Posts

Showing posts from November, 2023

Assembly Inthlanpui-a Vote tla te chhiar turin Serchhip District a inpeihfel thawkhat tawh

Image
Mizoram Legislative Assembly Inthlanpui-a Serchhip District huamchhung Assembly Constituency pathuma vote tla te chhiar tura inbuatsaihna te chu nimin khan District Election Officer David Lalthantluanga hovin thlihro a ni a, Vote chhiar tura inbuatsaihna hi peihfel thawkhat a ni tawh a ni.

Serchhip District-ah Myanmar atanga raltlan 343 awm mek

Image
Serchhip District chhungah Myanmar atanga raltlan rawn lut mi 343 an awm mek nia chhinchhiah a ni a, tunhnaia Myanmar buaina chhuak thar leh ah raltlan rawn lut tam vak lo an awm belh nia thudawn a ni.

Tennis Tournament khel tan

Image
Serchhip District Tennis Association (SDTA) buatsaih ‘Season Ending Tournament’ chu nimin khan Leisekawt Mual Tennis Court-ah khelh tan a ni a, Mipa Singles-ah mi 16 telin Doubles-ah mi pair 7 an tel a. Singles-a tel mi 16 te hi Group 4-ah thenin Group tin atang hian point hmu sang pahnih zel ten Quarter Final an khel anga, tunkar Inrinni-a zawhfel tur a ni ang.

Service Vote 122 let tawh

Image
Mizoram Assembly Inthlanpui neih mekah Serchhip District-a Service Voters 413 zingah mi 122 te Postal Ballot chu RO te hnenah a rawn let leh tawh. Tun tuma Mizoram Assembly Inthlanpui ah hian Serchhip District-ah Sevice Voters 413 awmin heng mite hnenah hian Vote an thlakna turin Postal Ballot thawnchhuah vek a ni a, nimin thleng khan 122 te chu RO te hnenah a rawn thleng leh tawh a. Heng te hi 26-Serchhip (ST) AC-ah 76, 27-Tuikum (ST) AC-ah 33 leh 28-Hrang-turzo (ST) AC-ah 13 te niin nimin bik-ah rawn thleng thar pathum a awm a ni.

Serchhip College-ah inzirtir

Image
Tun thla chhung awh tur India hmarchhak State hrang hranga Northeast Yatra for Lifestyle (Life) Mizoram-a kalpui mek chu Serchhip District-ah kalpui chhunzawm zel a ni a. He Yatra kalpui mek hnuaiah hian nimin khan Govt. Serchhip College-ah ‘Save Energy & Water’ tih thupui hmangin Awareness Campaign neih leh a ni a. He hun hi Lalthazuali Chhangte, Field Assistant, NAMP, MPCB chuan kaihruaiin Govt. Serchhip College-a Professor Dr. Lalrintluanga Sailo chu Resource Person atan hman a ni a, he huna tel zirlai te chu a lem nen entirna pein a zirtir a ni.

Myanmar Sipai thawnlet an ni

Tunhnaia Myanmar ramchhung Lialaipi leh a chhehvela Myanmar Sipai leh Mipui tangrual Sipai te inkahna avanga India rama rawn tlanchhia leh Assam Rifles kut-a inpe Myanmar Sipai mi 30 te chu nimin khan Tipa-a Police leh Assam Rifles te chuan Laki atangin an la a, hemi hnu hian Tipa atangin Indian Army Helicopter hmangin Moreh (Manipur) panpui an ni a, tum khat-ah mi 15 zelin tum hnih lak an ni a, Moreh atang hian Tamu (Myanmar) panpui an ni leh dawn a ni.

Nature Camp nei tur vailiam

Champhai Bethel Mission School-a Zirlai leh zirtirtu mi 60 te chu Champhai District-a Murlen National Park-a Nature Camp nei turin nimin khan EF&CC Department hotuten ten an vailiam a. Heng mite hian Murlen National Park chhunga Nungcha leh ramhmul chanchinte an zir hnuah Vawiin hian Champhai an pan leh dawn a ni. Mizoram Nature Learning Centre, Champhai atang hian tunhnaiah tum nga (5) Nature Tour buatsaih a ni ta a. Sikkim, Kaziranga, Palak Dil leh Dampa Tiger Reserve-ah te Nature Tour hi kalpui a lo ni tawh a ni.

Bank te hmalakna thlirho

Kolasib District chhunga Bank hrang hrang te hmalakna thlirin nimin khan DCC/DLRC/DLSC thutkhawm chu Bawrhsap John LT. Sanga hovin an thukhawm a. He hunah hian kumin July thla atanga September (2nd Quarter) chhunga Kolasib District chhunga Bank hrang hrangte hnathawh thlirlet niin hmachhawp an neih leh hmalak zui zel dan turte sawiho a ni bawk a. Hei bakah hian Ghar Ghar KCC Abhiyan Campaign chungchang pawh sawiho niin District chhunga khaw hrang hrangah te Campaign neih a nih dawn thu tarlan a ni bawk.

NGOCC in ngaihtuah dawn

Mizoram Inthlanpui-a Vote chhiar hun tur sawn a nih theihna tura Election Commission of India dawr-a kal NGO Coordination Committee hruaitute chuan nimin khan Aizawl an rawn thleng leh tawh a, Vawiin tlai hian an indawrna chung-chang hi an ngaihtuah leh ang.

NCORD Meeting nei

Nimin khan Khawzawl-ah District Narcotics Coordination Center (NCORD) thutkhawm neiin ruihhlo dona kawnga an hmalakna hrang hrang thlirho a ni. He thutkhawm ah hian Khawzawl SP Lalchhuanthanga chuan Khawzawl District chu NCORD-a District titha ber pawl a nih thu a sawi a. October leh November thla chhungin Khawzawl District-ah ruihhlo (drugs) man awm lovin, inthlan vuakvetah cheng nuai 13 hu Zu man a nih thu a sawi a. Police ten Zu siamna hmun leh motor-te check-in ‘Special Drive’ ngawrh taka an neih thin thu leh ‘Special Drive against Drugs and Liquor’ chu October ni 9, 2023 atangin ngawrh taka kalpui a nih thu te a sawi a. Drugs Awareness Campaign chu kumin chhungin khaw 28-ah neih tum a nih thu tarlan a ni bawk.

Governor in hmeichhia ruat

Mizoram Governor Dr. Hari Babu Kambhampati chuan Indian Armed Forces atanga India rama Woman Aide-De-Camp(ADC) hmasa ber atan Sqn. Leader Manisha Padhi, 2015 Batch Indian Air Force Officer chu a ruat a. Governor chuan a ADC pahnih zinga pakhat zawk atan Lady Air Force Officer a ruat chungchang ah he hna pawimawh tak thawk tura hmeichhe officer a tling chu thil chhinchhiah thlak a nih mai bakah Hmeichhia ten mipa te chauh tih theih anga mipui nawlpui ten a ngaih thin, hmuh theih loh indaidanna bang suchhiain kawng hrang hranga an hlawhtling thei a ni tih tilangtu a nih thu a sawi a ni. Sqn. Leader Manisha Padhi hian nimin khan a hna hi a zawm a. He hna a rawn thawh hma hian Bidar, Pune leh Bhatinda Air Force Station-ah te a lo thawk tawh a ni.

