Lenkawl

Mizoram Volleyball Association Inter District Volleyball Tournament khelh mekah nizan khan Serchhip District chuan Semi Final khelin result erawh kan hre hman ta lo thung.

Vantawng Group YMA chuan Thenzawl District a pian theih nan chak taka hmalak nise an ti.

Rampum-a POSHAN Pakhwada hman mek pualin nimin khan Serchhip-ah Millets (Buhtun) pawimawh zia leh mihring ei atana a that zia inzirtirna neih a ni a. Chawhnu lamah 'Millet based Tribal Food Fairs & Events on Millets Thali' neiin Millets atanga siam eitur chi hrang hrang phochhuah a ni bawk.

Mizoram Inter-District Junior Boys Football Championship-2023 khelh mekah Serchhip District chu Quarter Final thleng zo lovin an tla ve leh ta. Serchhip District Under-17 Team te hian Mizoram Inter-District Junior Boys Football Championship-2023 ah hian nimin khan Group Match khel lehin Lawngtlai District lakah 7-0 laiin an tlawm a. Heti hian an Group-a awm Team pathum ten match hnih an khelh ah tum khat theuh hnehna changin point 3 theuh an hmu a, Goal Difference-a sang pahnih Lawngtlai leh Khawzawl District ten Quarter Final lutin Serchhip District hi Group Stage paltlang zo lovin an tla ta a ni.

Serchhip District-a Lungkawlh khua in an khaw kum 150 tlin lawmna leh Haw runpui an buatsaih chu nimin khan Serchhip Addl. DC Lalmuansanga Ralte chuan a hmanpui.

Keitum leh Khawlailung inkara Tuichang Lei dawh thar chu Load Test neih a nih dawn avangin April 3 atanga ni 10 chhung khian khar leh a ni dawn.

Samagra Siksha Serchhip bultuma March 27 atanga neih, sawrkar School-a pawl 9 leh 11 (Science la tur) zirlaite tana Govt. JM H/S-a Mathematics Summer Camp neih mek chu Vawiin hian zawhfel a ni dawn a, he Mathematics Summer Camp in a tum ber chu pawl 9 leh pawl 11-a lut thar tur ten an zirlai tur an thiam theih nan lo enlawk pui leh lo zirtir a ni a, Serchhip District chhunga zirlai naupang 48 te chu Zirtirtu mi 10 ten an zirlai tur te zirtirin an lo enlawk pui a, Vawiin hian zawhfel a ni ang.

Alpha Hospital, Kulikawn neitu leh Hmeichhe lam thiam bik, Dr. Vanremmawii chuan nimin khan Police Training School, Thenzawl-ah a thlawna inentirna a buatsaih a, he hunah hian Hmeichhe lam harsatna nei hrang hrang mi 83 zet inentirin J. Malsawmzuala Vanchhawng te chhungkua chuan a mamawhte tan a thlawna sem tur damdawi an pe bawk a ni.

Lai Autonomous District Council (LADC) Budget Session chu nimin khan Lawngtlai a LADC Session Hall-ah neih tan a ni a, April 5 thleng a awh ang. Nimin-a thutkhawm ah hian CEM V. Zirsanga chuan kum 2023-2024-a LADC sawrkar sum hman tura ruahman cheng nuai 21,603.22 chu House-ah a pharh a ni.

Nimin khan Champhai-ah District Treasury Office buatsaihin Integrated Financial Management and Information System (IFMIS) kaltlanga bill leh hlawh pekchhuah tur chungchang zirhona chu Department-a Cashier leh Bill Assistant-te tan neih niin April 1 atang hian IFMIS kaltlangin hlawh leh bill te pek a ni tawh dawn a ni.

Health Minister Dr. R. Lalthangliana chuan nimin khan Hnahthial-ah District Fisheries Development Officer (DFDO) Office thar a hawng a, he hun hi Fisheries Minister K. Lalrinliana pawhin a hmanpui a ni. Tunhnai khan Khawzawl leh Saitual-ah te pawh DFDO Office thar hi hawn niin District thar pathum-ah DFDO Office hawn kim a ni ta a ni.

Mizoram-a NGO Coordination Committee chuan State Bank of India (SBI) in Mizote Bank Account atanga Tax Deduction at Source (TDS) lo lak chungchangah April, 2023 thleng SBI ngaihchan an rel. Thudawn danin nimin zing khan Aizawl-ah NGO Coordination Committee hi thukhawmin SBI in Mizote Bank Account atanga TDS an lak chungchang hi an ngaih-tuah a, SBI hian TDS an lakte chu niminpiah atang khan Account thenkhatah dahlet leh a nih thu an dawng a. Bank lam hmalakna avang hian April, 2023 chawlhkar khatna thleng ngaih-chan rih tha an ti a ni. TDS chungchang ah hian Tribal-te chu dan huaiah exempt niin Income Tax Act, 1961 hnuaiah leh Central Board of Direct Tax notification-ah te exempt vek tur nia thudawn a ni.

Lunglei Municipal Council (LMC) Inthlanpui hmasa ber atana Vote thlak chu tluang tak neih zawh a ni ta a, he inthlanna ah hian Vote nei thei mipa 19,12 leh hmeichhia 21,425, an vaiin 40,548 an awm a, heng zinga mi 30,111 te chuan Vote hi thlakin Vote za zela 74.26 a tla a ni. He inthlanna hi Polling Station 44-ah tluang taka neih niin Vote thlak rei ber Luangmual Polling Station-ah chuan zan dar 7:30-ah Vote thlak hi zawhfel a ni. He inthlanna a Vote thlakna khawl te hi Saikuti Hall-ah phurhkhawm niin venhimna hnuaiah dah a ni a, karleh Thawhtanni khian chhiar a ni ang.

Govt. Aizawl North College chuan nimin khan College Week kharna hun hmangin Sports Minister Robert Romawia Royte chuan khuallian niin a hmanpui.

Nimin khan lal Nikuala Lungphun hawnna leh Chawngtlai Khawchhuak Hawrunpui chu bialtu MLA leh Deputy Chief Minister Tawnluia hovin Chawngtlai khua ah neih a ni.

Land Revenue & Settlement Department changtu Minister Lalruatkima chuan Sawrkar in Dan a siam angin Assam Rifles ten Sipai Lammual ram an luah chu mimal hnenah pek phal a nih loh tur thu a sawi.

