni.

MZP General Hqrs. hruaitute leh Aizawl a College SU hrang hrangte chu nimin khan MZP Ofice-ah thukhawmin Offline-a College Class kalpui tur chungchang an ngaihtuah.

MJA in hmalakna an tlawh

Mizoram Pradesh Youth Congress Committee chuan Mizoram sawrkarin National Bank of Agriculture and Rural (NABARD) Govt. of India loan lak hmanga Mizoram-a School siam that leh thawmthatna sum hman danah pawisa tam tak eirukna a awm ngei nia hriat avangin nimin khan Mizoram Lokayukta Chairperson C. Lalsawta hnenah complaint thlenin First Information Report (FIR) an thehlut a. MPYCC President Dr. Lalmalsawma chuan, “Mizoram sawrkar School Education Department hian NABARD-ah Mizoram School 172 thawm thatna tur atan cheng nuai 3500 a puk a. He a pawisa puk hi Mizoram hmun hrang hrangah dik lo taka hmanna leh sum tihchingpenna nasa tak a awm ngei nia kan hriat avangin chhui chhuah ngei kan duh a ni,” a ti.

ZPM Party chuan Contract hnathawh-a dan kalha thil tihna chungchangah sawrkar in engtin nge hma a lak zui dawn tih an thlir reng dawn tih an sawi.

Niminpiah khan Mizoram-ah COVID-19 hri kai hmuhchhuah pung leh hretin hri kai 1057 hmuh an ni a, amaherawh chu hei hi Sample enfiah 5241 atanga chhut chuan zaa 20.17 a ni.

ZPM Thalaite chuan Driver te hamthatna tur Bill Ruling lamin an thlawp lo chu pawi an tih thu thuchhuah siamin an sawi.

Dan leh thupek kenkawh chungchangah MNF sawrkar chu a hlawhchham nia sawiin, State sawrkar thuneihna laksak turin BJP Mizoram Pradesh President Vanlalhmuaka chuan nimin khan Mizoram Governor Dr. Hari Babu Kambhampati a ngen.

Mizoram Governor Hari Babu Kambhampati chuan ICFAI University, Mizoram-a Vice Chancellor Prof. R.P.Vadhera leh Registrar Dr. David Lawmzuala te chu nimin khan Raj Bhavan-ah kawmin an hnathawh dan leh harsatna an neih te a sawipui.

Supply Minister K. Lalrinliana chuan, sawrkarin Food Corporation of India (FCI) atanga buhfai a leite chu a thianghlim tawk em tih finfiah turin zing zawka endik an tum tawh thu House a hrilh.

School Education Minsiter, Lalchhandama Ralte chuan NABARD sum puk hmanga School building sak leh siam thatah School 35 endik tawh atangin hnathawh tha tawk lo 6 hmuh a ni tih House a hrilh a. Hemi chungchanga zawhna chhanna eptu member ten an duhkhawp loh avangin House chhungah inhnialna hun engemaw chen a chhuak a ni.

Nimin khan Serchhip District-ah COVID-19 hri kai mi 138 zet hmuh belh leh an ni a, tunkar chhungin nitin-a hri kai hmuhchhuah hi mi za aiin an la tam ziah a ni.

Mizoram Civil Pensioners Association (MCPA) Serchhip North Branch chuan nimin khan Serchhip Kawnpui VC Hall-ah kum 2022-2023 chhunga hruaitu tur thlanna neiin President-ah C. Lalbiakthanga (P&E Veng), Vice President-ah Lalzuiliana (Bazar Hnuai) leh Treasurer-ah Thuamliana (AOC Veng) te thlantlin an ni a, heng mite hian an thawhpui turte an la ruat leh ang. MCPA Serchhip North Branch-ah hian Member 159 awmin kum kalta chhung khan mi 6 te Endowment Fund dil sak niin an Member boral mi 9 te ral an ni bawk.

PWD-a Executive Engineer (EE) leh Sub-Divisional Officer (SDO) engemaw zat chu an awmna hmun siksawi a ni a, heng zingah hian PWD Serchhip Project Sub-Division-a SDO Er. Diana Lalramthari chu Quality Control Sub-Division-II ah SDO hna chelh tura sawn a ni a, a aiawh tur hian Er. Amelin Lalawmpuii Chawngthu chu awm tura dah niin Project Division-I ah SDO (TC) hna chelh lai a ni. PWD Project Sub-Division hi Project Building Division hnuaia awm an ni.