Aizawl khawpui-a Vawk vulh dan khuahkhirh dawn

Aizawl Municipal Corporation (AMC) hotute leh Aizawl City Local Council Association (ACLCA) hruaitute chu nimin khan Aizawl Mayor Lalrinenga Sailo hova a Office-ah thukhawmin Aizawl khawpui chhunga Vawk vulh chungchanga inkaihhruaina dan an enho a. June 28, 2023-a AMC Board of Councillors Meeting-in thutlukna a lo siam tawh angin Aizawl khawpui chhung a lo thianghlim a, mipui an lo hrisel zawk nan leh leimin vanga chhiatna thleng a tlem zawk theih nan mihring chenna In atanga feet 100 aia hnaia vawk vulh chu January 15, 2024 atangin khuahkhirh a ni dawn a ni.

Champhai District-a Tui harsatna-ah Vaimim chin tum

Champhai District-ah Tui harsatna avanga buh chin theihlohna hmunah te nakum-ah Vaimim chin tum a ni.

A thlawnin buhfai sem chhunzawm dawn

Sawrkar laipui chuan mi retheite tana buhfai a thlawna semna Scheme, Pradhan Mantri Garib Kalyan Ann Yojana (PMGKAY) chu nakum January ni 1 atangin kum nga (5) dang a pawtsei a, he Scheme hnuaiah hian mi rethei vbc. 81 chuang tan thla tin buhfai kg. 5 chu a thlawna sem thin niin nimin khan Union Cabinet thukhawm chuan he thutlukna hi an siam a ni. Hei bakah hian Union Cabinet chuan Central Sector Scheme hnuaiah Women's Self Help Group (SHG) tan drone pek a remti a. He Scheme hnuaiah hian kum 2023-24 atanga 2025-26 chhungin SHG thlanchhuah 15,000 te hnenah drone hi pek a ni ang a, loneituten an hman hawh theih tura ruahman a ni ang. He Scheme atan hian cheng vbc. 1261 ruahman a ni bawk.

Manipur-ah inrelbawlna hran ngiat zel

Kuki-Zo te tana Manipura inrelbawlna hran ngiatin nimin khan ramchhunga khawpui leh thingtlang khaw hrang hrang 26-ah kawngzawh neih a ni.

ASF vanga Vawk suat tan zangnadawmna dil mek

Kum 2021-a Mizoram-a African Swine Fever (ASF) avanga Vawk suat te hnenah zangnadawmna cheng nuai 1,169.94 pek niin kum 2022-a Vawk suat neitute tan zangnadawmna Rs. 5,26,63,300 dil leh mek a ni a, sanction hmuh thuai beisei a ni.

PC Party in sawrkar thar ram tihmasawn tur leh tihausa turin an beisei tih an sawi

PC Party chuan Mizoram-a sawrkar thar lo piang tur chu ram tihmasawn tur leh ti hausa tura an duh leh an beisei thu an sawi.

China-a Pneumonia leng zirchian mek niin India tan hlauhthawn tur a awm rih lo niin a lang

Health Department hotute chuan tunlaia China rama Pneumonia hri leng chu zirchian mek a nih thu sawiin, tun dinhmunah India ram tan hlauhthawn tur a awm leh rih lo nia a lan thu an sawi.

NH. 54 laihzauh mekah zangnadawmna la tawh In la thiat si lo te thiah sak tan an ni

Image
National Highway-54 laihzauh leh siamthat hna thawh mekah Serchhip District chhunga zangnadawmna la tawh, mahni In la thiat lo te chu nimin Nov. 28, 2023 khan Executive Magistrate te kaihhruaina hnuaiah endik leh niin In la thiat lo te chu thiah sak tan an ni.

Thenzawl-ah Food Court hawng

Image
Mizoram State Livelihood Mission (MzSRLM) Serchhip RD Block hnuaia Vantawng Cluster Level Federation hmalaknain nimin khan Thenzawl Hermon Veng-ah khualzin te tana Chaw leh eitur dang ei theihna tur ‘Food Court’ hawn a ni.

Tawitlang Group YMA Sports Meet neih tan a ni

Image
Nimin khan Tawitlang Group YMA Sports Meet vawi 1-na chu Chhingchhip Playground-ah neih tan niin Serchhip Sub-Hqrs. YMA President Kawlthuama chuan he Sports Meet hi a hawng a ni.

Bawlhhlawh te chharfai

Image
Tun thla chhung atana Northeast Yatra for Lifestyle (Life) kalpui mek denchhenin nimin khan Serchhip District-a North Vanlaiphai khua ah Mass Rally neiin hman khat daih Sarang hman that loh zia inzirtirna leh hetiang bawlhhlawh chhar fai hnatlang neih a ni a. He hunah hian North Vanlaiphai Rahsi Veng Branch YMA Chhang Member ten bawlhhlawh te hi an chharfai a ni.

Ghar Ghar KCC Abhiyan sawiho

Nimin khan Saitual-ah District Level Committee chu Ghar Ghar KCC Abhiyan chungchang ngaihtuahin an thukhawm a, Ghar Ghar KCC Abhiyaan (Household KCC Campaign) hi India sawrkarin October 2023 atanga rampum huapa hmalakna a kalpui a ni a, India rama loneitu thlanchhuah te hnenah Kisan Credit Card (KCC) chak zawk a pek theihna tura hmalakna niin KCC loan la tawh leh la la lo te chiang zawk a zirchian a nih hnuin he hmalakna hi a theih anga chaka kalpui nise an ti a ni.

A nupui Chemte in vithlum

Siaha District chhung Amôbyu 'Ch' a cheng B.Chhingpui (56) chu nizan hmasa dar 6:00 vel khan a pasal N. Hnemsanga (51) nen inhnialin a pasal hian a hnunglam atangin a nak-ah Chemte in vawi hnih a vit a, ka pawh chhawn lohin a boral a, a ruang hi Postmortem a nih hnuah nimin khan vuiliam a ni. He pawi-khawihna a thlen hnu hian a pasal N. Hnemsanga hi Siaha Police Station-ah inpe nghalin thubuai siam sak a nih hnuah District Jail-ah khung nghal a ni.

Constitution Day hmang

Nimin November 28, 2023-ah khan Mizo-ram Secretariat Tualzawl MINECO-ah Chief Secretary mawhphurhna la mektu Navin Kumar Chaudhary IAS hovin Mizoram Secretariat a hnathawkte'n Constitution Day 2023 pualin Indian Constitution Preamble chhamrualin hun an hmang a. Kumtin November 26-ah kan ram danpui hlutna leh zahna entir nan India Constitution Day hi hman thin a ni a. Kumin-ah November 26 hi Pathianni a nih avang leh niminpiah, November 27 kha sawrkar chawlh a nih avangin nimin khan Constitution Day hi hman a ni.

Vote chhiar hun ECI sawipui

Mizoram Assembly Inthlanpui-a Vote tla te chhiar ni tura ruat, December 3, 2023 sawn a nih theihna tura Election Commission of India dawr tura kal NGO Coordination Committee hruaitute chuan nimin khan Chief Election Commissioner (CEC) Election Commissioner te chu hmuin an duhna te an thlen a. He inkawmna ah hian Election Commissioner pakhat a tel ve loh avangin Member kim-a an lo sawiho vat tur thu CEC hian a lo hrilh nia thudawn a ni.