Social Welfare & Tribal Affairs Minister Er. Lalrinawma chuan nimin khan Aizawl-a Social Welfare & Tribal Affairs Office tlawhin thawktute nen inkawmna a nei.

Mizoram chhunga hnamdang dan lova sumdawnna kalpuite dapchhuah kawngah MZP, Muslim Welfare Society Mizoram leh Central Mizoram Gorkha Youth Association (CMGYA) hruaitute chuan thawhho nise an ti.

Zokhawsang-a Assam Rifles Batallion Headquarters thar chu naktuk khian Union Home Minister Amit Shah chuan a hawng dawn.

Serchhip District-a Rullam khua chuan an khaw luah leh kum 50-na chu nimin khan lawmin bialtu MLA leh Minister Er. Lalrinawma chuan khuallian niin a hmanpui a. Hemi rual hian Zoram buai laia ram leh hnam tana Martar, Rullam a mite hriatrengna lungphun a hawng bawk.

Mizoram Volleyball Association Inter District Volleyball Tournament khelh mekah Serchhip District chuan an Match hmasa bera Mamit an hneh hnuah nizan hmasa khan an match hnihna khelin Khawzawl chu 3-1 in an hneh lo a, Khawzawl hian harsa lo takin Set hnih 25-15, 25-19 an la nghal a, Set 3-na ah Serchhip in 25-21 in la ve mah se, Khawzawl in set 4-na 25-19 a lain hnehna an chang a ni. An Group-a awm Khawzawl leh Mamit District te hi nimin khan inhmachhawn ve lehin Khawzawl hi 3-1 in an chak leh a. An Group atang hian Khawzawl leh Serchhip District hian Quarter Final lutin Serchhip District hian Vawiin a match hmasa berah Kolasib District chu Quarter Final Match an khelhpui ang.

Mizoram Inter-District Junior Boys Football Championship-2023 khelh mekah Serchhip District chuan an match hmasa berah hnehna an chang. Niminpiah atanga Kolasib-a khelh Mizoram Inter-District Junior Boys Football Championship-2023 ah hian Serchhip District hi Group C-ah awmin nimin khan an Match hmasa berah Khawzawl District an hmachhawn a, Khawzawl District hian Markas Lalhming-mawia hmangin goal khung hmasa mah se Jeffrey Lalthanliana chuan Second half-ah a sut a, C. Lalruatfela chuan minute 76-na ah Ser-chhip District chakna goal hi a khung a ni. Tun tuma Inter-District Junior Boys Football Championship-ah hian District 11 tel kimin Group 4-ah then an ni a, Serchhip District hian Vawiin chhun dar 12:30 hian Lawngtlai District an hmachhawn leh dawn a, Quarter Final lut ngei tura beisei niin Group tina a titha pahnih ten Quarter Final an khel dawn a ni.

UPC (NEI) Serchhip Pastor Bial enkawl mektu Rev. B. Lalengzauva chu Saitual Bial enkawl tura sawn niin nizan khan Serchhip Bial chuan UPC Biak Inpui Serchhip-ah thlahna hun an hmang a, naktuk-ah Saitual hi an pan ang. UPC (NEI) Serchhip Bial-ah hian Pastor C. Lalchhuanga chu Thuampui Bial atanga rawn awm tura tih a ni thung a, anni hian naktuk ah Serchhip an rawn lut dawn bawk a ni.

Serchhip-a Assistant Commissioner of Excise & Narcotics B. Ngurchhuana chu Lunglei ah Assistant Commissioner hna thawk tura sawn a ni a, a aiawh tur hian Assistant Commissioner of Excise & Narcotics (Law) hna chelh mektu Darhmingthanga chu rawn dah a ni thung. Ser-chhip-a Assistant Commissioner of Excise & Narcotics hna chelh tur Darhmingthanga hi hun rei tak Serchhip-a lo awm tawh leh OC hna pawh lo chelh tawh a ni.

MNYF East Block Serchhip chuan tun thla ni 26 chhun-a Serchhip Kawnpui Biak In bula Power Transformer kangchhia avanga he Transformer in a chawm Serchhip Bazar, Bazar Hnuai, AOC Veng, Venglai leh Chanmari ten eng an hmuh theih loh thu leh mipuite harsatna tawh leh mangana hriaa hun reilote chhunga sawrkarin a thara a thlak nghal chu lawmawm an tih thu thuchhuah siamin an tarlang a. “Mipuite tana rang taka che nghal thin sawrkar kan nei tih lantirtu anih avangin sawrkar hotute chungah lawmthu kan sawi a ni,” an ti a. Transformer kâng chhia thlakna tura a tul leh pawimawhte a ranglama bawhzuia, mipui tana thahnem ngai taka thawktu P&E Department Serchhip-a thawktute chungah lawmthu an sawi bawk.

BJP Mizoram State President Vanlalhmuaka chuan Assam Rifles sawn chhuahna atana Union Minister rawn kal tur anga sawi chu thu diklo a nih thu a sawi.

PC Party President Vanlalruata chuan Mizo-ram sawrkar sum chèt dan mak a tih thu a sawi. Nimin-a Press Statement a siamah PC Party President chuan kum 2020-21 a ral chiah, March 31, 2021 khàn Reserved Bank of India (RBI)-a Mizoram account-ah cheng khat mah awm lovin cheng vbc. 123.35 indaihlohna kan nei nia sawiin, hetianga RBI-a minus kan nei hi kumthar-a harsatna min siam chiamtu a ni thin tih thuchhuah siamin a tarlang a. Hemi ni vêk hian Mizoram sawrkar a sum khawihtu Officer (DDO) 709 kan neih zînga 285 chuan an Savings/Current Account-a sum an kawl belhkhawm chu cheng vbc. 456.59 anih thu leh hetianga sum khawih kual hi thil hlauhawm tak, corruption kawngkhar zâu taka hawngtu a nih thu a sawi bawk.

ZPM Thalaite chuan MNF Adviser leh Minister Dr. R. Lalthangliana’n March 28, 2023 a a bial a fanna-ah ZPM-te chu sum leh pai hmanga inkokhawm anga a sawi chu pawi an tih thu leh politics a nih tâk avânga Kohhran upa meuh pawhin dawt pawisa lova mahni elpui party-te dawt hmanga a bei mai chu kalphung hlui zia dik takah an ngai tih an sawi a. “MNF MLA zinga lehkhathiam leh puitling ber pawla mipuiin an ngaih pawhin hetianga dawt a pawisa lo a nih chuan, MNF party chu mipuite tân a beidawn-thlâk hle-ah kan ngai,” an ti bawk.

