Ramri-ah Assam an che leh

Vairengte tlaklam Assam leh Mizoram inrina bulah nimin khan Assam Police te'n Patrolling neiin Thlam pakhat bakah Kuhva kung thenkhat an tichhia.

Nimin chawhma lam khan Vairengte tlak lama Mizo te ram luah chin chhung, Huan te pawh an neihna hmun Hailakandi District Assam nena inrina bulah Assam Police te hi lutin, Vairengte Chhim Veng Pa, HK. Ramhluna huan thlang-ah te an kal bakah, Vairengte Field Veng a Lalchhandama te Thlam tichhiain, Kuhva kung thenkhat an tichhiat sak bawk.

Assam Police te hi Hailakandi SP, Ramandeep Kaur IPS hovin Hailakandi SDO (Civil) Jatin Moydory leh DFO Montaz Ali te an rawn kal tel bawk a. Assam Police te hi Company pahnih a mi te niin an vaiin mi 200 bawr vel nia hriat a ni. Mizote ram luah china Patrolling an neih chhan chu an hotu sang zawk atanga ti tura hriattirna an dawn vang niin thudawnna chuan a sawi.

He thil thleng an hriat veleh lungawi lovin Vairengte thalai eng emaw zatin Assam Police te awmna hi an pan ve nghal a. Vairengte SDPO in a ngen angin, Vairengte SDO (C) hovin Vairengte thalai te chu Assam Police te awmna ah kalin boruak muanawm tak hnuaiah inbiakna an nei a. State pahnih Official te inbiakna ah hian Hailakandi SP chuan Hailankandi hmunah inbiakna neih nise tiin rawtna a siam chu Vai-rengte SDO(C) leh SDPO te chuan remtiin, inbiakna neih hun tur hi inhriattir leh turin an ti bawk.