Serchhip-a Legal Metrology Enforcement Staff te chuan nimin khan Serchhip-a Gas Agent pakhat, B. Lalnema Gas Agency (Bharti Gas) atangin Gas buk tlinglo bur 23 an man.

Kum 2022-23 Mizoram Budget Estimate, cheng vbch. 14,008.15 chu nimin khan Finance changtu, Chief Minister Zoramthanga chuan Assembly House-ah a pharh a. Budget pumpui atangin hmasawnna hna thar thawhna tur (Capital Expenditure) chu zaa 28.57 a ni a, SEDP-ah cheng vbc. 700 dah a ni bawk.

Kum 2022-2023 Mizoram Budget-ah SE-DP kalpuina atan cheng vbc. 700 dah a ni. Nimin a Assembly thutkhawm ah Finance changtu Chief Minister Zoramthanga chuan budget a pharh ah he thu hi a tarlang a, SEDP atana cheng vbc. 700 ruahman atang hian cheng vbc. 350 chu Family Development lam hawi atan hman tur a ni a, cheng vbc. 100 chu sawrkar ngaih pawi-mawh danga a tul ang zela hman atan niin cheng vbc. 200 chu Central atanga hmasawnna tur sum hmuh te doletna atan leh vbc. 50 chu Road Maintenance atan hman a ni bawk ang.

Kumin January 2 atanga chin hriatloh a bo Johny Zoparliana ruang chu nimin khan hmuh a ni. Aizawl Zemabawk North-a cheng Johny Zoparliana (38) hi 4th IR niin hnathawhna avangin Mamit-ah hian a awm a, kumin January 2 atang khan chin hriatloha bo in khawtlang huapa ni 7 chhung zawn a nih hnuah pawh hmuh a ni ta lova, nimin chawhnu dar 1:30 vel khan Mamit Luangpawl ram chhung Khiangthelh lui hnar-ah a ruang hi hmuh a ni ta a ni.

Mizoram Rajya Sabha MP K. Vanlalvena’n Sansad Adarsh Gram Yojana (SAGY) hnuaia Model Village atana a thlan, Siaha District-a Phura khua chu nimin khan Siaha District Bawrhsap Lalsangliana chuan tlawhin SAGY Model Village atan a hawng a, SAGY Model Village chung-chang inzirtirna Orientation Programme buatsaih pawh khuallian niin a hmanpui bawk. Nimin a he hun hman ah hian Line Department ten an hmalakna leh hmachhawp te an tarlang a ni.

Tunkar Nilaini zan khan Aizawl North Development Society (ANDS) leh Aizawl North-II bialtu MLA Dr. Vanlalthlana te chuan thawhdunna tur thuthlung Memorandum of Understanding (MoU) an ziak a, he thawhhona thuthlung hnuaiah hian ANDS hian MLA Fund hmangin zirna, intodelhna leh hriselna kawngah hma an la dawn a, MLA Fund hmanga hnathawh turah te pawh ANDS hi Implementing Agency-ah an tang anga, tha taka MLA Fund atanga hna thawh a nih theih nan hnathawhte an enkawl sak thin ang.

Mizoram sawrkar chuan thuchhuah siamin Mizoram Finance Commission (MFC) pahnihna chuan hna an thawk tan tawh tih a tarlang a, tunah hian Chairman-ah F. Vanlalruata leh Member Secretary-ah Lalmalsawma te ni mekin 1st & 2nd Floor, Directorate of Accounts and Treasuries Building, Chanmari, Ramhlun Road, Aizawl-ah Office an neih thu a tarlang. Sub-section (2) of Section 9 of the Mizoram Finance Commission Act, 2010 (Act No. 17 of 2010) chuan MFC hi Civil Court thuneihna ang te pein MFC chuan an hnathawhna atan sawrkar department hrang hrangte tawiawma pawh a mamawh chho zel dawn bawk tih a tarlang bawk.

Lunglei Municipal Council (LMC) din tura hmalakna kal mek leh hmachhawp hrang hrangte zirhona hun chu nimin khan Lunglei-a Convention Centre Conference Hall-ah neih a ni a, he hunah hian LMC dinna tura hmalak tawhna te tarlan niin 2021-22 atana bul tan nan budget allocation cheng nuai 80 dawn a nih tawh thu te, LMC atana Post siam tura hriattirna tihchhuah a nih tawh thu te, LMC Office dinna tur atan phalna hmu tawhin Convention Centre-a bultan tum a nih thu leh Ward siamremna tur leh Village Council te Local Council-a thlak tura rawtna siam a nih tawh thu te tarlan a ni a, sawrkar kum thar ah bul tan theih beisei a nih thu tarlan a ni bawk.

