Latest News

Thuampui-a Vanduaina thlen dan chhuichian a ni dawn

Zirtawpni zan khan Aizawl Thuampui Veng-ah lungrem chim in In pakhat hnawlin mi 4 in nunna an chan a, he chhiatna thlen dan chhui chiang tur hian Inquiry Committee din a nih tur thu DM&R Minister, Lalchamliana chuan a sawi.

Zirtawpni zan dar 9:30 vel khan Aizawl Thuampui Veng-a lungrem pakhat chu chimin hei hian Lalbiakzuala te In luahlai, Assam Type chu a hnawl a, he In-ah hian mi 7 khawsa in In a awm mi 6 te chu a chimpui a, an zinga mi 4- Lalthlamuani (16), Joseph Lalrinhlua (5), Daniel Lalngaihsaka (3) leh Laltanpuii (16) te boralin Laltanpuii ruang hi zankhua a zawn a nih hnuah Inrinni zing khan hmuh a ni a, Inrinni vek khan Postmortem an nih hnuah vuiliam an ni. He In hi a chhawng niin a hnuai hi hnamdang in an luah a, anni erawh an him thung a ni.

Vanduaina thlenna hmun hi Chief Minister, Zoramthanga chuan Inrinni khan tlawhin chhanchhuahna hna thawktute inpekna chu fakawm a tih thu a sawi a. He vanduaina thlenga nunna chan te hnenah ralna sum a hlan nghal bawk.

Disaster Management & Rehabilitation changtu Minister, Lalchamliana pawhin vanduaina thlenna hmun hi tlawhin chhiattawhna lo thleng chuan a barakhaih thu leh nunna hlu tak 4 lai mai chân an awm chu pawi a tih thu leh a tawrhpui thu a sawi a. Khuarel chhiatna ni lo, fimkhur tawkloh leh inthlahdahna avanga chhiatna thleng a awm thin chu thil pawi tak a nih thu sawiin, he chhiat tawhna thlen chhan chhuichiang turin Deputy Commissioner, Aizawl chu a hriattir nghal bakah SDRF Scheme atangin chhiat tawk te tanpuina chu Sawrkar-in Dan a neih mek angin hmalakpui a nih tur thu a sawi a. Chhiat tawk chhungte ral nan Rs. 10,000/- leh Thuampui Local Council te hnenah hnatlang thingpui lumna turin Rs. 5,000/- a pe bawk.

Comments

Chhiar Hlawhte