Latest News

Chanchin thar thenkhat :

Chaw ei man pek tawh tur

Health & Family Department-a Special Secretary chuan Covid Care Centre (CCC)-a chawi ei leh in man chungchangah niminpiah khan thu-chhuah siamin CCC-a awm BPL chhungkua te chu chaw ei man awl tir (exempt) an nih tur thu leh BPL chhungkua nilo te chuan mahni chaw ei man pek tawh tur a nih thu a tarlang a. Chhung-kaw khawsak dinhmun harsa te chuan Officer-in-Charge kaltlangin bialtu Chief Medical Officer hnenah ei man chawilo turin dilna an siam theih tur thu leh CMO ten ruahmanna an siam theih tur thu a tarlang bawk. He ruahmanna hi thu leh awm hma chu hman nghal tura tih a ni.


Central Jail dinhmun enfiah

Tunhnaia COVID-19 hri kai thahnem tak hmuhna Central Jail chu nimin khan Aizawl District Addl. DC, R. Vanrengpuia leh Chief Medical Officer, Aizawl East leh Aizawl West te chuan tlawhin Aizawl District Jail pawh an tlawh nghal a, tunlai hripui leng meka Jail lamin harsatna an tawhte a hmunah an enpui bakah COVID-19 veite inkhunghran theihna tur an hmunhma neih angte an enfel pui bawk. Central Jail-ah hian PPE Suit - 30, Surgical mask - 100, N-95 mask - 50, Pulse Oximeter - 5, Oxygen concentrator - 2 leh Fumigating machine - 1 an hlan nghal bawk.


TNT-a hri kai 555 tih sawi

State Nodal Officer leh COVID-19 Spokesperson ni bawk Dr. Pachuau Lalmalsawma chuan Pathianni leh Thawhtanni kaltaa Thutak Nunpuitu Team (TNT) Centre, Muanna Veng-a COVID-19 Test runpui neih ah mi 1223 te Sample enfiah a nih thu sawiin, heng atang hian hri kai mi 555 hmuh an ni tih a sawi a, Sample enfiah te hi Rapid Antigen Test hmangin mi 1099 leh RT-PCR hmangin mi 124 an ni tih a sawi a, TNT Centre-a COVID-19 hri kaite zingah hian tun dinhmunah ngaihtuahawm an awm loh thu pawh a sawi bawk. TNT Camp-ah hian nimin khan Sample 405 enfiah lehin hri kai 125 hmuh leh an ni tih kan thudawnna chuan a sawi bawk.


ZPM in sawrkar an ngen

ZPM Thalaite chuan June 21, 2021-a Mizo-ram sawrkar in dawr leh In neitute hnenah, an dawr leh In luahtute hrethiâm a, a luah man awl tur emaw, tihniam tur emaw-a ngènna a siam chu lawmawm an tih thu sawiin, hetianga mipuite intanpui tawn tura ngentu hian a ram mipuite tan entawn tur siamin hma hruai se an ti a. Sawrkar chu lockdown avânga harsatna tawkte tanpuina atâna a sum bawm sawh keh a luangchhuak ve tur leh chhungkaw tam tak chhuanchham dinhmuna an din mek avangin an tan tanpuina (welfare scheme) siamsak turin an ngen a. Sumdawng leh dawrkai te chhiah chawi tihniam tur emaw, ngaidam tur emaw-a an ngen bakah miharsa zawkte tân bill leh chhiah chi hrang hrang ngaidam tur emaw, tihniam tur emaw in an ngen bawk.


MNYF ten tanpuina hlan

MNF Thalai, Mizo National Youth Front (MNYF) Hqrs. chuan nimin leh niminpiah khan Mizoram khawchhak tlangdunga Burma ral-tlante chu an awmna hmunah tlawhin tanpuina hrang hrang a hlan a, he hunah hian buhfai quintal 60, Mask 2000, Hand Sanitizer thahnem tak, Blanket 120 leh Silpauline bundle 4 a pe a, hei bakah hian mi inphalten an pekkhawm mutbu leh thawmhnaw hrang hrang pawh Group YMA kutah an hlan bawk. He hunah hian MNYF President, Er. Lalrinawma MLA chuan Mizo-ram chu Zofa hmun hrang hranga awmte Inpui a nih angin an mangan ni ah an rawn bel thin tih sawiin,Mizoram sawrkar chuan raltlante hi a ngaihtuah em em tih a sawi bawk. Tun dinhmun ah raltlan hi mi 1457 an awm nia chhinchhiah a ni.

Comments

Chhiar Hlawhte