World Health Organisation (WHO) leh European Union Humanitarian Aid chuan COVID-19 hri pui leng dona kawnga hmanraw pawimawh tak RT-PCR test kit 2,16,864 chu Mizoram tan hlanin nimin khan Health Minister Dr. R. Lalthangliana chuan a dawng a ni.

Niminpiah khan Mizoram-ah COVID-19 hri kai mi 964 hmuh belh leh an ni a, hei hi Sample enfiah 3645 atanga chhut chuan za zela 26.45 zet a ni thung.

Mizoram Legislative Assembly Budget Session neih mekah ZPM leh Congress Legislature Party-a tel te chu Vawiin atang hian Session-ah an tel chhunzawm leh dawn.

Finance Minister Zoramthanga chuan Chhiah thar lak emaw, Chhiah tihpun tumna a awm loh thu a sawi.

Home Minister Lalchamliana chuan nimin khan Directorate of Forensic Science Laboratory-ah Cyber Forensic Laboratory bun thar chu a hawng.

India ram zalenna kum 75 tlin lawmna atan leh thuchah hrang hrang kenga ke-a Mizoram fan tum Lalbiakthanga (64),Lawipu Veng Aizawl chuan nimin khan Serchhip rawn thlengin Serchhip-a thuthar thehdarhtu ten an lo dawngsawng a ni.

Serchhip-a hmunpui nei 23 Sector IGAR ‘E’ hnuaia 8th Assam Rifles te chuan nimin khan Unity Orphanage Home, Serchhip chu tlawhin naupangte mamawh ei tur chi hrang hrang an sem a, Assam Rifles hotute chuan he Home-a awm te chu tanpui an ngaihna apiangah tanpui an in-huam thu an sawi a ni.

Serchhip District Addl. DC Lalmuansanga Ralte chuan nimin khan thuchhuah siamin Serchhip District chhung hmun hrang hrang Restricted Area puan mek huamchhunga Sawrkar Office-te chu Head of Office theuh te'n hnathawk tur tul bik ruatin CAB tha taka zawrn chungin an kal thei ang tih a tarlang.

Nimin khan Serchhip District-ah COVID-19 hri kai mi 140 zet hmuh belh leh an ni.

India ram pum huapa Election Commission of India in a buatsaih mek Voters Awareness Contest chungchang sawihona chu nimin khan Serchhip DC Meeting Hall-ah Addl. DC Lalmuansanga Ralte hovin neih a ni a, Intihsiakna kalpui dan tur kimchang hi ecisveep.nic.in/contest/-ah en theih a ni a, a telte chuan an thil siamte chu Voter-contest@eci.gov.in-ah email hmanga thehluh tur a ni. Hrechiang duh tan Serchhip Election Branch-ah zawh chian theih a ni bawk ang.

Serchhip District Horticulture Officer (DHO) kalchhuak tur M. Vanlalzami chuan nimin khan Serchhip-a MJA member te leng-ah sawmin DHO thar tur R. Lalnuntluanga te nen inkawmna an nei a ni.

Bungtlang Lungzawl Zau Mat Lui-a Suspension Bridge dawh tur lungphum chu nimin khan Agriculture Department Director Rohmingthanga Colney chuan Lei dawhna tur hmunah a phum.

Agriculture Department in Serchhip-a Ran chaw herna hmun an buatsaih, Mini Feed Mill chu nimin khan Agriculture Department Director Rohmingthanga Colney chuan a hawng a, helai hmunah hian nikum November thla atang khan Ran chaw siamchhuah ni tawhin December thla atang khan hralhchhuah a lo ni tawh a ni.

Mizoram Legislative Assembly thutkhawm nimin a neih chhunzawm ah Session hnuhnung ber leh tun Session inkâra member hlui thi pathum- Saitlawma Sailo, C. Ramhluna leh Hrangthanga Colney te sunna hman a ni a, heng mite chanchin hi House-ah chhiarchhuah niin anmahni sunna atan ngawi rengin minute khat (1) an ding a ni. Nimin a Assembly thutkhawm ah hian Speaker sawm angin Chief Minister Zoramthanga leh Minister pahnih R.Lalzirliana leh Dr. K.Beichhua te'n House-ah lehkha pawimawh an pharh bawk a ni.

ZPM Party chuan PMGSY hnuaia kawng siam chungchangah dan lova inhnamhnawih a Assembly Speaker puhna chungchang chhui chiang tura ngenna nimin khan Mizoram Lok Ayukta-ah an thehlut.