ZoCareer Solutions-a Director RK Hnuna buatsaih ‘Mizo Competitive Year review 2022’ chu nimin khan Road & Infrastructure Development Board Vice Chairman Er. H. Lalzirliana MLA chuan a Office-ah a tlangzarh a, he leh-khabu hi phek 610-a chhah niin Rs. 350/- man tur a ni a, Chapter 5-a then niin Competitive Exam hrang hrang Banking, SSC, MPSC, MSSSB leh CUET Entrance pe turte tan pawh a tangkai tur dah a ni a. ZoCareer Solutions Office-ah leh Lehkhabu dawr hrang hrangah a lei theih tura dah a ni.

Khawzawl Town Planning & Development Committee thutkhawm hmasa ber chu nimin khan bialtu MLA leh Deputy Chief Minister Tawnluia hovin Khawzawl DC Conference Hall-ah neih a ni a, he hunah hian Khawzawl Master Plan buatsaih tura hmachhawp hrang hrang te sawifiah niin Khawzawl Master Plan buatsaih mek huamchin (Planning Boundary) tur te, Khawzawl khua-a mipui leh sawrkar department-te dinhmun zirchian dan tur te sawiho a ni a, Khawzawl Planning Boundary 45 sq.km ni tura Town & Country Planning Office, UD&PA Department in ruahmanna a lo siam chu a hmun ngeiah UD&PA leh Khawzawl VC ten lo zirchiang leh se an ti bawk.

Formosa Foundation India in Champhai Sub-Hqrs. YMA leh an hnuaia Branch 21 te hnena Oxygen Concentrator a pek chu nimin khan Law & Judicial Minister T.J. Lalnuntluanga chuan a dawng turte hnenah a hlan a, hemi puala Champhai Sub-Hqrs. YMA Office-a hun hman ah Minister chuan YMA kaltlanga hmalakna te a ngaih pawimawh thu sawiin, Oxygen Concentrator mamawhna a san avangin hemi kawnga hmalak a nih theih nan Formosa Foundation India-te dawra hmalak a ni thu a sawi a ni. Formasa Foundation India kaltlang hian District Hospital Champhai hnenah Mobile Ventilator chu Minister hian a lo hlan tawh bakah Urban PHC Champhai Vengthar kutah niminpiah khan Oxygen Concentrator a hlan bawk.

Tuichang bialtu MLA leh Deputy Chief Minister Tawnluia chuan nimin khan Khawzawl Vengthar-ah Tennis Court thar a hawng.

Lunglei Municipal Council (LMC) Inthlanpui hmasa ber atan nimin khan mipui ten Vote an thlak ta a, he inthlanna a Vote tla te hi April 3, 2023-ah chhiar a ni ang.

Kumin chhungin Champhai District-ah ND&PS Act, 1985 hnuaiah thubui 41 ziahluh a ni tawh.

Union Home Minister Amit Shah chuan Mizoram Lok Sabha MP C. Lalrosanga chu Aizawl atanga Zokhawsang a Assam Rifles an insawnfel vek tur thu a hrilh.

Regional Institute of Paramedical and Nursing Sciences (RIPANS) tihlen tumna atana hnathawh mek te leh thlen chin te chu nimin khan Governor Hari Babu Kambhampati chuan RIPANS Director leh Contractor te a sawipui.

MZP in Reiek khuaa Zofest 2018 an buatsaih hriatrengna lungphun chu niminpiah khan an hawng.

Chief Minister Zoramthanga chuan Ruihhlo, Zu leh sualna dang dang min hnukhniamtu chu huaisen taka kan sut a, eng bawih ah mah tang lo tura huaisenna leh tumruhna neih a pawimawh thu sawiin, “Kil tin atanga hmun hrang hranga ruihtheihthil lut lo danga lo do hneh tur chuan kan vai tan a ngai a ni,” a ti.

Serchhip-a Excise and Narcotics Department chuan nimin zing khan Thenzawl dai-ah Heroin No. 4 Hawng 30 zet an man a, hemi kaihhnawih ah hian mi pathum leh lirthei pahnih an man bawk.

Mizoram sawrkar in District Sports Committee ruangam thar a siam chu Serchhip District-a Sports Association hrang hrang ten zawm ve an rel angin Serchhip District Sports Committee-a hruaitu thlan tura ruahman te thlanna chu nimin khan tluang taka neih a ni.

District Child Protection Unit (DCPU) hnuaia din Serchhip District Jail Inspection Team te chuan nimin khan Serchhip District Jail tlawhin kum tling lo tang an awm leh awm loh an enfiah a. Nimin-a District Jail an tlawh lai hian tang mi 51 awmin an zinga 9 chu hmeichhia an ni a, Nu in a tanpui naute 2 an awm bawk. Serchhip District Jail-a tang zingah hian ruihtheih thil kaihhnawih a tang an tam ber a, kum tlinglo Jail tang leh thubuai nei an awm lo tih Inspection Team te hian an finfiah a ni. Hei bakah hian Jail-a in-enkawlna hrang hrangte pawh he hunah hian enfiah nghal a ni bawk.

Serchhip District Police te chuan ni 2 chhungin Serchhip District-ah Dan lova Kuhva tawlh nia hriat Motor pali atangin an man.

Serchhip Bazar leh a chhehvel chawmtu Electric Transformer Serchhip Venglai-a mi chu Pathianni khan kangin Eng pekchhuah theih a ni lo a. Thawhtanni khan a thlakna tur Aizawl ah zuk lak niin nimin khan a bun hna thawh nghal niin nimin tlai dar 4:00 vel atang khan dan pangngaiin Power hi pekchhuah chhunzawm leh a ni. He Electric Transformer kang avang hian Serchhip Bazar, AOC Veng, Venglai leh Lower Chanmari te chuan darkar 48 vel eng an hmu thei lo a, Electric Department te hi Serchhip Kawnpui North VC leh YMA ten a theih angin an lo pui bawk a ni.

Niminpiah khan Serchhip-ah Anaemia Camp neiin he hun hi Millet (Buhtun) ei a that zia leh Anaemia venna tha tak anih thu inzirtirna hun atana hman a ni.

