Latest News

Cricket Final khel dawn

Cricket Association of Serchhip District in an buatsaih, Serchhip District Cricket League vawi khatna chu Vawiin chhun dar 12:00 hian Final khelh a ni dawn ta a, Tuikhuah Veng CC leh AO3C ten Final hi an khel dawn a ni. He inkhel hi TV lamah en theih tura pekchhuah leh a ni dawn a ni. Vawiin a Final khelh hi Cricket Association of Mizoram hotute pawhin an rawn hmanpui dawn a ni.

Green Mizoram Day pualin Serchhip District-ah Thingtiak phun beihpui thlak leh a ni

Mizoram ti hring tura thingphun beihpui thlakna ni, Green Mizoram Day-2021 chu nimin khan Mizoram pumah hman leh niin Serchhip District-ah pawh he ni pual hian Thenzawl-a Golf Course & Resort-ah hun hman a ni a, he hun hi Tourism Secretary, K. Lalrinzuali chuan hmanpuiin Golf Course ram-ah hian thingtiak phun nghal a ni bawk.


Serchhip District-a Green Mizoram Day, 2021 hawnna inkhawm tawi Golf Course Multipurpose Hall-a neih ah Tourism Secretary, K. Lalrinzuali chuan, tunhnai mai-a kan ram-in tuihna leh sik leh sa lama harsatna a tawh dan en mai pawhin; ramngaw te din thara, thing leh mau te humhalh a tul zia a lang chiang em em tih a sawi a. Ram mipui zawng zawngten hemi kawnga hmalakna ah hian mawh kan phur a ni tih hriaa, kan tan tlan a tul thu sawiin, Serchhip District Level Task Force on Green Mizoram hmalakna te, District Bawrhsap Kumar Abhishek IAS thahnem ngaihna te leh Thenzawl DFO, Margaret Lalramchhani leh a thawhpuite inpekna chu fak tlak nia a hmuh thu a sawi bawk.

He hunah hian khual zahawm Serchhip District Bawrhsap, Kumar Abhishek chuan mihring kan pung zela, mamawh a punga, leilung nihphung a inbuktawk lo tial tial a. Mizoram-ahkum rei vaklo a awm chhung mai pawhin a changin namen lovin ruahtui kan dawng tam a, leimin, tuilian leh chhiatna a hring nasa a; a changin ruahtui dawng mumal lovin kan awm bawk a, tuihna harsatna tinrengin min tlak buak thin tih a sawi a. Hetiang harsatna kan dawn chhan ber chu khawvel boruak danglam zel vang a ni tih sawiin, he harsatna laka kan inven theihna pawimawh em em pahnih chu Thing phun uar-a enkawl puitlin leh Plastic lam thil hman tlem a ni tih sawiin, heng hmalakna kawng hnihte hmanga nasa taka he harsatna beihlet hi tuna kan mamawh, kan tuchhuan lo la awm zel turte tana pawimawh chungchuang a ni, a ti. District Administration chu Thing phun leh enkawl puitlin kawngah a tang hle a, kumin-ah pawh ram kangin a tihchhiat tawh Chanmari Veng-a hmun pakhat chu tuai thara thing hring hmuna siam leh atan thlangin nimin khan khawtlang huap hnatlang neiin sawrkar thuneitute pawhin thingtuak an phun bawk a ni.

Serchhip District-a Green Mizoram Day puala inkhawm hi Thenzawl DFO, Margaret Lalramchhani chuan kaihruaiin kum kalta chhunga Serchhip District-a ramkang venhimna lama thawk tha khuate hnenah lawmman sem niin Vanchengte khua chuan lawmman pakhatna an dawng a, Rs. 50,000/- leh thuziak hlan an ni a. Sialsir khua leh Khawbel ten lawmman pahnihna dawngin Rs. 15,000/- leh thuziak hlan an nih bakah Chekawn leh East Lungdar khua ten lawmman pathumna dawngin Rs. 5000/- ve ve hlan an ni bawk a. Heng lawmman dawng khua te hi hri leng avanga an kal a remchan loh avangin anmahni bialtu Forest RO te hnenah khuallian hian a hlan a ni.

Hei bakah hian Serchhip District-a chan-chinbu zinga ram kang ven chungchang leh Environmental Awareness pek kawnga thawk tha bera thlan, Lenkawl Serchhip Nitin Chanchinbu hnenah Thuziak leh pawisafai Rs. 5000/- hlan ni bawkin District Bawrhsap chuan  Editor, Zonun-sanga Kawlni hnenah a hlan a ni.

Nimin-a he hun hman zawh a nih hnu hian he huna tel sawrkar mi pawimawh te hian Golf Course ram-ah hian thingtiak an phun nghal a ni. Nimin-a he hun hman hi hri leng kara hman a nih avangin sawrkar in SOP a siam te zawm chungin sawmbik mi tlemte an tel a ni.

Comments

Chhiar Hlawhte