Tunkar Thawhlehni leh Nilaini-a Parliamentary Standing Committee on Coal, Steel and Mines thutkhawm New Delhi-a neih ah an Member leh Mizoram Lok Sabha MP C. Lalro-sanga chuan hmarchhak bial-a lungalhthei dap hnathawh a mumal lo chu lawmawm lo a tih thu a sawi a. Tlangram chhengchhia leh ramngaw te kaltlanga Rel kawng leh motor kawngpuite pawh siam mek a nih theih laia harsatna hrang hrang avanga hetiang hna thawh a harsa anga sawi hi a awihawm lo a ni, a ti a. Mizoram tiamin hmarchhak bial-a he hnathawhna atana tun kum thum kalta chhunga sum ruahman leh senso a tlem tual tual chu lungawithlak loh a tih thu sawiin, theihtawpa tan la thar turin Ministry chu a ngen bawk.

Mizoram Legislative Assembly Budget Session neih mek chu Vawiin hian chhunzawm leh tura ruahman niin kum 2022-23 chhunga Mizoram Budget chu Finance changtu Chief Minister, Zoramthanga'n House-ah a pharh dawn a. Mizoram Budget pharh rual hian Sawrkar kum kal mek (2021-22) chhunga Sawrkar sum indaih-lohna phuhrukna tur, Supplementary Demand for Grants pharh nghal a ni dawn a ni. Dan pangngaiin House-a Budget pharh ni-ah hian zawhna leh chhanna a awm dawn lova, Chief Minister-in Budget a pharh hnuah thutkhawm hi chhunzawm lovin tihtawp zui nghal a ni dawn a ni. Karleh Thawhtanni atangin Mizoram Budget 2022-23 pharh tak hi sawihona neih a ni dawn a, March ni 1-ah Budget sawihona hi zawhfel tura ruahman a ni a, a tuk March ni 2 atangin Minister hrang hrangte Department enkawlna tur sum ruahman te sawi ho-a pass tum a ni dawn a ni.

Niminpiah khan Mizoram-ah Sample 5833 enfiah niin heng atang hian COVID-19 hri kai mi 1295 hmuh an ni a, Sample enfiah atanga za zela 22.10 te chuan hri an kai a ni.

Assembly Speaker kaihhruaina hnuaia eptu pawl ten rorelna kalpui duh lova nimin-a House an chhuahsan chungchangah House Leader Zoramthanga chuan eptu Member-te chu sawi fel tur a awm a nih chuan House-ah innawr lova Court-a kal tura tiin, Budget Session hi a tawp thlenga tawiawm turin a sawm.

Ngaizawl kawng siamnaa cheng nuai 100 a laksak nia inpuhna ah Assembly Speaker Lalrinliana Sailo in Assembly Budget Session a kaihhruai duh lovin epty pawl pahnih ZPM leh Congress Member-te'n nimin khan House an chhuahsan.

Assembly House-a Governor thusawi chungchanga lawmthu sawina Motion Tuirial bialtu MLA K. Laldawngliana'n niminpiah a Assembly House-a a putluh chu nimin khan sawiho a nih hnuah pawm a ni.

Fisheries Minister K. Lalrinliana chuan Chakai Farm an buaipui mek chu cheng naui 547 senna tur ni anga mi thenkhatin Social Media lama an thehdarh chu thudik lo a nih tih sawiin, he thilah hian FIR thehluh an tum thu a sawi.

Tun dinhmunah Mizoram pumah Rubber kung puitling hnai theih nuai 2 vel a awm tawh.

Serchhip District-ah COVID-19 hri kai an pun belh zel a, nimin khan hri kai mi 139 zet hmuh belh leh an ni a, hri kai enkawl dam pawh mi sing khat aiin an tam tawh.

Serchhip District chhunga COVID-19 hri kai hluar zualna Veng leh khaw thenkhat te chu nimin atang khan hmun khuahkhirh bik (Restricted Area)-ah puan leh a ni.

Serchhip Agriculture Complex-a Ran chaw herna bun thar, Mini Feed Mill chu Vawiin chawhma dar 11:00 hian Agriculture Department-a Director Rohmingthanga Colney chuan a hawng dawn a, hemi hnu hian Bungtlang Lung-zawl Zau a Suspension Bridge dawhna tur lungphum a phum nghal bawk ang.