Kawn chei dan tur sawiho

Nimin khan Kolasib-ah District Bawrhsap John LT. Sanga hovin kumin Krismas leh Kumthar vuakveta Kolasib khawpui chhunga Veng hrang hrang-a kawn leh hmun remchang lai incheisiak buatsaih dan tur sawiho a ni a. Kawn chei Intihsiakna hi VC-te kaihhruaina hnuaiah kalpui nise, lawm-man pawh siam nise an ti a. VC-te chu hemi chungchangah hian hma la tura ngenna lehkha pek nise, Kolasib District chhunga Civil Sub-Division-ah te chuan veng/kawn chei an duh a nih chuan SDO (Civil) te kaihhruaina hnuaiah kalpui mai nise an ti bawk. He thutkhawm kaihruaitu Kolasib District Bawrhsap chuan kuminah hian 'Kolasib DC Bungalow' chu kum dang aia uara chei tum a nih thu sawiin, Krismas leh Kumthar vuakvetah a duh tan DC Bungalow hi tlawhna hun siam leh tum a nih thu a sawi bawk.

Khawzawl-ah Cooperative Society zirhona neih a ni

Khawzawl District chhunga Cooperative Societies 29 hruaitute tan Mizoram State Cooperative Union (MSCU) hmalakna in niin khan Cooperative Society chungchang zirhona neih a ni.

Rorelna Dik Group ten hmalak dan vilzui an tum

Rorelna Dik Group chuan Mizoram inthlanpui 2023-ah tu party pawh lo sawrkar se an Manifesto leh intiamnate vilzui an tum tih a sawi.

Kumin ah lirthei ziahluh thar sing hnih chuang awm

Kumin January 1 atanga November 27 thleng khan Mizoram-ah lirthei registration tih thar sing hnih chuang a awm tawh a, heng zinga za zela 72.91 chu Aizawl DTO chhunga ziahluh thar a ni.

Myanmar sipai 30 te Assam Rifles kutah inpe in Siaha District-ah raltlan rawn lut an pun belh zel

Myanmar sipai mi 30 te chu nimin khan Mizoram chhim lama Laki-a Assam Rifles te kutah an inpe a, hetihlai hian Myanmar ram buaina avang hian Mizoram-ah raltlan rawn lut an awm belh leh bawk a ni.

Serchhip-ah Northeast Yatra for Lifestyle (Life) nei mek

Image
India hmarchhak State 8-a tun thla (November) chhunga neih tura ruahman Northeast Yatra for Lifestyle (Life) chu kar hmasa lamah Mizoram tana a hawnna hun hman a nih hnuin Serchhip District-ah pawh kalpui mek a ni a. He Yatra neih chhung hian mipuite hnenah tam zawk leh zau zawkin ‘environment’ humhalh leh venhim pawi-mawh zia zirtirna pek tura ruahman niin tunah hian In tin-a lut lawrin hemi chungchang inzirtirna neih a nih bakah thuziak te sem a ni a. Vawiin hian North Vanlaiphai-ah Mass Rally neiin hman khat daih Plastic thenfai hnatlang neih nghal a ni anga, naktuk-ah Govt. Serchhip College-ah hemi chungchang inzirtirna hi neih leh a ni ang.

Senghawi hna thawk dawn

Image
Serchhip District chhunga National Highway-54 laihzauh leh siamthat hna kal meka zangna-dawmna la tawh, mahni In leh lo la thiat lo te chu an In leh lo te thiata senghawi tura hriattir an nih leh hnuah Vawiin hian Magistrate hovin an hmunah tlawh leh an ni dawn a, he hunah hian Dan leh thupek kengkawhtu Police lam pawh kalin zangnadawmna la tawh, mahni In leh lo la senghawi lo te chungah hian Dan angin hmalak tum a ni dawn a. Vawiin hian Chhingchhip-ah a bul tanna atan hmalak tum a ni ang.

Serchhip District Volleyball Championship khelh tan a ni

Image
Serchhip District Volleyball Association buat-saih ‘Serchhip District Volleyball Championship 2023’ chu nimin khan Serchhip Vengchung Volleyball Court-ah khelh tan niin tunkar Zirtawpni khian Final khela zawhfel a ni ang.

Vote chhiar dan tihchhin a ni

Image
Mizoram Assembly Inthlanpui-a Vote tla te chhiar tura Serchhip District-a inbuatsaihna kal mekah nimin khan Election Commission of India in ruahmanna a siam angin Vote tla te chhiar chhinna,  'Full dress rehearsal' chu Encore portal hmangin neih a ni a, Serchhip DC Conference Hall leh DC Meeting Hall-a he hun hmanna ah hian Serchhip District chhung Assembly Bial pathum-a Returning Officer ten an bial chan chhunga Polling Station tina vote tla chhiar dan tur te, EVM leh Postal Ballot buaipui dan turte an tichhin a, Electronically Transmitted Postal Ballots (ETPBS)  hmanga service vote tlate chhiar dan tur tih chhin a ni bawk.

MZP President in Union Minister hnenah thlen

New Delhi-a cham mek Mizo Zirlai Pawl (MZP) General Hqrs. President H Lalthianghlima chuan nimin khan Union Minister of State for Minority Affairs John Barla chu a chenna ah hmuin Mizo zirlaite tana thil pawimawh hrang hrang a thlen.

YMA ten In an sak sak

Kolasib Vengthar Branch YMA chuan nimin khan an huamchhunga hmeithai pakhat chenna In tur hnatlang in an sak sak a, In an sak sak hi enkawltu nei lo, chhungkhat laina hnai pawh nei lo niin, tunhnai khan sawrkar laipui Scheme kaltlanga Insak tanpuina, Housing for All a dawng a. YMA te hnenah In sak sak tura ngenin Kolasib Vengthar YMA te hian hemi ang hian In hi an sak sak a. In sakna tur hmunhma a neih loh avangin tuna a chen mekna neitu R Pakunga, Kolasib Venglai te chuan a damchhunga a awm an phalsak thu an hrilh angin helai hmunah hian In hi an sa ta a ni.

Chhawr tangkai turin duh

 Rikrum thli a thlen thulha tanpuitu kohna, State Emergency Response Center hotute chuan kum 2019-a an din hnuah tangkai taka hmang awm bawk mah se mipui ten State Emergency Response Center chu an la hre tawk lo nia an hriat thu an sawi a, a biakpawh theihna number 112 chu mipuiin chhinchhiah a, tangkai taka hmang tura chahin, mi thenkhat fiamthuna atan 112 chu Call ching an awm an awm thu leh hetiang hi ti tawh lo se an duh thu an sawi a. Phone signal awm lohna hmuna harsatna tawh thulhah pawh 112 hi call theih reng tih an sawi bawk.

Chawimawina thuziak hlan

Tun thla ni 7-a Mizoram Assembly inthlanpui vote thlak ni-a Lawngtlai East bial, Pang khuaa vote thlaktu kum 115 vel nia sawi Famiangi chu Lawngtlai District Election Officer (DEO) Joseph H.Lalramsanga chuan Ngaihhlutna thuziak leh Rs. 2000/- a hlan a, Lawngtlai DEO aiawhin Pangkhua Booth Level Officer K. Lianhrangvela chuan chawimawina hi a hlan a ni.

Health Deptt. in hma la nghal

Union Health Ministry-in tunhnaia ram thenawm China hmar lama naupang zinga thawkna lama harsatna nei an pun chhoh avanga State leh UT te chu vantlang mipui hriselna leh damdawi lama an inbuatsaih dante ennawn nghal tura a tih angin Mizoram sawrkar-a Health Department hotute chuan Mizoram dinhmun chu uluk taka thlithlai nghal a nih thu an sawi a, hetihrual hian hrileng hian India ala thlen loh avangin mipui tan chi-aina tur a awm lo a, hriattirna hi engemaw thulh a inralring tura tihna mai a nih thu leh sawrkar laipui atangin inkaihhruaina pawh engmah siam la ni lo mah se, an thurawn anga hmalak a nih thu an sawi.

