Latest News

Mi nawlpui te hnenah COVID-19 hri danna pe tan

Kum 18 leh 44 inkar te hnena COVID-19 vaccine pek mekah ngaih pawimawh hmasak ni lo, a nawlpui te hnena Vaccine pek chu nimin khan Serchhip District-ah kalpui tan a ni.

Sawrkar laipui ruahman anga kum 18 leh 44 inkar te hnena COVID-19 vaccine pek hna hi May thla atang khan kalpui tan a ni a, vaccine hi Mizoram-ah chuan State sawrkar hmalakna in a thlawna pek niin a tir lamah sawrkar in ngaih pawimawh-a a neih te pek hmasak niin kar kalta lam atang khan mipui nawlpui te hnenah pekchhuah tan a ni a, Serchhip District-ah chuan nimin khan vaccine hi pekchhuah tan a ni ve leh ta a ni.

Kum 18-44 te vaccine pek turah hian vaccine ala rawn thlen loh avangin kum 45 chunglam te hnena Vaccine pek tur chu lo hman puk a ni a, Serchhip District-ah chuan Dose 900 hman phalsak a ni a, nimin khan Serchhip Main Centre leh Lungpho-ah vaccine hi pek niin Serchhip-ah hian mi 220 vel leh Lungpho-ah hian mi 30 vel pek tura ruahman a ni a, Serchhip-ah hian Vawiin-ah mi 200 vel pek leh tura ruahman a ni bawk.

Tun tuma vaccine la turte tan hian a hma lamin COWIN-ah inziahluh hmasak a ngai a, heta inziaklut tan hian vaccine hi lak theih a ni a. Serchhip District-ah hian vaccine dose 900 hman theih ni mah se hei hi District chhunga PHC leh CHC hrang hrangah semchhuah ala nih dawn avangin Vaccine pek zel dan tur hi hriat theih ala ni lo thung. Health Department-a thawktu te chuan Vaccine pek mek hi nu naupawm te tan pawh lak theih a ni tih sawiin, amaherawh chu naupai lai te tan erawh lak theih a ni lo thung tih an sawi.

Comments

Chhiar Hlawhte