Serchhip-a District Horticulture Officer (DHO) M. Vanlalzami chu Horticutlure Department Rirectorate-ah Dy. Director hna chelh tura sawn a ni a, a aiawh tur hian Centre of Excellent, Thingdawl-a PO nilai R. Lalnuntlunga chu ruat niin Vawiin hian DHO mawhphurna an inhlan dawn a ni. DHO kalchhuak tur hian Vawiin chhun dar 12:30 hian Serchhip-a MJA member te a kawm dawn bawk a ni.

Serchhip District Headquarters Land Committee chu nimin khan a vawi khatna atan an thukhawm a, he hunah hian Serchhip District-a In hmun leh ram dilna lut hrang hrangte chu ngaihtuah a ni.

Champhai-ah chawimawi

All Mizoram Cement & Iron Rod Dealers Association (AMCIRDA) hruaitute chu nimin khan Aizawl-a Central YMA Office-ah lengin Central YMA hruaitute nen inkawmna an nei a, he hunah hian Mizoram chhunga hnamdang Mizo hming hawha Iron rod, Cement leh Balu zuarte chungchang leh Iron rod size leh buk tlinglo chungchang sawiho a ni a, Mizo hming hawha sumdawngte dapchhuah kawngah thawhho zel tha tih a ni bawk. Tun dinhmunah AMC area-ah Mizo hming hawha a heng bungraw zuar hi dawr 85 an awm mek tih he hunah hian tarlan a ni.

Congress Legislature Party Leader Zodin-tluanga leh ZPM Legislature Party Leader Lal-duhoma te chuan nimin khan Mizoram Legislative Assembly-a House Leader Zoramthanga hnenah lehkha thehlutin, Ngaizawl khaw kawng laihna sum atangin cheng nuai 100 zet Assembly Speaker Lalrinliana Sailo chuan a lo ei ve tih hriat a nih thu leh hetiang hian hmun danga contract hna atang te pawhin chanvo a nei nual nia hriat a ni bawk tih an tarlang a. Hei vang hian an rorelna sang bera kaihruaitu ni tlak ah an ngai lo tih tarlangin, a kaihhruaina hnuaia rorelna kalpui chu House zahawmna tih bawrhbanna ah an ngaih thu leh House zahawmna vawn nun a nih zel theih nan Session chu Deputy Speaker in kaihruai mai se tiin an ngen a ni.

Niminpiah khan Mizoram-ah COVID-19 hri kai mi 1675 hmuh belh leh an ni a, hei hi Sample enfiah zawng zawng 7352 atanga chhut chuan za zela 22.78 a ni.

ZPM Party chuan Khawzawl - Ngaizawl PMGSY Road Black Topping/White Topping chungchangah Assembly Speaker Lalrinliana Sailo chu thil nihna dik tak puang tura an phut thu an sawi.

Mizoram Legislative Assembly 8-na thutkhawm vawi 9-na chu nimin atangin neih tan a ni a, March ni 10, 2022 thleng awh tura ruhman a ni.

Mizoram Governor Dr. Hari Babu Kambhampati chuan hrileng avangin sawrkar chuan harsatna hrang hrang tawk mahse, sawrkar chungah rinna a nghat tlat tih sawiin, sawrkar kum kal mek 2021-22 ah SEDP atangin cheng Vbc. 83.39 chu Department hrang hrangah hmasawnna hna thawh nan pek a ni tawh tih a sawi bawk. 

Serchhip District-ah COVID-19 hri kai hmuhchhuah an la pung zel a, nimin khan hri kai mi 153 zet hmuhchhuah leh niin hri kai hmuh tawh zawng zawng pawh 10,986 an tling tawh.

Pathianni khan Mizoram-ah COVID-19 hri kai 519 hmuh belh leh an ni a, hei hi Sample enfiah zawng zawng  1914 atanga chhut chuan za zela 27.12 a ni.

COVID-19 hri leng mekah Serchhip District-a hri kai tamna Veng leh khua 34 te tun thla ni 15 atanga Red Zone-a puan te chu Vawiin, Feb. 22, 2022 hian a tawp dawn ta a. Red Zone kalpui zel dan tur hi la ngaihtuah tur a nih thu Addl. DC Lalmuansanga Ralte chuan sawiin, Vawiin hian hemi chungchang ngaihtuaha thutkhawm hi neih a ni dawn nia thudawn a ni.

Serchhip District Task Force on Beti Bachao Beti Padhao (BBBP) chu nimin khan thukhawmin kumin sawrkar kum kal meka BBBP Action Plan atana First Instalment kalpui dan tur an duang.