Mipa ten Hmeichhiate atangin zir tur kan ngah - Ruatkima

Aizawl West-II Bialtu MLA Lalruatkima chuan Mizo mipate'n chak lo zawka kan ngaih hmeichhiate atangin kawng hrang hrangin zir tur kan ngah tih a sawi.

Bairabi-ah inzirlawkna nei

Sairang Joint MHIP hruaitute chu nimin khan Bairabi-ah kalin Bairabi South VC leh MHIP ten lo dawngsawngin Zero Point Bazar Shed-ah an inkawm a, Sairang Joint MHIP hruaitute chuan Sairang-ah Rel a luh dawn hnaih tawh avangin lo inven dan tur leh lo inruahman lawk tula an hriat avangin Bairabi lam lo inven dan te zirchiang tura Bairabi-a kal an nih thu an sawi a. Bairabi South VC leh MHIP hruaitute hian Bairabi lo inven dan leh tun thlenga hmalakna kalpui reng a nih dan tlangpui hrilhin, inven dan leh in ruahman dan ah sawi lawk vek theih a nih loh thu leh tawnchawp thil harsatna hrang hrang a awm thu te an sawi bawk a. Bairabi leh Sairang in harsatna emaw, ram leh hnam humhalha inven dan turah an pawimawhna chen a in an kher loh tur thu te bakah, Bairabi aia inven a theihtawpa lungrual taka tanho reng a tul dawn thute an hrilh bawk.

Bairabi leh Sairang inkar Rel kawng siam hna nakum October thla ah zawhfel tum a ni

Bairabi leh Sairang inkar Rel kawng siam mek chu harsatna hrang hrang avangin kumin ah zawh hman a ni dawn lo a, nakum (2024) October thla khian zawhfel vek tum a ni.

Winter Festival nei turin inbuatsaih mek a ni

Thla thar December ni 11 atanga ni 16 inkara Winter Festival ropui taka nei turin inbuatsaihna kalpui mek a ni.

Mizoram Assembly Inthlanpui-a Vote tla te Dec. 3-a chhiar turin inbuatsaihna kalpui mek a ni

Mizoram State Assembly inthlanpuia vote tla te chhiar turin District tinah inbuatsaihna kalpui mek a ni a; Election Commission of India (ECI)-in ruahmanna a siam ang chuan thla thar December ni 3 khian mi 4000 chuang ten zing dar 8:00 atangin District khawpui tinah Vote tla hi an chhiar dawn a ni.

Pawl pahnih in thisen pe

Image
Inrinni khan Serchhip District Hospital Blood Bank-ah pawl pahnih ten damlo te hman turin a thlawnin thisen Unit 20 an pe a, Serchhip Chan-mari Branch YMA hnuaia Taitesena Section chuan thisen Unit 8 pein mipa 6 leh hmeichhia pahnih an ni a. Govt. Serchhip College NCC te pawhin thisen Unit 12 pein mipa 5 leh hmei-chhia 7 an ni bawk.

Serchhip ABC inkhawmpui tiak

Image
Zirtawpni kalta zan atanga Serchhip Area Baptist Council (ABC) Inkhawmpui vawi 27-na neih chu nizan khan a tiak ta.

Krista Lalber Kut ni hmang

Image
Roman Catholic Kohhran chuan nimin, November thla a Pathianni hnuhnung ber kha ‘Krista Lalber Kut ni’ ah hmangin he ni hi Lalpa chawi-mawina leh fakna thu leh hla puanga kawngzawhna hunah an hmang thin a. Kumin hian Aizawl Diocess hnuaia Parish Bial hrang hrangah he ni pual hian hun hman niin Serchhip Parish chuan chawhma lamah mahni Biak In theuha hun an hman hnuah nimin chhun khan IOC Veng atanga Serchhp P&E Veng-a Assumption Church thlengin kawng zawhin hun an hmang a, Assumption Church-ah hian Benediction-in kawngzawh kharna an nei a, Kohhran member thahnem tak an tel a ni.

Constitution Day hmang

India ram Danpui pawm ni, Constitution Day chu nimin Nov. 26, 2023 khan rampum-ah hman a ni. Constitution Day hi kumtin November 26-ah hman thin niin he ni hi November 26, 1949-a Constituent Assembly in India ram Danpui a pawm ni hriatrengna atana hman thin a ni a, hemi hnu January 26, 1950 khan India Danpui hi a taka hman tan a ni. Sawrkar laipui chuan kum 2015 atang khan Hnam Dan leh kalphung tih zahawm nan leh hmasawn zelna atan kumtin November 26 hi ‘Constitution Day’ atan a puang a ni.

Mizoram-ah Mobile Phone awm zat tlahniam

Mizoram-ah kum 2020-21 aiin kum 2021-22 ah Mobile Phone a tlem zawk. Economics & Statistics Department in tunhnaia a tihchhuah thar 'Statistical Handbook Mizoram 2022' a tarlan a nih danin kum 2020-2021 khan Mizoram-ah Mobile Phone 1,004,513 a awm a. Kum 2021-2022 ah chuan 865,375 awmin kum hmasa lam aia nikuma Mobile Phone tlemna hi 139,138 zet a tling a ni. 

NGOCC in ECI hmu dawn

Mizoram Assembly Inthlanpui Vote tla te chhiar hun atana December 3 (Pathianni) ruat sawn a nih theihna tura Election Commission of India (ECI) dawr tura New Delhi-a kal NGO Coordination Committee hruaitute chu naktuk, Nov. 28, 2023 tlai dar 3:00-ah Chief Election Commissioner (CEC) leh Election Commssioner dang te hmuh theihna hun siam sak an ni a. He hunah hian NGOCC hruaitute chuan an thilphut te an thlen dawn a ni.

Helicopter service tangkai

Aizawl (Mizoram) leh Lamka (Manipur) inkara Helicopter Service chu mipui ten an chhawr tangklai mek a, Helicopter pakhat chauh a service avangin mipui ten an inchan lo hle ni thudawn a ni. Zawhna chhanga General Administration Department hnuaia Civil Aviation Wing hotute chuan Aizawl leh Lamka inkarah hian sawrkar laipui ruahmanna in Helicopter service tir a ni a, hei hi Manipur-a Zohnahthlak ten an chhawr tangkai hle a, helicopter hi tum khata mi 10 phur thei chauh a nih avangin indaihlohna a nasat avangin ticket lak lawk pawh an rem ti lo tih an sawi. Civil Aviation Wing hotute chuan, Mizoram chhunga Helicopter service pawh mipui ten an inchan lo hle tih an sawi a, tun dinhmunah pakhat chauh thlawhtir a ni a, ni tin hmun 3 ah thlawh tir a ni a, hmun 15 regular taka thlawhtir an nih thu leh Cham-phai chu passenger tamna ber a nih thu an sawi.

Zangnadawmna pek-a lungawilohna enfiah a ni

Lunglei leh Tlabung inkar National Highway-302 laihzauh hna thawh meka zangnadawmna an dawn zat-a lungawi lo te zualkona chhan chu a hmunah enfiah a ni.

Tunhnaia pawisa lem man ah Rs. 500 note tam

Kum 2019 atanga kumin 2023 thlengin Mizoram-ah pawisa lem (Fake Indian Currency Note/FICN) Rs. 1,69,14,100 hu man a ni tawh a, pawisa lem man hnem ber chu Rs. 500 note a ni.