North Vanlaiphai khua atanga Block Agriculture Officer (BAO) Office sawnchhuah duhloh lantirna atan nimin khan North Vanlaiphai-ah Total Bandh neih a ni a, mipui ten an thlawp that avangin chawhnu dar 1:00-ah tihtawp a ni.

North Vanlaiphai Damdawi Veng Pastor Bial KTP te chuan niminpiah khan Serchhip Blood Bank-a dah turin thisen Unit 42 an pe a, thisen petute hi Mipa 31 leh Hmeichhia 11 te niin heng mi tlawmngai te thisen la tur hian Serchhip atangin Blood Bank-a thawktute chu North Vanlaiphai-ah hian an kal a ni.

National Conference on Tourism in Mission Mode chu nimin khan New Delhi-ah neih tan niin Mizoram atangin Tourism Minister Robert Romawia Royte chu a tel a, Vawiin hian chhunzawm-a zawhfel a ni ang.

Mizoram-a tlawmngai pawl hrang hrang YMA, MUP, MHIP, MZP, MSU te telna, NGO Co-Ordination Committee chu nimin khan thu-khawmin Aizawl hmun laili atangin Assam Rifles te chu an hmun thar Zokhawsang-ah insawnchhuak thuai se an duh thu leh Assam Rifles luah lai ram chhunga felhlel leh dik lo taka LSC lo neite chu a rang thei ang bera ram leh hnam rilru pua an pass (LSC) surrender turin a ngen nawn leh tih an sawi a. Mizo mipuite tana helai hmun hi a awm zui zel theih nan tuna pass lo neitu te pawh a rang thei ang bera Cancel sak tura sawrkar chu ngenin, Assam Rifles chhuahsan tur ram hi mipuite tana tangkai thei ang bera hman a nih theih nana hma la tura Mizoram sawrkar an ngen bakah, a tul angin sawrkar tawiawm zel pawh a inhuam thu an sawi bawk.

Lunglei Municipal Council (LMC) inthlanpui hmasa ber chu Vawiin hian neih a ni dawn ta a, tukin dar 7:00 atanga tlai dar 4:00 thleng hian mipui ten Vote an thlak dawn a, he inthlanna a Duty tur Polling Party 44 te pawhin nimin khan an Duty-na tur hmun an pan fel tawh a ni. Tarlan tawh angin he inthlanna hi Ward 11-ah neih a ni dawn a, INC, MNF leh ZPM te chuan Ward tin hi Party malin an chuh vek a, BJP pawhin Ward 9-ah Candidate an nei bawk a ni. He inthlanna atan hian EVM hman a ni dawn a, mipui ten Vote an thlak zawh velah EVM te hi lakhawmin April 3, 2023 zing dar 10:00 khian Saikuti Hall-ah chhiar a ni anga, hetah hian Counting Hall pahnih siamin Dawhkan 12 ve ve hun tur a ni ang.

Deputy Chief Minister Tawnluia chuan Family Oriented SEDP Phase 2 hi kalpui leh tur a nih thu sawiin, beneficiaries 60000 dang thlan leh tura ruahmanna siam fel a nih tawh thu a sawi a. Phase 2 atan hian cheng vbc. 300 dah a nih thu leh August ni 30 ral hmain tanpuina 2nd Instalment chu pek tlak vek tur a nih thu a sawi a. Phase I-a beneficiaries tam zawk te pawhin second instalment Rs. 25,000 theuh an account-ah an dawng mek tih a sawi bawk.

Lawngtlai District-a tlawmngai pawl lian ber Central Young Lai Association (CYLA) chuan tunhnaia Myanmar ram chhunga Siaha mi 2 leh South Lungpher mi pakhat thihna chu pawi an tih thu an sawi.

Ministry of Rural Development chuan ni 100 inhlawhfakna tia sawi, Mahatma Gandhi National Rural Employment Guarante Act (MGNREGA) hnuaia State tinte ni khat hlawh zat tur tichhuakin Mizoram-ah chuan nikhat hlawh hi Rs. 249 a ni ang.

Mamit District huamchhung Phuldungsei khuaa Primary Heath Centre (PHC)-a hman atan Border Security Force (BSF) 38 Battalion te chuan nimin khan Civic Action Programme atangin damlo enkawlna khawl chi hrang hrang - ECG khawl, Blood Pressure Monitor leh Stethoscope an hlan a, hei bakah hian Rajvnagar khuaah a thlawna inentirna buatsaih bawkin mi 300 chuang an inentir a ni.

Mizoram Aero-Sports Association chuan National Aero-Sports Policy Vision 2030 tihhlawhtlinna turin Paragliding Training an buatsaih dawn tih an sawi.

Kan Chanchinbu chhutna leh herna chawmtu Electric Transformer, Serchhip Venglai ami chu nimin khan kangin thlak a ngai a. P&E Department lamin a that theih hun tur an la hriat loh avang leh hei hi siamthat a nih loh chuan LENKAWL Chanchinbu her theih a nih dawn loh avangin mipuite hriatthiamna kan ngen e.

Mizoram State Legal Services Authority (SLSA)-a Member Secretary R. Vanlalena chuan Inrinni khan Serchhip District Jail tlawhin Serchhip District Legal Services Authority-a thawktute nen inkawmna an nei nghal bawk.

Mizoram People Forum (MPF) chuan Mizoram-ah inthlanna felfai leh thianghlim a awm theihna atan Inrinni khan Serchhip-ah ‘MPF District Level Political Seminar’ an buatsaih a. Inrinni zan atang khan Serchhip Town chhunga Presbyterian Kohhran hrang hrangah Political Awareness Campaign neih zui nghal a ni.

UPC (NEI) Serchhip hnuaia Pentecostal Youth Department (PYD) Serchhip Pastor Bial te chuan Inrinni khan Serchhip Blood Bank-a dah turin thisen Unit 27 an pe a, thisen petute hi mipa 20 leh hmeichhia 7 niin Serchhip Blood Bank-a kalin thawktu ten an thisen hi an lak sak a ni. Thudawn danin tunhnaiah Serchhip Blood Bank-ah thisen dahkhawl sa a tam lo hle a, hei vang hian thisen mamawh an awm pawhin dapchawp a ngai lek lek a ni.

Serchhip District Table Tennis Association (SCDTTA) chuan Inrinni khan kum 2023-2025 chhunga an hruaitu tur thlanna an nei.