Govt. Serchhip College NCC Unit te tana ‘Cadre Camp for 'B' Certificate Exam’ hmasa ber leh Serchhip-a Camp vawikhatna chu nimin khan Govt. Serchhip College-ah neih tan a ni.

Mizoram fang tur vailiam

Mizoram Legislative Assembly Budget Session chu Vawiin hian neih tan a ni dawn a, Vawiin hian Larsap in House chhungah thu a sawi dawn a ni.

Khawzawl District a awm Ngaizawl khaw mipui lungawilo chuan PMGSY hnuaia an khaw kawng Alkatra luan hna leh White Topping hna thawktute Buk chu nimin khan an thiah sak.

Health Minister Dr. R. Lalthangliana chuan nimin khan Synod Hospital, Durtlang-ah 800 LPM Oxygen Generation Plant a hawng a, “Hri kai nunna chhan kawngah pawh kan thawhrimna malsawmin a awm a ni,” a ti.

Mizoram Lokayukta Chairperson C. Lalsawta chuan 'Second Annual Report of the Mizoram Lokayukta’ chu nimin khan Mizoram Governor Hari Babu Kambhampati hnenah a thehlut.

Mizoram Governor Dr. Hari Babu Kambhampati chuan nimin khan Mizoram Presbyterian Kohhran Synod hruaitute chu Raj Bhavan-ah kawmin Mizoram mipui mimir tam zawkin Central Scheme tha tak tak, miharsate chawikanna atana kalpui mek te an hriat loh bakah an dawng lo tih a hmuh thu a sawi.

Consumer te i harh ang u XXXIII : Irod Rod buk dik leh tling engtin nge kan hriat ang?

Inrinni thleng khan Serchhip District-ah CO-VID-19 hri kai mi 10,753 hmuhchhuah an ni tawh.

Nimin February 20, 2022 kha Mizoram State Day vawi 35-na a ni a, India sawrkar leh MNF ten June 30, 1986-a inremna an neih hnuah February 20, 1987 khan Mizoram chu State pui-tling-ah hlankai niin kumin hian Mizoram State Day hi Pathianni a nih avangin he ni puala hun hman a awm lo a ni. Mizoram State Day pual hian Chief Minister Zoramthanga chuan mipuite hnenah thuchah sawiin Zoram mipuite zawng zawng tan hlimna leh malsawmna a nih theih nan chibai bukin duhsakna a hlan bawk a. Prime Minister leh Union Minister te atang pawhin duhsakna a dawn thu a sawi bawk.

Mizoram-ah COVID-19 hri kai hmuhchhuah pung leh hret mah se hri kai enkawllai erawh mi sing khat aiin an la tlem.

Mizo Students' Union (MSU) General Hqrs. chuan Kamlova Chhangte inti Kamrul Laskar zawn hna chu Inrinni khan an thawk tan tih sawiin, a Tribal Certificate-a a chenna hmun tarlan Thuam-pui Veng-ah zawngin Thuampui Branch YMA te'n lo an lo dawnsawn hnuah MSU hruaitute hi a chenna in nia hriatah an hruai a, Kamrul Laskar hi awm lovin, an thenawmte sawi danin kum hnih vel zet an hmuh tawhlo tih an lo sawi niin thuchhuah an siamah an tarlang a ni. MSU chuan Kamrul Laskar chu Mizoram pumah zawn chhunzawm zel a ni dawn tih sawiin, hmuh a nih hma zawng Mizo dan angin ni sarih (7) chhung MSU kaihhruaina in zawn a ni ang tih an tarlang bawk.

Mizoram Sawrkar Planning & Programme Implementation Department Secretary Lalmal-sawma Pachuau chuan Inrinni khan NLCPR (Do-NER) kaltlanga cheng nuai 1,988 senna tur Champhai khawpui kianga luang Keilungliah lui khuah 'Construction of Dam Reservoir and Development of Recreation Centra at Keilungliah, Champhai' hnathawh mek leh NEC Project cheng nuai 200 senna tur 'Afforestation of Denuded Hills in Champhai District of Mizoram' hmalakna te chu a tlawh a, hun bituk chhung ngeia tha taka zawh a pawimawh thu sawiin, hnathawktute chu thahnem ngai taka thawk turin a chah a ni.