Thla 7 chhungin chhiah Vbc. 671.11 (61.89%) hmu

Mizoram sawrkar a Taxation Department chuan kumin April atang October (thla sarih) chhungin mipuite atangin Chhiah chi hrang hrang Rs. 6,71,11,29,777 an hmu tling tawh a, hei hi sawrkar kum kal mek 2023-24 a chhiah hmuh beisei zat (target) cheng Vbc. 1,084.29 atangin zaa 61.89% a ni.

Kum 18 chhunga ruihhlo vanga thi tam ber kum?

Kumin (2023) chhungin Mizoram-ah ruihhlo vangin mi 67 an thi tawh nia chhinchhiah a ni a, kum 18 kalta chhunga ruihhlo thihpui tam ber kum thleng thei dinhmun ah kan ding mek a ni.

China-a hri leng vangin State leh UT lehkha thawn

Tunhnai khan Director General of Health Services, Ministry of Health and Family Welfare Prof. (Dr.) Atul Goel chuan State leh UT hrang hranga National Health Mission-a Mission Director-te hnenah lehkha thawnin China-ah naupang lam thawk harsatna siamtu natna vei an tam thu sawrkarin a hriat thu a sawi a. Chi-aina tur a awm lo chungin hetiang lam hi uluk taka zirchian nise tiin State tina IDSP te’n thil awmdan vil ngun a, damdawi In-a khum leh inenkawlna lam pawh thlithlai reng nise a ti bawk.

Nausen thi zat tehna ah Mizoram dinhmun tha ber

Sawrkar kum liam ta 2022-23 chhung khan Mizoram-ah nausen kum khat hnuailam thi 363 awmin nu nau chunga thi (Raicheh) mi 18 an awm bawk a. Sawrkar laipui atanga record tihchhuah thar berah chuan nausen thi zat tehnaah Mizoram dinhmun a tha ber a ni.

Mizoram boruak a bawlhhlawh chak in AQI ah Level 3 thleng tih MPCB hotuten an sawi

Mizoram boruak chu a bawlhhlawk chak hle a. Boruak bawlhhlawh leh bawlhhlawh lo tehna, Air Quality Index-ah a san lai berin 216 a thleng a, hei hi fimkhur ngai tak, rei tak hip luha thawk tiharsa thei a ni.

Mizoram chhim lamah raltlan rawn lut leh

Tunhnai lawka Myanmar Chin State chhimlam Lailenpi khaw chhehvel Myanmar Indo Thlawhna te'n an bomb leh avangin Siaha District-ah raltlan 298 an rawn luh belh.

Mizoram-a Oil Palm tharchhuah 20% vel thartu Nalzawl khua in Mizorma-ah Oil Palm an tharchhuak tam ber

Mamit District-a Nalzawl khua chu Mizoram-a Oil Palm tharchhuak tam ber khua nia hriat an ni a, Mizoram in kum khat-a Oil Palm a tharchhuah za zela 20 vel chu he khua atanga tharchhuah niin Mizoram mai bakah India hmarchhak-a khaw mal-a Oil Palm tharchhuak hnem ber nia hriat an ni bawk.

ABC Inkhawmpui nei tan

Image
Mizoram Baptist Kohhran-a Rorelna sang ber dawttu, Area Baptist Council (ABC) Rorel leh Inkhawmpui chu nizan atang khan Mizoram hmun hrang hrangah ABC 17-ah neih tan a ni a, Vawiin hian ABC Rorelna neiin ABC Executive Committee thute bakah Pastor Bial atanga Agenda lut te, ABC kaltlanga Assembly 2024-a thlen tura chhawpchhuah te ngaihtuah a ni anga. Naktuk Chawhma Inkhawm-ah Kohhran Upa Nemngheh Inkhawm (Ordination Service) neih tur niin kuminah hian BCM pumpui-ah Kohhran Upa atan mi 206 nemngheh tur an awm a, Chawhnu lamah Lalpa zanriah (Sacament) kilho a ni ang.

Counting Agent Training nei

Image
Assembly Inthlanpui a Vote tla te chhiar tura inbuatsaihna kal mekah nimin khan Serchhip District-a Counting Agent te tan Brilliant Higher Secondary School, New Serchhip-ah Training buatsaih a ni a, East Lungdar BDO Albert Vanlalruata, ARO ni bawk chuan vote chhiar dan tur leh Counting Agents te mawhphurhna chi hrang hrang a zirtir a. Zawhna leh chhanna hun hman niin Master Trainer leh Settlement Officer Gaston Vanlalhriatpuia chuan zawhna te chhangin a hrilh-fiah bawk a ni. Assembly Inthlanpui-a Vote tla te chhiarna turah hian Candidate tin te hian an aiawha Vote chhiarna hmuna awm tur, Counting Agent hi an ruat thei a, Vote tla chhiarna tur hian Dawhkan 8 zel a awm dawn avangin Candidate tin te hian Dawhkan tina awm tur hi an ruat thei a, nimin-a Training-ah hian Serchhip District chhunga Assembly Constituency pathum atangin Political party hrang hrang aiawh mi 78 an tel a ni.

PWD Serchhip Division in kawngpui KM 365.81 enkawl mekin blacktop loh KM 27.845 a awm

Image
PWD Serchhip Division-a hotute chuan an Division huamchhungah inkalpawhna kawngpui enkawllai KM 365.81-a thui an neih mek thu sawiin, heng zinga KM 337.967 te chu Blacktop tawh a ni tih an sawi a. PMSGY-III hnuaiah Khawlailung leh Hmunzawl inkar kawngpui chu Blacktop tura ruahman mek a nih thu an sawi bawk.

Counting Official 1st Randomization neih a ni

Image
Mizoram Assembly Inthlanpui a Vote tla te Serchhip District-a chhiar tura inbuatsaihna kal mekah niminpiah tlai khan Counting Official 1st Randomization neih a ni a, tarlan tawh angin Serchhip District-a Vote tla te chhiar tur hian Counting Assistant-ah mi 45, Counting Supervisor-ah mi 35 leh Micro Observer atan mi 41 ruatchhuah an ni a. Heng atang hian EVM leh Postal Ballot chhiar tura Table tina Duty tur bakah thlaveng tur za zela 20 chu thlanchhuah niin Counting Assistant-ah mi 42, Counting Supervisor-ah mi 34 leh Micro Observer-ah mi 41 thlan an ni a. Thla thar December 2-ah Second Randomization nei lehin hetah hian an Duty-na tur Constituency thlan leh tur a ni dawn a. Vote chhiar ni tur December 3, 2023 zing dar 5:00-ah 3rd Randomization nei lehin hetah hian an thutna tur Dawhkan thlanfel leh a ni dawn a ni. Serchhip District chhunga Assembly Bial pathum tana Counting Hall hran theuh siamah EVM-a Vote tla te chhiarna turin Dawhkan pariat (8) theuh dahin heng ah hian Counting As

Kohhran Hmeichhe Ni hmang

Image
Presbyterian Kohhran chuan nimin, November thla a Zirtawpni hnuhnung ber kha ‘Kohhran Hmeichhe Ni’ atan hmangin Kohhran hrang hrang ten he ni hi urhsun takin an hmang a ni.

ECI hotute la hmu thei lo

Mizoram Assembly Inthlanpui Vote chhiar hun tura ruat lawk sawn a nih theihna tura Election Commission of India dawr tura New Delhi a kal NGO Coordination Committee hruaitute chu nimin khan ECI Office-ah kal mah se  ECI hotute an hmu thei lo a, Vawiin hian ECI hotute hmuh tumin an kal leh dawn nia thudawn a ni.