Serchhip-a Excise & Narcotics Department te chuan Inrinni zing dar 8:45 vel khan Serchhip P&E Veng-ah Heroin No. 4 Hawng thum, gram 33.53-a rit chu an man leh a, hemi kaihhnawih ah hian Rosiamliani (43), Serchhip P&E Veng nia insawi leh Lalneihmawii (45), North Khaw-bung nia insawi te pawh man nghal an ni. Inrinni khan END te hian Mualvawm-ah Heroin No. 4 gram 37.83 an man leh bawk a, hemi kaih-hnawih ah hian Lalnunmawia (22), Darnam Veng leh Hmingthianghlimi (22), Khuangthing nia inchhal pawh man an ni bawk.

Tun thla ni 12 atanga chin hriat loha awm Isak Malsawmtluanga, Thenzawl Vengthar chu Mizo dan-a ni 7 zawn a nih hnuah a chin hriat ni lovin khawtlang huapa zawn chu tihtawp a ni. Tun thla ni 12 chawhnu dar 1:30 vel khan tun thla tira Sertlangpui atanga Thenzawl Vengthara pem Isak Malsawmtluanga (15) hi Thenzawl Venghlun-a an chhungte ina an leng chu chin hriat lohin a bo a, kar hmasa Thawhtanni atang khan Thenzawl Joint VC leh Joint YMA bultumin khawtlang huapa zawn a ni a, Lung-rang tlangah a lirhteng/khalhlir ken chu hmuh niin, ngawrh takin Lungrang tlang hi dap a ni a, Zirtawpni chawhnu lam khan Mat, Chawmkai lei thlang, Lungbang li kai bulah ram riakten an hmu nia sawi a ni a, nimin, a ni 7 ni-ah helai hmun hi dap leh ni mahse hmuh a ni ta lo a, nimin tlai lam khan khawtlang huapa zawnna chu tihtawp a ni ta a ni.

 UPC (NEI) Serchhip Pastor Bial Ladies Auxiliary Department (LAD) inkhawmpui vawi 55-na chu nimin Pathianni hmang khan UPC New Serchhip Kohhran Biak In-ah neih a ni a, thupui thlanbik awm lovin Speaker atan bialtu Pastor Rev. B. Lalengzauva chu hman a ni.He inkhawmpui hi Zirtawpni zan khan bialtu Pastor chuan hawngin Inrinni khan khawmpui Palai ten ro an rel a ni. Serchhip Dinthar Bial UPC LAD Inkhawmpui pawh nimin Pathianni hmang khan Darnam Veng UPC Biak In-ah neih a ni bawk.

North Vanlaiphai khawtlangin an khua atanga Block Agriculture Officer (BAO) Office sawn chhuah duh lohna lantira an hmalakna kal mekah North Vanlaiphai khuaa Ruling Party, MNF Unit awm zawng zawng Unit pasarih (7) leh Group MNF-a hruaitute chuan Party a an nihna chawlhsanin naktuk, March 28, 2023 (Thawhlehni) hian an Seal te Aizawl-a Mizo Hnam Run-ah an dah dawn a. Hetianga MNF hruaitute'n banna an thehluh hi mipuite'n an thlawpna, an hriatpuina leh an hmalak mekna-a an lungrualna lantirna'n naktuk ah vek khian North Vanlaiphai-ah Total Bandh an huaihawt dawn bawk a, N. Vanlaiphai khawtlang hian tun thla tir March ni khat (1) khan an khua atanga Block Agriculture Office sawnchhuah duhloh lantir nan kawng an lo zawh tawh bawk a ni.     Hetihlai hian kar kalta Thawhtanni khan North Vanlaiphai khuaa MNF VC member te chuan MNF VC member an nihna atanga an inhnuhdawhna chu Serchhip DLAO hnenah thlenin, Independent VC din tura ngenna an lo thlen tawh thu VCP Lalttanpuia chuan a s

 Mizoram Election Department chuan Tripura a inbengbel tawh Bru vote nei hming 4,318 a paih tawh a, hming la paih loh mi 6,084 an la awm mek. Joint Chief Electoral Officer David Liansanglura Pachuau sawi danin Tripura Assembly inthlanpui vuakvetah Tripura State Election Commission hian Bru mi Electoral Roll-a hming an thun tharte Mizoram lamin a lo paihna tur ngenna hi hun reife an titawp a. Tunah hian an rawn thawn tan leh mek a. ERONet hmanga Tripura a Bru-te Electoral Roll a thun tawh, Mizoramin a lo paih ve tura an thawn hi a vuaicha hle a, Mizoram Election Department hotute leh Mamit, Kolasib leh Lunglei District Election hotute chu tunkar chho hian Tripura State Election Commission thuneitute hmu tura Agartala lama kal turin an inruahman a. Kumin kum tawp lama Mizoram Assembly inthlan hma ngeia Mizoram Roll a Bru hming la chuangte paih fai vek chu an duhdan a nih thu an sawi a ni.

 Bairabi leh Sairang inkar Rel kawng siam nan sawrkar kumthar 2023-2024 ah cheng vbc. 915 ruahman belh a ni. Parliament Budget session neih mekah kar kalta khan Union Minister of Railways, Communications and Electronics & Information Technology, Ashwini Vaishnaw chuan Mizoram Rajya Sabha MP K. Vanlalvena zawhna chhangin he thu hi Parliament a hriattir a. Ashwini Vaishnaw-a chuan Bairabi leh Sairang inkar Rel kawng siam nan hian cheng vbc. 5021.45 chu sanction a nih tawh thu leh hna hi cheng vbc. 7000 senga zawh theih beisei a nih thu a sawi a. Hna zawh theih beisei hun erawh chhan hrang hrang vangin sawichian theih a la ni lo, a ti bawk. Sihhmui atanga Mizoram chhim tawp Zorinpui thlenga Rel kawng siam tumna a awm em tih zawhna pawh Railway Minister chuan chhangin, Rel kawng siam hna chu a tul dan azira thawh thin a nih thu leh mamawhna leh kawng hrang hranga a tangkai dan tur thlir chunga siam thin a ni tih a sawi a.Tun dinhmunah chuan Sihhmui - Zorinpui Rel kawng siam tumna a awm

TATA Group hnuaia awm Air India chuan March 18, 2023 atang khan Lengpui Airport-a an flight neihte an titawp ta a, Air India thlaktu tur chu ngaihtuah mek niin, tihfel theih thuai beisei a ni tih Mizoram sawrkara Aviation Wing hotute chuan sawiin, tun dinhmunah Lengpui Airport-ah Indigo leh Alliance Air flight a la awm a ni.