Civil Hospital Aizawl Dialysis Unit-a harsatna awm chungchang sawihona chu Health and Family Welfare Board Cive Chairman Dr. ZR. Thiamsanga MLA hovin Inrinni khan Civil Hospital Aizawl-ah neih a ni a, he hunah hian Dr. ZR. Thiamsanga chuan Dialysis Unit, Civil Hospital-a harsatna awm te chu damlo ten an mamawhna a san em a vangin a rang thei ang bera hmalak ngei a ngaih thu sawiin, a tul ang zela amah ngei pawhin a umzui zel tur thu a sawi bawk. Dialysis khawl hi 12 awmin tha taka a kaltluan chuan nikhatah damlo 36 enkawl thei tura ngaih a ni.

Mizoram sawrkar in kawlphetha chhit man tihsan rawtna a siam chu huntiam chhungin pawl 5 ten sawiselna an thehlut nia thudawn a ni.

Ningani kalta zan khan Serchhip District Hospital-a OST Centre-a mi tu tih hriatloh chu lutin damdawi thenkhat lakchhuah a ni a, Serchhip Police ten an chhui zui hnuah Zirtawpni khan helai hmuna lut hi man a ni.

Higher & Technical Education Minister Dr. R. Lalthangliana chuan cheng nuai 156 senga Govt. Serchhip College-a Science Building sak thar chu Inrinni khan a hawng a, he building hi Rashtriya Uchchatar Shiksha Abhiyan (RUSA 2.0) sum atanga sak a ni. H&TE Ministe chuan a tak taka zirlaite thiamna haichhuah chu a pawi-mawh tih sawiin, Degree emaw Certificate tha leh mark hmuh san ringawt a tawk lo tih a sawi a, a tak taka thiamna zirlai ten an neih a pawimawh ber zawk tih a sawi bawk.

COVID-19 hri leng avanga inkhuahkhirhna kalpui-ah zan lama pawn chhuah khapna chu hlih a ni ta.

COVID-19 hri leng avanga mipui inkaihhruaina tihchhuah thar leh niin kawng thenkhat ah mipui khuahkhirhna la awm mah se mipuite khap behna lam erawh a awm meuh tawh lo.

Health Minister Dr. R. Lalthangliana chuan Inrinni khan Serchhip rawn tlawhin Serchhip a pawl hrang hrangte chuan Serchhip District Hospital sak thuai a nih theih nana hma lak sak turin Minister hnenah hian an lo thlen a ni.

Serchhip Mat Phai Tuisen Zau-a MLA Fund hmanga kawng laih thar chu Inrinni (Feb. 19, 2022) khan MJA Serchhip District Member te chuan tlawhin hnathawh an enpui a, helai vela thlai chingtute chuan he kawng thar siam avang hian thlai thar phurhchhuah kawnga harsatna an tawh thin chu sutkian a nih an beisei tih an sawi a ni.

Serchhip Thalai Pawl (STP) chuan Powergrid in CSR Fund atanga Khum 100 awm theihna Serchhip District Hospital sakna tur cheng vbc. 21 an pe dawn ta chu lawmawm an tih thu leh a hmun tur ah NGO Coordination Committee in an lo ruahman tawh, Bukpui ram chu tha an tih thu an sawi.

Nimin khan Serchhip District-ah hri kai mi 95 hmuh belh leh niin hri kai enkawllai 899 an la awm mek.

Thenzawl Divisional Forest Officer (DFO) leh Serchhip District Fire Prevention Committee-a Member Secretary Lalbiakchama Chawngthu chuan nikum lamah kangmei nasa tak kan tuar tih sawiin, “Kumin ah chuan mipuite kan fimkhur phawt chuan ramkang leh kangmei lakah kan him thei ngei ang,” a ti.

Serchhip District Bawrhsap Nazuk Kumar IAS chuan nimin khan thuchhuah siamin tun thla ni 15-a thupek an lo tihchhuah tawh ah Serchhip Bazar Veng Red Zone-a puan chu Bazar Area-ah COVID-19 hri kai zat an kiam avangin Red Zone atanga hlih a nih thu a tarlang a. Serchhip Bazar Building pawh dan pangngai a hawn leh nghal a ni bawk.

Serchhip District Addl. DC Lalmuansanga Ralte chuan nimin khan thupek tichhuakin tun thla ni 8-a hri leng chungchanga inkaihhruaina tihchhuah ah Clause A Sl. No. 8-a tarlan Sports Practice (Indoor & Outdoor) chu a hmuna leng zat chanve aia tam lova phal a nih thu a tarlang a. Covid Appropriate Behaviour zawm ngei a nih theihna turin Sports Association hruaitu ten mawhphurhna an la tur a ni tih a tarlang bawk.