MPCC in Inthlan thlirlet

Mizoram Pradesh Congress Political Affairs Committee (PAC) nimin-a thukhawm chuan Mizoram Assembly Inthlanpui neih zawh tak thlirletin Mizoram mipuite chuan India secularism humhim an duh zia an tilang chiang hle ah an ngai tih sawiin, Mizoram State chuan BJP leh an thawhpui te an duhlohzia an lantir chiang hle ah an ngai tih an sawi a. Congress leh INDIA Alliance chuan Secularism leh remna leh muanna humhim a nih zel nan BJP te chu an do zui zel dawn tih pawh sawiin, BJP te nena thawh-hona nei party te chuan Mizoram mipui te kalhin chet an la ah an ngai tih an sawi bawk.

MNF Chhung Inkhawm nei

MNF Party chuan nimin khan Aizawl-a Mizo Hnam Run-ah Chhung Inkhawm neiin he hunah hian MNF President Zoramthanga chuan ‘Nang malsawmna ni ang che’ tih chu MNF chuan thuthlunga an hman mek a nih thu a sawi a. Party dang te angin Vawiin-ah rinthu maia bial tina tling leh tlinglo tur lo sawi rawtui vak vak chuan awmzia a neih loh thu pawh sawiin, Vote a tla fel vek tawh a, engkim titheitu Pathian hnenah erawh tawngtai chuan awmzia a neih thu a sawi bawk.

BJP tel ngei ngeina sawrkar a piang dawn niin sawi

BJP Mizoram chuan nimin khan Aizawl-a an Party Office-ah Friday Political Session neiin he hun thu sawitu MLA hlui Dr. K. Beichhua chuan kum 2023 MLA Election kan neih ah BJP tel ngei ngeina Sawrkar a piang ngei dawn niin a sawi a. “Party dang chu Sawrkar chakin an tuihal a, mahni-a Sawrkar turin an in ngai theuh a, nimahsela Neutral leh Intellectual lam te erawh chuan, a mala Sawrkarna siam an awm an rin loh thu an sawi bawk a, chuvangin keini chu a mala Sawrkarna siam thei ni lo mah ila Mizorama Sawrkar thar lo piang turah erawh kan tel ngei a rinawm a ni,” a ti bawk.

Hemophila natna zirho a ni

Hemophlia Society, Aizawl Chapter leh Intas Foundation te tangkawp buatsaihin nimin Nov. 24, 2023 khan Civil Hospital Aizawl Conference Room-ah Hemophilia Patient Assistance Program hman a ni a. Hemophila hi natna vang tak niin thisen tikhaltu an tlakchham avangin ngaihven ran an ngai hle a. Tunah hian Aizawl Chapter hnuaiah Hemophilia natna nei mi 27 an awm mek a, he natna nei tan hian Aizawl Chapter hian a thlawnin Hemophilia Federation of India atangin damdawi a dawng thin a ni. Nimin-a he hun an hman hi Civil Hospital Aizawl-a Senior Medical Superintendent Dr. Zoramthanga chuan khual-lian nia hmanpuiin he natna chungchang leh hriat tur pawimawh hrang hrang zirho a ni.

Rupay Platinum Debit Card

Mizoram Cooperative Apex Bank Ltd. in mipuite hman theih tura Rupay Platinum Debit Card an siam chu nimin khan Apex Bank Chairman Lalnunsanga chuan a tlangzarh a, he Card hian hamthatna chi hrang hrang a keng tel a. Rupay Debit Card pangngai aiin nikhata ATM atanga lakchhuah theih zat a tam zawk a, POS/Online Transaction atan pawh a hman theih chin a sang zawk dawn a ni. Heng bakah hian Life & Accidental Insurance a kengtel a, India ram Airport hrang hrangah Airport Lounge Access a keng tel a, Amazon-Pay hmang tan za zela 20 thleng discount a keng tel bawk ni. He Card hmang duh tan Apex Bank Branch hrang hrangah a dil theih a ni a. Hemi rual hian Sumdawng leh mimal tan pawha hman theih turin QR code Generation a tlangzarh tel bawk a ni.

Assam Police bo thu ah Assam IGP in Ngopa a tlawh

Mizoram Assembly Inthlanpui-a Duty tura rawn kal Assam Police Constable pakhat bo ta chungchang ngaihvenin Assam Police IGP Akhilesh Kumar Singh chuan Mizoram a rawn tlawh.

Northeast Yatra for Lifestyle (LiFE) in Mizoram hawng

India hmarchhak State pariat-a November thla chhunga neih tur Northeast Yatra for Lifestyle (Life) hawnna chu nimin khan MPCB Conference Hall, Aizawl-ah neih a ni.

Inthlanpui result chak leh awmze nei zawka puanzar a nih theih dan tur sawihona neih a ni

Mizoram Assembly Inthlanpui-a Vote tla te chhiar huna Chanchinthar lakhawmtute hriat tur pawimawh hrang hrang sawihona chu nimin khan neih a ni.

Serchhip District-ah Dec. 3, 2023 zing dar 8:00 atangin Vote tla chhiar tura ruahman a ni

Image
Mizoram Legislative Assembly Inthlanpui neiha Serchhip District chhung Bial pathum a Vote tla te December 3, 2023 zing dar 8:00 atanga chhiar tura ruahmanna siam mek zel niin nimin khan Vote tla chhiar turte tan hian Training neih a ni.

NH. 54 siam meka zangnadawmna la tawh zinga In la thiat loh te karleh ah thiah sak an ni dawn

Image
National Highway-54 laihzauh leh siamthat hna Serchhip District-a thawh mekah zangnadawmna la tawh zinga mahni In leh lo la thiat lo te chu karleh kartir lam atang khian an In leh lo te thiah sak tum an ni a. Hetianga In leh lo la thiat lo te hi IPC Section 188 hmangin thubuai siamsak an ni bawk ang.

ABC Inkhawmpui nei dawn

Image
Baptist Church of Mizoram (BCM) Rorelna sang ber dawttu, Area Baptist Council (ABC) Inkhawmpui chu tun Pathianni lo awm tur hmangn hian neih a ni dawn a, Serchhip Area Baptist Council Inkhawmpui vawi 27-na chu BCM Biak In New Serchhip-ah zanin atang hian neih a ni ang. Serchhip ABC Inkhawmpui-ah hian ‘Tho la, I Pathian ko rawh’ (Jona 1:6) chu thupui ah hman a ni dawn a, zanin hian Pathian biak inkhawm neiin naktuk-ah BCM Biak In, Maranatha (IOC Veng)-ah ABC Rorel neih a ni ang.

Zangnadawmna pechhuak mek

Image
National Highway-54 laihzauh leh siamthat hna thawh meka Serchhip District chhunga ram lak sak, zangnadawmna la pek loh te chu pek tan mek an ni a, tarlan tawh angin NH. 54 in Serchhip a helna turah hian zangnadawmna la pek fel loh mi 19 leh Chhiahtlang a helna turah mi pakhat awmin heng mi te tan hian tun thla ni 3 khan cheng vbc. 162 chu hmuh a lo ni tawh a. Hei hi buaipui ngai ang ang te buaipui a nih hnuah lehkha tihfel tawh te chu Bank-ah sum pechhuak tura tih ni tawhin chawlhkar khat chhunga pe hman tura beisei a ni a. Heng bakah hian by-pass road ni lo hmundang a zangnadawmna la pek loh mi 70 te tan pawh tun thla tir lam khan cheng vbc. 4.4 hmuh ni tawhin heng te pawh hi lehkha tifel tawh te chu Vawiin hian Bank lamah thehluh fel vek hman tura beisei a ni bawk.