 Mizoram Pradesh Congress Committee (MPCC) chuan MNF Thalaite thuchhuah siam chu thu belhchian dawl lo niin an sawi.

Chief Minister Zoramthanga chuan ni 2 cham turin Inrinni khan Champhai a thleng a, sawrkar kumthar, 2023-2024-ah sawrkar flagship programme kal mek SEDP hnuaiah chhungkaw 60,000 dang huam thartir leh tur a nih thu a sawi.

Land Revenue and Settlement Director chuan Assam Rifles chhuahsan tur ram luah chhunga LSC leh House pass lo neite chu insawifiah turin a ti.

Excise & Narcotics Department Office, Serchhip-a sum tih chingpen thubuai a Court in thiamloh a chantir mi pahnih te chu lung In tang tur leh sum chawi tura hrem an ni a. Court-in a hremna hi kum 3 aia tam tan a nih avangin Bail-a chhuah theih an ni lo a. An duh chuan Court sang zawkah an khinglet thung a ni. 

Health Department hnuaia Food and Drug Administration (FDA) Serchhip leh Serchhip District Anti-Tobacco Squad te chuan nimin khan Serchhip Bazar leh a chhehvel-a Dawr hrang hrangte tlawhin Dan phalloh-a ei leh in chi thil zawrh te dapchhuah hna an thawk a. He hunah hian Dawr pahnih atangin Shikhar leh a eikawp chi pocket 884 zet an man a ni.

Serchhip DC Office-a General Branch atana hman building chu cheithat hna thawh a ni dawn a, hei vang hian General Branch hi DC Conference-ah sawn lailawk niin hei vang hian General Branch dawr turte chuan DC Conference Hall-ah pan thawh tur a ni ang.

Serchhip-a Excise & Narcotics Department ten tun thla tir lama Heroin kaihhnawiha an man, Zirtawpni kalta-a Court-a hruai an nih hnuah tlanchhuak mi pathum te chu nimin thleng khan man tumin zawn chhunzawm zel an la ni a, heng mite chin hria leh lo hmu te chuan thuneitute hriattir tura ngen an ni bawk. Heng mi 3 zinga pahnih hi Zokhawthar nia insawi niin pakhat hi New Serchhip Luiralmawi nia insawi a ni thung.

Serchhip District Boxing Association (SEDBA) chuan March ni 27, 2023 atang khian Coach ruaiin Serchhip Boxing Hall-ah a duh apiang tan Boxing zirna an hawng leh dawn a, Coaching Fee thla khat ah mi pakhat tan Rs. 200/- niin March ni 24, 2023 ralhma in a zir duh turte chuan SEDBA General Secretary (Ph. 9436596533) hnenah in hriattir theih a ni ang. Khualkhua atanga Boxing zir duh, thlenna mumal nei lo te tan pawh Boxing Hall ah riahchilh in a zir theih dawn bawk a ni.

MJA Serchhip District member te chu I&PR Department bultuma sawrkar hmalakna then-khat leh hmun pawimawh te tlawh turin Vawiin hian Lawngtlai District panin an zinchhuak dawn a, Serchhip DIPRO K. Saitluanga chuan ho in naktuk-ah Chhimtuipui lui-a Beino, Lungmak tia hriat leh KMMTTP kawng laih mek te an tlawh ang. Hemi hnu hian MJA Member te hi tunkar Ningani-a MJA General Conference vawi 49-na Siaha-a neih tur hmang turin an kal leh nghal anga, Zirtawpni khian Serchhip panin an rawn kir leh ang.

North Vanlaiphai Joint Action Committee chuan an khua atanga Block Agriculture Office (BAO) Office sawnchhuah duhloh lantirna atan Rulling Party-ten Seal dah an lo tum tawh leh Rulling VC Member-ten Party atanga ban an tumna chu kaltlangpui ni se an ti.

Lunglei Municipal Council (LMC) inthlan neih tura Congress Party in Model Code of Conduct bawhchhiaa Minister Lalchhandama Ralte an puhna chungchangah Lunglei District Youth Congress Committee chuan hma la tura ngenna nimin khan RO hnenah an thehlut.

BJP chuan nimin khan Aizawl-a an Office-ah Karthar inhlanna neiin an President Vanlalhmuaka chuan Mizoram thalai tam tak te chuan thil tak tak an duh avangin BJP Sawrkar hi a tul tawh hle tih an hria niin a sawi a. MNF leh Congress-ah beisei a bo tawh niin a sawi bawk.

Lawngtlai District-a Mampui khuaa All NGO Joint Action Committee chuan Mampui vety Farm Manager Dr. John B. Khithie chu kum khat pawh a la awm hma leh a aiawh dah awm lova sawnchhuah a ni chu an ngaithim lo tih sawiin, Sawrkar chu a sawnna sut tura an duh thu an sawi a, March 24 thleng sawrkar chu ngaihchan nise an ti bawk.

Ni 4 chhung awh tur Mara Autonomous District Council (MADC) Budget Session chu nimin khan MADC Chairman N. Viakhu khaih-hruaina hnuaiah neih tan a ni a, Session tan ni ah hian Chairman N. Viakhu chuan, MNF MDC pali ten BJP an zawm tak avangin MADC sawrkar chu BJP sawrkar hlang a ni tawh tih a puang a ni. Nimin-a MADC thutkhawm ah hian Chawhma lamah zawhna leh chhanna hun hman niin CEM chuan kum 2023-2024 Budget ruahman, Rs. 1,79,78,48,000 a pharh hnuah nimin a thut-khawm chu tihtawp a ni a, Vawiin ah chhunzawm leh a ni ang.