Serchhip Sub-Hqrs. YMA huamchhunga awm Tawitlang Group YMA hruaitute chuan PMGSY hnuaia Sialhau kawng siam mek chu nimin khan enin hnathawh chu tha thawkhat-a an hriat thu an sawi a. Chutihrual chuan huntiam chhunga zawh hman loh an hlauh thu sawiin, a tawp thlenga hnathawh enpui zel an tum thu an sawi bawk.

Mizoram Police te chuan Online inbumna chungchangah mipuite chu fimkhur turin an chah.

Lunglei-ah Skill Training hawng

Mizoram-ah COVID-19 hri kai hmuhchhuah an la tlahniam zel a, niminpiah khan Sample 5083 enfiah niin heng atang hian hri kai mi 1119 hmuhchhuah an ni a, Sample enfiah atanga chhutin za zela 22.01 te chuan hri an kai a ni.

Commerce & Industry Minister Dr. R. Lalthangliana chuan Chili (Tuipui)-a service tur Mar Boat chu nimin khan mipuite hman theih turin a vailiam.

Federation of Mizoram Government Employees & Workers (FMGE&W) ten sawrkar laka lungawiloh lantirna atana karleh chhunga Badge dum bel an tum chu thulh leh a ni tih an sawi.

Hmar Peoples Convention (HPC) hruaitute chuan nimin khan Sinlung Hills Council (SHC) Pisa-ah thuthar thehdarhtute kawmin, SHC sawrkar rintawk loh (No Confidence Motion) MNF member pathum leh Independent Member pathumin an putluh thu an sawi.

Mizoram Governor Hari Babu Kambhampati chuan nimin khan Raj Bhavan-ah Mizoram Post Post Office hotu lian te kawmin Mizoram chhunga an hmalakna te a zawt a, Post Office te chu Bank anga hman theih a ni tih sawiin, thingtlang mi te tan Bank ang chiah a hna thawh theih dan te nasa zawka zirtirna pe turin a chah bawk.

Lawngtlai DISHA thukhawm

Khawchhak lam atanga bungrua rawn lut leh dan lova bungraw tawlh te lo enfiahna tura ruahman Serchhip Sailiamkawn-a Police Check Post thar chu Serchhip SDPO Kaste Romalsawma chuan nimin khan hawngin helai hmunah hian nitin darkar 24 chhung Duty tur pawh dah nghal an ni.

Nimin khan Serchhip District-ah COVID-19 hri kai mi 129 hmuh belh leh niin nimin tlai thleng khan hri kai enkawllai 883 an la awm a ni.

MJA Serchhip District ten Serchhip Press Club sakna bungrua an dahthat lo la thin mi 2 te chu man niin an thil ruk thenkhat te pawh hmuh let a ni.

Power Grid Corporation of India Ltd. chuan CSR Fund hmanga khum 100 awmna tur Ser-chhip District Hospital sakna tur sum dilna chu an pawm thu an sawi.

Niminpiah khan Mizoram-a COVID-19 hri kai hmuhchhuah chu a hma ni aia tlahniam hretin hri kai mi 1571 hmuh an ni a, hei hi Sample enfiah zawng zawng 6082 atanga chhut chuan za zela 25.83 lai a la ni thung a ni.

Mizoram Rajya Sabha MP K.Vanlalvena chuan niminpiah khan Mamit District chhung Chuhvel khaw daia Assam ramri bul hnaiha Mizoram Police Duty Post te a tlawh.

Mizo Language Development Board (Draft) Bill, 2022 chu karleh-a Assembly Budget Session neih turah putluh a ni dawn tih Human Resources Development Board Vice Chairman L. Thangmawia, MLA chuan a sawi.

Mizoram sawrkar-a Supply Department chuan Mizoram pumah Supply Centre 121 nei mekin, chung zinga 21 chu sak that mek a ni.

Serchhip District-ah ni khat-a COVID-19 hri kai hmuhchhuah a la tlahniam thei meuh lo a, nimin khan hri kai mi 121 zet hmuh belh leh an ni.

Mizoram Journalist Association (MJA) Serchhip ten Serchhip Bazar-a Letter Box kan dah thin chu Serchhip Press Club hman theihna peih a nih tak avangin Serchhip Press Club-ah hian Letter Box hi dah a ni ta a. MJA member te enkawl tualchhung chanchinbu-a lehkhathawn tur emaw pawimawh nei te chuan Serchhip Press Club-a Letter Box-ah hian dah thin tawh tur a ni tih mipuite kan in hriattir e.