MPSC in Interview tura tling te hming tarchhuak

Image
Mizoram Public Service Commission (MPSC) chuan Mizoram Civil Services (Combined Competitive) Main Examination, 2023 chu nimin khan tichhuakin thla thar December 8 atanga 15 chhungin Personal Interview neih a ni ang.

Tuitla ruang hmuh a ni

Nizan hmasa khan Lawngtlai leh Siaha inkar Tuipui ferry-ah mi 5 chuanna lawng chesualin an zinga mi pakhat chu tui-ah a tlahlum a, nimin khan a ruang hmuh a ni. Thudawn danin nizan hmasa khan Chhimtuipui lui kam, Tuipui Ferry-a cheng mi 5 te chuanna Lawng hi Lei hlui ban a sut avanga chesualin Lawng-a chuang hnamdang mi pathum leh Mizo pahnih te chu tui-ah an tla a, Mizo leh hnamdang pahnih ve ve te hi him taka chhanchhuah an nih laiin hnamdang pakhat, Nayaj Uddin (22) chu chhan hman a ni lo a, nimin chawhnu lam khan  an chetsualna bulah Lawng chesual hian Lei hlui banah a lo nek bet chu hmuh a ni. Thudawn danin he Lawng-a chuang hnamdang te hi unau vek niin an pa a boral avanga Karimganj lama haw tum nia sawn an ni.

A thlawnin hriselna endik sak

Hnahthial-a Health Department thawktute chuan tunlai hian Hnahthial hmun lun laiah thuin kum 30 chin chunglam te hriselna dinhmun a thlawna endik sakna, Non-Communicable Diseases (NCD) checking an nei thin a. Thawktue hian khawlai a kalte chu a remchan angin an thisen a san leh san loh, Zunthlum an neih leh neih loh bakah Ka chhung leh Hnute Cancer an neih leh neih loh te an endik sak thin a ni.

Sub-Hqrs. YMA kum 50-na lawm

Lunglei Sub-Hqrs. YMA chuan nimin khan an kum 50 tlinna, Golden Jubilee lawmna hun Lunglei Convention Centre-ah hmangin Central YMA Vice President Prof. Lalnuntluanga chuan khuallian niin a hmanpui a, YMA-ah mitin, Kohhran, pawl zawng zawng leh Party zawng zawng an leng vek tih sawiin, huap zo pawl a nihna chhawmnun a ni zel em tih ngaihtuah turin YMA hruaitu kalkhawmte chu a chah bawk.

Sanction order hlan fel

New Delhi-a cham mek Sports Minister Robert Romawia Royte hnenah Aizawl Multipurpose Hall sakna tur cheng nuai 450 sanction order chu niminpiah khan Ministry of Youth Affairs & Sports hotuten an hlan a, he Hall hi Volleyball leh sports discipline dangte pawh khelh theihna tura ruahman niin, Durtlang North khawtlang in MSSC kuta ram an pekah sak tum a ni. Sports Minister Robert Romawia Royte chuan Indoor Hall indaihlohna avangin State Level Competition duh anga neih theih a ni lo fo tih sawiin, an lo ruahman anga Hall thar thalaite tana sanction a ni leh ta chu a lawmawm a tih thu a sawi a, he Hall hi Khelo India Scheme atanga funding dawn a nih thu a sawi bawk. Dan dinglai angin he project atang hian Mizoram Sawrkarin GST leh Labour cess cheng nuai 40 chuang a chang dawn a ni.

Nurse zir ten thutiam an la

School of Nursing Thingdawl (SONT), Ko-lasib chuan nimin khan an School Auditorium-ah General Nursing & Midwifery (GNM) 7th Batch zirlaite lukhum khumtirna leh khawnvar chhi-a thutiam lakna hun (Capping and Lamp Lighting Ceremony) hmangin SONT 4th Batch zirchhuak te Certificate hlanna hun (Graduation Ceremony) an buatsaih a. He hun hi Mizoram Sawrkara Health & Family Welfare Department Principal Director, Directorate of Nursing Director ni bawk Dr. Vanlalsawma chuan hmanpuiin Damlo enkawltu te'n damlote tana an tih theih sang ber chu tawngka leh chetziaa hmangaihna lantir a nih thu a sawi.

TB dona kawnga hmalak dan sawihona hun hmang

Ministry of Health & Family Welfare, Central TB Division atanga Joint Supportive Supervisory Mission lokal te leh Mizoram State-a TB lam buaipuitute chuan nimin khan Aizawl-a DHS Conference Hall (Old building)-ah inkawmna an nei.

Mizoram-ah Sangha Dil Sqkm 55.7-a zau a awm

Mizoram-ah Sangha Dil 16,587 a awm mek a, Sangha Dil zawng zawng belhkhawm zau zawng hi Hectare 5527.08 a ni a, hei hi Sqkm 55.27-a zau ang a ni.

MADC Thlasik thutkhawm ni khat awh neih a ni

Mara Autonomous District Council (MADC) Thlasik thutkhawm nikhat awh chu nimin khan MADC Session Hall, Siaha-ah tluang taka neih a ni.

MSSA Conference Chief Secretary in a hmanpui

Mizoram Secretariat Service Association (MSSA) General Conference vawi 18-na chu nimin khan Tourist Lodge, Chaltlang-ah neih a ni a, Chief Secretary Dr. Renu Sharma IAS chuan khuallian niin a hmanpui a ni.

CEO hovin Vote chhiar tura inbuatsaihna thlirho a ni

Mizoram Chief Electoral Officer (CEO) Madhup Vyas IAS chuan Mizoram Assembly Inthlanpui-a Vote tla te chhiar tura inbuatsaihna kal mekah nimin khan Mizoram chhung District 11-a District Election Officer (DEO) te chu inpuahchahna an kalpui tawh dan leh hmachhawp an neih te Video Conference kaltlangin a sawipui.

Police in Airport-a thawk chawimawina hlan

Lengpui Airport-a Indigo Airlines-a Executive Security hna thawk hmeichhe pakhat chu Crystal Meth tam tham tak manna ah leh .22 silaimu man chhuah kawnga a thawh hlawk avangin Mizoram Police te chuan chawimawina an hlan.

Serchhip District-a NH. 54 laihzauh hna kal mek Bawrhsap in a hmunah kalin a enfiah

Image
Serchhip District Bawrhsap leh NH. 54 laihzauh leh siamthat hna thawh mekah Competent Authority for Land Acquisition (CALA) David Lalthantluanga chuan nimin khan NHIDCL te hmalak dan enfiahin, zangnadawmna dawng tawh zingah In leh lo la thiat lo te chu an thiah loh chhan te a hmunah tlawhin a endik bawk.

PWD Serchhip Division in sawrkar kum kal mekah cheng nuai 54 sengin hna paruk an thawk tawh

Image
PWD Serchhip Division chuan sawrkar kum kal mek 2023-2024 ah Maintenance Action Plan atanga cheng nuai 54 an hmuh hmangin hmun hrang hrang 6-ah kawngpui siamthat hna an thawk tawh.

Registration tih theih

India Skills Competition 2023 leh World Skill Competition 2024 a tel duh te tan registration tih theih a nih thu sawrkar thuchhuah chuan tarlangin, Skill India Digital platform kaltlanga in register tur a ni a. www.skillindiadigital.gov kaltlangin emaw, LESDE Office, Skill Wing, Earth day road, MINECO, Aizawl-ah emaw registration hi tih theih a ni. Hemi chungchanga zawhna nei te tan phone number 9856735845/9612883303-ah te biak pawh theih niin Registration hi November ni 30, 2023 thleng hawn a ni.