Sikkim atangin ILP Committee Member mi pali (4) te chuan Mizoram-a Inner Line Permit kalphung leh dinhmun zirchiang turin nimin khan Aizawl an rawn thleng a, Commissioner & Secretary, Home Department chuan lo dawng-sawngin Home Department hotute nen inkawmna an nei nghal a ni. Sikkim atanga rawn kalte hian Sikkim-ah tualchhung mi nilo, eizawnna leh thildang hrang hrang avanga lut an thathnem avangin tualchhung mipuiten harsatna an tawk mek tih sawiin, an harsatna tawh chi hrang hrang te an tarlang a, heng harsatna sukiang tur hian pawnlam mi Sikkim-a lut turte zawm tur dan (regulation) siam an duh thu sawi langin, heng avang hian State hrang hrang zirchianna an neih thu an sawi a, Mizor sawrkar Official te nen sawihona zau takin an nei bawk a ni.

Nimin khan khawvel pumah ‘World Oral Health Day’ hman niin Aizawl-ah pawh he ni pual hian DHME, Conference Hall-ah hman a ni a, he hun hi Health and Family Welfare Board Vice Chairman Dr. ZR. Thiamsanga MLA chuan hmanpuiin Mizote hi Oral Health lama kan thanharh a tul takzet thu te, zuk leh hmuam kan tih nasat avanga natna, a bikin Cancer kan vei nasat ziate leh Oral Health inzirtirna kawngah nasa taka tan kan lak thar a tul thu a sawi a. Zuk leh hmuam, ruihtheih thil reng reng kan ka atanga lut lo tura mitinin kan ka chhung kan vawn thianghlim tul a tih thu a sawi bawk.

Fisheries Minister K. Lalrinliana chuan SEDP Pilot Project hnuaia Dumlui-a 'Chakai Demonstration Farm' kalpui chu nimin khan tlawhin he enchhinna hi a hlawhtlin chuan ei leh bar intodelhna kawng a mellung pawimawh tak a nih tur thu a sawi.

Sports Minister Robert Romawia Royte chuan MNF chu Pathian in Mizo hnam te min suihkhawmna atana din niin a sawi.

Lawngtlai West bialtu MLA Ngunlianchunga chuan District Council & Minorty Affairs (DC&MA) Minister thar Robert Romawia Royte chuan a hna hi chelh thei nia a lan loh thu sawiin, “A chang dawn a nih chuan 17.06.2022-a Deed of Agreement DC&MA leh NECS ten an lo ziah tawh chu cancel tur a ni,” a ti.

Kum 2019 atanga January 31, 2023 inkar ah Mizoram School Education Department-a Zirtirtu a ngheta thawk pension-a chhuak mi 668 an awm a, zirtirtu a ngheta thawk tur mi 152 chiah lâk a ni thung a. Primary School leh Middle School-ah zirtirtu leh Headmaster post ruak 2,584 a awm.

Thla thar April 3 thlenga hman tur Poshan Pakhwada chu nimin khan Social Welfare & Tribal Affairs Minister Er. Lalrinawma chuan Secretariat Conference Hall, Aizawl-ah a hawng. Chawtha leh hrisel hmuhtheihna tur atana hmalakna hun, Poshan Pakhwada hawnna hunah hian Minister Er. Lalrinawma chuan Poshan Abhiyaan chu Mizoram-ah hlawhtling taka kalpui mek a nih thu sawiin, kum 2023 chu ‘International Year of Millets’ a nih angin Poshan Pakhwada hmanna kawngah Millets (buhtun) lam hawi activity siam a nih thu a sawi a; theihtawp chhuaha tihlawhtling zel turin thawktute leh Departmeng hrang hrang atanga kalkhawmte a fuih bawk.

Governor Hari Babu Kambhampati chuan nimin khan Power & Electricity Department hotute Raj Bhavan-ah kawmin tuiluang chakna hmanga Kawlphetha tam tham zawk Mizorama siamchhuah dan tur chungchang an sawiho.

Serchhip-a UD&PA Department chuan DAY-NULM hnuaiah Serchhip-a Self-Help Group (SHG) Member te tan Puantah zirna an buatsaih mek.

Serchhip Sub-Hqrs. YMA chuan Inrinni khan Sub-Hqrs. Executive Committee (SEC) thutkhawm an nei.

Seventh-day Adventist-a thalai pawl, Adventist Youth Federation (AYF) chuan Inrinni khan Global Youth Day pualin hmun hrang hrangah damlo a mamawhte hman turin thisen an pe a. Serchhip Chanmari AYF te pawhin Serchhip Blood bank-a dah turin thisen Unit 8 an pe a, thisen petute hi mipa 6 leh hmeichhia 2 an ni.

Heroin No. 4 kaihhnawiha Serchhip-a Excise & Narcotics Department ten an man mi 3, Zirtawpni kalta-a tlanchhuak te chu nimin tlai thleng khan man an la ni lo a, man leh ngei tuma ngawrh taka zawn mek an la ni. Tarlan tawh angin Zokhawthar mi nia insawi mi 2 leh New Ser-chhip Luiralmawi-a cheng nia insawi te hi Zir-tawpni khan Serchhip District Court-a hruai an nih hnuah District Jail-a dahluh an nih dawn laiin Jail kawt atangin an tlanchhuak a, ngawrh taka zawn zui mek zel an ni.

Mizoram UPC-a Hmeichhe pawl, Ladies Auxiliary Department (LAD) Serchhip Bial Inkhawpui vawi 28-na chu nimin Pathianni hmang khan Zoar Biak In, New Serchhip-ah neih a ni a, he khawmpui hi Zirtawpni zan atang khan neih niin Palai lawmna leh inkhawmpui hlanna neih a ni a, Inrinni khan khawmpui Rorel neih niin Inkhawmpui-ah hian Speaker atana ruat mi 5 ten thu an sawi a ni.

Kolkata Mizo Welfare chuan Inrinni khan Salt Lake-a Mizoram House-ah Chapchar Kut an hmang a, Road & Infrastructure Development Board Vice Chairman Er. H. Lalzirliana MLA chuan Kut Pa niin a hmanpui a ni. Kut Pa chuan Mizoram pawn-a awm Mizote chu Hnamdang karah pawh Mizo nunzemawi leh Zofate Inpumkhatna atana an thawhna lawmthu a hrilh bawk a ni.

Mizo Writers' Association (MWA) chuan nikum (2022) chhunga Mizo tawng-a lehkhabu lehlin chhuak thazual thlanna an neih mekah a tha zual pathum an thlangchhuak ta a. Heng te hi Lalzarzova Khiangte lehlin ‘Jungle Lore’ tih te; Sangzuala Pachuau lehlin ‘Pasalthate lu nghahna’ tih leh Rev. H.L. Thianghlima lehlin ‘Phum tura hriak thih’ tih te niin heng atang hian a tha ber thlanchhuah a ni leh dawn a ni.

