Mizoram-ah hri kai 203 hmuhchhuah leh an ni

Niminpiah khan Mizoram-ah Sample 3214 enfiah niin heng te atang hian COVID-19 hri kai mi 203 hmuhchhuah an ni a, Mizoram-a hri kai hmuhchhuah zawng zawng chu 14,196 an tling tawh a ni.

Niminpiah khan ZMC Laboratory-ah Sample Sample  625 enfiah niin heng atang hian COVID-19 hri kai mi 34 hmuhchhuah an ni a, an vai hian Aizawl District ami te niin hri kai hmuhchhuah tawh nen inkawmhnaihna neih avanga inkhunghrang lai an ni a, an zinga pakhat hi Sairang mi niin midang zawng hi Aizawl khawpui chhung Veng hrang hrang ami an ni.

Mizoram District hrang hranga TrueNat Laboratory-ah Sample 171 enfiah ni bawkin heng atang hian COVID-19 hri kai mi 7 hmuh an ni a, an zinga mi 3 te chu Lunglei District-a hri kai hmuh te niin Siaha leh Kolasib District-ah hri kai mi 2 ve ve hmuh an ni a, hri kai mi 2 te hi hri kai hmuhchhuah tawh nen inkawmhnaihna nei niin midang te hi hri kaina hriatloh te an ni.

Rapid Antigen Test hmangin niminpiah khan Sample 2418 enfiah ni bawkin heng atang hian hri kai 162 hmuhchhuah an ni ve leh bawk a, an zinga mi 124 te hi Aizawl District-a hri kai hmuhchhuah te an ni. Sairang Dinthar Veng atangin hri kai mi 17 hmuhchhuah niin Aizawl Dinthar Veng Veng atangin hri kai mi 15 hmuhchhuah an ni bawk a, heng te hi Containment Zone-a puanlai an ni a, Veng 5-ah hri kai mi 10 aia tam hmuhchhuah an ni bawk a ni.

Lunglei District-ah hri kai 21 hmuhchhuah awm bawkin an zinga mi 13 te chu Lunglei khawpui chhung ami an ni a, Kolasib District-ah hri kai 9 hmuh niin Saitual District-ah hri kai mi 4 hmuh an ni a, Serchhip District-ah hri kai mi 2 hmuh niin Siaha leh Mamit District-ah hri kai mi pakhat ve ve hmuh an ni bawk.

Nimin khan Mizoram-a COVID-19 hri kai zingah mi 122 te chu enkawl dam an ni leh bawk a, heti hian tun thlengin Mizoram-a hri kai hmuhchhuah tawh chu 14,194 niin heng zinga 10,891 te chu enkawl dam an ni tawh a, hei hi hri kai hmuhchhuah atanga chhutin za zela 76.72 a ni a, hri kai enkawllai 3245 an la awm mek a ni.

Hri kai zingah nunna chan awm belh leh :

Mizoram-a COVID-19 hri kai enkawl zingah nimin khan nunna chan pakhat awm lehin Mizoram-a hri kai zinga nunna chan chu mi 58 an tling tawh a ni. Nimin chawhnu dar 3:20 khan Ngunzaliani (37), Phunchawng-a khawsa mek chu ZMC-ah a boral a, amah hi tun thla ni 7-a COVID-19 hri kai hmuhchhuah niin ZMC-ah dahluh nghal a ni a, amah hi Rilpui cancer a ni bawk. Heti hian Mizoram-ah COVID-19 hri kai zingah mi 58 boral tawhin an zinga mi 18 te chu tun thla-a boral an ni a, tun thla chhung hian nitin hri kai boral an la awm ziah a ni.