Thenzawl khua in Handloom Exhibition an buatsaih

Serchhip District-a awm Thenzawl East Handloom Society chuan tunkar Thawhtanni atang khan Khawzawl Vengthar-a MUP Run-ah Handloom Exhibition buatsaihin nimin khan zawhfel a ni a, he Handloom Exhibition-ah hian Mizo puan leh thuam chi hrang hrang a duh apiangte lei theih tura phochhuah niin Thenzawl East Handloom Society Member te hian cheng nuai thum man vel an hralhchhuak niin an sawi a ni. Thenzawl East Handloom Society-ah hian Member 20 vel awm mekin khaw hrang hrangah an puantah te zuarin an kal chhuak thin a, Khawzawl-a Handloom Exhibition an neih hma hian Champhai-ah pawh an lo nei tawh a ni.

Vote chhiar training dawn

Assembly Inthlanpui-a Serchhip District chhung Assembly Bial pathum-a Vote tla te chhiar tura inbuatsaihna kal mekah Vawiin hian Vote chhiar tura ruat te tan Brilliant HSS-ah Training buatsaih a ni dawn a, Tarlan tawh angin Serchhip District chhunga Assembly Bial pathum tan hian Counting Hall hran theuh siamin Counting Hall tinah hian Dawhkan 8 zel dah a ni dawn a, Dawh-kan tinah hian Counting Supervisor leh Counting Assistant te bakah Vote chhiar enpui tura ruat, Micro Observer pakhat theuh an awm dawn a. Naktuk-ah 1st Randomization neiin thlaveng tur thlanchhuah leh an ni dawn a ni.

Thil thawn enfiah thin dawn

Nimin khan Khawzawl-ah District Bawrhsap K. Lalrohlua hovin dan phal loha ruihhlo leh thil dang tawlh tihtawp a nih theih nan Sumo (Maxi cab) Counter-a CCTV vuah chungchang leh thil thawn dan chungchang chu Maxi Cab neitute leh Counter neitute nen sawiho a ni a. Maxi Cab Counter te chu November ni 27, 2023 (Thawh-tanni) atangin thil thawntu leh dawngtu tur te nihna bakah thawnna motor neitu leh khalhtute nihna kimchang tak chu format duan sa hmanga chhinchhiah turin tih an ni a. Sumo/Maxi Cab-a thil thawn tur reng rengin Counter kaltlangin thawn vek tawh tur niin Khawzawl Tuisenphai-ah thil thawn te hi a khat tawkin Police ten Sumo Counter te chhinchhiah nen a inmil em tih cross-checking an nei thin dawn bawk a ni.

Leimin ah mi 2 boral

Nimin Nov. 22, 2023 chawhma dar 10:00 vel khan Bairabi leh Sairang inkar Rel kawng siam mek-a Kawnpui Rel Station tur bulah lei a min a, hnathawktu pahnihin nunna an chan a ni. Thudawn danin Kawnpui Rel Station tur bula hnathawh mekah hian khawl (Hitachi) hmanga hnathawh niin laih rem ngai deuh te chu mihring tha hmanga laih a ni a, hetihlai hian lei hi min thutin Railways Ministry hnuaia RL Construction Pvt. Ltd. hnathawk mi pahnih Dipak Datta (27) leh Durga Prasad Passi (53), Machak, VTC Mosaka, Nagoan District, Assam-te chhilhin, an nunna an chan phah a ni. Vanduaina thlenga boral mi pahnih te ruang hi Kawnpui Damdawi In-ah postmortem niin an khaw lamah an ruang hi lak a ni.

Vote chhiar zirhona nei

Mizoram Assembly Inthlanpui neih meka Kolasib District chhung Assembly Bial pathum a Vote tla te chhiartu tura ruat, Counting Supervisor leh Counting Assistant te bakah Vote chhiar enpui tura ruat, Micro Observer-te tan nimin khan Training buatsaih a ni a, Bial tin tan Counting Hall pakhat theuh siamin Dawhkan 10 zel dah tura ruahmanna siam a ni.

Ruihhlo dona tur sawiho

Nimin khan Aizawl-ah District Bawrhsap Nazuk Kumar IAS hovin ruihhlo do chungchang a hmalakna chi khat, Nasha Mukt Bharat Abhiyaan, Aizawl District hnuaia Sub-Committee on Drug Prevention in Schools and Colleges chu an thu-khawm a, an hmalakna leh hmachhawp te thlirin ruahmanna sawiho zingah College zirlaite atangin Master Volunteer te ruata, training pek an nih hnuah an rualpui thalai/zirlaite zingah ruihhlo thatloh zia leh a invenna te an zirtir dan tur te sawiho a ni a. College hrang hrangah hian zirtirtute kaihhruaina hnuaiah Anti-Drug Club te din tha an ti bawk. Kum kalta lamah Nasha Mukt Bharat Abhiyaan hmalakna in Master Volunteer te kaltlangin zirlaite zingah ruihhlo chungchang zirtirna hi pek a lo ni tawh bawk a ni.

DoNER Secretary-ah thlen

Mizoram Rajya Sabha MP K. Vanlalvena leh Human Resources Development Board Vice Chairman Dr. L.Thangmawia MLA te chuan niminpiah tlai khan Union Secretary of DoNER Chanchal Kumar chu New Delhi-a a Office-ah kawmin Mizoram mamawh thenkhat an thlen a. Central sawrkarin sum sanction order a tih-chhuah tawh si, a taka pawisa pek kan la nih si loh Aizawl by-pass road, PM Devine Scheme harsatna tawh te leh Tuichangral kawngpui thenkhat laihna tur NESID Scheme harsatna thenkhat te bakah Lengteng bial chhung thil pawimawh thenkhat te an thlen a. DONER Secretary Chanchal Kumar chuan a rang thei ang bera bawhzui sak a tum thu a lo hrilh a ni.

Delhi-a NHIDCL Office tlawh

Lengteng Bialtu MLA Dr. L. Thangmawia chuan nimin khan New Delhi-a NHIDCL Hqrs. Office tlawhin Mizoram lam bialtu NHIDCL-a General Manager (Technical) M. Khalid chuan a lo dawngsawng a, Dr. L. Thangmawia hian a bial kaihhnawiha NHIDCL hmalakna te sawipuiin a zawtfiah bawk.

I rin aiin MPF a hlu a nia aw!

I rin aiin MPF a hlu a nia aw! - Vanlalrema Vantawl Mission Veng

Serchhip Branch Young Mizo Association-in YMA Golden Jubilee a hman dan tlangpui

Image
Serchhip Branch Young Mizo Association-in YMA Golden Jubilee a hman dan tlangpui - F. Lalawikunga, Secretary

Serchhip mi siam Tung her khawl Saitual-ah hawn a ni

Image
Nimin khan Saitual-ah Tung kawr khehna khawl bun thar chu hawn niin he khawl hi Ruala & Sons, Serchhip te siam a ni.

Mizoram-a Heroin man hnem ber kum thleng mekin kum 2 kalta chhunga man aiin kumin ah man tam tawh

Image
Mizoram-ah Heroin a hluar zel niin a lang a, kumin hi kum khat chhunga Mizoram-a Heroin man tam ber kum ni mekin kum 2021 leh kum 2022 chhunga Heroin man zawng zawng aiin kumin chhunga Heroin man hi a tam tawh zawk a. Mizoram-a man tam tham erawh State pawn lam a mi tur a ni tlangpui thung nia hriat a ni.

Inthlanpui puan hnuah dan phalloh thil man tam tawh