Zirtawpni khan Lunglei District Police te chuan Crime Review Meeting neiin he huna tarlan a nih danin kumin chhungin an District-ah Police ten thubuai 47 ziaklut tawhin heng zinga 21 te chu Court-ah Chergesheet thehluh a ni tawh a, Heroin No. 4 kaihhnawih ah thubuai pahnih ziahluh ni tawhin mi 7 man an ni a, Heroin kg. 3.620 zet an man tawh bawk a. Kumin ah March 16 thleng khan Traffic rules bawhchhia te sum chawitir zat chu Rs. 3,08,109 aa tling tawh bawk a ni. Kum kalta 2022 chhung khan Lunglei District chhungah thubuai chi hrang hrang 205 ziahluh a ni a, heng zinga Case 150 te chu Court-ah chargesheet thehluh tawh a ni.

ZPM Party ten diklo taka a thuneihna hmanga hlawkna tela an puh, Minister of State Robert Romawia Royte ban tura Larsap an ngenna chu Larsap Pisa chuan zirchiang turin Election Commission of India hnenah a thlen a. Mizoram Larsap, Dr. Hari Babu Kambhampati aiawha ECI hnena lehkha ziaktu, Larsap Secretary V. Lalsangliana'n March ni 16-a lehkha a ziak ang chuan, ZPM aiawha Larsap hnena Petition thehluttu in Minister of State Robert Romawia Royte, Aizawl East-II bialtu MLA ni bawk chu, The Representation of people Act 1951 bawhchhiain diklo takin a thuneihna hmanga hlawkna telah a puh a, hei vang hian ZPM chuan Minister of State Robert Romawia Royte chu Article 192 (1) to the Constitution of India thuneihna hmanga a nihna atanga ban turin Larsap an ngen a, hei vang hian Mizoram Larsap chuan ECI chu he thil hi zirchiang a, a ngaihdan hriattir turin a ngen a ni.

Art & Culture Minister R. Lalzirliana chuan hnamdang kawppui a thlan chu hnam ralna pakhat a nih avangin kawppui thlan kawngah hnam anga thanharh a tul thu a sawi.

Berawtlang-a Tourist Home Annexe sak thar chu Zirtawpni tlai khan Tourism Minister Robert Romawia Royte chuan a hawng a, he building hi Ministry of Tourism, Govt. of India sum cheng nuai 252.26 hmangin Mizoram PWD in an sa a, a furniture leh equipments te cheng nuai 36.29 hmangin Tourism Department in a siam ve thung a ni.

Mizoram Pradesh Congress Committee (MPCC) chuan MNF Adviser leh Minister ni bawk Lalchhandama Ralte chu Model Code of Conduct bawhchhia ah an puh.

Gauhati High Court Aizawl Bench chuan Primary leh Middle School-a Zirtirtu Post ruak hnawhkhahna atan SSA Zirtirtute hmang turin Mizoram sawrkar a hriattir. SSA hnuaia zirtirtu intelkhawm, Mizoram SSA Teachers' Assoction (MSSTA) chuan kum 2018 khan Gauhati High Court-ah SSA zirtirtute dahngheh an nih theih nan thubuai a lo thehlut tawh a. Hei hi Court chuan a ngaihtuah hnuah thuremna mumal awm lovin thubuai hi a titawp a. Mizoram SSA Teachers' Association chuan September ni 18, 2019 khan Court-ah thubuai thehlut nawn lehin, hei hi Gauhati High Court, Aizawl Bench-in a ngaihtuah tha leh a, Zirtawpni khan Court chuan thuremna tichhuakin Mizoram Sawrkar chu Primary leh Middle School zirtirtu post ruak awm mekte hnawhkhah turah Scheme siam a, SSA hnuaia zirtirtu thawk laite Mizoram SSA Teachers' Assoction member te chu dah nghet turin a hriattir a. SSA Teacher dahnghet tura hriattirna hi thla 6 chhunga tifel hman vek turin Mizoram Sawrkar chu a hriattir bawk a ni.

Mizoram sawrkar thil pawimawh hrang hrang buaipuia New Delhi-a zin Minister Dr. R. Lalthangliana chuan Inrinni khan a rawn haw pahin Lengpui Airport Medical Inspection (MI) Room, Lengpui Damdawi In leh Sub-Centre te tlawhin an mamawh hrang hrangte a enfiah.

State Meteorological Centre chhinchhiah danin kumin hian Mizoram-ah ruah a sur har a, ruahtui pawh a tlem rih. State Meteorological Centre chhinchhiah danin, Aizawl-ah kumin ah ni khat chauh ruah a la sur a, March ni 15 (Nilaini) khan ruahtui mm 19.4 a tla a ni.

COVID-19 len lai, mipui khuahkhirhna khauh taka kalpui a nih khan Mizoram-ah innei thar an tlem phah lova, hri len hma kum 2019-2020 aiin hri len hnu kum 2020-2021-ah innei thar an tam zawk.

Mizoram-ah lirthei a pung chho chak hle a, Aizawl khawpui chhung (Aizawl DTO - Urban) ringawtah thla khata lirthei punna chu 1,500 chuang a tling a, MZ-01 ‘Z’ kal mek a zawh hunah MZ-01 AB-in a kal chhunzawm dawn nia thudawn a ni a. Hetihlai hian tun dinhmuna Aizawl DTO (Urban)-a lirthei awm zat chu 2,41,553 a tling bawk.

Mizoram-ah HIV/AIDS kai hmuhchhuah an nih kum 1990 atanga kumin January thleng khan HIV/AIDS vei hmuhchhuah mi 27,876 an awm tawhin thihpui mi 4,005 an awm tawh a, HIV/AIDS vei hmuhchhuah tam berte chu thalai, kum 25-34 inkar an ni.

Serchhip-a Excise & Narcotics Department Office-a eirukna thubuai ah Special Judge (Prevention of Corruption) Dr. HTC. Lalrinchhana chuan a hunlai-a Serchhip-a Superintendent of Excise Rongura, Luangmual, Aizawl leh Treasury Office-a Asst. Account Officer Suakngura, P&E Veng Serchhip te thiamloh chantirin karleh Thawhtanni, March ni 20, 2023 khian hremna puan a ni ang.